16

¹ Ette Yesu hidofe hijo do hejufak illohonyie, “Owuon ifa lobo hasamani ho tihoni lolotoŋita hirro innohonyie, etisiahak ifa huwo hijo etihara hatoŋitani ibariti innohonyie. ² Niya ette hasamani helilloŋu inyeja eijo do honyie, 'dohonyie nyo ne etira naŋ hirro innohoi? Isiara naŋ ituhutita innohoi, ibe iye inyiak hira hatoŋitani.'

³ Ette hatoŋitani lie to wan honyie hijo, ‘Egiem iso naŋ nyo, iyane adumu ettok lalaŋ igem adde tere hanaŋ? Abe naŋ awuon ho golo haromori, eloriri naŋ himimojo. ⁴ Ayien naŋ nyo lahu naŋ hihum anyar honyie huwo lelilloŋu naŋ ahaŋitek hose letiwet naŋ te igem.‘

⁵ Ette hatunani lie elilloŋu huwo illo horosi , niya ette hatunani lie elilloŋu huwo illo horosi illo eittok honyie, ette inyeja hifia lafa lara hitieri hijo, ‘Awak eittok hanaŋ dohoi jai?‘ ⁶ Eijo lie ‘Karajaha inno hiyali hisihe naboite.‘ Ette inyie hijo do honyie, ‘Todumu waraga nohoi tohunye da fau kokuak igiorok tomona miet.‘ ⁷ Ette hatunani hijo do lobo, ‘Ara innohoi jai?’ Eijo lie, ‘hisihai nobotie inno geme,‘ Eijo inyeja hijo, ‘Todumu waraga nohoi, igiorok tomona hotohunik.‘

⁸ Ette eittok lafa lie honyie mune hatunani lafa lorru nyo egiem inyeja na lanyar, nyo egiama lenyirok ha fau inna no lorru nalagalik binno to huwo innohose agalik durre illo calai. ⁹ Ajo naŋ da hatai, imotiai to kwaite innahatai to ibariti inno fau, nyo lesaha innohoi anyar honyie elilloŋu iye amai nolobe eremik hisoha.

¹⁰ Lie leleniefita hirro hullo loduhucio odule iso hiniefita inno loluŋa, ojo lolobe eniefita hullo loduhucio, obe iso hidofe inyeja eniefita inno loluŋa. ¹¹ Atti lobe iye ifa eniefita ibariti inno fau nalanyar, ŋai iso eiso dohoi ibariti hunna dede? ¹² Lobe ifa iye eniefita hirro inno lobo tihoni, ŋai iso eremik hiso dahatai hirro inne lara innahatai?

¹³ Obe lobo tihoni eremik higiama do leitaha lohor, kuya oremik aliwari lobotie ette mune lobotie, kuya eremik higiama do lobotie hamai ette miasa do lobotie. Ettalik iye higiama to Hollum iko ibariti.”

¹⁴ Nafa etiru Farisei hirro hamunok ha arobiya inne daŋ, ette elohitari Yesu nyo omuno isieja gurusi agalik. ¹⁵ Ette hijo dohose, “Etilibo itai kwaite innahatai do hosiere ho huwo, hati oyien Hollum tajia innahatai. Hirro inno olibo do hosiere ho huwo, orru to hosiere ho Hollum.

¹⁶ Odule ifa hifahita ho hekilak many ottuni Yoani. Many to nyia ahosiere, arrasa daŋ hitiyana sayye inno Obie no Hollum, ojo huwo tamai arrasa ciama hikoi nohose daŋ ahotuai to golon. ¹⁷ Hati ofiak iso te ido ho fau halitari adde, ette iso golon to higierita inno hifahita haguasari adde.

¹⁸ Lolopiaha ho noŋoruo honyie ette ŋayemu nabo hamai eyau inyeja hiyau no roto, ojo lie lalayama hitonoŋoru nolopiaha ho hitololewa, eyau hiyau no roto.

¹⁹ Owuon ifa lobo tihoni lelecefita boŋojin inne lara sura ojo hidofe ogol to hinyaŋa. Eŋaleta ifa inyeja holoŋitek daŋ. ²⁰ Owuon ifa hidofe lobo lolociaŋ lelemimojo lara fure nohonyie Lasaru, lolowuon kwan daŋ ho horroŋon arria ojo lofer daŋ ta mari honyie, ²¹ Awak ifa inyeja hihuhuro ŋiria nolodek da fau ho tihoni hasamani - ojo ŋohe afanu hididala horroŋon innohonyie.

²² Nafa loye lolociaŋ lie, ahafari ifa anjillohien oholio honyie aŋhati ha Abramo. Ette hidofe hasamani lie yei ette ŋanuhahini, ²³ Da mai no hima, towuana nohonyie to hitigiama, ette inyeja hihaf honyiehite ette ŋaigonyu Abramo alamarai leletole Lasaru to suhe na Abramo.

²⁴ Ette inyeja yio binno eijo dohonyie, ‘Monye Abramo, tomehini da hanaŋ, ifahu Lasaru, hawoŋ hehumak hafialai honyie do hifioŋ hetiliha ŋadief hanaŋ, nyo awuon naŋ tamai nolowulo binno.’

²⁵ Hati eijo Abramo, ‘Hito, iko ihuma higigil nafa helewuar iye, ewuon ifa iye iko hirro inno olibo, ojo Lasaru orrumu hirro inno lepal. Hati iyane, elobia inyeja ejo iye ewuon ho hitigiama. ²⁶ Obe lara inne hamai, hati owuon iwure to hiji hatai hijo hotobiaŋa luha lalaŋu telle, ejo iyohoi ebe lelaŋ adde hatai.‘

²⁷ Ette hasamani lie hijo, ‘Atana naŋ iye, Monye Abramo, ifahak inyeja da haji ho monye hanaŋ ²⁸ Nyo awuon naŋ ho ilasira miet - anyar lohu inyeja hisor isieja, abaŋ naŋ hijo eremik isieja ŋafanu tamai norru.’

²⁹ Hati eijo Abramo, ‘Owuon isieja ho Musa ojo hekilak; isiara isieja hetira dohose.’ ³⁰ Ette hasamani lia hitiraŋ, ‘Obe, Baba Abramo, ohu ida lobo tihoni do hose tere hayok, eremik iso isieja hilloito.’ ³¹ Hati eijo Abramo do honyie, ‘Lobe isieja etira do Musa iko hekilak, obe iso isieja eremik huruk hiram no huwo ille lebuhu to yei.’”