¹ ಅಪ್ಡು ಯೆರೂಸಲೇಮಿಂಚ ಪರಿಸಾಯುಲು ಶಾಸ್ತ್ರಿಲು ಯೇಸು ದೆಗ್ರುಕಿ ವಚ್ಚಿ - ನೀ ಶಿಷ್ಯುಲು ಪೆದ್ದೊಲಿಂಚ ವಚ್ಚಿನ ಸಂಪ್ರದಾಯ್ಮುನಿ ಎಂದ್ಗೂ ಮೀರ್ತಾರು ? ² ವಾಳು ಸೈ ಕಡಿಕೋಕುನ್ನ ಅಹಾರ್ಮುನಿ ಸೀಸ್ಕೊಂಟಾರೆ ಅನಿ ಅಡ್ಗಿನ್ದಾಂಕು ಯೇಸು ವಾಳ್ಕಿ ಉತ್ರುಮು ಇಚ್ಚಿಂದೆಮಂಟೆ ³ ಸಹ್ಮು ಸಂಪ್ರುದಾಯ್ಮು ನಿಮಿತ್ಮು ದೇವುಡು ಆಜ್ನೇನಿ ಎಂದ್ಗೂ ಮೀರ್ತಾರು ? ⁴ ಎಟ್ಟಂಟೆ ತಲ್ಲಿ ತಂಡ್ರಿನಿ ಸನ್ಮಾನಿಯಾಲನಿನು ತಂಡ್ರಿನಾವ್ನಿ ತಲ್ಲಿನಾವ್ನಿ ದೂಷಿಚ್ಚೋಡ್ಕಿ ಮರಣ್ಮು ದಂಡನ್ಮು ಆವಾಲನಿನು ದೇವುಡು ಸೊಪ್ನಾಡು . ⁵ ಯೋವ್ಡಾರ ವಾಡ್ ತಂಡ್ರಿನಾವ್ನಿ ತಲ್ಲಿನಾವ್ನಿ ಸೂಸಿ - ನಾನು ನೀ ಸಂರಕ್ಷಣ್ಮುಕಾಯಿ ಇಯ್ಬೇಕಾಯುಂಡೆದ್ನಿ ದೇವುಡುಕಾಯಿ ಪೆಟ್ನಾನು ಅನಿ ಸೊಪ್ಪೆದಾಯ್ತೆ ವಾಡ್ಕಿ ವಾಳ್ ತಲ್ಲಿ ತಂಡ್ರಿನಿ ಸನ್ಮಾನಿಬೇಕಾವ್ಲೇ ಅಂಟಾರು . ⁶ ಮೀ ಸಂಪ್ರುದಾಯ್ಮು ನಿಮಿತ್ಮು ದೇವುಡು ವಾಕ್ಯುಮುನಿ ನಿರರ್ತಕ್ಮು ಸೇಸ್ನಾರು . ⁷ ಕಪಟಿಲಾ , ಮೀ ವಿಷಯುಮ್ಲ ಯೇಶಾಯುಡು ವಿಹಿತ್ಮಾಯಿ ಪ್ರವಾದಿಚ್ನಾಡು , ವಾಡು ರಾಸಿಂದೆಮಂಟೆ - ⁸ ಆ ಜನಲು ಮಾಟಿಂಚ ನನ್ನೀ ಸನ್ಮಾನಿಸ್ತಾರು , ಆಯ್ತೆ ವಾಳ್ ಮನ್ಸು ನಾಕಿ ದೂರ್ಮಾಯಿಂದಿ . ⁹ ಮನುಷ್ಯುಲು ಕಲ್ಪಿಚ್ಚಿನ ಕಟ್ಟಳೆಲ್ನೆ ವಾಳು ಭೋದಿಚ್ಚೆದಾನ್ನಿಂಚ ನಾಕಿ ಭಕ್ತಿನಿ ಸೂಪೇದಿ ವ್ಯರ್ಥ್ಮು ಅನೇದೆ . ¹⁰ ಆಮಿಂದ ಯೇಸು ಜನಲು ಗುಂಪ್ನಿ ದೆಗ್ರುಕಿ ಪಿಲ್ಚಿ ವಾಳ್ಕಿ - ಶೆವ್ವಿಚ್ಚಿ ಇನಂಡ್ರಿ , ತಿಲ್ಸ್ಕೊಂಡ್ರಿ . ¹¹ ನೋರುನೋನ್ಕಿ ಪಾಯೇ ಅಂಟೇದಿ ಮನುಷ್ಯುಡ್ನಿ ಹೊಲೆ ಸೇಸೆಟ್ಲೆದು , ನೋರು ನೋನಿಂಚ ವಚ್ಚೆ ಅಂಟೇದೆ ಮನುಷ್ಯುಡ್ನಿ ಹೊಲೆ ಸೇಸೇದಿ ಅನಿ ಸೊಪ್ಪೇ. ¹² ಅಪ್ಡು ಶಿಷ್ಯುಲು ವಚ್ಚಿ ವಾಡ್ನಿ - ಪರಿಸಾಯುಲು ಈ ಮಾಟ್ನಿ ಇನಿ ಬೇಸ್ರುಮುಸೇಸ್ಕೊಂಟಾರು ಅನಿ ನೀಕಿ ಗೊತ್ತಾಯಿನೋ ಅನಿ ಅಡುಗ್ರಿ . ¹³ ದಾನ್ಕಿ ಯೇಸು - ಪರ್ಲೋಕ್ಮುಲ ವುಂಡಿನ ನಾ ತಂಡ್ರಿ ನಟ್ಕುನ್ನಾ ವುಂಡಿನ ಶೆಟ್ಳುನಂತ ಬೇರ್ ಸಮೇತ್ಮು ಪೆರ್ಕಿ ಪಾಗೋಟ್ಪಾತದಿ . ¹⁴ ವಾಳ್ ಮಾಟ್ನಿ ಇಡಿಯಂಡ್ರಿ , ವಾಳೆ ಗುಡ್ಡೋಳ್ ,ಇಂಕೋಕ್ಳಿಕಿ ದಾವ್ನಿ ಸೂಪೆದಾನ್ಕಿ ಪಾತಾರು , ಗುಡ್ಡೋಡು ಗುಡ್ಡೋಡ್ಕಿ ದಾವ್ ಸೂಪ್ತೆ ವಾಳಿದ್ರೂ ಗುಂತ್ಲ ಪಡ್ತಾರು ಅನೆ. ¹⁵ ಅಪ್ಡು ಪೇತ್ರುಡು ಈ ಸಾಮ್ಯಮು ಅರ್ಥ್ಮುನಿ ಮಾಕಿ ಸೊಪ್ಪು ಅನಿ ಸೊಪ್ಪೇಕಿ ಯೇಸು ¹⁶ ಮೀಕು ಇಂಕ ಬುದ್ದಿ ಲೇದ ? ನೋರ್ ನೋನ್ಕಿ ಪಾಯೇ ಅಂಟೇದಿ ಕೊಡ್ಪ್ಲ ¹⁷ ಸೇರಿ ಬಹಿರ್ದೆಶುಮ್ಕಿ ಪಾತದನಿ ಮೀಕಿ ತಿಲಿಲೇದ ? ¹⁸ ಆಯ್ತೆ ನೋರಿಂಚ ವಚ್ಚೆ ಅಂಟೇವಿ ಮನ್ಸ್ ನೋನಿಂಚ ವಸ್ತಾವಿ , ಇವೆ ಮನುಷ್ಯುಲ್ನಿ ಹೊಲೆ ಸೇಸ್ತಾವಿ . ¹⁹ ಎಟ್ಟಂಟೆ ಮನ್ಸ್ ನೋನಿಂಚ ಶೆಡ್ಡೆ ಆಲೋಚ್ನುಮುಲು ಕೊಲೆ ಹಾದ್ರುಮು ಸೂಳ ಗಾರ್ಕ್ಮು ದೊಂಗ್ತನ್ಮು ಸುಳ್ಳು ಸಾಕ್ಷಿ ತಿಟ್ಟೆದಿ ವಸ್ತಾವಿ . ಮನುಷ್ಯುಡ್ನಿ ಶೆಡ್ಪೆ ಅಂಟೇವಿ ಇವೆ , ²⁰ ಆಯ್ತೆ ಸೈ ಕಡ್ಕೊಕುನ್ನ ಊಟ್ಮು ಸೇಸೇದಿ ಮನುಷ್ಯುಡ್ನಿ ಶೆಡ್ಪೆಟ್ಲೆದು ಅನೆ. ²¹ ಯೇಸು ಆನಿಂಚ ಲೇಸಿ ತೂರ್ ಸೀದೋನ್ ಪಟ್ನುಮುಲ ಪ್ರಾಂತ್ಯುಮ್ಲಿಕಿ ಪಾಯೇ . ²² ಆ ಸೀಮೆ ಇಂಚ ಕಾನನ್ಯಾದಿ ಒಕ್ದಿ ಲೇಸಿ ವಚ್ಚಿ - ಸ್ವಾಮೀ ದಾವಿದುಡು ಕುಮಾರುಡಾ , ನನ್ನೀ ಕರುಣಿಯ್ಯಿ , ನಾ ಬಿಡ್ಕಿ ದೈಮು ಕಾಟ್ಮು ಹೆಕ್ವಾಯಿಂದಿ ಅನಿ ಕೂಸ್ಕೊನೆ . ²³ ಆಯ್ತೆ ವಾಡು ದಾನ್ಕಿ ಏಮಿ ಉತ್ರುಮಿಯ್ಲೇ , ಅಪ್ಡು ವಾಡ್ ಶಿಷ್ಯುಲು ವಚ್ಚಿ - ಮಾ ಎನ್ಕ ಕೂಸ್ಕೊನಿ ವಸ್ತಾದಿ , ದಾನ್ನಿ ಅಂಪಿಚ್ಚಿಡಿ ಅನಿ ವಾಡ್ನಿ ಬೇಡ್ಕೊನೆ . ²⁴ ದಾನ್ಕ್ ವಾಡ್ - ತಪ್ಪಿಚ್ಕೊನಿನ ಗೊರ್ಲುಲಾಕ ವುಂಡೆ ಇಸ್ರಾಯೇಲುಲು ಇಂಟೋಳ್ ದೆಗ್ರುಕಿ ಹೊರ್ತು ಇಂಕ್ಯೋಳ್ ದೇಗ್ರುಕು ನಾನು ಅಂಪಿಚ್ನೋಡ್ ಕಾದು ಅನೆ . ²⁵ ಅಪ್ಡು ಆದಿ ವಚ್ಚಿ ಯೇಸುಕಿ ಅಡ್ಪಡಿ - ಸ್ವಾಮೀ , ನಾಕಿ ಅನುಗ್ರಹ್ಮು ಸೇಯಾಲ ಅನೆ . ²⁶ ದಾನ್ಕ್ ಯೇಸು - ಬಿಡ್ಳು ತಿನೇ ರೊಟ್ನಿ ಸೀಸ್ಕೊನಿ ಕುಕ್ಲು ಪಿಲ್ಲಿಲ್ಕಿ ಹೇಸೇದಿ ಸರಿಕಾದು ಅನಿ ಉತ್ರುಮು ಇಚ್ಚೇಕಿ ²⁷ ಸ್ವಾಮೀ , ಆ ಮಾಟ ನಿಜ್ಮ , ಕುಕ್ಲು ಪಿಲ್ಲಿಲಂತೂ ವಾಳ್ ಯಜ್ಮಾನ್ಲು ಮೇಜಿಂಚ ಪಡೆ ರೊಟ್ಟ ತುಂಡ್ಲುನಿ ತಿನ್ಟಾವೆ ಅನೆ . ²⁸ ಯೇಸು ದಾನ್ಕಿ - ಅಮ್ಮಾ , ನೀ ನಂಬುಕ್ಮು ಹೆಕ್ವ , ನೀ ಮನ್ಸ್ ಲಾಕ್ನೆ ಆವ್ನಿ ಅನಿ ಉತ್ರುಮು ಇಚ್ಚೆ . ಅದೇ ಗಲ್ಗ್ಲ ದಾನ್ ಬಿಡ್ದ ಸ್ವಸ್ಥ್ಮಾಯೇ . ²⁹ ಯೇಸು ಆನಿಂಚ ಲೇಸಿ ಗಲಿಲಾಯ್ಮು ಸನುದ್ರುಮು ದೆಗ್ರುಕಿ ವಚ್ಚಿ ಬೆಟ್ಟುಮ್ನಿ ಎಕ್ಕಿ ಆನ ಕುಚ್ಕೊನೆ . ³⁰ ಅಪ್ಡು ಜನಲು ಗುಂಪು ಗುಂಪಾಯಿ ವಾಡ್ ದೆಗ್ರುಕಿ ವಚ್ಚಿ ಕುಂಟ್ಲು ಗುಡ್ದೊಳು ಮೂಗುಲು ಸೈ ಕಾಲ್ಲು ಲೇನಿನೋಳು ಈ ಇಂಕ ಅನೇಕ್ಲು ಪಿಲ್ಚಿ ತೋಡ್ಕೊಚ್ಚಿ ವಾಳ್ನಿ ಯೇಸು ಪಾದಾಲ್ ದೆಗ್ರುಲ ಇಡ್ಸ್ರಿ , ವಾಡು ವಾಳ್ನಿ ವಾಸಿ ಸೇಸೆ . ³¹ ಮೂಗೊಳಾಯುoಡೋಳು ಮಾಟ್ಲಾಡಿoದಾನ್ನಿ ಸೇತ್ಲು ಕಾಳ್ಳು ಲೇನೋಳು ಸ್ವಸ್ಥುಮಾಯಿಂದಾನ್ನಿ ಕುಂಟ್ಲಿಕಿ ಕಾಲ್ ವಚ್ಚಿಂದಾನ್ನಿ ಗುಡ್ಡೋಳ್ಕಿ ಕನ್ನು ವಚ್ಚಿಂದ್ನಿ ಜನಲು ಕನಿ ಆಶ್ಚರ್ಯುಮು ಪಡಿ ಇಸ್ರಾಯೇಲ್ ಜನಲ ದೇವುಡ್ನಿ ಕೊಂಡಾಡ್ರಿ . ³² ಅಪ್ಡು ಯೇಸು ತನ್ ಶಿಷ್ಯುಲ್ನಿ ಹತ್ರುಮ್ಕಿ ಪಿಲ್ಚಿ ವಾಳ್ಕಿ - ಈ ಜನಲು ಸೂಸಿ ಕನಿಕರ್ಮು ಪಡ್ತಾನು , ವಾಳು ನಾ ದೆಗ್ರುಕಿ ವಚ್ಚಿ ಇಪ್ಡು ಮೂಡು ದಿನ್ಮಾಯೇ , ವಾಳ್ಕಿ ಊಟುಮ್ಕಿ ಏಮಿ ಲೇದು , ವಾಳ್ನಿ ಉಪ್ವಾಸ್ಮಾಯಿ ಅಂಪಿಚ್ಚಿ ಇಡ್ಸೇಕಿ ನಾಕಿ ಮನ್ಸ್ ಲೇದು , ದಾವ್ಲ ಬಳಲಿ ಪೋಯೋಳು ಅನಿ ಸೊಪ್ಪೇ . ³³ ಶಿಷ್ಯುಲು - ಇಂತ ಜನಲ್ನಿ ತ್ರುಪ್ತಿನಿ ಪಡಿಚ್ಚೆಕಿ ಆವ್ಲೆನಂತ ರೊಟ್ಟ ಈ ಅಡ್ವಿಲ ಮಾಕಿ ಯಾನಿಂಚ ವಸ್ತಾದಿ ? ಅನೇಕಿ ಯೇಸು - ಮೀಲಾ ಎನ್ನಿ ರೊಟ್ಳು ವುಂಡಾವಿ ಅನಿ ಅಡ್ಗಿನ್ದಾಂಕಿ ವಾಳು ³⁴ ಯೋಡು ರೊಟ್ಳು ಮಲಿ ಕೊಂಚ್ಮು ಸನ್ವಿ ಶಾಪ್ಲು ವುಂಡಾವಿ ಅನೆ . ³⁵ ಅಪ್ಡು ವಾಡು ಜನಲು ಗುಂಪ್ಕಿ ನೆಲ್ಮಿಂದ ಕುಚ್ಚೊಂಡ್ರಿ ಅನಿ ಅಪ್ಪಣ್ಮು ಇಚ್ಚಿ ³⁶ ಆ ಯೋಡು ರೊಟ್ಳುನಿ ಆ ಶಾಪ್ಲುನಿ ಸೀಸ್ಕೊನಿ ದೇವುಡು ಸ್ತೋತ್ರುಮು ಸೇಸಿ ಅವ್ಟ್ಲುನಿ ಇರ್ಸಿ ಶಿಷ್ಯುಲುಕಿ ಇಚ್ಚೇಕಿ ಶಿಷ್ಯುಲು ಗುಂಪ್ನೋಲ್ಕಿ ಪಂಚಿಚ್ರಿ . ಅಂದ್ರು ಊಟ್ಮು ಸೇಸಿ ತೃಪ್ತುಲಾಯ್ರಿ . ಮಿಕ್ಕಿನ ³⁷ ತುಂಡ್ಲುನಿ ಕೂಡ್ಬಿಚ್ಚಿನಾಯಿ ಯೋಡು ಎಡುಗ್ಲು ನಿಂಡೆ . ³⁸ ಊಟ್ಮು ಸೇಸ್ನೋಳು , ಆಡೋಳು ಬಿಡ್ಳು ಕಾಕುನ್ನ , ಮೊಗೋಳೆ ನಾಲ್ಗು ಸಾವ್ರಾಲು ಮಂದಿಲು . ³⁹ ಯೇಸು ಆ ಜನಲು ಗುಂಪ್ನಿ ಅಂಪಿಚ್ಚಿ ದೋಣಿನಿ ಎಕ್ಕಿ ಮಗದಾನ್ಮು ಸೀಮೇಕಿ ವಚ್ಚೆ .