¹ ಆ ದಿವ್ಸುಮ್ಲ ಯೇಸು ಇಂಟಿoಚ ಪಾಯಿ ಸಮುದ್ರುಮು ದಡುಮ್ಲ ಕುಚ್ಚೋನೆ . ² ಬಹಳ್ಮು ಜನಲು ವಾಡ್ ದೆಗ್ರುಕಿ ವಚ್ಚಿಂದಾನ್ನಿಂಚ ವಾಡು ದೋಣಿ ಎಕ್ಕಿ ಕುಚ್ಚೋನೆ . ³ ಆ ಜನಲಂದ್ರು ಈ ದಡುಮಿಂದ ನಿಲ್ಪಡುಂಡ್ರಿ . ಅಪ್ಡು ಯೇಸು ವಾಳ್ಕಿ ಸಾಮ್ಯುಮು ರೂಪ್ಮಾಯಿ ಅನೇಕ್ಮು ಸಂಗತಿಲ್ನಿ ಸೊಪ್ಪೇ . ⁴ ಎಟ್ಟಂಟೆ ಬಿತ್ತೋಡು ಬಿತ್ತೆದಾನ್ಕಿ ಪಾಯೇ . ವಾಡು ಬಿತ್ತೆನಪ್ಡು ಕೊಂಚ್ಮು ಇತ್ಲು ದಾವ್ ಮಗ್ಗುಲ್ಲಾ ಪಡೆ , ಗುವ್ಲು ವಚ್ಚಿ ಅವುಟ್ಲುನಿ ತಿನಿಡ್ಸೆ . ⁵ ಕೊಂಚ್ಮು ಇತ್ಲು ಹೆಕ್ವ ಮನ್ಲೇನಿನ ಬಂಡ ನೆಲ್ಮುಲ ಪಡೆ , ಆನ ಮನ್ನು ತೆಲ್ಗವುನ್ಡಿನ್ದಾನ್ನಿಂಚ ಅವಿ ಜಲ್ದಿ ಮೊಳ್ಸೆ , ಆಯ್ತೆ ಎಂಡ್ ವಚ್ನಪ್ಡು ಬಾಡಿ ಬೇರ್ಲೇನಿನ ಕಾರ್ಣುಮಿಂಚ ಎನ್ಡ್ಪಾಯೇ . ⁶ ಮಲಿ ಕೊಂಚ್ಮು ಇತ್ಲು ಮುಂಡ್ಲು ಶೆಟ್ಲುಲ ಪಡೆ , ⁷ ಮುಂಡ್ಳು ಶೆಟ್ಳು ಪೆರ್ಗಿ ಅವ್ಟ್ಲುನಿ ಅಡ್ಗಿಚ್ಚಿಡ್ಸೆ . ⁸ ಇಂಕ ಕೊಂಚ್ಮು ಮಂಚಿ ನೆಲ್ಮುಲ ಪಡಿ ಒಕ್ಟಿ ನೂರಂತ , ಒಕ್ಟಿ ಅರವತಂತ , ಒಕ್ಟಿ ಮೊಪೈಅಂತ ಪಲ್ಮುನಿ ಇಚ್ಚೆ . ⁹ ಶವ್ಲುವುಂಡೋಡು ಇನ್ನಿ ಅನೆ . ¹⁰ ಆಮಿಂದ ಯೇಸು ಶಿಷ್ಯುಲು ವಚ್ಚಿ - ಎಂದ್ಗೂ ಸಾಮ್ಯುಮು ರೂಪ್ಮಾಯಿ ವಾಳ್ ಜೊತ್ಲ ಮಾಟ್ಲಾಡ್ತಾವು ಅನಿ ಅಡುಗ್ರಿ . ¹¹ ಅಂದ್ಗು ವಾಡು ವಾಳ್ಕಿ - ಪರ್ಲೋಕ್ಮು ರಾಜ್ಯುಮಿನ ಗುಟ್ಟುಲ್ನಿ ತಿಳ್ಚೆ ವರ್ಮು ಮೀಕಿ ಇಚ್ಚಿಂದಿ , ವಾಳ್ಕಿ ಇಯ್ಲೇದು . ¹² ಎಂದ್ಕಂಟೆ ವುoಡೋಡ್ಕಿ ಇಚ್ಚಲ್ಪಡ್ತಾದಿ , ವಾಡ್ಕಿ ಮಲ್ಲೀ ಹೆಕ್ವಾಯ್ತಾದಿ , ಲೇನೋಡ್ ತೊಟ್ಟಿಂಚ ವುಂಡೇದಿ ಸೀಸಲ್ಪಡ್ತಾದಿ . ¹³ ವಾಳ್ ಜೊತ್ಲ ಸಾಮ್ಯುಮು ರೂಪ್ಮಾಯಿ ಮಾಟ್ಲಾಡೆದಾನ್ಕಿ ಕಾರ್ಣುಮು ಎಮಂಟೆ ವಾಳ್ಕಿ ಕಂಡ್ಳುನ್ಟೇನು ಸೂಸೆಟ್ಲೆದು , ಶವ್ಲುನ್ಟೇನು ಇನೆಟ್ಲೆದು ಮಲಿ ತಿಳ್ಚ್ಕೊನೆಟ್ಲೆದು . ¹⁴ ಯೇಶಾಯುಡು ಸೊಪ್ಪಿನ ಪ್ರವಾದ್ನುಮು ವಾಳ್ಳಾ ನೆರ್ವೆರ್ತಾದಿ , ಅದೇಮಂಟೆ - ಮೀರು ಶವ್ಳುಂಡಿ ಇಂಟೇನು ತಿಳ್ಚ್ಕೊನೆಟ್ಲೆದು , ಕಂಡ್ಲುಂಡಿ ಸೂಸ್ತೆನು ಕನೇಕೆಲೇದು . ¹⁵ ಈ ಜನಲು ಹೃದಯ್ಮು ಕೊಬ್ಬೆ , ವೂಳ್ ಶವ್ಲು ಮಂದ್ಮಾಯೇ , ವೂಳು ಕಂಡ್ಳು ಮೂಸ್ಕೊನ್ನಾರು . ಮೀರು ಕಂಡ್ಲಿಂಚ ಕನಿ ಶವ್ಲಿಂಚ ಇನಿ ಹೃದಯ್ಮಿಂಚ ತಿಳ್ಚಿ ನಾ ತೊಟ್ಗಿ ತಿರಿಕೋನಿ ನಾಯಿಂಚ ಸ್ವಸ್ಥಥ್ಮುನಿ ಎಟ್ಟೂ ಹೊಂದ್ಗುಡ್ದನಿ ಸೇಸ್ಕೊನ್ನಾರು ಅನೇದಿ . ¹⁶ ಆಯ್ತೆ ಮೀ ಕಂಡ್ಳು ಕನ್ಟಾವಿ , ಮೀ ಶವ್ಲು ಇಂಟಾವಿ , ದಾನ್ನಿಂಚ ಮೀರು ಧನ್ಯುಲು . ¹⁷ ಮೀಕಿ ಸತ್ಯುಮಾಯಿ ಸೊಪ್ತಾನು , ಮೀರು ಸೂಸ್ತ ವುಂಡೆ ಕಾರ್ಯಲ್ನಿ ಬಹುಮಂದಿಲು ಪ್ರವಾದಿಲು ಮೊಗೋಳು ಸೂಡಾಲನಿ ಅಪೇಕ್ಷಿಸ್ತೆನು ಸೂಡ್ಲೆದು , ಮೀರು ಇಂಟವುಂಡೆ ಸಂಗತಿಲ್ನಿ ವಾಳು ಇನಾಲನಿ ಅಪೇಕ್ಷಿಸ್ತೆನು ಇನ್ಲೇದು . ¹⁸ ಬಿತ್ತೋಡು ವಿಷ್ಮಾಯಿನ ಸಾಮ್ಯುಮು ಅರ್ಥುಮ್ನಿ ಇನಂಡ್ರಿ ¹⁹ ಯೌಡಾರ ಪರ್ಲೋಕುಮು ರಾಜ್ಯುಮಿನ ವಾಕ್ಯುಮುನಿ ಇನಿ ತಿಳ್ಚ್ಕೊಕುನ್ನ ವೂಳ್ಳಾ ಸೈತಾನುಡು ವಚ್ಚಿ ಆ ಮನುಷ್ಯುಡು ಮನ್ಸ್ಲ ಬಿತ್ತಿಂದಾನ್ನಿ ಸಿಸೇಸ್ತಾಡು , ಈ ಮನುಷ್ಯುಡೆ ಇತ್ತ ಪಡಿನ ದಾವ್ ಮಗ್ಲೋಡಾಯ್ನಾಡು . ²⁰ ಒಕ್ಡು ವಾಕ್ಯುಮ್ನಿ ಇನಿನ ತಕ್ಷಣ್ಮೆ ಸಂತೋಷ್ಮಿಂಚ ದಾನ್ನಿ ಸ್ವೀಕರಿಸ್ತಾಡು , ²¹ ತನ್ಕಿ ಬೇರ್ಲೇನಿನ ಕಾರ್ಣುಮಿಂಚ ವೂಡು ಕೊಂಚ್ಮು ಕಾಲ್ಮು ಮಾತ್ರುಮೆ ವುಂಡಿ ಆ ವಾಕ್ಯುಮು ನಿಮಿತ್ಮಾಯಿ ಸಂಕಟ್ಮಾವ್ನಿ ಹಿಂಸ್ಮಾವ್ನಿ ವಸ್ತೆ ಜಲ್ದಿ ಎಡ್ಗಿ ಪಡ್ತಾಡು , ವೂಡೆ ಇತ್ತ ಪಡಿನ ಬಂಡಿನ ನೆಲ್ಮಾಯುನ್ಡೋಡು . ²² ಒಕ್ಡು ವಾಕ್ಯುಮ್ನಿ ಇನಿಂದಾಯ್ತೆನು ಪ್ರಪಂಚ್ಮಿನ ಚಿಂತ ಐಶ್ವರ್ಯುಮಿನ್ಚಾಯೆ ಮೋಸ್ಮು ಆ ವಾಕ್ಯುಮುನಿ ಅಡ್ಗಿಚ್ಚಿಇಡ್ಸೆದಾನ್ನಿಂಚ , ಪಲ್ಮುನಿ ಇಯ್ಕುನ್ನ ವುನ್ಟಾಡು , ವೂಡೆ ಮುಂಡ್ಲು ಶೆಟ್ಳುಲ್ಲಾ ಇತ್ತ ಪಡಿನ ನೆಲ್ಮಾಯುಂಡಾಡು . ²³ ಒಕ್ಡು ವಾಕ್ಯುಮ್ನಿ ಇನಿ ತಿಳ್ಚ್ಕೋನಿ ಪಲ್ವಂತುಡಾಯಿ ನೂರಂತಾವ್ನಿ ಅರ್ವತಂತಾವ್ನಿ ಮುಪೈಯಂತಾವ್ನಿ ಪಲ್ಮುನಿ ಇಸ್ತಾಡು , ವೂಡೆ ಮಂಚಿ ನೆಲ್ಮಾಯುಂಡೋಡು ಅನಿ ಸೊಪ್ಪೆ . ²⁴ ವಾಡು ಮಲ್ಲೋಕ್ಟಿ ಸಾಮ್ಯುಮುನಿ ಸೊಪ್ಪೆ , ಅದೇಮಂಟೆ - ಪರ್ಲೋಕುಮು ರಾಜ್ಯುಮು ಮಂಚಿ ಇತ್ನಿ ವಾಳ್ ಸೇನ್ಲ ಬಿತ್ತಿನ ಓಕ್ ಮನುಷ್ಯುಡ್ಕಿ ಹೊಲುಕ್ಮ್ಮಾಯಿಂದಿ . ²⁵ ಆಯ್ತೆ ಜನಲು ನಿದ್ರಾ ಸೇಸೆ ಕಾಲುಮ್ಲ ವಾಡ್ ವೈರಿ ವಚ್ಚಿ ಗೋದ್ವುಲು ಮದ್ಯಲ ಹಣಜಿನಿ ಬಿತ್ತಿ ಪಾಯೇ . ²⁶ ಗೋದ್ವುಲು ಪೆರ್ಗಿ ಪಲ್ಮುಕಿ ವಚ್ನಪ್ದು ಹಣಜಿನು ಕನ್ಪಡೆ . ²⁷ ಅಪ್ಡು ಯಜ್ಮಾನುಡು ಆಳ್ಳು ವಾಡ್ ದೆಗ್ರುಕಿ ವಚ್ಚಿ - ಅಯ್ಯಾ , ನುವ್ವ ನೀ ಸೇನ್ಲ ಮಂಚಿ ಇತ್ನಿ ಬಿತ್ನಾವೆ , ಹಣಜಿ ಯಾನಿಂಚ ವಚ್ಚೆ ಅನಿ ಅಡ್ಗೇಕಿ ವಾಡು ²⁸ ಇದಿ ಓಕ್ ವೈರಿ ಸೇಸಿನ ಕೆಲ್ಸ್ಮು ಅನ್ನಪ್ದು ಆಳ್ಳು ವಾಡ್ನಿ ²⁹ ಅಟ್ಟಾಯ್ತೆ ಮಾಮು ದಾನ್ನಿ ಆರ್ಬಿಚ್ಚಿ ಸೀತಾಮು ಅನಿ ಅಡ್ಗ್ನಪ್ದು ವಾಡು - ವದ್ದು , ಹಣಜಿನಿ ಆರ್ಬಿಚ್ಚಿ ಸೀಸೆನಪ್ಡು ದಾನ್ ಜೊತ್ಲ ಗೊದ್ವುಲ್ನಿಏಮಾರ ಪೆರ್ಕೋಳು. ³⁰ ಸುಗ್ಗಿ ಕಾಲ್ಮು ಗಂಟ ರೊಂಡುನು ಪೆರ್ಗ್ನಿ , ಸುಗ್ಗಿ ಕಾಲುಮ್ಲ ನಾನು ಕೋಸೋಳ್ಕಿ - ಮೊದ್ಲು ಹಣಜಿನಿ ಆರ್ಬಿಚ್ಚಿ ಸೀಸಿ ದಾನ್ನಿ ಕಾಲ್ಚೆದಾನ್ಕು ಮೋಪ್ ಕಟ್ಟೇಸಿ , ಗೋದ್ವುಲ್ನಿ ನಾ ಕನ್ಜುಮ್ಕಿ ನಿಂಪಂಡ್ರಿ ಅನಿ ಸೊಪ್ತಾನು ಅನೆ . ³¹ ಯೇಸು ಇಂಕೊಕ್ಟಿ ಸಾಮ್ಯನಿ ವಾಳ್ಕಿ ಸೊಪ್ಪೆ , ಅದೇಮಂಟೆ - ಪರ್ಲೋಕ್ಮು ರಾಜ್ಯುಮು ಸಾಸ್ವೆ ಗಿಂದ್ಲುಕಿ ಹೋಲುಕ್ಮಾಯಿಂದಿ .ಓಕ್ ಮನುಷ್ಯುಡು ದಾನ್ನಿ ಸೀಸ್ಕೋನಿ ಪಾಯಿ ವಾಡ್ ಸೇನ್ಲ ಬಿತ್ತೆ . ³² ಅನ್ನೀ ಇತ್ಲುಕಿಂತಾನು ಸನ್ದಾಯಿಂದಿ , ಪೆರ್ಗಿನ ಮಿಂದ ಕಾಯಿಪಲ್ಯುಮು ಶೆಟ್ಳುಕಿಂತ ಪೆದ್ದಿದಾಯಿ ಮಾನಾಯ್ತಾದಿ , ಆಕಾಶ್ಮುಲ ಪಾರಾಡೆ ಪಕ್ಷಿಲು ವಚ್ಚಿ ದಾನ್ ಕೊಂಬುಲ್ಲಾ ವಾಸ್ಮು ಸೇಸ್ತಾವಿ ³³ ಇಂಕೋಕ್ಟಿ ಸಾಮ್ಯುಮ್ನಿ ವಾಳ್ಕಿ ಸೊಪ್ಪೆ , ಅದೇಮಂಟೆ - ಪರ್ಲೋಕ್ಮು ರಾಜ್ಯುಮು ಪುಲ್ಪು ಸಂಪ್ಳಿಕೆಕಿ ಹೋಲುಕ್ಮಾಯಿಂದಿ . ದಾನ್ನಿ ಓಕ್ ಆಡ್ದಿ ಸೀಸ್ಕೋನಿ ಮೂಡು ಸೇರು ಸಂಪ್ಳುಕ್ಮುಲ ಕಲ್ಪಿಪೆಟ್ಟೆಕಿ ಆ ಸಂಪ್ಳುಕ್ಮು ಅಂತ ಪುಲ್ಪಾಯೆ . ³⁴ ಯೇಸು ಈ ಮಾಟ್ಲುನಿ ಅಂತ ಜನಾಲು ಗುಂಪ್ಕಿ ಸಾಮ್ಯುಮು ರೂಪ್ಮಾಯಿ ಸೊಪ್ಪೆ , ಸಾಮ್ಯುಮು ಲೇಕುಣ್ಣ ಒಕ್ಟ್ನು ಸೊಪ್ಲೆ . ³⁵ ನಾನು ನೋರ್ ಸೀಸಿ ಸಾಮ್ಯುಮು ರೂಪ್ಮಾಯಿ ಉಪದೇಶಿಸ್ತಾನು , ಲೋಕಾದಿಪತಿಡಿಂಚ ಮರೆಯಾಯುಂಡೆವ್ನಿ ಆಕ್ಟರ್ಕಿ ಎತ್ಕೋಸ್ತಾನು ಅನಿ ಓಕ್ ಪ್ರವಾದಿ ಮುಖಾಂತ್ರುಮು ಸೊಪ್ಪಿನ ಮಾಟ ನೆರ್ವೇರ್ಸೆ . ³⁶ ಅಪ್ಡು ಯೇಸು ಜನಲ್ನಿ ಇಡ್ಸಿ ಇಂಟ್ಕಿ ಪಾಯಿನ್ಮಿಂದ ಯೇಸು ಶಿಷ್ಯುಲು ವಚ್ಚಿ - ಸೇನ್ಲಿನ ಹಣಜಿ ಸಾಮ್ಯುಮು ಅರ್ಥುಮ್ನಿ ಮಾಕಿ ಸೊಪ್ಪು ಅನ್ರಿ . ³⁷ ದಾನ್ಕಿ ಯೇಸು - ಮಂಚಿ ಇತ್ನಿ ಬಿತ್ತೋಡು ಅಂಟೆ ಮನುಷ್ಯು ಕುಮಾರುಡು , ³⁸ ಸೇನಂಟೆ ಈ ಲೋಕ್ಮು , ಮಂಚಿ ಇತ್ತ ಅಂಟೆ ಪರ್ಲೋಕ್ಮು ರಾಜ್ಯುಮೋಳು , ಹಣಜಿ ಅಂಟೆ ಸೈತಾನ್ಮೊಳು , ³⁹ ದಾನ್ನಿ ಬಿತ್ತೆ ವೈರಿ ಅಂಟೆ ಸೈತಾನುಡು , ಸುಗ್ಗಿ ಕಾಲ್ಮು ಅಂಟೆ ಯುಗ್ಮು ಸಮಾಪ್ತಿ , ಕೊಸೋಳು ಅಂಟೆ ದೇವದೂತುಲು . ⁴⁰ ಇಟ್ಟುoಡೆದಾಯಿ ಎಟ್ಟ ಹಣಜಿನಿ ಆರ್ಪ್ಕೊನಿಸೀಸಿ ಕಾಲ್ಚಿಡ್ಸ್ತಾರೋ , ಅಟ್ಟೆ ಯುಗ್ಮು ಸಮಾಪ್ತಿಲ ನಡ್ಸ್ತಾದಿ ⁴¹ ಮನುಷ್ಯುಕುಮಾರುಡು ತನ್ ದೂತುಲ್ನಿ ಅಂಪಿಸ್ತಾಡು , ವಾಳು ಯೇಸು ರಾಜ್ಯುಮುನೋನಿಂಚ ಅಂತ ಕoಟಕುಲ್ನಿ ಅಧರ್ಮಿಲ್ನಿ ಕೂಡ್ಬಿಚ್ಚಿ ಅಗ್ಗಿ ಕೊಂಡುಮ್ಲ ಏಸ್ತಾರು , ⁴² ಆನ ಗೋಳಾಟ್ಮು ಕಟಕಟ್ಮು ಪಂಡ್ಳುಕೊರ್ಕೆದಿ ವುಂಟಾವಿ . ⁴³ ಅಪ್ಡು ನೀತಿವಂತುಲು ಮನ್ ತಂಡ್ರಿ ರಾಜ್ಯುಮ್ಲ ಸೂರ್ಯುಡಟ್ಗ ಪ್ರಕಾಶಿಸ್ತಾರು . ಶವ್ಲುನ್ಡೋಡು ಇನ್ನೀ ಅನೆ . ಪರ್ಲೋಕ್ಮು ರಾಜ್ಯುಮು ಸೇನ್ಲ ಪೂಡ್ಸಿಪೆಟ್ಟಿನ ದ್ರವ್ಯುಮ್ಕಿ ಹೋಲುಕ್ಮಾಯಿಂದಿ . ಒಕ್ಡು ದಾನ್ನಿ ಕನ್ಕೋನಿ ಮೂಸೀಡ್ಸಿ ದಾನಿಂಚಾಯಿನ ಸಂತೋಷ್ಮಿಂಚ ತನ್ ಬದ್ಕ್ನಂತ ಅಮ್ಮಿ ಆ ಸೇನ್ನಿ ಕೊನ್ಕೋನೆ . ⁴⁴ ಒಕ್ಡು ದಾನ್ನಿ ಕನ್ಕೋನಿ ಮೂಸೀಡ್ಸಿ ದಾನಿಂಚಾಯಿನ ಸಂತೋಷ್ಮಿಂಚ ತನ್ ಬದ್ಕ್ನಂತ ಅಮ್ಮಿ ಆ ಸೇನ್ನಿ ಕೊನ್ಕೋನೆ . ⁴⁵ ಮಲಿ ಪರ್ಲೋಕ್ಮು ರಾಜ್ಯುಮು ಮಂಚಿವಾಯ್ನ ಮುತ್ತುಲ್ನಿ ಹುಡ್ಕೆ ವ್ಯಾಪಾರಸ್ತುಡ್ಕಿ ಹೋಲುಕ್ಮಾಯಿಂದಿ . ⁴⁶ ವಾಡು ಬಹು ಬೆಲೆವುಂಡೆ ಓಕ್ ಮುತ್ನಿ ಕನಿ ತನ್ ಬದ್ಕ್ನಂತ ಅಮ್ಮಿ ವಚ್ಚಿ ದಾನ್ನಿ ಕನ್ಕೋನೆ ⁴⁷ ಮಲಿ ಪರ್ಲೋಕ್ಮು ರಾಜ್ಯುಮು ಓಕ್ ವಲ್ಕಿ ಹೋಲುಕ್ಮಾಯಿಂದಿ . ದಾನ್ನಿ ಸಮುದ್ರುಮ್ಲ ಏಸಿ ಅನ್ನಿ ಜಾತಿ ಶಾಪ್ಳುನಿ ಪಟ್ರೀ . ⁴⁸ ಆದಿ ನಿಂಡಿನ್ಮಿಂದ ದಾನ್ನಿ ದಡುಮ್ಕಿ ಎಳ್ಸಿ ಕುಚ್ಕೋನಿ ಮಂಚಿ ಶಾಪ್ಳುನಿ ಪುಟ್ಟಿಲ್ಲಾ ನಿಂಪ್ಕೋನಿ ಶೆಡ್ಡೆ ಶಾಪ್ಳುನಿ ಪಾರೇಸಿಇಡ್ಸ್ರೀ . ⁴⁹ ಅಟ್ಟೆ ಯುಗ್ಮು ಸಮಾಪ್ತಿಲ ಅಯ್ತಾದಿ . ದೇವದೂತುಲು ವಚ್ಚಿ ನೀತಿವಂತುಲುನೋನಿಂಚ ಶೆಡ್ದೋಲ್ನಿ ಬೇರೆ ಸೇಸಿ ವಾಳ್ನಿ ಅಗ್ಗಿ ಕೊಂಡುಮ್ಲ ಏಸ್ತಾರು . ⁵⁰ ಆನ ಗೋಳಾಟ್ಮು ಕಟಕಟಮು ಪಂಡ್ಳುಕೊರ್ಕೆದಿ ವುಂಟಾವಿ . ⁵¹ ಈ ಅನ್ನೀ ಮಾಟ್ಲು ಅರ್ಥ್ಮು ಮೀಕಿ ತಿಲ್ಸ್ನೋ ಅನಿ ಅಡ್ಗ್ನಪ್ಡು ವಾಳು - ತಿಲ್ಸೆ ಅನ್ರಿ . ⁵² ಅಪ್ಡು ಯೇಸು ವಾಳ್ಕಿ - ಇಟ್ಟುಂಡೆದಾಯಿ ಪರ್ಲೋಕ್ಮು ರಾಜ್ಯುಮು ವಿಷಯ್ಮಾಯಿ ಉಪದೇಶ್ಮು ಹೊಂದ್ಕೋನಿ ಶಿಕ್ಷಿತುಡಾಯಿನ ಪ್ರತಿಯೊಕ್ಡು ಶಾಸ್ತ್ರೋಪದೇಶಕುಡು ಇಂಟ್ ಯಜ್ಮಾನುಡ್ಕಿ ಹೋಲುಕ್ಮಾಯಿನಾಡು . ವಾಡು ವಾಡ್ ಬೊಕ್ಕಸ್ಮುನೋನಿಂಚ ಕೊತ್ ವಸ್ತುಲ್ನಿ ಪಾತ್ ವಸ್ತುಲ್ನಿ ಆಕ್ಟರ್ಕಿ ಎತ್ಕೊಸ್ತವುನ್ದಾಡು ಅನಿ ಸೊಪ್ಪೆ . ⁵³ ಯೇಸು ಈ ಸಾಮ್ಯಮುನಿ ಮುಗ್ಬಿಚ್ಚಿನ್ಮಿಂದ ಆನಿಂಚ ಪಾಯೇ . ⁵⁴ ಆಮಿಂದ ಯೇಸು ವಾಳ್ ಊರ್ಕಿ ವಚ್ಚಿ ಆನುಂಡೆ ಸಭಾಮಂದಿರ್ಮುಲ ಜನಲ್ಕಿ ಉಪದೇಶ್ಮು ಸೇಸ್ತವುಂಡೆ . ವಾಳು ಇನಿ ಅತ್ಯಾಶ್ಚರ್ಯುಮು ಪಡಿ - ವೂಡ್ಕಿ ಈ ಜ್ನಾನ್ಮು ಈ ಮಹಾತ್ಕಾರ್ಯುಲು ಯಾನಿಂಚ ವಚ್ಚಿನಾವಿ ? ವೂಡು ಆ ಬಡಗಿ ಕೊಡ್ಕುಕದ . ⁵⁵ ವೂಡ್ ತಲ್ಲಿ ಮರಿಯಳುಅನೇದಿಕದ . ಯಾಕೊಬುಡು ಯೋಸೆಫುಡು ಸೀಮೊನುಡು ಯೂದುಡು ವೂಳು ವೂಡ್ ತೊಂಬುಳ್ಳುಕದ ⁵⁶ ವೂಡ್ ಶೆಲ್ಲುಲು ಅಂದ್ರು ಮಾಲ ವುಂಡಾರು ಕದ . ಅಟ್ಟಾಯ್ತೆ ಇವಂತ ವೂಡ್ಕಿ ಯಾನಿಂಚ ವಚ್ಚಿನಾವಿ ? ಅನಿ ಮಾಟ್ಲಾಡ್ಕೋನಿ ಯೇಸು ವಿಷಯ್ಮಾಯಿ ಬೇಸರ್ಮುಗೊನ್ರಿ . ^{58 57} ಆಯ್ತೆ ಯೇಸು ವಾಳ್ಕಿ - ಪ್ರವಾದಿ ಬೇರೆ ಯಾನುಂಟೆನು ವಾಡ್ಕಿ ಮರ್ಯಾದೆ ವುಂಡಾದಿ , ಆಯ್ತೆ ಸ್ವದೆಶ್ಮುಲಾನು ಸ್ವಂತ ಇನ್ಟ್ಲಾನು ಮಾತ್ರ ಮರ್ಯಾದೆಲೇದು ಅನೆ . v 58 ವಾಳು ಯೇಸುನಿ ನಂಬ್ಕುಣ್ಣಾ ಪಾಯಿಂದಾನ್ನಿಂಚ ಯೇಸು ಆನ ಅನೇಕ್ಮು ಮಹಾತ್ಕಾರ್ಯುಲ್ನಿ ಸೇಯ್ಲೇದು .