¹ Lepas kame' melewate'nye dengan selamat, kame' tau bahwe pulo nyan te disebut Malta. ² Pendudok asli pulo nyan te nunjokkan kebaekan ati yang luar biase. Kerne, sida' ngidupkan api serte nyambut kame' semue sebab saat nyan pun ari te mulai hujan am serte udarenye dingin. ³ Kale Paulus ngumpolkan ranting-ranting dan naro'nye diatas api, seeko' ular beludak keluar kerne panas lalu melilet tangan Paulus. ⁴ Kale Pendudok asli meliat binatang bebise nyan begantung ditangan Paulus, sida' ngomong satu same laen, " 'nda' diragu'kan gi' am die nyan seorang pembunoh ⁵ Namun Paulus ngibaskan binatang nyan ke dalam api tapi die 'nda' ngalame' luka' apepun a' ⁶ sida'-sida nyan te sangke Paulus bakal 'mbengkak atopun tejato' dan mati saat nyan am. Tapi lama' sida' nunggu sida' nda' meliat ade suatu yang salah bakal tejadi pade die, akhernye sida'pun berubah pikeran dan ngatekan bahwe Paulus nyan te dewe. ⁷ Kale nyan, disekitar tempat nyan ade tanah punye pemimpin dipulo nyan yang bename Publius yang nyambut kame' serte njamu kame' dengan ramahnye selame tige ari. ⁸ Waktu nyan te, bapak publius tebaring ditempat tidur kerne demam serte disentri Paulus datang buat 'njenguk serte 'ndu'ekannye, lalu die menaro' tangannye keatas kepale orang nyan dan nyembuhkannye. ⁹ Lepas hal nyan tejadi, orang-orang lainnye dipulo nyan yang agi' sakitpun datang pade Paulus serte disembohkan. ¹⁰ Sida'pun makin hormat pade kame', ketike kame' siap belayar sida' nyediekan segale hal yang kame' perlukan.mu ¹¹ Dah tige bulan belalu, kame' belayar didalam sebuah kapal dari Aleksandria, yang belabuh dipulo nyan selama' musim sejo' dengan make' Dioskuri sebage lambangnye. ¹² Dah tibe di Sirakusa, kame' bediam disana' selama' tige ari. ¹³ Dari' senun kame' belayar nyusur'ek pantai dan tibe di Regium. Besoknye, angin selatan betiup dan pade ari selanjutnye, kame' tibe di Putioli. ¹⁴ Disenun, kame' jumpe'ek bebrape dulor Selman dan Diundang untok diam besame sida' selama' tujoh ari. Lalu kame' pegi ke Roma. ¹⁵ Dan saudare-saudare seiman disana', kale ndengar tentang kame', datang dari senun hingge ke Forum Apius dan Tres Taberne buat ndatange' kame' saat Paulus meliat sida', die besukor ke Allah dan atinye dikuatkan. ¹⁶ Kale kame' sampe' di Roma, Paulus dibolehkan buat tinggal sorang, dengan seorang prajurit yang ngawaleknye. ¹⁷ Tige ari berikutnye, Paulus ngumpolkan pemimpin-pemimpin Yahudi setempat, dan lepas sida' bekumpol, die ngomong ke sida' , " Saudare-saudare, walaupun saye nda' 'mbuat apepun yang melawan bangse kite atau adat istiadat nenek moyang kite, tapi saye diberi'kan sebagai sorang tahanan dari Yerusalem ketangan sida' Roma. ¹⁸ Kale sida' dah meri'se saye, sida' mao' 'mbebaskan saye kernen ndak ade ak alasan buat hukuman mati bagi saye. ¹⁹ Tapi, kerne orang-orang Yahudi keberatan saye tepakse naik banding ke Kaisar, bukan bearti saye mempunye'ek tudohan untuk melawan bangse saye. ²⁰ Jadi, itu' am sebabnye, saye dah minta' untok meliat kau dan ngomong dengan kau karne saye diikat dengan rantai inin demi pengharapan Israel" ²¹ Selanjutnye, sida' ngomong ke Paulus, " Kame' nda' nerima' surat tentang kau dari Yudea dan nda' ade sorangpun dari saudare-saudare seiman yang datang kesenek untok 'mberik kabar atau ngomong hal yang burok tentang kau. ²² Tapi, kame' mao' 'ndengarkan dari kau ape pendapat kau tentang sekte nin, kame' tau bahwe dimane-mane orang-orang nentang die" ²³ Kale sida' udah nentukan satu ari untok Paulus, sida' datang ke Paulus ditempat penginapannye, besame serombongan orang banyak. dari pagi sampe' malam, Paulus 'njelaskan ke sida' dengan besaksi tentang kerajaan Allah dan beusahe meyakinkan sida' tentang Yesus, baek dari hukum Taurat Musa, ataupun kitab pare Nabi. ²⁴ beberape orang bah pecaye mah dengan ape yang diomongkan Paulus, tapiu yang laen ade ga' am yang nda' pecaya'. ²⁵ Kale sida' nda' setuju seko' sorang, sida' pun pegi lepas Paulus ngomongkan hal inin." memang bujor am ape yang sampe'kan Ruh kudus ke nenek moyang kau lewat Nabi Yesaya. ²⁶ Pegi am ke bangse inin dan sampe' kan nam kau bakal 'ndengar, tapi nda' bakal paham a', kau bakal meliat, tapi nda' suah ngerti. ²⁷ Sebab, ati bangse nin udah menebal dan telingenye berat untok ndengar. sida' udah nutup matenye. supaye jangan sida' dengar dengan telinge sida', ngerti dengan ati sida' dan bale'. Lalu aku bakal nyembohkan sida'. Yesaya 6:9-10 ²⁸ Karne nyan, biar am hal inin kau ketahu'ek bahwe keselamatan yang dari Allah ini dah disampe'kan ke bangse-bangse lain dan sida' akan 'ndengarkan". ²⁹ [ Dah Paulus nyampe'kan omongan-omongan nyan, orang-orang Yahudi pegi dengan banyak pebedaan pendapat diantare sida'] ³⁰ Paulus tinggal selama' dua' taon penuh dirumah yang disewenye sendiri dan nyambut semue orang yang datang ke die, ³¹ sambel ngabarkan kerajaan Allah dan ngajar tentang Tuhan Yesus Kristus dengan penuh keberanian dan tanpa halangan apepun.