¹ ಪದ್ನಾಯೇಕಿ ಅಂತ ಪೆದ್ ಯಾಜಕುಲು ಜನಲ ಪೆದ್ದೋಳು ಯೇಸುನಿ ² ಸೊಂಪಿಬೀಯಾಲನಿ ಆಲೋಚ್ನುಮು ಸೇಸ್ಕೊನಿ ವಾಡ್ನಿ ಕಟ್ಟಿಚ್ಚಿ ಸೀಸ್ಕೊನ್ನ್ಪಾಯಿ ದೇಶಾಧಿಪತಿಯಾಯಿನ ಫಿಲಾತನುಡ್ಕಿ ಒಪ್ಪಿಚ್ರಿ . ³ ಅಪ್ಡು ಯೇಸುನಿ ಪಟ್ಟಿಚ್ಚಿನ ಯೂದುಡು ವಾಡ್ಕಿ ಮರಣ್ಮು ದಂಡನೆ ತೀರ್ಪಾಯೆ ಅನಿ ಸೂಸಿ ಪಶ್ಚತ್ತಾಪ್ಮು ಪಡಿ ಆ ಮುಪೈ ರುಪಾಯ್ಲುನಿ ಪೆದ್ ಯಾಜಕುಲ್ಕಿ ಪೆದ್ದೊಳ್ಕಿ ತಿರ್ಗಿ ಎತ್ಕೊಚ್ಚಿ ⁴ ತಪ್ಲೇನಿನೋಡ್ನಿ ಮರಣಂಕಿ ಒಪ್ಪಿಚ್ಚಿ ಪಾಪ್ಮು ಸೇಸ್ತಿ ಅನೆ . ದಾನ್ಕ್ವಾಳು - ಆದಿ ಮಾಕೇಮಿ ? ನುವ್ವೇ ಸೂಸ್ಕೋ ಅನ್ರಿ . ⁵ ಅಪ್ಡು ವಾಡು ಆ ದುಡ್ಲುನಿ ದೇವುಡು ಆಲಯುಮ್ಕಿ ಪಾರ್ಗುಕಿ ಪಾಯಿ ಊರ್ಲು ಏಸ್ಕೋನಿ ಸಚ್ಚೆ . ⁶ ಪೆದ್ ಯಾಜಕುಲು ಆ ದುಡ್ಲುನಿ ಸೀಸ್ಕೋನಿ ಆದಿ ಜೂಡ್ ಹತ್ಯೆಕಿ ಇಚ್ಚಿನ ಕ್ರಯುಮು ಆಯಿಂದಾನ್ನಿಂಚ ದಾನ್ನಿ ಕಾಣಿಕ್ಮು ಪೆಟ್ಟುಗ್ಲ ಎಯ್ಕುಡ್ದು ಅನ್ರಿ . ⁷ ಆಮಿಂದ ಆಲೋಚ್ನುಮು ಸೇಸಿ , ಪರದೇಶಿಲ್ನಿ ಪೂಡ್ಸೆದಾನ್ಕೊಸ್ಕರ್ಮು ದಾನಿಂಚ ಕುಂಬಾರುಡ ಸೇನು ಅನೆ ಭೂಮಿನಿ ಕೊನ್ಕೊನ್ರಿ . ⁸ ಈ ಕಾರ್ಣುಮಿಂಚ ಇಪ್ಡುಗಂಟ ಆ ಸೇನ್ಕಿ ಜೂಡ್ ಹತ್ಯೆ ಸೇನು ಅನೆ ಪೇರು ವುಂಡಾದಿ . ⁹ ಇಟ್ಟೆ ಪ್ರವಾದಿಯಾಯಿನ ಯೇರೇಮಿಯುಡು ಸೊಪ್ಪಿನ ಮಾಟ ನೆರ್ವೇರೆ , ಅದೇಮಂಟೆ ¹⁰ ವಾಳು ಆ ಮುಪೈ ರುಪಾಯ್ಲು ಸೀಸ್ಕೋನಿ ಕರ್ತುಡು ನಾಕಿ ಅಪ್ಪಣ್ಮು ಸೇಸಿನಟ್ಗೆ ದಾನ್ನಿ ಕುಂಬಾರುಡು ಸೇನ್ಕಿ ಇಚ್ರಿ . ಇದೇ ವಾಡ್ ಕ್ರಯ ಕಟ್ಟಿನ ಬೆಲ , ಇದೇ ಇಸ್ರಾಯೇಲ್ಯುಲ ಕೆಲುವ್ಲು ಕ್ರಯ್ಮು ಕಟ್ಟಿನೋಡಾ ಬೆಲ ಅನೇದಿ . ¹¹ ಯೇಸು ದೇಶಾಧಿಪತಿ ಮುಂದ್ರ ನಿಲ್ಪಡುಣ್ಣಪ್ಡು ದೇಶಾಧಿಪತಿಡು ಯೇಸುನಿ - ನುವ್ವ ಯಹೂದ್ಯುಲಾ ಅರಸುಡು ಹೌನೋ ಅನಿ ಅಡ್ಗೆ . ಯೇಸು - ನುವ್ವೇ ಸೊಪ್ನಾವು ಅನೆ . ¹² ಮಲಿ ಪೆದ್ ಯಾಜಕುಲು ಪೆದ್ದೋಳು ಯೇಸು ಮಿಂದ ದೂರು ಸೊಪ್ಪೆನಪ್ಡು ಯೇಸು ಏಮಿ ಉತ್ರುಮು ಇಯ್ಲೇದು . ¹³ ಅಪ್ಡು ಪಿಲಾತುಡು ಯೇಸುನಿ - ವೂಳು ನೀ ಮಿಂದ ಎನ್ನಿ ಸಾಕ್ಷಿ ಸೊಪ್ತಾರು , ನುವ್ವ ಅಡ್ಗೆಟ್ಲೆದಾ ? ಅನಿ ಅಡ್ಗೆ . ¹⁴ ಯೇಸು ವಾಡ್ಕಿ ಓಕ್ ಮಾಟ್ಕಾಯ್ತೆನು ಉತ್ರುಮು ಇಯ್ಲೇದು . ದಾನ್ನಿ ಸೂಸಿ ದೇಶಾಧಿಪತಿಡು ಬಹಳ್ಮು ಆಶ್ಚರ್ಯುಮು ಪಡೆ . ¹⁵ ಆಯ್ತೆ ಆ ಪಂಡುಗ್ಲ ಜನಲು ಅಪೇಕ್ಷಿಚ್ಚೆ ಸೇರೆಯೋಡ್ನಿ ವಾಳ್ಕಿ ಇಡ್ಸಿ ಇಚ್ಚೇದಿ ದೆಶಾಧಿಪತಿಡುದಿ ಪದ್ದತಿಯಾಯುಂಡೆ . ¹⁶ ಆ ಕಾಲುಮ್ಲ ಬರಬ್ಬುಡನೆ ಪ್ರಸಿಧ್ಧುಮಾಯಿನ ಒಕ್ ಸೆರೆಯೋಡು ಸಿಕ್ಕಿಪಡೆ . ¹⁷ ಇಟ್ಟುoಡೆದಾಯಿ ವಾಳು ಕೂಡೋಚ್ಚಿನ ಸಮಯುಮ್ಲ ಪಿಲಾತುಡು ಕೊಡ್ಪುರಿಯಿಂಚ ಒಪ್ಪಿಚ್ಚಿ ಇಚ್ನಾರು ಅನಿ ತಿಲ್ಸಿ ¹⁸ ಮೀಕಿ ಯೋಳ್ನಿ ಇಡ್ಸಿಯಾಲ ಅಂಟಾರು ? ಬರಬ್ಬುಡ್ನೋ ? ಕ್ರಿಸ್ತುಡನ್ಬಿಚ್ಕೊನೆ ಯೇಸುನೋ ಅನಿ ವಾಳ್ನಿ ಅಡ್ಗೆ . ¹⁹ ವಾಡು ನ್ಯಾಯಸನ್ಮುಲ ಕುಚ್ಚೋನುನ್ಡ್ನಪ್ಡು ವಾಡ್ ಪೆಂಡ್ಲಾಂ - ನುವ್ವ ಆ ಮೋಗೋಡು ಗೊಡವೇಕಿ ಪೋವೊದ್ದು , ವಾಡ್ ದೆಸೆಯಿಂಚ ಈ ಬೊದ್ದು ಕನ್ಸ್ಲ ಬಹಳ್ಮು ತೊಂದ್ರಪಡ್ತಿ ಅನಿ ವಾಡ್ ದೆಗ್ರುಕಿ ಸೊಪ್ಪಿ ಅಂಪಿಚ್ಚೆ ²⁰ ಅಕ್ಡಿಕಿ ಪೆದ್ ಯಾಜಕುಲು ಪೆದ್ದೋಳು ಬರಬ್ಬುಡ್ನಿ ಇಡ್ಸಿಯಾಲನಿ ಬೇಡ್ಕೊನೆ ಅಟ್ಟ ಯೇಸುನಿ ನಾಶ್ಮುಗೊಳ್ಬಿಚ್ಚೆ ಅಟ್ಟು ಜನಲ್ನಿ ಒಡoಡಿಚ್ರಿ. ²¹ ದಾನ್ಕಿ ದೇಶಾಧಿಪತುಡು ವಾಳ್ನಿ - ಈ ಇದ್ರುಲ್ಲಾ ಯೋಳ್ನಿ ಮೀಕಿ ಇಡ್ಸಿಯಾಲನಿ ಅಂಟಾರು ಅನಿ ಅಡ್ಗೇಕಿ - ಬರಬ್ಬುಡ್ನಿ ಅನ್ರಿ . ²² ಪಿಲಾತುಡು ವಾಳ್ನಿ - ಅಟ್ಟಾಯ್ತೆ ಕ್ರಿಸ್ತುಡನ್ಬಿಚ್ಕೊನೆ ಯೇಸುನಿ ನಾನೇಮಿ ಸೇತ್ನು ಅನಿ ಅಡ್ಗೇಕಿ ಅಂದ್ರು ವಾಡ್ನಿ ಶಿಲುಭೇಕಿ ಏಬಿಯ್ಯಿ ಅನ್ರಿ . ²³ ದಾನ್ಕ್ವಾಡು - ಎಂದ್ಗೂ ? ಶೆಡ್ದೆದೇಮಿ ಸೇಸೆ ? ಅನೆ . ಆಯ್ತೆ ವಾಳು - ವಾಡ್ನಿ ಶಿಲುಭೇಕಿ ಏಬಿಯ್ಯಿ ಅನಿ ಬಹಳ್ಮಾಯಿ ಆರ್ಭಟಿಚ್ರಿ . ²⁴ ಅಪ್ಡು ಪಿಲಾತುಡು ತನ್ ಯತ್ನುಮು ನಡ್ಸೆಟ್ಲೆದು ಗದ್ದಲ್ಮು ಮಾತ್ರುಮು ಹೆಕ್ವಾಯ್ತಾದಿ ಅನಿ ತಿಲ್ಸಿ ನೂಳು ಸೀಸ್ಕೋನಿ ಜನಲು ಮುಂದ್ರ ಸೈ ಕಡಿಕೋನಿ- ಈ ಮೊಗೋಡ್ನಿ ಸೊಂಪೆದಾನ್ಕಿ ನಾನು ಸೇರ್ನೋಡು ಕಾದು , ಮೀರೆ ಸೂಸ್ಕೊಂಡ್ರಿ ಅನಾಯಿ ಜನಲಂತ ²⁵ ವಾಡ್ನಿ ಸೊಂಪ್ಬಿಚ್ಚಿದಾನ್ಕು ಮಾಮು ಮಾ ಬಿಡ್ಳು ಉತ್ರುಮು ಇಸ್ತಾಮು ಅನ್ರಿ . ²⁶ ಅಪ್ಡು ಬರಬ್ಬುಡ್ನಿ ಇಡ್ಸಿಚ್ಚಿ ಯೇಸುನಿ ಕೊರಡೆಯಿಂಚ ಕೊಟ್ಟಿಚ್ಚಿ ಶಿಲುಭೇಕಿ ಏಬಿಚ್ಚೇಕಿ ಒಪ್ಪಿಚ್ಚೆ . ²⁷ ಆಮಿಂದ ದೇಶಾಧಿಪತಿಡು ಸಿಪಾಯಿಲು ಯೇಸುನಿ ಅರ್ಮನೆನೂನ್ಕು ತೊಡ್ಕೊಂಪಾಯಿ ²⁸ ಪಟಾಲಮುನಿಅಂತ ವಾಡ್ ಸುತ್ಲೂ ಕೂಡಿಚ್ಕೊನಿ ವಾಡ್ ಬಟ್ಳುನಿ ಸೀಸೇಸಿ ಎರ್ರ ವಲ್ಲಿನಿ ಏಸಿ ಮುಂಡ್ಳು ಬಳ್ಳಿಯಿಂಚ ಕಿರೀಟ್ಮುನಿ ²⁹ ಎನ್ಸಿ ಯೇಸು ತಲ್ಮಿಂದ ಪೆಟ್ಟಿ ಕುಡುಮ್ ಸೇತ್ಕಿ ಬೆತ್ತುಮ್ನಿ ಇಚ್ಚಿ ವಾಡ್ ಮುಂದ್ರ ಮೊಣಕಾಲೂರಿ - ಯೆಹೂದ್ಯುಲ ಅರ್ಸುಡಾ , ನೀಕಿ ನಮಸ್ಕಾರ್ಮು ಅನಿ ಯೇಸುನಿ ಪರಿಹಾಸ್ಯುಮು ಸೇಸ್ರಿ . ³⁰ ಮಲಿ ಯೇಸು ಮಿಂದ ಊಸಿ ಆ ಬೆತ್ತುಮ್ನಿ ಪೆರ್ಕೊನಿ ಯೇಸು ತಲಕೈ ಮಿಂದ ಕೊಟ್ರಿ . ³¹ ಇಟ್ಟ ಯೇಸುನಿ ಪರಿಹಾಸ್ಯುಮು ಸೇಸಿನ್ಮಿಂದ ಆ ವಲ್ಲಿನಿ ಸೀಸಿ ಯೇಸು ಬಟ್ಳುನಿ ಏಸಿ ಯೇಸುನಿ ಶಿಲುಭೇಕಿ ಏಸೆದಾನ್ಕಿ ಸೀಸ್ಕೊನಿಪಾಯ್ರಿ . ³² ಆಕ್ಟರ್ಕಿ ಪಾತವುನ್ಡ್ನಪ್ಡು ಕುರೆನೆ ಪಟ್ಣುಮಿನ ಸೀಮೊನುಡನೋಡ್ನಿ ಕನಿ ವಾಡ್ನಿ ವಾಡ್ ಶಿಲುಭೇನಿ ಮೋಸೆದಾನ್ಕಿ ಬಿಟ್ಟಿಪಡ್ರಿ . ³³ ಮಲಿ ಗೋಲ್ಗಥಾ ಅಂಟೆ ಕಪಾಲ ಸ್ಥಳ್ಮು ಅನೆ ಸ್ಥಾನಂಕಿ ವಚ್ನಪ್ಡು ಯೇಸುಕಿ ಸೇದು ಬೆರ್ಸಿನ ದ್ರಾಕ್ಷಾರಸ್ಮುನಿ ತಾಗೆದಾನ್ಕಿ ಇಚ್ರಿ , ³⁴ ಯೇಸು ದಾನ್ನಿ ರುಚಿ ಸೂಸಿ ತಾಗೆಕಾವ್ಕುನ್ನಾ ವುಂಡೆ . ³⁵ ಆಮಿಂದ ವಾಳು ಯೇಸುನಿ ಶಿಲುಭೇಕಿ ಏಸಿ ಯೇಸು ಬಟ್ಳುಕಾಯಿ ಚೀಟು ಏಸಿ ಪಾಲು ಸೇಸ್ಕೊನ್ರಿ , ³⁶ ಮಲಿ ಆನ ಕುಚ್ಚೋನಿ ಯೇಸುನಿ ಕಾಸ್ತಾ ವುಂಡ್ರಿ . ³⁷ ಇದ್ಕಾಕುನ್ನ ಯೇಸು ಮಿಂದ ಮೋಪಿನ ಅಪ್ರಾದ್ಮುನಿ ರಾಸಿ ಯೇಸು ತಲಕೈ ಮಿಂದ ಹಚ್ರಿ , ಅದೇಮಂಟೆ - ವೂಡು ಯೇಸು , ಯೆಹೂದ್ಯುಲಾ ಅರಸುಡು ಅನೇದೆ . ³⁸ ಅಪ್ಡು ಇದ್ರೂ ದೊಂಗುಲ್ನಿ ಎತ್ಕೊಚ್ಚಿ ಒಕ್ಕುಡ್ನಿ ಕುಡುಮ್ ತೊಟ್ಟು ಒಕ್ಕುಡ್ನಿ ಎಡುಮ್ ತೊಟ್ಟು ಯೇಸು ಜೊತ್ಲ ಶಿಲುಭೇಕಿ ಏಸ್ರಿ . ³⁹ ಆನ ಪಾಯೋಳು ತಲಕೈ ಆಡಿಚ್ಚಿ - ದೇವುಡು ಆಲಯುಮ್ನಿ ಪಡೇಸಿ ಮೂಡು ನಾಲ್ಲಾ ಕಟ್ಟೋಡೇ , ನಿನ್ನಿ ರಕ್ಷಿಚ್ಕೋ , ⁴⁰ ದೇವುಡು ಕೊಡ್ಕಾಯುಂಟೆ ಶಿಲುಭೆ ಯಿಂಚ ದಿಗಿ ರಾ ಅನಿ ಯೇಸುನಿ ಹಂಗಿಸ್ತ ವುಂಡ್ರಿ . ⁴¹ ಅದೇ ಮೇರೇಕಿ ಪೆದ್ ಯಾಜಕುಲು ಶಾಶ್ತ್ರಿಲು ಪೆದ್ದೋಳು - ವಾಡು ಇನ್ಕೊಕ್ಳುನಿ ರಕ್ಷಿಚ್ಚೆ , ತನ್ನಿ ರಕ್ಷಿಚ್ಕೊನೆಕಾಯೇಟ್ಲೆ . ⁴² ವಾಡು ಇಸ್ರಾಯೇಲುಲಾ ಅರಸುಡು ಕದಾ . ಇಪ್ಡು ಶಿಲುಭೆಯಿಂಚ ದಿಗಿರಾನಿ , ದಿಗಿ ವಸ್ತೆ ವಾಡ್ಲ ನಂಬುಕ್ಮುಪೆಡ್ತಾಮು . ⁴³ ದೇವುಡ್ಲ ಭರವಸ್ಮು ಪೆಟ್ನಾಡು , ದೇವುಡು ವಾಡ್ಲ ಇಷ್ಟುಮು ಪೆಡ್ತೆ ಇಪ್ಡು ವಾಡ್ನಿ ಇಡ್ಬಿಯ್ನಿ , ತಾನು ದೇವುಡು ಕೊಡ್ಕಾಯ್ನಾಡು ಅನಿ ಸೊಪ್ನಾಡೆ ಅನಿ ಹಾಸ್ಯುಮಿಂಚ ಮಾಟ್ಲಾಡ್ತಾ ವುಂಡ್ರಿ . ⁴⁴ ವಾಡ್ ಜೊತ್ಲ ಶಿಲುಭೇಕಿ ಏಸಿನ ದೊಂಗ್ಲು ಸಹ್ಮು ವಾಡ್ನಿ ಅದೇ ಪ್ರಕಾರ್ಮು ನಿಂದಿಸ್ತ ವುಂಡ್ರಿ . ⁴⁵ ಮದ್ಯಾನ್ಮು ಪನ್ನೆಂಡು ಗಂಟ್ಲಿಂಚ ಮೂಡು ಗಂಟ್ಲು ಗಂಟ ಆ ದೇಶ್ಮು ಮಿಂದಂತ ಸೀಕ್ಟಿ ಕವಿಚ್ಚೆ . ⁴⁶ ಸುಮಾರು ಮೂಡು ಗಂಟ್ಲುಕಿ ಯೇಸು - ಎಲೀ , ಎಲೀ , ಲಮಾ ಸಬತ್ಕಾನಿ , ಅಂಟೆ ನಾ ದೇವುಡಾ , ನಾ ದೇವುಡಾ , ಎಂದ್ಗೂ ನನ್ನೀ ಸೈ ಇಡ್ಸ್ನಾವು ಅನಿ ಪೆದ್ ದ್ವನಿಯಿಂಚ ಕೂಸೇ . ⁴⁷ ಆನ ನಿಲ್ಪಡುಂಡೋಳ್ಳಾ ಕೆಲುವ್ಲು ದಾನ್ನಿ ಇನಿ - ವೂಡು ಎಲಿಯೂಡ್ನಿ ಪಿಲಿಸ್ತಾಡು ಅನ್ರಿ . ⁴⁸ ಕೂಡ್ಲಾನೆ ವಾಳ್ಳಾ ಒಕ್ಡು ಪರ್ಪಾಯಿ ಸ್ಪಂಜಿನಿ ಎತ್ಕೊಚ್ಚಿ ಪುಲ್ಪು ರಸ್ಮಿಂಚ ನಿಂಡ್ಬಿಚ್ಚಿ ಕಟ್ಕಿ ಸಿಕ್ಬಿಚ್ಚಿ ಯೇಸುಕಿ ತಾಗೇಕಿ ಇಚ್ಛೆ . ⁴⁹ ಮಿಕ್ನೋಳು - ಇಡಿ , ಎಲಿಯೂಡು ವಚ್ಚಿ ವಾಡ್ನಿ ರಕ್ಷಿಸ್ತಾಡೆಮೋ ಸೂತಾಮು ಅನ್ರಿ . ⁵⁰ ಯೇಸು ತಿರ್ಗಿ ಪೆದ್ ದ್ವನಿಯಿಂಚ ಕೂಸಿ ಪ್ರಾಣ್ಮು ಇಡ್ಸೆ . ⁵¹ ಅಪ್ಡು ಇಗೋ ದೇವುಡು ಆಲಯುಮು ತೆರ ಪೈನಿಂಚ ದುಗುನುಗಂಟ ಸಿಂಪಿ ರೊಂಡು ಭಾಗ್ಮಾಯೇ . ⁵² ಭೂಮಿ ಆದ್ರೆ , ಬಂಡೇಲು ಸೀಳಿ ಪಾಯೇ , ಸಮಾದಿಲು ತೆರ್ಸೆ , ನಿದ್ರ ಪಾಯಿನ ಅನೇಕುಲು ಭಕ್ತುಲ ದೇಹುಮು ಲೇಸೆ . ⁵³ ಮಲಿ ಯೇಸು ಲೇಸಿನ್ಮಿಂದ ಸಮಾಧಿಲುನೋನಿಂಚ ಆಕ್ಟರ್ಕಿ ವಚ್ಚಿ ಪರಿಶುಧ್ಮು ಪಟ್ಟಣುಮ್ಳುನೋನ್ಕಿ ಪಾಯಿ ಅನೇಕುಲ್ಕಿ ಕನ್ಬಿಚ್ಕೋನೆ ⁵⁴ ಶತಾಧಿಪತುಡು ಮಲಿ ವಾಡ್ ಜೊತ್ಲ ಯೇಸುನಿ ಕಾಬಿಸ್ತ ವುನ್ದ್ನೋಳು ಭೂಕಂಪ್ಮು ನಡ್ಸಿನ ಸಂಗತಿಲ್ನಿ ಸೂಸಿ ಬಹಳ್ಮು ಹೆದ್ರುಕೋನಿ - ನಿಜ್ಮಾಯಿ ವೂಡು ದೇವುಡು ಕುಮಾರುಡು ಆಯುಂಡೆ ಅನ್ರಿ . ⁵⁵ ಇದ್ಕಾಕುನ್ನ ಅನೇಕುಲು ಸ್ತ್ರೀಲು ಆನ ವುಂಡಿ ದೂರ್ಮಿಂಚ ಸೂಸ್ತ ವುಂಡ್ರಿ . ವೂಳು ಯೇಸು ಸೇವೆ ಸೇಸ್ತ ಗಲಿಲಾಯ್ಮಿಂಚ ವಾಡ್ ಎನ್ಕ ವಚ್ಚುಂಡ್ರಿ . ⁵⁶ ವೂಳ್ಳಾ ಮಗ್ದಲಿನ ಮರಿಯಳು ಯಾಕೋಬುಡು ಯೋಸೆಯುಲ ತಲ್ಲಿಯಾಯಿನ ಮರಿಯಳು ಜೆಬೇದಾಯುಡಾ ಬಿಡ್ಳು ತಲ್ಲಿನು ವುಂಡ್ರಿ . ⁵⁷ ಮಾಟಾಲಾಯಿನಪ್ಡು ಅರಿಮಾತಾಯಿನ ಯೋಸೆಫುಡನೆ ಓಕ್ ಧನ್ವಂತುಡು ವಚ್ಚೆ , ವೂಡು ಸಹ್ಮು ಯೇಸುವಿನ ಶಿಷ್ಯುಡಾಯುಂಡೆ . ⁵⁸ ವೂಡು ಪಿಲಾತುಡು ದೆಗ್ರುಕಿ ಪಾಯಿ ಯೇಸು ದೇಹುಮುನಿ ತನ್ಕಿ ಇಚ್ಬೀಯಾಲನಿ ಬೇಡ್ಕೊನೆದಾಯಿ ಪಿಲಾತುಡು ದಾನ್ನಿ ಇಯಾಲನಿ ಅಪ್ಪಣ್ಮು ಸೇಸೆ . ⁵⁹ ಯೋಸೆಫುಡು ಆ ದೇಹುಮ್ನಿ ಸೀಸ್ಕೋನಿ ದಾನ್ನೀ ಶುಧ್ಮಾಯಿನ ನಾರು ಮಡಿಲ ಸುತ್ತಿ ಬಂಡ್ಲ ತೋಡುಂಡಿನ ⁶⁰ ತನ್ ಕೊತ್ ಸಮಾಧಿಲ ಪೆಟ್ಟಿ ಸಮಾಧಿ ವಾಕ್ಲಿಕಿ ಪೆದ್ ರಾಯ್ನಿ ಉರ್ಳಿಚ್ಚಿ ಪಾಯೇ . ⁶¹ ಮಗ್ದಿಲಿನ ಮರಿಯಳು ಆ ಬೇರೆ ಮರಿಯಳು ಆನ ಸಮಾಧಿಕಿ ಎದ್ರಾಯಿ ಕುಚ್ಚೋನುಂಡ್ರಿ . ⁶² ಮರುದಿನ್ಮು ಅಂಟೆ ಸೌರಣ್ಮು ದಿನ್ಮು ಕಳ್ಸಿನ್ಮಿಂದ ಪೆದ್ ಯಾಜಕುಲು ಪರಿಸಾಯುಲು ಪಿಲಾತುಡು ದೆಗ್ರುಕಿ ಕೂಡೋಚ್ಚಿ ⁶³ ದೊರುಡಾ , ಆ ಮೋಸ್ಮುಗಾರುಡು ಬದ್ಕುನ್ನಪ್ಡು ತಾನು ಮೂಡು ದಿನಾಲು ಮಿಂದ ಲೇಸ್ತಾನು ಅನಿ ಸೊಪ್ಪಿಂದಿ ಮಾ ನೆನಪ್ಕಿ ವಚ್ಚೆ , ⁶⁴ ದಾನ್ಕಾರ್ಣುಮು ಮೂಡ್ನೆ ದಿನ್ಮು ಗಂಟ ಸಮಾಧಿನಿ ಬದ್ರುಮು ಸೇಸಿ ಕಾಸೆದಾನ್ಕಿ ಅಪ್ಪಣ್ಮು ಇಯ್ಯಾಲ , ಲೇಕುಣ್ಪಾತೆ ವಾಡ್ ಶಿಷ್ಯುಲು ವಚ್ಚಿ ವಾಡ್ನಿ ದೊಂಗ್ಲಿಚ್ಕೋನಿ ಪಾಯಿ ಸಚ್ನೋಡು ಬದ್ಕಿ ವಚ್ನಾಡು ಅನಿ ಸೊಪ್ಪೋಳು , ಅಪ್ಡು ಮೊದ್ಲುನೆ ಮೋಸ್ಮ್ಕಿಂತ ಕಡೆ ಮೋಸ್ಮು ಕೆಡುಕಾಯಿನಿ ಅನ್ರಿ . ⁶⁵ ಪಿಲಾತುಡು ವಾಳ್ಕಿ - ಕಾವಲುಗಾರುಲ್ನಿ ಸೀಸ್ಕೊಂಡ್ರಿ , ಪಾಯಿ ಮೀಕಿ ತಿಳ್ಚಿನ ಅಟ್ಗ ಬದ್ರುಮು ಸೇಸಿ ಕಾಯಂಡ್ರಿ ಅನಿ ⁶⁶ ಸೊಪ್ಪಿಂದಾಯಿ ವಾಳು ಪಾಯಿ ಕಾವಲುಗಾರುಲುಜೊತ್ಲ ಆ ರಾಯ್ಕಿ ಮುದ್ರೆ ಏಸಿ ಸಮಾಧಿನಿ ಬದ್ರುಮು ಸೇಸ್ರಿ .