¹ Saul manombu, Dawid wẽmambu siclape chidja ẽkombu Amalec pua gobu pytamã miro krey ² kowe krey'y mbrewipychãpe wẽmambu kbe'e Saul toãllagi noambyre puare tyru ochowegi to'õ krembo ywype kmarãma emi chã wycho roma ³ Go Dawi pranduma idjape: mawe rekuaty dje ekõ? idja inama: Cho kandjãma Israel tãrã noãndy puare ⁴ Go Dawid inama idjape: Buerõ wẽma kiupa gami chope, gogi inama: Israel irondy kajãmbama mondo tõmumbu buare tarã Israel pua manoma, Saul go te'y Jonatan emi. ⁵ Go Dawid pranduma kbuchuwepe manonga dje Kua Saul go te'y Jonatan mano buare? ⁶ Go kbuchuwe djawuma: Cho ekõ tarãllãndy Gilboa kuãmbukupe, go wechãma, Saulpe kãwãmbyre go dja djãpẽ, emi go tarã mbepurã tõ mumbuatygi idja pyche rekuaty ekõ roma bu. ⁷ Go wechãma pyche rekuaty go pukama, go cho ina: Kowepe cho ĩ. ⁸ Go pranduma chope: Awa rõ dje, gobu cho inama: Cho rõ Amalec puagi, ⁹ Go kiuma chope: bro'o gami dje chope cho okryrallãma cho mano ru wyma. ¹⁰ Gobu cho broma idjape kuabu idja ekollãwerãbechema; gobuma pychyma tõdjiwa ãwã ïngi dja tõdji, emi djywa beta go ïngi dja djywadji, go cho eruma kowebu cho rekuatygipe. ¹¹ Gobu Dawid wiroma idja tyru, go nonga djapo emi go kbe'e idjadji ingi wywy. ¹² Chĩnga tarãma wywy go ullãma bue'e wywy chãwã wychobu manowedjiwa Saul emi dja tey Jonatan, emi Apã Wachu tapy tarã puatygi, go Israel tapy pua qwywype pe'ẽ akua imbipe. ¹³ Go dawid djavuma kbuchuwepe: matywa rõ dje. Go idja djawu: Cho rõ duwe chupa puatygi etakrã Amalec puagi. ¹⁴ Buerã dje krymbaeche dje ipo upiwã browã Apã Wachu prawowegipe. ¹⁵ Gobu Dawid puka etakrã kbe'e idjadjiwatygipe djawuwã idjape: O ga mondo bro'owã idjape. Gobu kbe'e pycho idjape manowã ¹⁶ Go David djawuma: dje pirã ĩwã dje tõ llabu. Dje djuru rupi dje djawuma: cho broma Apã Wachu prawowegipe. ¹⁷ Go Dawid chingajeky Saul idja tey'y Jonatan manowedjiva, goware pre'ema idja chingabu go pre'e manowedjiwa ¹⁸ Go djawu kowe kiuwerã Juda irõndy mbychepe ; go parawerã djã gatugi kuachia parapyrepe ¹⁹ Israel chapi mbuwema go kmabuku llabu. Mawenonga wa'a go chijaechegi ²⁰ Go kiueme Gatpe, go kiueme kowe bue'e Ascalon ape rupi, djapollãwã Filistea pua tey kudjã urygatueche gobu judiollãgi tey kudjã urygatupe djudjallãwã. ²¹ Gilboa kuãmbuku llabu kowebu waeme chapy emi mbaky, go pendje ywype tarã mbatyeme bue ã'ã; gope djawã buchãngi krymbaechegi eche nonga emi Saul eche nonga piy nongallã roma mondo bue tapiagi ²² Jonatan wachĩ panellãgi, djywõma pychãdji gorãwe idja byllãndy krymbaechegipe go Saul pẽ'ẽ puku gorãwe idja byllãndygi pychoma ²³ Saul emi Jonatan, go rõ prawopyty emi reko gatupyty, edji gorãwẽ ĩndy emi edji wedjallãndy manopewe, gogi rõ wewe paillãwe torã wachudji emi chidjaichewe djukudji. ²⁴ Israel radjy wywy, chinga ga mando Sauldji; go pypypa endawe pendjepe tyru pirãgatugidji go pẽndje tyrupe djonoma ita biribuchãgi ²⁵ Krymbaechegi wa nongagi tõmumbupe, go nonga Jonatan wama emi monoma kmabukupe ²⁶ Cho djãwã chinga ruwy, djedji, cho pawe Jonatan, cho prawo gatugi. Praru gatu begatuve chope go kudjã wywy prawodji ²⁷ Tu,u, tu,u, vama o go chijaichegi, kandjãmbama o dja tõmumbu bue wywy