¹ Bulus, tǝ Sibanus,tǝ Timotawus nǝghǝ tlǝghǝni a kyaani mǝn laaɓkǝn Tasolinika a giɓkǝ Cognvon Dawopm, tǝ Daaghǝ Daadǝn wopm Yesu Ɓorghǝn Cogn. ² Gyaal ghǝ Cogn tǝ naa ɓaski tǝ wusni ghǝ raa yo ɗaŋ yi ɗi gha Dawopm Cogn tǝ Daadǝn Yesu Ɓorghǝn kǝ Cogn.' ³ A naa ciɓ mǝ nyaar Cogn mǝn ko dzaŋgyo nǝ kyaani mǝn wopm. Nǝ durghǝ yo tu cighes a ndara. Caaghǝn raa waan tǝ daɗag kai nǝ ŋaa nyi hŋ. Suughǝni dlǝŋ waan tǝ daɗad kai. ⁴ Myaani tǝ gama wopm myaa ɗuni gǝǝɓ tǝ kyaani mǝn laaɓkǝn Cogn. Migha wulghǝn vi a shiili ghǝ raa waan tǝ ccghǝni raa waan a buŋngǝni yo ɗaŋ kighai. Miigha wulghǝn vii gha buŋngǝni yo ɗaŋ kigha dluughǝni vwaa ghai. ⁵ Gini yaa cinǝ ɓalaŋ ɗǝǝlghǝn vik Cogn kaɓkǝ zarghǝ zaari wos. Ngǝtn yo ɗaŋ wo laaɓ kaari ɗi yaan tu ndaghǝni a giɓkǝ guŋndu ghǝ Cognvonii ɗaŋ kyaa buŋ ɗai. ⁶ Nǝ mbun gha Cognvon tǝ sular matsǝ ghǝnii mǝn yo ɗaŋ caa matsǝki mǝn, ⁷ a vǝr ki ngaaghǝn laa tǝ myaani. Wo fi ngǝrshi gin gha dzaŋ ngǝ maaghǝn Dawopm Daadǝn Yesu ɗaŋ a shii ɗi Tsogn tǝ mǝn shinngǝn Cogn tǝ vartǝ wos. ⁸ A giɓkǝ wuɗ anda wo suular gya gyo mǝn ɗaŋ tǝ yisǝŋ Cogn hŋ tǝ kaɓ vii wusni ghǝ Daadǝn Yesui hŋ. ⁹ Ta buŋ forǝn ngǝ mǝskǝni dzaŋ ngǝ jaan a ken wos tǝ luughǝni vartǝ wos. ¹⁰ Wo fi gin dzaŋgii ɗaŋ yaa mani tǝ luughǝn wos nǝ zarsǝ wos, wo ndǝr naa nǝ ngǝtn ngǝ kwasarghǝn a mǝn yo ɗaŋ tǝ caa raa ɓastǝ. Nǝghǝ yo tu kǝ caa raa a ngǝtn yo ɗaŋ kǝ tlya zha wopm ɗa. ¹¹ Nǝ durghǝ gin mya kara Cogn ko dzaŋ gyo nǝ kyaani. Mya kara Dawopm tǝ caa cimngǝn waan tǝ naa ndaraara. Mya kara Cogn tǝ vǝrki ngǝtn yo ɗaŋ kya suu aa yi fi ngǝtn mbuni ndaraara tǝ ɗeɓaɗ laaghǝ caaghǝni raa tǝ vartǝ. ¹² Mya kara gin nǝghǝ yo tu sǝm ngǝ Daadǝn Yesu tǝ tu luughǝni ɓastǝ, nǝ durghǝ yo tu gyal ghǝ Dawopm Cogn, tǝ kaɓkǝ Daadǝn Yesu Ɓorghǝn Cogn.