14

¹ Ottu ifa hiram inna da nabo holong no Sabato. Eno Yesu ahaji lobo lettok lo Farisei adahari imune, ette isieja hihum ehutok ette riŋa do honye toktok. ² Ette lobo tihoni lolonguai hawon do Yesu. ³ Ette Yesu hifia hetiyanak ille hifahita illo Yudeya iko Farisei hijo, "Anyar enahu hifahita hitinyara to Sabato, Kuya obe?"

⁴ Hati oduehini ifa isieja liling. Ette Yesu arihu tihoni lie ette hitinyar inyeja, ette efahak inyeja adde. ⁵ Atati inyeja hijo do hose, “ŋai le tere hatai lelum hito nohonye kuya hiteŋ do hirri to holong no Sabato lobe awak epihu adde?” ⁶ Hati obe isieja etira hifi honye nia.

⁷ Nafa egonyu Yesu hilak illafa huwo eliloŋu ette nganyimu massik inne hitoŋita letaha elimahini inyeja isieja daŋ hitiriamita inna, ⁸ ’’Le liloŋu lobo tihoni itai do lohomo no hiyama, ibaŋa etole da harajin inno hosiere, nyo kuya owuon lobo leliloŋu inyie lalagalik iye. ⁹ Hati lawoŋ tihoni lie daŋ, ottu iso inyie to kwan nohonyie monye lohomo eliloŋu itai daŋ, hijo dohoi, 'Isiara tihoni le mai nohoi,' Niya, eno inyeja hitole da hara no fiahajok to riri.

¹⁰ Hati leliloŋu inyie iye hijo ino itolojo da mai nolofiak. Ottu iso eliloŋu iye ette hijo, "Illa, tette woŋ a hosiere.' Eyani is nia lohuo dohoi. Do hiji ho huwo daŋ lowo hoi de teremeja. ¹¹ Nyo tihoni daŋ lalahaf kwan nohonyie etinyalam iso ojo leletinyalam kwan nohonyie ahafa iso inyeja.’’

¹² Eijo Yesu hidofe tihoni lafa leliloŋu inyeja, "Isiara iye ŋiria nafar kuya na harie, baŋa leliloŋ mote hoi, hilasi hoi, kuya hilahaŋ hatai kuya lonyihari lohoi, lalabara iya do hose ofuo ŋelienyu eliloŋu inye.

¹³ Hati lehumak iye lohomo, ililoŋu lociaŋak, haŋurak, yokiojok, ojo haŋodok. ¹⁴ Ette iso iye wuana ho jaha, nyo obe isieja elienyu iye. Odumahini iso dohoi do hebuhu no halibok."

¹⁵ Nafa etiru lobo lohose tara illafa etole ho Yesu do teremeja no ŋiria. Ette hijo, “Isiara jaha do lie ladaha iso imune do lobie no Hollum!” ¹⁶ Ette Yesu hijo do honye, “Ehuhumak ifa lobo tihoni ŋiria nettok ata eliloŋu arria. ¹⁷ Nafa olibe ŋiria, efahak inyie hegiamani honye heno helimak huwo illafa eliloŋu hijo, ‘Ifanu, nyo otubai hirro iyane.’

¹⁸ Ette isieja bidaŋ ta mai hitiara hiloleita hijo, 'Enyaŋu ifa naŋ mana ajo naŋ luŋa ahu loriŋari, hibe woti, ibusak naŋ.’ ¹⁹ Ette lobotie hijo, ‘Enyaŋu iŋole naŋ hilak husuŋ haromok miet, ajo naŋ ahu hikem isieja, illa hibe woti.’ ²⁰ Ette lobo tihoni hijo, ‘heletek naŋ yama, abe naŋ luŋa aremik ŋawoŋ.’

²¹ Ette hegiamani ŋacohari ohu ŋelimak ettok lohonye hirro inne, ette ettok lahahaji le hijoria do hegiamani, ette hijo do hegiamani, ‘kokuak ino atuluba no bore na gala, yani lociaŋak, yokiajak, haŋodok iko haŋurak.’ ²² Ette hegiamani hijo, ‘Lettok, egiem naŋ daŋ innara eijo iye, hati ofitini nobo mai.’

²³ Eijo ettok do hegiamani, ‘Inno atulubaha, iko maŋatin, ililoŋu isieja hafanu ahotuai, anyar efut haji hanaŋ. ²⁴ Ajo naŋ daha hatai, obe lobo tara luha lolotu illafa eliloŋu eremik to hosiere hiniŋ ŋiria nanaŋ.'''

²⁵ Iyane, ofuo ifa iluluŋ no huwo daŋ honyi, ette inyeja yite ette hijo dohosie, ²⁶ “Lawoŋ lobo tihoni da hanaŋ ojo lobe oliwari monye honyie, hotonye, noŋoruo, durre, hilasira iko hanasira—ee, ojo manya nohonye daŋ hidoe—obe eremik hira alefahati hanaŋ. ²⁷ Lie lolobe olorita Kuruce nohonyie ette ŋawoŋ da halu hanaŋ obe eremik hira efahati hanaŋ.

²⁸ Lawak lobo lahatai, duho haji nelesaga, obe lohunyie do ta fau ette hihien hinyaŋita harriŋari hirro inno loremik hetufutak haji? ²⁹ Nyo letiarak inyeja iduhit ette enyiei lesohak, ille legonyu igem nyie elohitari inyeja, ³⁰ Ette hijo, ‘Etiara tihoni le duho na haji obe hati eremik esohak.’

³¹ Lari eittok ohu oriomori fere ho lobo eittok obe lohunyie da fau ette hihien hijo horemik iso oseŋer hisihai tomon illohonyie rem ho eittok lolotu loremori ho inyeja ho oseŋer hullo hisihai tomona arik? ³² Lobe, halarrasa hariomok luha alamarai, ette ŋefahak herarani honye tohosiere herara hirro inne himora. ³³ Iyane, lobe lobo lahatai ebusak hirro inno omuno inyeja, obe iso eremik hira ejufani hanaŋ.

³⁴ Olibo mile bino, hati lolite iduarit nohonyie, eremik iso duaran jai? ³⁵ Obe losiru hegiamari do huron kuya hidofe da tanyan inne efuro. Ebirori iso adde. Lie lolowuon ho yohe isiara hetiru, isiara inyeja hetiru.”