^{1 2} 1.ಯೇಸುನ ಉಪದೆಶಾಮ್ನಿ ಇನಾಲಾನಿ 2.ಇಂತಾ ಸುಂಕಮೊಳು ಪಾಪಿಲು ಆತುಡ ದೇಗ್ಗರ್ಗಿ ವಸ್ತಾ ಉಂಡಾಲು ಫರಿಸಾಯಲು ಶಾಸ್ತ್ರಿಲು-ಊಡು ಪಾಪಿಲ್ನಿ ಸೇರ್ಪ್ಗಾನಿ ವಾಳ ಜೊತ್ಲಾ ಊಟಂಸೇಸ್ತಾಡು ಅನಿ ಸೋಪ್ಗಾನಿ ಗುಣುಗುಟ್ತಾಉಂಡ್ರಿ. ^{3 4 5} 3.ಅಪ್ಡು ವಾಡು ಒಕ್ಕ ಸಾಮ್ಯಮ್ನಿ ಸೋಪ್ನಾಡು. 4.ಅದೇಮoಟ್ಟೆ -ಮೀಲೋಗ ಯಾವ ಮನುಷ್ಯಡೈನಾತಾನ್ಗೀ ನೂರು ಉಂಡಲಾಗ ಅವುಟ್ಲಾ ಓಕ್ಟಿ ಕಳ್ಸಿಪಾತೆ ವಾಡು ತೊಬ್ಬಾಯಿತೊಮ್ಮದಿ ಅಡವಿಲಾ ಉಡ್ಸಿ ಕಳ್ಸಿಪೈನ್ನದಾನ್ನಿ ಸಿಕ್ಕೆ ತನಕ ದಾನ್ನಿ ಹುಡಿಕ್ಕನ್ನಿ ಪೋಗುಂಡ ಉಂಡಾಡೋ? 5.ಸಿಕ್ಕಿನಪೈನ ವಾಡು ಸಂತೋಷಂಪೋಡ್ತಾ ^{6 7} 6.ದಾನ್ನಿ ತನ್ನ ಹೇಗ್ಲಾ ಪೈನ ಪೆಟ್ಗಾನಿ ಇಂಟ್ಗಿ ವಚ್ಚಿ ಸ್ನೇಹಿತಾಲ್ನಿ ನೆರೆಹೊರೆವಾಳ್ನಿ ಸೇರ್ಪಿ-ಕಳ್ಸಿ ಪಾಯ್ಡಾ ಗೊರ್ರ ಸಿಕ್ಕೆ,ನಾ ಜೊತ್ಲಾ ಸಂತೋಷಂಪೋಡoಡ್ಡಿ ಅನಿ ವಾಳ್ಗಿ ಸೋಪ್ತಾಡುಕದ. 7.ದಾನoತ್ತೆ ದೇವುಡ ಕಡ್ಗಿ ತಿರ್ರಿಕನೇದಾನ್ಗಿ ಅವಶ್ಯಂಲೆಗುಂಡ ತೊಬ್ಬಾಯಿತೊಮ್ಮದಿಮಂದಿ ನೀತಿವಂತಲ್ಗಿoತ್ತ ದೇವುಡ ಕಡ್ಗಿ ತಿರ್ರಿಕ್ಕಾನ ಒಕ್ಕ ಪಾಪಿಯ ವಿಷಯಂಗ ಪರಲೋಕಂಲಾ ಸಂತೋಷಂಉಟಾಯ್ತಾದನಿ ಮೀಕಿ ಸೋಪ್ತಾನು. ^{8 9 10} 8.ಯಾವ ಆಡದಿ ತನ್ಲಾ ಪದಿ ಪಾವಲಿಲುoಡಲಾಗ ಒಕ್ಕ ಪಾವಲಿ ಕಳ್ಸಿಪಾತೆ ದೀಪಂಅಂಟ್ಟಿಚ್ಚಿ ಇಲ್ನಿ ಊಕಿ ಸಿಕ್ಕೆ ತನ್ಕ ದಾನ್ನಿ ಎಚ್ಚರಂನಿಂಕ ಹುಡ್ಕುನ್ನ ಉಂಡಾದೆ? 9.ಸಿಕ್ಕಿನ್ಪೈನ ಆದಿ ತನ್ನ ಗೆಳತಿಲ್ನಿ ನೆರೆಹೊರೆವಾಲ್ನಿ ಸೇರ್ಪಿ-ಕಳ್ಸಿಪೈನ್ನ ಪಾವಲಿ ಸಿಕ್ಕೆ,ನಾ ಜೊತ್ಲಾ ಸಂತೋಷಂಪೋಡoಡ್ಡಿ ಅನಿ ಸೋಪ್ತಾದಿಕದ. 10.ದಾನಂತ್ತೆ ಒಕ್ಕ ಪಾಪಿಯು ದೇವುಡ ಕಡ್ಗಿ ತಿರ್ರಿಕನೇ ವಿಷಯಮ್ಲಾ ದೇವದೂತಲಮುಂದ್ರ ಸಂತೋಷಮೈನಾದನಿ ಮೀಕಿ ಸೋಪ್ತಾನು ಅನ್ನಾಡು. ^{11 12} 11.ಇಂಕಾ ಆತುಡು ಸೋಪ್ಪಿಂದೆಮಂಟ್ಟೆ-ಒಕ್ಕಡೋಕ್ಕ ಮನುಷ್ಯಡ್ಗಿ ಇದ್ರೂ ಬಿಡ್ಲುಉಂಡ್ರಿ. 12.ಅವ್ಟಾಲ ಸಿನ್ನೋಡು ತಂಡ್ರಿಗಿ-ಅಬ್ಬಾ,ಆಸ್ತಿಲಾ ನಾಕಿ ವಚ್ಚೆತಕ್ಕ ಪಾಲ್ನಿ ಇಯ್ಯಿ ಅನಿ ಅಡ್ಗಾಲು ತoಡ್ರಿಯು ಬದುಕ್ನಿ ವಾಳ್ಗಿ ಪಂಚ್ಚಿಇಚ್ಚಾಡು. ^{13 14} 13.ಕೊಂಚ್ಚಂದಿನಂಪೈನ ಆ ಸಿನ್ಕೋಡ್ಕು ಅಂತಾ ಕೋಡ್ಪಾಗನಿ ದೂರದೇಶಾಂಗಿ ಎಲ್ಲಿಪಾಯಿ ಆನ ಪಟಿಂಗಡಾಯಿ ಬದ್ಕಿ ತನ್ನ ಆಸ್ತಿನ್ನಿ ಸೂರೆಸೇಸುಡ್ಸಾಡು. 14.ಇಟ್ಟೆ ವಾಡು ಅಂತಾ ಪಾಡ್ಸೆಸ್ಗನ್ನಪೈನಾ ಆ ದೆಶಾಮ್ಲಾ ಅಂತ ಘೋರಬರ ವಚ್ಚಿ ಏಮಿ ಗತಿಲೆಗುನ್ನವಾಡೈನಾಡು. ^{15 16} 15.ಅಪ್ಡು ವಾಡು ಪಾಯಿ ಆ ದೇಶಂ ನಿವಾಸಿಲೋಗ ಒಕ್ಕಡ್ಲಾ ಸೇರ್ಗನ್ನಾಡು;ಆ ಮನುಷ್ಯಡು ಪಂದಿಲ್ನಿ ಮೆಪೆದಾನ್ಗಿ ವಾಡ್ನಿ ತನ್ನ ಸೆಂಡ್ಲಾಗಿ ಅಮ್ಪಿಚ್ಚನಾಡು. 16.ಇಟ್ಟುoಡಾಗ ವಾಡು ಪಂದ್ದಿ ತಿಂಟಉನ್ನ ಕಾಯಿಯನ್ನೈನ ತಿನಿ ಆಕಲ್ನಿ ತಿರ್ಪಾಗನ್ನಾಮುಅನಿ ಆಶೆಪಡ್ನಾಡು;ಅಯ್ನೂ ಯಾವ್ಳು ವಾಡ್ಗಿ ಇಲೇದು. ^{17 18 19} 17.ಅಪ್ಡು ವಾಡ್ಗಿ ಬುದ್ದಿವಚ್ಚಿ ವಾಡು-ನಾ ತಂಡ್ರಿದೇಗ್ಗರ್ಗ ಎಂತೋ ಮಂದಿ ಕೂಲಿಮನ್ಸಲ್ಗಿ ಬೆಕೈನಂತ ಆಹಾರ್ಮುಂದ್ದಿ;ನಾನಾದ್ರೂ ಇನಾ ಆಕಲ್ನಿoಕ್ಕ ಸಸ್ತಾನು. 18.ನೀನು ಲೇಸಿ ನಾ ತಂಡ್ರಿ ದೇಗ್ಗರ್ಗಿ ಪಾಯಿ ವಾಡ್ಗಿ-ಅಬ್ಬಾ,ಪರಲೋಕನ್ಗಿ ವಿರೋಧಂಅಯ್ನೋ ನೀ ಮುಂದ್ರ ಪಾಪಂ ಸೇಸ್ನಾನು;ಇಂಕ ನಾನು ನೀ ಕೊಡ್ಕುಅನ್ಬಿಚ್ಗಾನದಾನ್ಗಿ ಯೋಗ್ಯಡ್ಕಾದು; 19.ನನ್ನಿ ನೀ ಕೂಲಿಮನ್ಸಿಲ್ಲಾ ಒಕ್ಕಡoತ್ತೆ ಸೇಯ್ಯಿ ಅನಿ ಸೋಪ್ತಾನು ಅನ್ಗಾನಿ ಲೇಸಿ ತನ್ನ ತಂಡ್ರಿಯ ಕಡ್ಗಿ ವಚ್ಚಾಡು. ^{20 21} 20.ವಾಡು ಇಂಕ ದೂರಂಲಾ ಉಂಡ್ಡನಪ್ದೆ ವಾಡ ತಂಡ್ರಿಯು ವಾಡ್ನಿ ಸೂಸಿ ಕನಿಕರ್ಮಪೊಡಿ ಪರ್ಗಿತ್ತೋಚ್ಚಿ ವಾಡ ಕೊರಳ್ನಿ ಅಪ್ಗಾನಿ ವಾಡ್ಗಿ ಬಹಳಂಗ ಮುದ್ದುಪೆಟ್ಟಾಡು. 21.ಆಯ್ನೂ ಕೊಡ್ಕು ವಾಡ್ಗಿ-ಅಬ್ಬಾ,ಪರಲೋಕನ್ಗಿ ವಿರೋಧಂಗ್ಗು ನೀ ಮುಂದ್ರ ಪಾಪಂಸೇಸ್ನಾನು;ಇಂಕ ನೀನು ನೀ ಕೊಡ್ಕುಅನ್ಬಿಚ್ಗಾನದಾನ್ಗಿ ಯೋಗ್ಯಡ್ಕಾದು ಅನಿ ಸೋಪ್ಪಾಲು ತಂಡ್ರಿ ವಾಡ ಮನ್ಸಿಲ್ಗಿ ^{22 23 24} 22.ಶ್ರೇಷ್ಠಮೈನ ನಿಲುಅಂಗಿನಿ ಬಿರ್ನಾ ತಿಸ್ಗಾನಿ ಊಡ್ಗಿ ಪೆಟ್ಟoಡ್ಡಿ;ಊಡ ಸೇತ್ಗಿ ಉಂಗುರಂನಿಪೆಟ್ಟoಡ್ಡಿ;ಕಾಳ್ಗಿ ಸೋಪ್ಲು ಮೆಟ್ಟಿಚ್ಚಂಡ್ಡಿ; 23.ಕೊಬ್ಬಿಚ್ಚಿನ ಆ ದೂಡ್ನಿ ಇಸ್ಗಾನಿ ಕೂಯ್ಯoಡ್ಡಿ; ಪಂಡ್ಗ ಸೇತಾಮು,ಉಲ್ಲಾಸಂ ಪಡಾಮು. 24.ಈ ನಾ ಕೊಡ್ಕು ಸಚ್ಚಿನವಾಡೈನಾಡು,ತಿರ್ಗಿ ಬದ್ಕಿ ವಚ್ಚಾಡು;ಪೋಲಿಪೈನಾಡು,ಸಿಕ್ನಾಡು ಅನಿ ಸೋಪ್ನಾಡು.ಅಪ್ಡು ವಾಳು ಉಲ್ಲಸಂಪೋಡೆದಾನ್ಗು ತೊಡ್ಗಾಳು. ^{25 26 27} 25.ಆಯ್ತೆ ವಾಡ ಪೆದ್ದಕೊಡ್ಕು ಸೇನ್ಲಾ ಉಂಡಾಡು.ವಾಡು ಇಂಟ ದೆಗ್ದೇಗ್ಗರ್ಗಿ ವಸ್ತುಂಡಾಗ ವಾದ್ಯನರ್ತನಂಲ್ನಿ ಇನಿ 26.ಮನ್ಸಿಲಾ ಒಕ್ಕಡ್ನಿ ತನ್ನ ದೇಗ್ಗರ್ಗಿ ಪಿಲ್ಚಿ-ಇದೇಮಿ ಅನಿ ವಿಚಾರಿಚ್ನಾಡು. 27.ಮನ್ಸಿ ವಾಡ್ಗಿ-ನೀ ತೊಮ್ಮಡು ವಚ್ನಾಡು;ಊಡು ಸುರಕ್ಷಿತುಡೈ ವಚ್ಚಿಂದಾನಿಂಕ ನೀ ತಂಡ್ರಿಯು ಆ ಕೊಬ್ಬಿಚ್ಚಿನ ದೂಡ್ನಿ ಕೊಬಿಚ್ನಾಡು ಅನಿ ಸೋಪ್ನಾಡು. ^{28 29 30} 28.ದೀನ್ನಿ ಇನಿ ವಾಡ್ಗಿ ಸಿಟ್ಟೋಚ್ಚಿ ಲೋಕಿ ಪೋಗುಂಡ ಉಂಡಾಡು.ಅಪ್ಡು ವಾಡ ತಂಡ್ರಿಯು ಇತರ್ಗಿ ವಚ್ಚಿ ವಾಡ್ನಿ ಬೇಡ್ಗಂನ್ನಾಡು. 29.ಅಯ್ತೆ ವಾಡು ತನ್ನ ತಂಡ್ರಿಗಿ-ಸೂಡಿ,ಇನ್ಏಂಡ್ಲು ನೀ ಸೇವೆ ಸೇಸ್ನಾನು,ಮಲಿ ನೀನು ನೀ ಒಕ್ಕ ಅಪ್ಪನೇನು ಯಾಬದ್ದು ಮೀರ್ಲೆದು;ಅದ್ರೂ ನಾನು ನಾ ಸ್ನೇಹಿತಲ ಜೊತ್ಲಾ ಉಲ್ಲಾಸಂಪೋದೆದಾಂನ್ಗಿ ನೀನು ಯಾಬದ್ದು ಒಕ್ಕ ಮ್ಯಾಕ್ನಿಕಾನಿ ಇಲೇದು. 30.ಆಯ್ತೆ ಸೂಳೆಲ್ನಿ ಕಟ್ಗಾನಿ ನೀ ಬದುಕ್ನಿ ನುಂಗುಡ್ಸಿ ಈ ನೀ ಕೊಡ್ಕು ವಚ್ನಪ್ದು ಕೊಬ್ಬಿಚ್ನಾ ದೂಡ್ನಿ ವಾಡ್ಗಿ ಕೊಬಿಚ್ನಾವು ಅನಿ ಉತ್ತರಂಇಚ್ನಾಡು. ^{31 32} 31.ದಾನ್ಗಿ ತಂಡ್ರಿಯು-ಕಂದಾ,ನುವ್ವ ಯಪ್ದು ನಾ ಜೊತ್ಲಾ ಉಂಟ್ವಿ,ಮಲಿ ನಾದಂತ ನೀದೆ. 32.ಆಯ್ತೆ ಉಲ್ಲಾಸಂಪೋಡೆದಿ ಸಂತೋಷಂಪೋಡೆದಿ ನ್ಯಾಯಂಆಯ್ನ್ದೆ;ಯಂದ್ಗoಟ್ಟೆ ಈ ನೀ ತೊಮ್ಮಡು ಸಚ್ಚಿನವಾಡೈಡ್ಡೆ,ತಿರ್ಗಿ ಬದ್ಕಿ ವಚ್ಚಾಡು;ಪೋಲಿಪೈಡ,ಸಿಕ್ನಾಡು ಅನಿ ಸೋಪ್ನಾಡು.