¹ Gya yesatn, ǝŋ kyaa tuu gon ɗaŋ a maali, kyaani ɗaŋ ki tǝ zhipti Coghǝi she a gǝǝm mureshi a datǝpmngǝ zhipti kǝ mbutarghǝni raa, ɗakghǝnɗa nǝ gama wan durghǝ tu tǝ ɗyiɓ gon wan won hŋ. ² Mbiin vuughǝni dlǝŋsǝ wan tǝ fighǝn cighǝi wo yugnngar mborki kǝ gi ɗaŋ nǝ ɓorghǝnni. ³ Durghǝ tu, konu ya mbi tu cinǝ ngǝtn won ɗaŋ yanes cinǝ ngǝtn won hŋ, ca morni gamas. ⁴ She konu tǝǝ ndǝr laa woshi, kili gin wo tu ngǝtn won ɗaŋ wo ɗuu gǝǝɓ kai she ya ɓumtsǝ gaam wos tǝ gon hŋ. ⁵ Durghǝ tu konu wo kon laaghǝ ngǝtn yo ɗaŋ a fi. ⁶ Gyo ɗaŋ tǝ fuutǝ gǝkes a naa ciɓ tǝ fitǝ laa mǝni a ngǝshi gya gin ɗaŋ yi ndararai, tǝ gui ɗaŋ ca ryaa Cogn hŋ. ⁷ Ɓuruk ngǝtn yo ɗaŋ kǝ kǝǝɓ yaani ghuŋ ci ngǝtn yo ɗaŋ ka tlaa. ⁸ Durghǝ tu ɓuruk gyo ɗaŋ kǝ kǝǝɓ tursǝ ngǝtn tǝ kuskǝ raa, nǝ kuskǝ ngǝtes ghǝn wo tlaani raaghai. Gyo ɗaŋ ya kǝǝɓ a zhipti, a te zhipti wo tu rai kǝ zhaɗ zhaɗ a tǝ zhipti. ⁹ Laa tǝ ɗuughǝ a fighǝn ngǝtnngǝ mbuuni hŋ, durghǝ tu a kili yo ɗaŋ yi ɗa ndarani maa tlaa ngǝtn yo ɗaŋ mǝ kǝɓ, ǝŋ mya dlaa gyaŋ hŋ. ¹⁰ Durghǝ tu a kili yo ɗaŋ mǝǝ tǝ dǝǝl, she mǝǝ fi ngǝtn mbuuni konu mǝn. Mǝǝ fi ngǝtn mbuuni gya gyo mǝn ɗaŋ cinǝ mǝri ghǝ caaghǝn raa. ¹¹ Yalǝn a yel lǝɗkǝn tagarta yo ɗaŋ mǝ dlyaaɗ ki mǝn tǝ taasatn. ¹² Gya gyo ɗaŋ tǝ suu tǝ giɗ raa mbuuni a te dlii caa caaki ciɓ tu tǝǝ sǝǝrǝki wani. Caa fi cighǝi durghǝ tu caa suuki tǝǝ ɓuŋngar shi hŋ, nǝ durghǝ ghǝmmbǝles kǝ yan ɗaŋ nǝ ɓorghǝnni. ¹³ Durghǝ tu gya gyo ɗaŋ taa sǝrǝshi washi caa laaɓ mborki hŋ. A bamvi gi caa suuni tu tǝ sǝrǝki wani, durghǝ tu tǝǝ ɗuu gǝǝɓ tǝ dlii wan. ¹⁴ Gaan tu mya ɗuu gǝǝɓ tǝ ghǝmmbalghǝni Daadǝn wopm Yesu ɗaŋ nǝ ɓorghǝnni, Te ɓastǝ ghǝn tǝ ghǝmmbal ɗǝgn te ɓasǝm, myani a te dǝkes. ¹⁵ Durghǝ tu sǝrǝghǝn ki sǝrǝghǝn hŋ nǝ ngǝtn won hŋ. A bamvi gi nǝ zaarghǝ muuri. ¹⁶ Ɓuruk gya gyo ɗaŋ ta tsǝtn a ngǝtn yo ɗaŋ tǝ gaa, mǝ gaa raa wusni tǝ yelghǝn gwanndǝ tǝ raa wusni tǝ naa ɓashi tǝ dulgam mǝn Isar'ila kaɓkǝ Cognvon. ¹⁷ Ɗaŋngǝnni tǝ hal a ken gon tǝ vuum raa mǝn hŋ, durghǝ tu ma mbi dadaɗ wus kǝ Yesu a dletn. ¹⁸ mbuuni kǝ Daadǝn wopm Yesu ɗaŋ nǝ ɓorghǝnni tǝ naa tǝ gya zhipti wan. Tǝ naa cik.