^{1 2 3} 1 ಅಪ್ಡು ಯೇಸು ವಾಳ್ ಜೊತ್ಲ ಸಾಮ್ಯುಮು ರೂಪ್ಮಾಯಿ ಮಾಟ್ಲಾಡೆದಾನ್ಕಿ ತೊಡಗಿ- ಓಕ್ ಮನುಷ್ಯುಡು ಓಕ್ ದ್ರಾಕ್ಷೆ ತೋಟುಮ್ನಿ ಸೇಸಿ ಸುತ್ಲು ಬೇಲಿ ಏಬಿಚ್ಚಿ ದ್ರಾಕ್ಷಿ ಆಲೆಕಾಯಿ ಓಕ್ ಗುಂತ್ನಿ ಸೀಬಿಚ್ಚಿ ಹೊಡೆನಿ ಕಟ್ಬಿಚ್ಚಿ ಒಕ್ಲಿಗುಲ್ಕಿ ವಾರಂಕಿ ಇಚ್ಚಿ ಬೇರೊಕ್ಟಿ ದೇಶುಮ್ಕಿ ಪಾಯೇ . 2 ಫಲ್ಮು ಕಾಲ್ಮು ವಚ್ನಪ್ಡು ದ್ರಾಕ್ಷೆ ತೊಟ್ಮಿನ ಪಂಡ್ಳು ಪಾಲ್ನಿ ಆ ಒಕ್ಲಿಗುಲಿಂಚ ಸೀಸ್ಕೋನಿ ವಚ್ಚೆದಾನ್ಕಾಯಿ ಓಕ್ ಆಳ್ನಿ ವಾಡ್ ದೆಗ್ರುಕಿ ಅಂಪಿಚ್ಚೆ . 3 ವಾಳು ವಾಡ್ನಿ ಪಟ್ಕೋನಿ ಕೊಟ್ಟಿ ಉತ್ಸೇತ್ಲ ಅಂಪಿಚ್ಚಿ ಇಡ್ಸ್ರಿ . ^{4 5} 4 ಆ ಧಣಿ ತಿರ್ಗಿ ಇಂಕೊಕ್ಡು ಆಳ್ನಿ ವಾಳ್ ದೆಗ್ರುಕಿ ಅಂಪಿಚ್ಚೆಕಿ ವಾಡ್ನಿ ವಾಳು ತಲಕೈ ತಲಕೈ ಮಿಂದ ಕೊಟ್ಟಿ ಅಪಮಾನ್ಮು ಪಡಿಚ್ರಿ . 5 ಆಮಿಂದ ಇಂಕೊಕುಡ್ನಿ ಅಂಪಿಚ್ಚೆಕಿ ವಾಡ್ನಿ ಸೊಂಪಿ ಏಸ್ರಿ . ಇಂಕ ಅನೇಕುಲ್ನಿ ಅಂಪಿಚ್ಚೆ . ವಾಳ್ಳಾ ಕೆಲುವುಲ್ನಿ ಕೊಟ್ರಿ , ಕೆಲುವ್ಲುನಿ ನರ್ಕಿ ಏಸ್ರಿ . ^{6 7} 6 ವಾಡ್ಕಿ ಇಂಕ ಒಕ್ಡುಂಡೆ ಯೋಳಂಟೆ ವಾಡ್ ಮುದ್ದು ಕೊಡ್ಕೆ . ನಾ ಕೊಡ್ಕುಕಾರ ಮರ್ಯಾದೆ ಸೂಬಿಚ್ಚಿ ಯೋಳನಿ ಧಣಿ ತೊಟ್ಟಿಂಚ ವಾಡ್ನಿ ವಾಳ್ ದೆಗ್ರುಕಿ ಅಂಪಿಚ್ಚೆ . 7 ಆಯ್ತೆ ಆ ಒಕ್ಲಿಗುಲು - ವೂಡೇ ಭಾದ್ಯಸ್ಥುಡು , ರಾಂಡ್ರಿ , ವೂಡ್ನಿ ಸೊಂಪಿ ಏತಾಮು , ^{8 9} 8 ಅಪ್ಡು ಸ್ವಾಸ್ಥ್ಯುಮು ಮಾದಾಯ್ತಾದಿ ಅನಿ ಒಕ್ಳು ಜೊತ್ಲ ಒಕ್ಳು ಮಾಟ್ಲಾಡ್ಕೋನಿ ವಾಡ್ನಿ ಪಟ್ಟಿ ಸೊಂಪಿ ಏಸಿ ದ್ರಾಕ್ಷೆ ತೋಟುಮಿಂಚ ಆಕ್ಟರ್ಕಿ ಪಾಗೊಟ್ಟಿಡ್ಸ್ರಿ . 9 ಅಟ್ಟಾಯ್ತೆ ದ್ರಾಕ್ಷೆ ತೊಟುಮು ಧಣಿ ಏಮಿ ಸೇಸ್ತಾಡು ? ವಾಡು ವಚ್ಚಿ ಆ ಒಕ್ಲಿಗುಲ್ನಿ ಸಂಹರಿಚ್ಚಿ ತನ್ ತೋಟುಮ್ನಿ ಬೇರೆ ಜನಲ್ಕಿ ಸೇಸೆದಾನ್ಕಿ ಇಸ್ತಾಡು . ^{10 11 12} 10 ಇಂಟ್ ಕಟ್ಟೋಳು ವದ್ದು ಅನಿ ಇಡ್ಸಿನ ರಾಯೇ ಮುಖ್ಯುಮೈನ ಮೂಲರಾಯಾಯೇ . 11 ಇದಿ ಕರ್ತುಡಿಂಚಾನೆ ಆಯೇ , ಮಾಕಿ ಆಶ್ಚರ್ಯುಮಾಯಿ ಸೂಪ್ತಾದಿ ಅನೆ ಶಾಸ್ತ್ರುಮು ವಚನ್ಮುನಿ ಮೀರು ಓದ್ಲೆದಾ ಅನೆ . 12 ವೂಡು ತಮ್ಮುಲ್ನೆ ಕುರಿಚ್ಚಿ ಈ ಸಾಮ್ಯುಮ್ನಿ ಸೊಪ್ಪೆ ಅನಿ ವಾಳು ತಿಲ್ಚ್ಕೋನಿ ವಾಡ್ನಿ ಪಟ್ಕೊನೆದಾನ್ಕಿ ಸಂಧರ್ಭುಮು ಸೂಸ್ತವುಂಡ್ರಿ . ಆಯ್ತೆ ಜನಲಿಕು ಭಯ್ಮುಪಡಿ ವಾಡ್ನಿ ಇಡ್ಸಿ ಪಾಯ್ರಿ . ^{13 14 15} 13 ಆಮಿಂದ ವಾಳು ಯೇಸುನಿ ಮಾಟ್ಲುಲ್ಲಾ ಪಟ್ಕೊನೆ ದಾನ್ಕಿ ಪರಿಸಾಯುಲ್ಲಾನು ಹೆರೂದ್ಯಲ್ಲಾನು ಕೆಲುವ್ಲುನಿ ವಾಡ್ ದೆಗ್ರುಕಿ ಅಂಪಿಚ್ರಿ . 14 ವೂಳು ವಚ್ಚಿ - ಭೋಧಕುಡಾ , ನುವ್ವಾ ಸತ್ಯುವಂತುಡು , ಯೋಳ್ಕು ಹೆದ್ರುಲೇನೋಡು , ನುವ್ವ ಜನಲು ಮಕ್ಮು ಇಚ್ಚೆಕು ಮಾಟ್ಲಾಡ್ಕುನ್ನಾ ದೇವುಡು ಮಾರ್ಗುಮ್ನಿ ಸತ್ಯುಮಾಯಿ ಭೋಧಿಚ್ಚೋಡಾಯಿನಾವು ಅನಿ ತಿಲ್ಚ್ನಾಮು . 15 ಸೈಸೆರೋಡ್ಕಿ ತೆರಿಗೆ ಇಚ್ಚೇದಿ ಸರಿನೋ ಸರಿಕಾದೋ , ಇಯ್ಯಾಲ್ನೋ ವದ್ದೋ ಅನಿ ವಾಡ್ನಿ ಅಡುಗ್ರಿ . ಯೇಸು ವಾಳ್ ಕಪಟುಮ್ನಿ ತಿಲ್ಚಿ - ನನ್ನೀ ಎಂದ್ಗೂ ಪರೀಕ್ಷೆ ಸೇಸ್ತಾರು ? ನಾಕಿ ಓಕ್ ದುಡ್ಲುನಿ ಎತ್ಕೊಚ್ಚಿ ಸೂಪಂಡ್ರಿ ಅನ್ನಪ್ಡು ವಾಳು ಎತ್ಕೊಚ್ರಿ . ^{16 17} 16 ಅಪ್ಡು ಯೇಸು - ಈ ತಲಕೈ ಮುದ್ರೆ ಯೋಲ್ದಿ ಅನಿ ಅಡ್ಗಿನ್ದಾಂಕಿ ವಾಳು - ಸೈಸೆರೋಡ್ದಿ ಅನ್ರಿ . 17 ಯೇಸು - ಸೈಸೆರೋಡಿದ್ನಿ ಸೈಸೆರೋಡ್ಕಿ ಇಯಂಡ್ರಿ , ದೇವುಡುದ್ನಿ ದೇವುಡ್ಕಿ ಇಯಂಡ್ರಿ ಅನಿ ಸೊಪ್ಪೆ . ವಾಳು ಯೇಸು ವಿಷಯುಮ್ಲ ಬಹು ಆಶ್ಚರ್ಯುಮು ಪಡ್ರೀ. ^{18 19} 18 ಆಮಿಂದ ಸದ್ದುಕಾಯುಲು ಯೇಸು ದೆಗ್ರುಕಿ ವಚ್ರಿ .ವೂಳು ಪುನರುತ್ಥಾನ್ಮು ಲೇದು ಅನೋಳು . 19 ವೂಳು ಯೇಸುಕಿ ಪ್ರಶ್ನೆ ಸೇಸಿನ್ದೇಮಂಟೆ - ಭೋಧಕುಡಾ , ಅನ್ನಾಯ್ನೋಡು ಬಿಡ್ಳು ಲೇಕುನ್ನ ಪೆಂಡ್ಳಾಮ್ನಿ ಇಡ್ಸಿ ಸಸ್ತೆ ದಾನ್ನೀ ವಾಡ್ ತೊಂಬ್ಡು ಪೆಂಡ್ಳಿ ಸೇಸ್ಕೋನಿ ತನ್ ಅನ್ಕಿ ಸಂತಾನುಮ್ನಿ ಪಡಿಯಾಲನಿ ಮೋಶೆ ರಾಸ್ಪೆಟ್ನಾಡoತೆ . ^{20 21 22 23} 20 ಯೋಡು ಮಂದಿ ಅನ್ದೊಂಬುಳ್ಳು ವುಂಟೇನು . ಮೊದ್ಲೋಡು ಪೆಂಡ್ಳಾಮ್ನಿ ಸೇಸ್ಕೋನಿ ಸಂತಾನ್ಮು ಲೇಕುಣ್ಣಾ ಸಚ್ಚೆ . 21 ರೊಂಡ್ನೆವಾಡು ದಾನ್ನಿ ಪೆಂಡ್ಳಿ ಸೇಸ್ಕೋನಿ ಸಂತಾನ್ಮು ಲೇಕುಣ್ಣಾ ಸಚ್ಚೆ . ದಾನ್ಲಾಕ್ನೆ ಮೂಡ್ನೆವಾಡು . 22 ಇದೇ ಪ್ರಕಾರ್ಮು ಯೋಡು ಮಂದಿಲು ಸಂತಾನ್ಮು ಲೇಕುಣ್ಣಾ ಪಾಯ್ರಿ . ಕಡೇಲ ಆ ಆಡ್ದಿನು ಸಚ್ಚೆ .ಪುನರುತ್ಥಾನ್ಮುಲ ಆದಿ ಯೋಳ್ ಪೆಂಡ್ಳಾಮ್ ಆಯುಂಟಾದಿ ? 23 ದಾನ್ನಿ ಯೋಡು ಮಂದಿಲು ಪೆಂಡ್ಳಿನಿ ಸೇಸ್ಕೊನ್ನಾರೆ ಅನ್ರಿ . ^{24 25} 24 ಯೇಸು ವಾಳ್ಕಿ - ಮೀರು ಶಾಸ್ತ್ರುಮ್ನ್ನಾರಾ ದೇವುಡು ಶಕ್ತಿನಿ ತಿಳ್ಚಿಂದಾನ್ನಿನ್ಚಾನೆ ತಪ್ಪೋಳಾಯ್ನಾರು ಕದ . 25 ಸಚ್ನೋಳು ಜೂಡಾಯಿ ಲೇಸಿನ್ಮಿಂದ ಪೆಂಡ್ಳಿ ಸೇಸ್ಕೊನೆಕು ಲೇದು , ಸೇಸಿಚ್ಚೆಕುಲೇದು , ಪರ್ಲೋಕ್ಮುಲವುಂಡೆ ದೇವುಡು ದೂತುಲುಲಾಕ ವುಂಟಾರು . ^{26 27} 26 ಆಯ್ತೆ ಸಚ್ನೋಳು ಬದ್ಕಿ ಲೇಸ್ತಾರನೆ ವಿಷಯುಮ್ಲ ಸೊಪ್ಪ್ಬೇಕಾಯ್ತೆ - ನಾನು ಅಬ್ರಾಹಾಮುಡಾ ದೇವುಡು , ಇಸಾಕುಡು ದೇವುಡು , ಯಾಕೋಬುಡು ದೇವುಡು ಅನಿ ಮೊಶೆಕಿ ನುಡ್ಸಿಂದಾನ್ನಿ ಮೀರು ಮೋಶೆ ಗ್ರಂಥುಮ್ಲ ಪೊದೆ ಸಂಗತಿ ವುಂಡೆ ಅಧ್ಯಾಯುಮ್ಲ ಓದ್ಲೆದಾ ? 27 ವಾಡು ಜಿವಿತುಲ್ಕಿ ದೇವುಡಾಯಿನಾಡೇ ಹೊರ್ತು ಜೂಡ್ಲೆನಿನೋಳ್ಕಿ ಕಾದು , ಮೀರು ಪಟ್ಟಿನ ಅಭಿಪ್ರಾಯುಮು ಬಹು ತಪ್ಪಾಯಿಂದಿ ಅನಿ ಸೊಪ್ಪೆ . ^{28 29 30 31} 28 ಶಾಸ್ತ್ರಿಲ್ಲಾ ಒಕ್ಡು ವಾಳ್ ತರ್ಕುಮ್ನಿ ಇನಿ ಯೇಸು ವಾಳ್ಕಿ ಮಂಚಿ ಉತ್ರುಮು ಇಚ್ಛೆ ಅನಿ ತಿಲ್ಚಿ ಹತ್ರುಮ್ಕಿ ವಚ್ಚಿ - ಅನ್ನೀ ಆಜ್ನೆಲ್ಲಾ ಮೊದ್ಲುನೆ ಆಜ್ಞೆ ಯಾವ್ಡಿ ಅನಿ ವಾಡ್ನಿ ಅಡ್ಗಿನ್ದಾಂಕು ಯೇಸು - 29 ಇಸ್ರಾಯೇಲ್ ಜನುಮಾ ಇನು , ಮಾ ದೇವುಡಾಯಿನ ಕರ್ತುಡು ಓಕ್ಡೇ ದೇವುಡು , 30 ನೀ ದೇವುಡಾಯಿನ ಕರ್ತುಡ್ನಿ ಪೂರ್ಣಹ್ರುದಯ್ಮಿಂಚಾನು ಪೂರ್ಣ ಪ್ರಾಣುಮಿಂಚಾನು ಪೂರ್ಣ ಬುದ್ದಿಯಿಂಚಾನು ಪೂರ್ಣ ಶಕ್ತಿಯಿಂಚಾನು ಪ್ರೀತಿಯಾಲ ಅನೇದೆ ಮೊದ್ಲುನೆ ಆಜ್ಞೆ , 31 ನೀ ನೆರೆಯೋಡ್ನಿ ನೀಲಾಕ್ನೆ ಪ್ರೀತಿಯಾಲ ಅನೇದೆ ರೊಂಡ್ನೆ ಆಜ್ಞೆ , ಇವುಟ್ಳಿಕಿಂತ ಹೆಕ್ವಾಯಿನ ಆಜ್ಞೆ ಇಂಕೋಕ್ಟಿಲೇದು ಅನಿ ಉತ್ರುಮು ಇಚ್ಛೆ . ^{32 33 34} 32 ಅಪ್ಡು ಆ ಶಾಸ್ತ್ರಿಡು - ಭೋಧಕುಡಾ , ಬಾಗ ಸೊಪ್ತ್ವಿ , ಓಕ್ಡೇ ವುನ್ಡಾಡು ವಾಡೆ ಹೊರ್ತು ಇಂಕೊಕ್ಡು ದೇವುಡು ಲೇದು ಅನಿ ನುವ್ವ ಸೊಪ್ಪಿಂದಿ ನಿಜ್ಮು . 33 ವಾಡ್ನಿ ಪೂರ್ಣ ಮನ್ಸಿಂಚಾನು ಪೂರ್ಣ ಬುದ್ದಿಯಿಂಚಾನು ಪೂರ್ಣ ಶಕ್ತಿಯಿಂಚಾನು ಪ್ರೀತಿಚ್ಚೇದಿ ಮಲಿ ತನ್ನಿ ಪ್ರೀತಿಚ್ಕೊನಟ್ಗ ತನ್ ನೆರೆಯೋಡ್ನಿ ಪ್ರೀತಿಚ್ಚೇದಿ ಇವಿ ರೊಂಡು ಅನ್ನೀ ಸರ್ವಾಂಗಹೊಮುಮುಕಿಂತಾನು ಅನ್ನೀ ಯಜ್ನಾಲುಕಿಂತಾನು ಹೆಕ್ವಿವಿ ಅನೆ . 34 ವಾಡು ಬುದ್ದಿಯಿಂಚ ಉತ್ರುಮು ಇಚ್ಚಿಂದಾನ್ನಿ ಯೇಸು ಕನಿ - ನುವ್ವ ದೇವುಡು ರಾಜ್ಯುಮ್ಕಿ ದೂರ್ಮಾಯ್ನೋಡು ಕಾದು ಅನೆ . ಅಪ್ಡಿಂಚ ವಾಡ್ನಿ ಪ್ರಶ್ನೆ ಸೇಸೆದಾನ್ಕಿ ಯೋಳ್ಕು ಧೈರ್ಯುಮು ವುಂಡ್ಲೇದು . ^{35 36 37} 35 ಯೇಸು ದೇವುಡು ಆಲಯುಮ್ಲ ಉಪದೇಶ್ಮು ಸೇಸ್ತಾವುಂಡೆನಪ್ಡು ಪ್ರಶ್ನೆ ಸೇಸಿ - ಶಾಸ್ತ್ರಿಲು ರಾಬೇಕಾಯಿನ ಕ್ರಿಸ್ತುಡ್ನಿ ದಾವಿದುಡು ಕೊಡ್ಕು ಅನಿ ಸೊಪ್ತಾರೆ , ಆದಿ ಎಟ್ಟಾಯ್ತಾದಿ ? 36 ನಾನು ನೀ ವಿರೋದಿಲ್ನಿ ನೀ ಪಾದಾಲು ದುಗುನ್ಕಿ ಏಸೆ ಗಂಟ ನಾ ಕುಡುಮ್ತೊಟ್ಟು ಕುಚ್ಚೋನುಂಡು ಅನಿ ಕರ್ತುಡು ನಾ ಒಡೆಯುಡ್ಕಿ ನುಡ್ಸೆ ಅನೇದಾಯಿ ದಾವಿದುಡೇ ಪವಿತ್ರಾತ್ಮುಮು ಪ್ರೇರಣ್ಮು ಯಿಂಚ ಸೊಪ್ಪೆ . 37 ದಾವಿದುಡೇ ವಾಡ್ನಿ ಒಡೆಯುಡು ಅನಿ ಸೊಪ್ಪುನ್ಡೇದಾoಟ್ಲ ವಾಡು ವಾಡ್ಕಿ ಕೊಡ್ಕಾಯೇದಿ ಎಟ್ಟ ? ಅನಿ ಅಡ್ಗೆ . ^{38 39 40} 38 ಸಾಧಾರ್ಣುಮು ಜನ್ಮು ವಾಡ್ ಮಾಟ್ನಿ ಸಂತೋಷ್ಮಿಂಚ ಇಂಟವುಂಡ್ರಿ . ಯೇಸು ಉಪದೇಶ್ಮು ಸೇಸಿ ಸೊಪ್ಪಿನ್ದೆಮಂಟೆ - ಶಾಸ್ತ್ರಿಲು ವಿಷಯುಮ್ಲ ಎಚ್ರುಕಾಯಿ ವುಂಡoಡ್ರಿ . ನಿಲುವಂಗಿನಿ ಏಸ್ಕೋನಿ ತಿರ್ಗಾಡೆದಿ , ಅಂಗ್ಡಿ ಬೀದಿಲ್ಲಾ ನಮಸ್ಕಾರಲು , 39 ಸಭಾಮಂದಿರ್ಮುಲ ಮುಖ್ಯುಮುಪೀಟಾಲು , ಔತಣ್ಮು ಪ್ರಸ್ತಲ್ಲಾ ಪ್ರಥುಮುಸ್ಥಾನಲು ಇವುಟ್ಲಾನೆ ವಾಳು ಮನ್ಸುವುಂಡೋಳಾಯಿನಾರು . 40 ವಿದ್ವೇಲು ಇಂಟ್ನಿ ನುಂಗಿ ನಟನೆಕಾಯಿ ದೇವುಡುಕಿ ಪಡ್ಗುಂಗಾಯಿನ ಪ್ರಾರ್ಥನೇನಿ ಸೇಸೋಳಾಯಿನ ವೂಳು ಹೆಕ್ವಾಯಿನ ದಂಡನುಮ್ನಿ ಹೊಂದ್ತಾರು ಅನೆ . ^{41 42} 41-42 ಯೇಸು ಬೊಕ್ಕಸ್ಮು ಇಲ್ಕಿ ಎದ್ರುಮಾಯಿ ಕುಚ್ಕೋನಿ ಜನಲು ಬೊಕ್ಕಸ್ಮುಲ ದುಡ್ಳು ಏಸೇದ್ನಿ ಸೂಸ್ತವುಂಡೆ . ಅನೇಕುಲು ಮಂದಿ ಐಶ್ವರ್ಯವಂತುಲು ಹೆಕ್ವ ಹೆಕ್ವ ಏಸ್ತಾವುಂಡೇಕಿ ಓಕ್ ಬಡ ವಿಧ್ವೆ ವಚ್ಚಿ ರೊಂಡು ಕಾಸ್ಲು ಅಂಟೆ ಓಕ್ ದುಗ್ಗಾಣಿ ಏಸೆ . ^{43 44} 43 ಅಪ್ಡು ಯೇಸು ತನ್ ಶಿಷ್ಯುಲ್ನಿ ಹತ್ರುಮ್ಕಿ ಪಿಲ್ಚಿ - ಮೀಕಿ ನಿಜ್ಮಾಯಿ ಸೊಪ್ತಾನು , ಬೊಕ್ಕಸ್ಮುಲ ಏಸ್ನೋಳoದ್ರುಲಾ ಈ ಬಡ ವಿಧ್ವೆ ಹೆಕ್ವ ಏಸಿಂದಿ . 44 ಎಟ್ಟಂಟೆ ಅಂದ್ರು ವಾಳ್ಕಿ ಸಾಲಾಯಿ ಮಿಕ್ಕಿಂದಾ೦ಟ್ಲ ಏಸ್ರಿ , ಇದೋ ದಾನ್ ಬಡ್ತನ್ಮುದಾಂಟ್ಲಾನು ದಾನ್ಕುಂಡಿನ್ದಂತ್ನು ಏಸೆ , ದಾನ್ ಜೀವನ್ಮುನೆ ಇಚ್ಚಿಡ್ಸೆ .