¹ ವಾಳು ಯೆರೂಸಲೇಮಿಕಿ ಸಮೀಪಿಚ್ಚಿ ಅಂದ್ಮು ಮಾನ್ಲುಲ ಗುಡ್ಡ್ಮು ದೆಗ್ರ ವುಂಡೆ ಬೇತ್ಫಾಕೆಕಿ ವಚ್ನಪ್ಡು ಯೇಸು ಇದ್ರೂ ಶಿಷ್ಯುಲ್ನಿ ಪಿಲ್ಚಿ ² ಮೀಎದ್ರುಗುಂಡೆ ಹಳ್ಳಿಕಿ ಪೊಂಡ್ರಿ , ಪಾಯಿಂತಕ್ಷಣ್ಮೆ ಆನ ಕಟ್ಟುಂಡೆ ಗಾಡ್ದಿನಿ ದಾನ್ ಜೊತ್ಲ ವುಂಡೆ ಪಿಲ್ನಿ ಕಂಟಾರು , ಅವ್ಟ್ಲುನಿ ಇಪ್ಪಿ ನಾ ದೆಗ್ರುಕಿ ಪಟ್ಕೋನಿ ರಾಂಡ್ರಿ . ³ ಯೌಡಾರ ಮೀಕಿ ಏಮಾರ ಸೊಪ್ತೆ , ಇವಿ ಸ್ವಾಮಿಯೋಳ್ಕಿ ಬೇಕಾಯ್ನಾವಿ ಅನಂಡ್ರಿ , ಅಪ್ಡೇ ಅವುಟ್ಲುನಿ ಇಡ್ಸಿಇಸ್ತಾಡು ಅನಿ ಸೊಪ್ಪಿ ಅಂಪ್ಪಿಚ್ಚೆ ⁴ ಓಕ್ ಪ್ರವಾದಿ ಮುಖಾಂತ್ರುಮು ಸೊಪ್ಪಿನ ಮಾಟ ನೆರ್ವೇರೆಅಟ್ಗ ಇದಿ ಆಯೆ , ಆ ಮಾಟ ಏಮಂಟೆ ⁵ ನಗರಿಕಿ - ಸೂಡಿ , ನೀ ಅರಸು ನೀ ದೆಗ್ರುಕಿ ವಸ್ತಾಡು , ವಾಡು ಶಾಂತ್ಮುವುಂಡೋಡಾಯಿನು ಗಾಡ್ದಿನಿ , ಹೌನು ಪ್ರಾಯ್ಮು ಗಾಡ್ದಿ ಪಿಲ್ನಿ ಎಕ್ನೋಡಾಯಿನು ವಸ್ತಾಡನಿ ಸೊಪ್ಪಂಡ್ರಿ ಅನೇದಿ. ⁶ ಅಪ್ಡು ಶಿಷ್ಯುಲು ಪಾಯಿ ಯೇಸು ಮಾಕಿ ಅಪ್ಪಣ್ಮು ಇಚ್ನಟ್ಗೆನೇ ⁷ ಗಾಡ್ದಿನಿ ಗಾಡ್ದಿ ಪಿಲ್ನಿ ಎತ್ಕೊಚ್ಚಿ ಅವುಟ್ಲು ಮಿಂದ ವಾಳ್ ಬಟ್ಳುನಿ ಏಸೇಕಿ ವಾಡು ಎಕ್ಕಿ ಕುಚ್ಚೋನೆ . ⁸ ಜನಲು ಗುಂಪ್ಲ ಹೆಕ್ವ ಮಂದಿಲು ವಾಳ್ ಬಟ್ಳುನಿ ದಾವ್ಲ ಪೊರ್ಸುಂಡ್ರಿ , ಬೇರೆ ಕೆಲುವ್ಲು ಮಾನ್ಲಿಂಚ ಚಿಗುರ್ಲುನಿ ಕೋಸಿ ದಾವ್ಲ ಹರಡ್ತವುಂಡ್ರಿ . ⁹ ವಾಡ್ ಎನ್ಕನು ಮುಂದ್ರನು ಗುಂಪಾಯಿ ಪಾತವುಂಡಿನ ಜನಲು - ದಾವಿದುಡು ಕುಮಾರುಡ್ಕಿ ಜಯುಮು ಕರ್ತುಡು ಪೇರ್ಲ ವಚ್ಚೋಡ್ಕಿ ಆಶೀರ್ವಾದ್ಮು ಪೈನ ಲೋಕ್ಮುಲ ಜಯಮು ಅನಿ ಆರ್ಭಟಿಚ್ರಿ . ¹⁰ ಯೇಸು ಯೆರೂಸಲೇಮ್ನಿ ಸೇರೇಕಿ ಪಟ್ನುಮಂತ ಗದ್ದಲ್ಮಾಯಿ , ವೂಡು ಯೋಳು ? ಅನ್ರಿ . ¹¹ ದಾನ್ಕಿ ಆ ಜನಲು ಗುಂಪ್ನೋಳು - ವೂಡು ಆ ಪ್ರವಾದಿ , ಗಲಿಲಾಯ್ಮಿನ ನಜರೇತಿನಿ ಯೇಸು ಅನ್ರಿ . ¹² ಆಮಿಂದ ಯೇಸು ದೇವುಡುಆಲಯಮ್ಕಿ ಪಾಯಿ ದಾಂಟ್ಲ ಅಮ್ಮೆದಿ ಸೀಸ್ಕೊನೆದಿ ಅಂದ್ರುನು ಅಂಪಿಚ್ಚಿಇಡ್ಸಿ ಚಿನಿವಾರುಲ ಮೇಜುಲ್ನಿ ಪಾರಿವಾಲ್ನಿ ಅಮ್ಮೊಳ್ ಕಾಲ್ಮಣಿಲ್ನಿ ಉಂಟಿಚ್ಚಿ ವಾಳ್ಕಿ ¹³ ನಾ ಆಲಯುಮು ಪ್ರಾರ್ಥನಾಲಯುಮು ಅನ್ಬಿಚ್ಕೊಂಟಾದಿ ಅನಿ ರಾಸಿಂದಿ , ಆಯ್ತೆ ಮೀರು ದಾನ್ನಿ ದೊಂಗ್ಲು ಗವಿ ಸೇಸ್ತಾರು ಅನಿ ಸೊಪ್ಪೆ . ¹⁴ ಅಪ್ಡು ಗುಡ್ಡೋಳು ಕುಂಟೋಳು ದೇವುಡುಆಲಯುಮ್ಲ ವಾಡ್ ದೆಗ್ರುಕಿ ವಚ್ಚೇಕಿ ವಾಳ್ನಿ ಸ್ವಸ್ಥ್ಮು ಸೇಸೆ . ¹⁵ ಆಯ್ತೆ ಮಹಾಯಾಜಕುಲು ಶಾಸ್ತ್ರಿಲು ವಾಡು ಸೇಸಿನ ಆಶ್ಚರ್ಯುಮುಕರಮುಆಯಿನ ಕಾರ್ಯಲ್ನಿ ದಾವಿದುಡು ಕುಮಾರುಡ್ಕಿ ಜಯ್ಮು ಜಯ್ಮು ಅನಿ ದೇವಾಲಯ್ಮುಲ ಕೂಸ್ತ ವುಂಡೆ ಸಿನೋಳ್ನಿ ಸೂಸಿ ಕೊಪ್ಮುಸೇಸ್ಕೊನಿ ವಾಡ್ಕಿ ¹⁶ ವೂಳು ಸೊಪ್ಪೆದಾನ್ನಿ ಇಂಟಾವ ಅನಿ ಅಡ್ಗೇಕಿ ಯೇಸು - ಹೌನು , ಇಂಟಾನು , ಸನ್ ಸಿನೋಳ್ ನೋರಿಂಚನು ಸನ್ಕೂಸ್ಲುಲ ನೋರಿಂಚಾನು ಸ್ತೋತ್ರುಮ್ನಿ ಸಿದ್ದಿಕಿ ಎತ್ಕೊಸ್ತ್ವಿ ಅನೇದ್ನಿ ಮೀರು ಎಪ್ಡಾರ ಓದ್ಲೇದಾ ? ಅನೆ . ¹⁷ ಆಮಿಂದ ವಾಳ್ನಿ ಇಡ್ಸಿ ಪಟ್ನುಮಿಂಚ ಬೆಥಾನ್ಯಂಕಿ ವಚ್ಚಿ ಆನ ರಾತ್ರಿ ದಿಕ್ಕೋನ್ರಿ . ¹⁸ ಪದ್ನ ವಾಡು ಪಟ್ನುಮ್ಕಿ ತಿರ್ಗಿ ಪಾಯೇನಪ್ಡು ಆಕ್ಲಾಯೆ . ದಾವ್ಲ ಒಕ್ಟಿ ಅಂಜೂರ್ಮು ಮಾನ್ನಿ ಕನಿ ದಾನ್ ಹತ್ರುಮ್ಕಿ ಪಾಯಿ ದಾಂಟ್ಲ ಬರೀ ಆಕ್ಲುನೆ ಹೊರ್ತು ಮಲೇಮಿ ಕನ್ಕುನ್ನ ದಾನ್ಕಿ - ಇಂಕ್ಮಿಂದ ನೀಲ್ಲಾ ¹⁹ ಫಲ್ಮು ಎಪ್ಎಪ್ಡುಕು ಆವ್ಕುನ್ನ ಪೋನಿ ಅನಿ ಸೊಪ್ಪೆ . ಆ ಕ್ಷಣ್ಮೆ ಆ ಅಂಜೂರ್ಮು ಮಾನು ಎಂಡ್ಪಾಯೇ . ²⁰ ಶಿಷ್ಯುಲು ದಾನ್ನಿ ಸೂಸಿ ಬೆರ್ಗಾಯಿ - ಈ ಅಂಜೂರ್ಮು ಮಾನು ಓಕ್ ಕ್ಷಣ್ಮುಲಾನೇ ಎಂಡಿಪಾಯಿನೆ , ಆದಿ ಎಟ್ಟ ? ಅನ್ರಿ . ²¹ ದಾನ್ಕಿ ಯೇಸು - ಮೀಕಿ ಸತ್ಯುಮಾಯಿ ಸೊಪ್ತಾನು ಮೀರು ಸಂಶಯ್ಮು ಪಡ್ಕುನ್ನ ನಂಬ್ತೆ ನಾನು ಅಂಜೂರ್ಮು ಮಾನ್ಕಿ ಸೇಸೆಅಂಟೆದಾನ್ನಿ ಮೀರು ಸೇಸ್ತಾರು. ಇದಿ ಮಾತ್ರುಮು ಕಾಕುನ್ನ ಈ ಬೆಟ್ಟುಮ್ಕಿ - ನುವ್ವ ಪೆರ್ಕೋನಿಪಾಯಿ ಸಮುದ್ರುಮ್ಲ ಪಡು ಅನಿ ಸೊಪ್ತೆ ಆದಿ ಆಯ್ತಾದಿ . ²² ಮೀರು ನಂಬ್ಕೊನಿ ಪ್ರಾರ್ಥ್ನುಮ್ಲ ಎಮೇಮಿ ಬೇಡ್ಕೊಂಟಾರೋ ದಾನ್ನಂತ ಹೊಂದ್ತಾರು ಅನೆ . ²³ ಆಮಿಂದ ವಾಡು ದೇವುಡು ಆಲಯುಮ್ಕಿ ವಚ್ಚಿ ಭೋದಿಸ್ತ ವುಂಡೆದಾಯಿ ಮಹಾಯಾಜಕುಲು ಪ್ರಜುಲ ಪೆದ್ದೊಳು ಯೇಸು ದೆಗ್ರುಕಿ ವಚ್ಚಿ - ನುವ್ವ ಯಾವ್ ಅಧಿಕಾರ್ಮಿಂಚ ದೀನಂತ ಸೇಸ್ತಾವು ? ²⁴ ಈ ಅಧಿಕಾರ್ಮುನಿ ನೀಕಿ ಯೋಳು ಇಚ್ರಿ ಅನಿ ಅಡ್ಗೇಕಿ ಯೇಸು ವಾಳ್ಕಿ ಸೊಪ್ಪಿನ್ದೆಮಂಟೆ ನಾನು ಸಹ್ಮು ಮಿಮ್ಮುಲ್ನಿ ಓಕ್ ಮಾಟ ಅಡ್ಗ್ತಾನು , ದಾನ್ನಿ ಮೀರು ನಾಕಿ ಸೊಪ್ತೆ ನಾನು ಯಾವ್ ಅಧಿಕಾರ್ಮಿಂಚ ದೀನ್ನಿ ಸೇಸ್ತಾನುಅನೇದ್ನಿ ಮೀಕಿ ಸೊಪ್ತಾನು . ²⁵ ದೀಕ್ಷಾಸ್ನಾನ್ಮು ಸೇಬಿಚ್ಚೆ ಅಧಿಕಾರ್ಮು ಯೋಹೋವುಡ್ಕಿ ಯಾನಿಂಚ ವಚ್ಚೆ ? ಪರ್ಲೋಕ್ಮಿನ್ಚಾನೋ ? ಮನುಶ್ಯುಲಿನ್ಚಾನೋ ಅನೆ .ಅಪ್ಡು ವಾಳು ಪರ್ಲೋಕ್ಮಿಂಚ ವಚ್ಚೆ ಅನಿ ಮಾಮು ಸೊಪ್ತೆ ಅಟ್ಟಾಯ್ತೆ ಮೀರು ವಾಡ್ನಿ ಎಂದ್ಗೂ ನಂಬ್ಲೇದು ಅನಿ ಮೀಕಿ ಸೊಪ್ತಾಡು , ²⁶ ಮನುಷ್ಯುಲಿಂಚ ವಚ್ಚೆ ಅನಿ ಸೊಪ್ತೆ ಮಾಕಿ ಜನಲುದಿ ಬಯ್ಮುಂಡಾದಿ , ಯೋಹಾನುಡು ಪ್ರವಾದಿ ಅನಿ ಅಂದ್ರು ಎನ್ಬಿಚ್ನಾರೆ ಅನಿ ವಾಳ್ ವಾಳ್ ನೋನ ಮಾಟ್ಲಾಡ್ಕೊಂಟವುಂಡ್ರಿ . ²⁷ ಕಡೆಕಿ ವಾಳು- ಮಾಮರೆಲೆಮು ಅನಿ ಯೇಸುಕಿ ಉತ್ರುಮಿಚ್ರಿ. ಅಪ್ಡು ಯೇಸು ವಾಳ್ಕಿ- ಯಾವ್ ಅಧಿಕಾರ್ಮಿಂಚ ದೀನ್ನಂತ ಸೇಸ್ತಾನೋ ದಾನ್ನಿ ನಾನು ಮೀಕಿ ಸೊಪ್ಪೆಟ್ಲೆದು . ²⁸ ಆಯ್ತೆ ಮೀಕಿ ಎಟ್ಟ ಸೂಪ್ತಾದಿ ? ಓಕ್ ಮನುಷ್ಯುಡ್ಕಿ ಇದ್ರೂ ಬಿಡ್ಳುoಡ್ರಿ . ವಾಡು ಮೊದ್ಲೋಡ್ ದೆಗ್ರುಕಿ ವಚ್ಚಿ - ಕೊಡ್ಕ , ಪಾಯಿ ಈ ಪೊದ್ದು ದ್ರಾಕ್ಷಿ ತೋಟ್ಲ ಕೆಲ್ಸ್ಮು ಸೆಯ್ಯಿ ಅನ್ನಪ್ಡು ವಾಡು ²⁹ ನಾನು ಪಾಯೇಟ್ಲೆ ಅನಿ ಸೊಪ್ಪಿನ್ದಾಯಿನು ಆಮಿಂದ ಪಶ್ಚಾತ್ತಾಪ್ಮು ಪಡಿ ತೋಟುಮ್ಕಿ ಪಾಯೇ. ³⁰ ಆಮಿಂದ ರೊಂಡ್ನೋಡ್ ದೆಗ್ರುಕಿ ವಚ್ಚಿ ಅದೇ ಮಾಟ್ನಿ ಸೊಪ್ಪ್ನಪ್ಡು ವಾಡು - ಪಾತಾನಬ್ಬ ಅನ್ಟೇನು ಪೋನೆಲೇದು . ³¹ ವಾಳಿದ್ರುಲ ತಂಡ್ರಿ ಚಿತ್ಮುಲಾಕ ನಡ್ಸ್ನೋಡು ಯೋಳು ಅನಿ ಅಡ್ಗಿನ್ದಾಂಕು ವಾಳು - ಮೊದ್ಲೋಡೆ ಅನ್ರಿ . ಅಪ್ಡು ಯೇಸು ವಾಳ್ಕಿ - ಭ್ರಷ್ಟುಲು ಸೂಳೇಲು ಮೀಕಿಂತ ಮೊದ್ಲು ದೇವುಡು ರಾಜ್ಯುಮ್ನಿ ಸೇರ್ತಾರು ಅನಿ ಮೀಕಿ ಸತ್ಯುಮಾಯಿ ಸೊಪ್ತಾನು . ಯೋಹಾನುಡು ಧರ್ಮುಮುಮಾರ್ಗುಮ್ನಿ ಬೋಧಿಚ್ಚೋಡಾಯಿ ಮೀ ದೆಗ್ರುಕಿ ವಚ್ಚೆ , ³² ಮೀರು ವಾಡ್ನಿ ನಂಬ್ಲೇದು , ಭ್ರಷ್ಟುಲು ಸೂಳ್ಳು ವಾಡ್ನಿ ನಂಬ್ರಿ , ಮೀರು ದೀನ್ನಿ ಸೂಸಿನ್ದಾಯಿನು ಪಶ್ಚಾತ್ತಾಪ್ಮು ಪಡ್ಲೇದು ವಾಡ್ನಿ ನಂಬ್ಲೇದು . ³³ ಇಂಕೊಕ್ಟಿ ಸಾಮ್ಯುಮ್ನಿ ಇನಂಡ್ರಿ - ಓಕ್ ಇಂಟ ಯಜ್ಮಾನುಡುಂಡೆ . ವಾಡು ಓಕ್ ದ್ರಾಕ್ಷಿ ತೋಟುಮ್ನಿ ಸೇಸಿ ದಾನ್ ಸುತ್ಲು ಬೇಲಿ ಏಬಿಚ್ಚಿ ದಾಂಟ್ಲ ದ್ರಾಕ್ಷೆ ಅಲುಮ್ನಿ ಸೇಬಿಚ್ಚಿ ಹೂಡೇನಿ ಕಟ್ಬಿಚ್ಚಿ ಒಕ್ಕಲಿಗುಲ್ಕಿ ವಾರುಮ್ಕಿ ಇಚ್ಚಿ ಬೇರೋಕ್ಟಿ ದೇಶುಮ್ಕಿ ಪಾಯೇ . ³⁴ ಪಲ್ಮು ಕಾಲ್ಮು ಹತ್ರುಮಾಯ್ನಪ್ಡು ತನ್ಕಿ ರಾಬೇಕಾಯಿನ ಪಂಡ್ಲುನಿ ಸೀಸ್ಕೋನಿ ವಚ್ಚೆದಾನ್ಕಾಯಿ ಆ ಒಕ್ಕ್ಲಿಗ್ಲು ದೆಗ್ರುಕಿ ತನ್ ಆಳ್ನಿ ಅಂಪಿಚ್ಚೆಕಿ ಒಕ್ಕ್ಲಿಗ್ಲು ವಾಡ್ ಆಳುಲ್ನಿ ಪಟ್ಕೋನಿ ಒಕ್ಕುಡ್ನಿ ಕೊಟ್ರಿ , ³⁵ ಒಕ್ಕುಡ್ನಿ ನರ್ಕಿ ಏಸ್ರಿ , ಒಕ್ಕುಡ್ನಿ ರಾಯ್ ಕೊಟ್ಟಿ ಸೊಂಪ್ರಿ . ³⁶ ಪುನ ಮೊದ್ಲೋಲ್ಕಿಂತ ಹೆಕ್ವ ಮಂದಿ ಆಳುಲ್ನಿ ಅಂಪಿಚ್ಚೆ , ವಾಳ್ಕು ಅಟ್ಟೆ ಸೇಸ್ರೀ . ³⁷ ಕಡೆಲಾ ನಾ ಕೊಡ್ಕುಕಾರ ಮಾರ್ಯಾದೆನಿ ಸೂಪೋಳು ಅನ್ಕೋನಿ ವಾಡ್ ಕೊಡ್ಕ್ನಿ ವಾಳ್ ದೆಗ್ರುಕಿ ಅಂಪಿಚ್ಚೆ . ³⁸ ಆಯ್ತೆ ಆ ಒಕ್ಕಲಿಗುಲು ವಾಡ್ ಕೊಡ್ಕುನಿ ಕನಿ - ವೂಡೆ ಬಾದ್ಯಸ್ಥುಡು , ರಾಂಡ್ರಿ ವೂಡ್ನಿ ಸೊಂಪಿಏತಾಮು , ³⁹ ವೂಡ್ ಸ್ವಾಸ್ತುಮ್ನಿ ಮಾಮೆ ಸೀಸ್ಕೊಂದಾಮು ಅನಿ ವಾಳ್ ವಾಳ್ನೋನ ಮಾಟ್ಳಾಡ್ಕೋನಿ ವಾಡ್ನಿ ಪಟ್ಕೋನಿ ದ್ರಾಕ್ಷೆ ತೊಟ್ಮಿಂಚ ಆಕ್ಟರ್ಕಿ ದೊಬ್ಬಿ ಸೊಂಪಿಏಸ್ರಿ . ⁴⁰ ಅಟ್ಟಾಯ್ತೆ ದ್ರಾಕ್ಷೆ ತೊಟ್ಮು ಧಣಿ ವಚ್ನಪ್ಡು ಆ ಒಕ್ಕಲಿಗುಲ್ಕಿ ಏಮಿ ಸೇಸ್ತಾಡು ಅನೆ . ⁴¹ ವಾಳು ವಾಡ್ಕಿ - ಆ ಕೆಡುಕುಲ್ನಿ ಕ್ರೂರಮಾಯಿ ಸಂಹರ್ಬಿಚ್ಚಿ ಕಾಲ್ಮುಕಾಲ್ಮುಕಿ ಪಂಡ್ಲುನಿ ತನ್ಕಿ ಸಲ್ಬಿಚ್ಚೆಅಟ್ಟ ಬೇರೆ ಒಕ್ಕಲಿಗುಲ್ಕಿ ವಾಡ್ ತೋಟುಮ್ನಿ ವಾರುಮ್ಕಿ ಇಸ್ತಾಡು ಅನಿ ಸೊಪ್ಪೆ . ⁴² ಯೇಸು ವಾಳ್ಕಿ - ಇಲ್ಲು ಕಟ್ಟೋಳು ವದ್ದುಅನಿ ಇಡ್ಸಿನ ರಾಯೇ ಮುಖ್ಯುಮಾಯಿನ ಮೂಲಾರಾಯಾಯೇ , ಇದಿ ಕರ್ತುಡಿನ್ಚಾನೆ ಆಯೆ , ಮಾಕಿ ಆಶ್ಚರ್ಯುಮಾಯಿ ಸೂಪ್ತಾದಿ ಅನೆ ಮಾಟ್ನಿ ಮೀರು ಶಾಸ್ತ್ರುಮ್ಲ ಎಪ್ಡಾರ ಓದ್ಲೆದಾ ? ⁴³ ದಾನ್ನಿಂಚ ದೇವುಡು ರಾಜ್ಯುಮು ಮೀಯಿಂಚ ಸೀಬಿಚ್ಚಿ ದಾನ್ ಪಲ್ಮುನಿ ಇಚ್ಚೆ ಜನುಮ್ಕಿ ಇಚ್ಚೇದಿ . ⁴⁴ ಆ ರಾಯ್ಮಿಂದ ಪಡೋಡು ತುಂಡುತುಂಡಾಯ್ತಾಡು , ಇದಿ ಯೋಳ್ ಮಿಂದ ಪಡ್ತಾದೋ ವಾಡ್ನಿ ಪುಡಿಪುಡಿ ಸೇಸ್ತಾದಿ ಅನಿ ಸೊಪ್ಪೆ . ⁴⁵ ಮಹಾಯಾಜಕುಲು ಪರಿಸಾಯುಲು ವಾಡ್ ಸಾಮ್ಯುಮ್ನಿ ಇನಿ ವಾಳ್ನೆ ಕುರಿಚ್ಚಿ ಮಾಟ್ಲಾಡ್ತಾಡು ಅನಿ ತಿಳ್ಚ್ಕೋನಿ ವಾಡ್ನಿ ಪಟ್ಕೊನೆ ದಾನ್ಕಿ ಸಂದರ್ಬುಮು ಸೂಸ್ತವುನ್ಡ್ರಿ , ⁴⁶ ಜನಲು ವಾಡ್ನಿ ಪ್ರವಾದಿ ಅನಿ ಎನ್ಬಿಚ್ಚಿದಾನ್ನಿಂಚ ವಾಳ್ಕಿ ಭಯ್ಮುಪಡ್ರಿ .