¹ ಆರು ದಿನ್ಮಾಯಿನ್ಮಿಂದ ಯೇಸು ಪೆತ್ರುಡ್ನಿ ಯಾಕೊಬುಡ್ನಿ ವಾಡ್ ತೊಂಬ್ಡಾಯಿನ ಯೋಹಾನುಡ್ನಿ ಮಾತ್ರುಮು ವಿಂಗಡ್ಮಾಯಿ ತೋಡ್ಕೋನಿ ಎತ್ರುಮಾಯುಂಡೆ ಬೆಟ್ಟ್ಮುಕಿ ಪಾಯೇ. ² ಆನ ವಾಳ್ ಕನ್ಮುಂದ್ರ ಯೇಸು ರೂಪ್ಮು ಬೇರೆಯಾಯೇ , ಯೇಸು ಮಕ್ಮು ಸೂರ್ಯುಡ್ಲಾಕ ಪ್ರಕಾಶಿಚ್ಚೆ , ಯೇಸು ಬಟ್ಳು ಎಲ್ಗ್ ಲಾಕ ತೆಲ್ಗಾಯೆ. ³ ಇದ್ಕಾಕುನ್ನ ಮೋಶೆಡು ಎಲಿಯುಡು ವಾಡ್ ಸಂಗಡ್ಮು ಮಾಟ್ಲಾಡ್ಕೋನಿ ವಾಳ್ಕಿ ಕನ್ಬಿಚ್ಕೋನ್ರಿ. ⁴ ಅಪ್ಡು ಪೇತ್ರುಡು ಯೇಸುಕಿ - ಸ್ವಾಮೀ , ಮಾಮು ಇನ್ನೆ ವುಂಡೆದಿ ಮಂಚುದಿ . ಅಪ್ಪಣುಮಾಯ್ತೆ ಈನ ಮೂಡು ಪರ್ಣ್ಮು ಶಾಲೆಲ್ನಿ ಕಟ್ತಾಮು , ನೀಕೊಕ್ಟಿ , ಮೊಶೆಕೊಕ್ಟಿ , ಎಲಿಯುಡ್ಕೊಕ್ಟಿ ಅನಿ ಸೊಪ್ಪೇ. ⁵ ಇಟ್ಟೆ ಮಾಟ್ಲಾಡೆನಪ್ಡೆ ಕಾಂತ್ಮುಂಡೆ ಮೊಡ್ಮು ದಾನ್ ಮಿಂದ ಕವಿಚ್ಚೇ . ಇದ್ಕಾಕುನ್ನ ಆ ಮೊಡ್ಮುನೋನಿಂಚ - ವೂಡೂ ಪ್ರಿಯುಡಾಯಿನ ನಾ ಕೊಡ್ಕು , ವೂಡ್ನಿ ನಾನು ಮೆಚ್ನ , ವೂಡ್ ಮಾಟ್ನಿ ಇನಂಡ್ರಿ ಅನೆ ಆಕಾಶ್ಮು ವಾಣಿ ಆಯೆ. ⁶ ಶಿಷ್ಯುಲು ದೀನ್ನಿ ಇನಿ ಬಹಳ್ಮಾಯಿ ಎದ್ರುಕೊನಿ ಹಬ್ಬ್ರಿ. ⁷ ಆಯ್ತೆ ಯೇಸು ಅತ್ರುಮ್ಕಿ ವಚ್ಚಿ ವಾಳ್ನಿ ಮುಟ್ಟಿ - ಲೇಯನ್ದ್ರಿ ಹೆದ್ರೋದಂಡ್ರಿ ಅನೆ. ⁸ ವಾಳು ಕನ್ನೆತ್ತಿ ಸೂಸ್ನಪ್ಡು ಯೇಸುನೆ ಹೊರ್ತು ಇಂಕ್ಯೋಲ್ನಿ ಕನ್ಲೇ. ⁹ ವಾಳು ಆ ಬೆಟ್ಮಿಂಚ ದಿಗಿ ವಚ್ಚೆನಪ್ಡು ಯೇಸು ವಾಳ್ಕಿ - ಮೀರು ಇಪ್ಡು ಕನಿನ ದರ್ಶನುಮ್ನಿ ಮನುಷ್ಯ ಕುಮಾರುಡು ಸಚ್ಚಿ ಜೂಡಾಯಿ ಲೇಸೇಗಂಟ ಯೋಳ್ಕು ಸೊಪ್ಪೋದಂಡ್ರಿ ಅನಿ ಖಂಡಿತ್ಮಾಯಿ ಸೊಪ್ಪೇ . ¹⁰ ಅಪ್ಡು ಯೇಸು ಶಿಷ್ಯುಲು - ಎಲಿಯುಡು ಮೊದ್ಲು ವಚ್ಚೇದಿ ಅಗತ್ಯುಮು ಅನೇದಿ ಶಾಶ್ತ್ರಿಲು ಸೊಪ್ತಾರ್ಕದ , ಇದಿ ಎಟ್ಟ ಅನಿ ಯೇಸುನಿ ಅಡ್ಗಿನ್ದಾಂಕು ಯೇಸು - ಎಲಿಯುಡು ವಚ್ಚೇದಿ ನಿಜ್ಮು , ವಚ್ಚಿ ಅನ್ನಿನಿ ಸರಿಸೇಸ್ತಾಡು, ¹¹ ವಚ್ಚಿ ಅನ್ನಿನಿ ಸರಿಸೇಸ್ತಾಡು, ಆಯ್ತೆ ನಾನು ಮೀಕು ಸೊಪ್ಪೇದೆಮಂಟೆ , ¹² ಎಲಿಯುಡು ವಚ್ಚಿ ಪಾಯೇ , ಜನಲು ವಾಡ್ ಗುರ್ತ್ನಿ ಅರಿಕುನ್ನ ವಾಳ್ ಮನ್ಸ್ಕಿ ವಚ್ನಟ್ಗ ವಾಡ್ಕಿ ಸೇಸ್ರಿ. ವಾಡ್ಕಾಯ್ನಟ್ಗೆ ಮನುಷ್ಯಕುಮಾರುಡ್ಕಿ ಸಹ್ಮು ವಾಳ್ ತೊಟ್ಟಿಂಚ ಹಿಂಸ್ಮಾಯ್ತಾದಿ ಅನಿ ಉತ್ರುಮಿಚ್ಚೆ . ¹³ ಅಪ್ಡು ಸ್ನಾನಿಕುಡೈನ ಯೋಹಾನುಡು ವಿಷಯ್ಮಾಯಿ ಮೀಕಿ ಈ ಮಾಟ್ನಿ ಸೊಪ್ಪೇ ಅನಿ ಶಿಷ್ಯುಲು ತಿಳ್ಚ್ಕೊನ್ರಿ . ¹⁴ ವಾಳು ಜನಲು ಗುಂಪ್ಮು ಹತ್ರುಮ್ಕಿ ವಚ್ನಪ್ದು ಒಕ್ಡು ಯೇಸು ಅತ್ರುಮ್ಕಿ ವಚ್ಚಿ ಯೇಸು ಮುಂದ್ರ ಮೊನ್ಕಾಲ್ನೂರಿ ವನ್ದಿಂಚಿ - ಸ್ವಾಮೀ ನಾ ಕೊಡ್ಕ್ನಿ ಕರುಣಿಯ್ಯಿ, ¹⁵ ವಾಡು ಮೂರ್ಚಾರೋಗ್ಮಿಂಚ ಬಹಳ್ಮು ಕಷ್ಟ್ಮು ಪಡ್ತಾಡು, ಅಪ್ಪ್ದಪ್ಡು ಹಗ್ಲಾನು ಅಪ್ಪ್ದಪ್ದು ನೂಳ್ಳಾನು ಪಡ್ತುಂಟಾದು . ¹⁶ ವಾಡ್ನಿ ನೀ ಶಿಷ್ಯುಲು ದೆಗ್ರುಕಿ ತೊಡ್ಕೋನಿ ವಚ್ಚುಂಟಿ , ಆಯ್ತೆ ವಾಡ್ಕಿ ವಾಸಿ ಸೇಸೆಕಿ ವಾಳಿಂಚ ಆಕುಣ್ಣಪಾಯೇ ಅನೆ ¹⁷ ದಾನ್ಕಿ ಯೇಸು - ಎಲಾ , ನಂಬುಕ್ಮುಲೇನಿನ ಮೂರ್ಖ್ಮು ಸಂತಾನುಡ , ನಾನು ಇಂಕೆನ್ ದಿನ್ಮು ಮೀ ಜೊತ್ಲ ವುಂಡುದ್ನು ? ಇಂಕೆನ್ ದಿನ್ಮು ಸಹಿಸ್ಕೊಂದ್ನು ? ವಾಡ್ನಿ ಈನ್ಕಿ ತೊಡ್ಕೋನಿ ರಾಂಡ್ರಿ ಅನೆ. ¹⁸ ಯೇಸು ವಾಡ್ನಿ ಗದ್ರಿಚ್ಚೇಕಿ ದೈಮು ವಾಡ್ನಿ ಇಡ್ಸಿ ಪಾಯೇ , ಆ ಕ್ಷಣ್ಮೆ ಆ ಸಿನೋಡ್ಕಿ ಸ್ವಸ್ತ್ಮಾಯೇ. ¹⁹ ಆಮಿಂದ ಶಿಷ್ಯುಲು ಎಕಾಂತ್ಮಾಯಿ ಯೇಸು ದೆಗ್ರುಕಿ ವಚ್ಚಿ - ದಾನ್ನಿ ಇಡ್ಬಿಚ್ಚೆಕಿ ನಾಕಿ ಎಂದ್ಗೂ ಆವ್ಲೇದು ಅನಿ ಅದ್ಗ್ನಪ್ದು ಯೇಸು ವಾಳ್ಕಿ ²⁰ ಮೀ ನಂಬುಕ್ಮು ಕೊಂಚ್ಮಾಯುoಡೆದಾನ್ಕೆ ಆವ್ಲೇದು, ಮೀಕಿ ಸತ್ಯುಮಾಯಿ ಸೊಪ್ತಾನು , ಸಾಸ್ವ ಗಿಂಜಿಲಂತ ನಂಬುಕ್ಮು ಮೀಕಿ ವುಂಡೆದಾಯ್ತೆ ಮೀರು ಈ ಬೆಟ್ಮುಕಿ - ²¹ ಆನ್ಕಿ ಪೋ ಅನಿ ಸೊಪ್ತೆನು ಆದಿ ಪಾತಾದಿ , ಮಲಿ ಮೀ ಸೈಯಿಂಚ ಆವ್ಲೆಂದಿ ಒಕ್ಟಿ ಉಂಡೆಟ್ಲೆ ಅನೆ. ²² ವಾಳು ಗಲಿಲಾಯುಮ್ಲ ಗುಂಪ್ ಗುoಪಾಯಿ ಕೂಡೆನಪ್ದು ಯೇಸು ವಾಳ್ಕಿ -ಮನುಷ್ಯ ಕುಮಾರುಡು ಮನುಷ್ಯುಡು ಸೈಕಿ ಒಪ್ಪಿಚ್ಚಿಇಸ್ತಾಡು. ²³ ವಾಳು ಯೇಸುನಿ ಸೊoಪ್ತಾರು , ಸಚ್ನ ಮೂಡ್ನೆ ದಿನುಮ್ಲ ಯೇಸು ಜೂಡಾಯಿ ಲೆಸೋಸ್ತಾಡು ಅನಿ ಸೊಪ್ಪೇ.ದಾನ್ನಿ ಇನಿ ವಾಳು ಬಹಳ್ಮು ದುಖ್ಮು ಪಡ್ರಿ. ²⁴ ವಾಳು ಕೆಪೆರ್ನೌಮೆಕಿ ವಚ್ನಪ್ಡು ದೇವಾಲಯ್ಮುಕಾಯಿ ತೆರಿಗೆನಿ ಎತ್ತೋಳು ಪೇತ್ರುಡು ದೆಗ್ರುಕಿ ವಚ್ಚಿ - ಮೀ ಭೋದಕುಡು ದೇವಾಲಯ್ಮು ತೆರಿಗೆನಿ ಸಲ್ಲಿಚ್ಚೆಟ್ಲೆದ ಅನಿ ಅಡ್ಗೆಕಿ - ಹೌನು , ಸಲ್ಲಿಸ್ತಾಡು ಅನೆ. ²⁵ ಪೇತ್ರುಡು ಇಂಟ್ನೋನ್ಕಿ ವಚ್ನಪ್ಡು ಯೇಸು ವಾಡ್ಕಿಂತ ಮೊದ್ಲೇ - ಸೀಮೊನುಡ ನೀಕಿ ಎಟ್ಟ ಸೂಪ್ತಾದಿ? ಭೂಲೋಕ್ಮು ಅರಸುಲು ಸುಂಕ್ಮಾವ್ನಿ ಮಂಡತೆರಿಗೆನಾವ್ನಿ ಯೋಳಿಂಚ ಸೀಸ್ಕೊಂಟಾರು ? ವಾಳ್ ಬಿಡ್ಲಿಂಚಾನೋ ? ಬೇರೊಲಿಂಚಾನೋ ಅನಿ ಅಡ್ಗೆ. ²⁶ ವಾಡು ಬೇರೊಳಿಂಚ ಅನಿ ಉತ್ರುಮು ಇಚ್ಚೆಕಿ ಯೇಸು - ವಾಡ್ಕಿ ಆಯ್ತೆ ಬಿಡ್ಳು ದಾನ್ಕಿ ನೊನ್ಪೋಡ್ನೋಳ್ ಕಾದು . ²⁷ ಆಯ್ತೆನು ಮಾ ವಿಷಯ್ಮಾಯಿ ವಾಳು ಬೇಸೃಮು ಸೇಸ್ಕೊಗುಡ್ದು , ನುವ್ವ ಸಮುದ್ರುಮ್ಕಿ ಪಾಯಿ ಗಾಳ್ಮು ಏಸಿ ಮೊದ್ಲು ಸಿಕ್ಕೆ ಶಾಪ್ನಿ ಎತ್ತು , ದಾನ್ ನೋರ್ನಿ ಸೀಸಿ ಸೂಸ್ತೆ ದಾಂಟ್ಲ ಓಕ್ ರೂಪಾಯಿ ಸಿಕ್ತಾದಿ , ದಾನ್ನಿ ಸಿಸ್ಕೋನಿ ಮಾಇದ್ರುದಿ ಅನಿ ಸೊಪ್ಪಿ ವಾಳ್ಕಿ ಇಯ್ಯಿ ಅನಿ ಸೊಪ್ಪೇ.