¹ Gononga ekũawe, David ray amnon, prawo tamardji, idja rõ dare kber tugi. Tamar rõ Absalon pawe kudjã, go Absalon rõ David ray emi. ² Amnon chã premo djiwa Tamardji achy buchã nonga. Tamar kbe'e pokollãndy, go buare amnonpe djueiwerã kura idjape pokowã. ³ Go Amnon rekowe bygatutygi bykuapyre Jonadab, Kbe'e tõ gatueche kura go David pawe tywypurãgi Sama ty'y. ⁴ Go kbe'e ina idjape; ymachidjagi tey'y, bue ware dje kreymba wywy eche gei parã? dje kiullãwerã ko chope? Amnon inama idjape: cho prawo prowo tamarpe, cho pawe Absalon pawe kudjã. ⁵ Jonaldab ina idjape: djenogami dje ikẽ endatype achy buãga mondo. go dje apã ekõmbu; ina idjape: cho puka djepe buewã cho pawe kudjã tamarpe bakupyre eruwãcho uwã, djono gami cho chã ruwa cho uwã, go cho wechãmba cho uwerã idja djawẽ. ⁶ Gobu Amnon djeno ĩ achy buã. go ymachidja wachugi ekõmbu dja ẽndape. Ina dja apãpe; cho puka djepe buewã cho pawe kudjãTamar cho ẽndape, cho chã ruwa djapowã mirõ ipa. cho uwã idja djawẽ ⁷ Gobu David buema Tamarape dja tapype ina idjape; O gami kowebu dje pawe Amnon tapype, baku gami ipa dja uwã. ⁸ Gombu tamar oma dja pawe Amnon tapype, baku gami ipa dja uwã. Gombu Tamar oma dja pawe Amnon tapype, dja djeno ĩ dja ĩke ẽndatype; idja eruma trigo kui dja ipope idja papywã, go dja chã ruwa djapo ipa emi bakuma ⁹ Gombu mima kara chepe dja chã ruwa; idja rõudjuellã. Gombu Amnon ina; Nuẽmba ga mondoAche wywy kowe puagi! Go Ache wywy opama dja tapy puare ¹⁰ Gombu Amnon ina tamarpe: Eru gami bakupyre go tapy djawã ikẽndype cho uwa dje ipo puare. Go tamar rama ipa dja djapowe dja pawe Amnon ikẽ ẽndaptype. ¹¹ Go tamar mima dja chã ruwa dja bue uwã, Amnon kãwãma idjape, inama;Edjo chopawe kuadjã djenowã chodji. ¹² Gombu kudjã ina idjape; Gonongallã, cho pawe, cho chã teychellãwã; gononga djapollãndy Israel tapy tãrãpe. djapoeme kowe bue buchãeche! ¹³ Maty rõ cho owerã cho chã teychedjiwa, dje emi chã teyche werã Israel tapy tãrãpe, dje ẽkõwerã kbe'e djembi buchã nonga. Cho pukadjepe djawu gami ymachidja wachugipe, idja mewerã chope dje llaporã ¹⁴ Amnon wẽndudjuellã idjape, go chidjawe buare idjadji, birima idjape. ¹⁵ Gombu Amnon prawo djuellãma idjape, byllãbuchãma idjadjji emi wechã djuellãma kowebu byllã wachuwe go prawo gatu dja rekowegidji. Go Amnon ina idjape: puã, amatykua ¹⁶ Go kudjã ina idjape: Gonongallã, cho pawe; dje chope buemba kowembu bue buchãechewe, chope dje biriware. Amnon wẽndu djuellã idjape ¹⁷ Gombu pukama etakrã dja buetygi emi ina idjape bue mondo kowe kudjã! dja obu tapy djãwã peche gatu gami! ¹⁸ Go Tamar pypyma etakrã tyrupuku ño'agatagi' go tyru pypy ymachidjagi tey kudjã udja nondje. Gombu Amnon buetygi wywy nuema mondo kuedjàpe emi peche gatuma go tapy chãwã dja kuerewepe. ¹⁹ Gombu Tamar kawãma krẽmbo kawoma dja tõ llambu gombu puka chidjape roma' o. ²⁰ Gombu dja pawe keypurã Absalon prãnduma idjape: dje eche pokoma ko dje pawe Amnon? chingaeme cho pawe kudjã; idja rõ emi dje pawe; chinga tãrãeme kowedji. Gononga tamaĩ ĩma Absalon tapype okryrallã buchãpemaĩ ²¹ Ymachidja wachu David kuambu kowe buedjiwa prãdjã buchã rõma. ²² Absalon ĩnallã Amnonpe bue buchã emi bue gatu; Absalon byllãmba djepe Amnondji, biri buare dja pawe kudjã Tamarpe. ²³ Wachumba mirõ ruy'y, Absalon muchãma dja wachupurã wywy Baa;. hazorpe, ĩngi Efrain ywype; go pukawa bua bakupyre Wachupe tapytãrã pua ymachidja tey wywype. ²⁴ Go buare Absalon oma ymachidja wachugi endape inama: kowembu dje buetygi wywymuchãm ami wachupurã wywy; cho pukama ymachidjagi ekõwa cho endape dja buetygi wywydji ²⁵ Gombu ymachidja wachugi inama Absalonpe: Gonongallã, cho ray, ore opallãwerã,djepe puy wachullãwã. radjueche idjape David odjuellã, djawa gatuma idjape dja ombu. ²⁶ Gombu Adsalom ina: Dje ollãmbu, cho puka djepe owa chodji cho pawe Amnon. Gombu David ina wyche idjape: Buerã owerã djedji? ²⁷ Absalom puka omatã buare idjape, David wedja owã idjadji amnon emi duwe ymachidja wachu ray wywy. ²⁸ Gombu Absalon inama dja buetygi wywype, cho puka pendjepe mewã tãrã chipopurã lla ty'y Amnonpe, go cho inamba; pycho mondo Ammompe, gombu bro mondo, krymballãeme, cho rõ enare pendjepe. chidja mondo, krymballãeme ²⁹ Gombu Absalon buetygi wywy djapoma Amnondji inambyre nonga idja wywype. Gombu ymachidja wachugi wywy puã rõma djo dja bepurã djacha wywy lla,bu kadjama Absalon enda puare. ³⁰ Go wywy imbu wyche ape rupi, wẽma David endape diawu wywy inama: absalon bropamadjono ymachidjagi tey'y wywype, illãma dawe wywy ³¹ Gombu David puãba doremadja tyra emi wama ywype, emi dja buetygi wywy ingi idjadji doroma emi dja tyru wywy ³² Gombu Jonaldab, sima tey dawid tuty, ina Davidpe: Inaeme cho rekoatygi bropapyre ymahidjagi tey wywy, amnon etakrãpe rõ bropyre; gogi absalon rõ inawe ẽkowerã, Amnon biri krey djiwe dja pawe kudjã tamarpe. ³³ Go buare wẽndueme djawa wywy: ymachidjagi tay wywy bropapyre, Amnon etakrãechepe rõ bropyre. ³⁴ Absalon kandjãma.Go wechãndygi kuwendygi tapytãrãdji, wẽchã gatu wechãma tãrã tapytãrãpua ekõma kuãmbuku rekoaty. ³⁵ Gombu Jonadab ina Davidpe: Wechã gope ẽkõma ymachidjagi tey wywy, dje buetygi inawe nonga djepe ³⁶ Gombu djawupambu, ekõmbama ymachidjagi ray wywy, chinga romago wywy. Go tapytãrã ymachidjagi emidja buetygi wywy chĩnga parã wachu roma reko edjy wywy ³⁷ Gombu Adsalon kandjãma oma talmai endape, Amiud tey, Gesur tapytãrã ymachidjagi endape. Go David chinga ẽkõ dja raydji kreybu wywy ³⁸ Gononga Absalon kãndjãma ẽkõwa Gesurpe, gope ĩma brewipychã ruy'y. ³⁹ Gombu ymachidjagi prãndjã buchã roma Absalongi krampima; okryra gatuma Amnon mano waredjiwa