¹ Ketike Yesus selosai memerintahan ke due bolas mured-Nye, Nye'e pogi tanggai so'on engkai meajar wan berkhotbah di kute-kute sidak. ² Kannimam, ketike Yohanes, an ade di penjare, mendongai pekerije-pekerije Kristus, Nye'e mengirem posan melalui mured-murednye, ³ wan betakon ke-Nye, "Ape Engkau an bakal menjuhak onan, atau haroskah urang koai mehantek an loyennye?" ⁴ Yesus menyaout wan betutor ke sidak, "pogi wan padahilah ke Yohanes ape an kolai dongai wan liat, ⁵ an bute meliat, an lumpoh bejalan, an saket kusta ditahirkan, an mati dibangketan, wan ke an misken diberitean Injil. ⁶ Wan, diberokatilah urang an cade tersandung oleh-Dan." ⁷ Wan, selopas sidak berangkat, Yesus mule beromong ke urang rami tontang Yohanes, "Ape an hondak kolai liat di padang belantare? Sebatang poreng an di guyang ribot? ⁸ Kolai berangkat engkai meliat ape? Seurang an bepekoyan halos? Sidak an bepekoyan halos onan ade di istane-istane raja. ⁹ Engkai meliat apekah kolai berangkat? Seurang nabi? Ya, Doan menutoran kedi'i, nye'e bahkan lobeh bosar tanggaipade seurang nabi. ¹⁰ Sobab, nye'elah urang an tontangnye tolah tetules: Liat! Doan mengirem utusab-Dan melohok'i-Di'i. Nye'e an bakal mempersiopan jalan bagi-Di'i di hedopan-Di'i.' Maleakhi 3:1 ¹¹ Doan menutoran an sebonarnye ke-di'i, di antare sidak an di lahiran oleh betine, cade kale tampel urang an lobeh bosar tanggaipade Yohanes Pembaptis. Kliagak, an paleng kocet dalam Kerajaan Suru'ge, lobeh bosar tanggaipade nye'e. ¹² Sojak zaman Yohanes pembaptis hingge kanninam, Kerajaan Suru'ge, wan urang-urang an kojam onan melakuannye juan pakse ¹³ Sobab, semue nabi wan Hukom Taurat bernubuat sampai zaman Yohanes. ¹⁴ Wan, jike kolai hondak menerimenye, nye'elah Elia an bakal menjuhak onan. ¹⁵ Sape an mempunyei kelindang enkai mendongai, hondaklah nye'e mendongaian! ¹⁶ Namon, juan apekah bakal Danbandingan generasi inen? Sidak onan macam biak-biak kocet an dudok di tompat-tompat umom, an menalau tetambah-tambahnye, ¹⁷ wan betutor, 'Urang koai menciopan seruling engkaidi'i, tapi kolai cade menari. Urang koai menyanyian lagu dukecite, tapi kolai cade berdukecite.' ¹⁸ Kerene Yohanes menjuhak tanpe makan, juge tanpe minom, wan sidak beromong, 'Nye'e kerasukan roh johat.' ¹⁹ Kliagak, ketike Biak Mendesie menjuhak lopas malan wan minom, wan sidak beromong, 'Liat, seurang an rangke wan pemabok, tetambah padangan pengumpol pajak wan urang-urang beduse.' Kliagak oleh kelakuannye." ²⁰ Dahnan Yesus mule mencele kute-kute tompat Nye'e malakuan paleng banyak mukjizat kerene sidak cade betobat. ²¹ Celakelah kolai Betsaida! Sobab, jike mukjizat-mukjizat an tolah tejadi di antare kolai juge tejadi di Tirus wan Sidon, sidak udah lambat bertobat juan bepekoyan kabung wan habu. ²² Kliagak, Doan menutoran kedi'i bahwe pade ari penghakiman,Tirus wan Sidon bakal lobeh bise menanggungnye tanggaipade kolai. ²³ Wan, kolai, Kapernaum, bakalkah kolai ditinggian sampai ke langet? Cade, kolai bakal dituronan ke dunie urang mati, sobab jike mukjizat-mukjizat an tolah tejadi di antare kolai onan tejadi di Sodom, kute onan bakal totap ade sampai hari oyen. ²⁴ Kliagak, Doan menutoran kedi'i bahwe pade ari penghakiman, tanah Sodom bakal lobeh bise menenanggongnye tanggaipade kolai. ²⁵ Pade wayah onan Yesus betutor, "Doan memulian Engkau, Bapa, Duate pucok langet wan bumi, bahwe Engkau menapok'an semue inen tanggai urang-urang an bijaksane wan pandai, wan mengungkapannye ke biak-biak kocet. ²⁶ Ya, Bapa, kerene macam onanlah an berkonan di hedopan-Mu. ²⁷ Segegale sesuatu tolah diserahan ke-Ku oleh Bapa-Ku. Wan, cade seurang pon an mengonal Anak, seloyen Bapa; cade seurang pon mengonal Bapa seloyen Anak wan setiap urang an dikehondak'i Sang Anak engkai mengungkapkannye. ²⁸ Datanglah ke-Ku semue an loteh lesu wan beboban borat, wan Doan bakal meenji'idi'i kelegaan. ²⁹ Pikullah kuk an Danpasang, wan belajarlah tanggai-Dan kerene Doan lomah lombot wan rondah hati, wan kolai bakal mendapatan ketonangan dalam jiwedi'i. ³⁰ Sobab, kuk an Danpasang onan mudah wan boban-Dan ringan."