¹ Biturus, murghǝ shinngǝn kǝ Yesu Ɓorghǝn kǝ Cogn a lǝǝɓkǝ sǝmmbǝrsǝ yo ɗaŋ nǝ bwaghǝn, ɗaŋ cin basaŋngǝnni giɓ Buntus, galatiya, kappadokiya, Asiya, tǝ Bitiliya, ² Gin yin a yisǝŋngǝn ɓanndǝŋ kǝ Cogn Daa, ɗaŋ tǝ bǝlshi tǝ zhipti var kǝ mbutarghǝn gam nǝ durghǝ petsakkǝnngǝ voraŋngǝ Yesu ɗaŋ nǝ Ɓorghǝnni. Gyal tǝ naa tǝ kyan, tǝ mbutarghǝn raa wa tǝ gǝǝɗi. ³ Gan Cogn von tǝ Daaghǝ Daadǝn wopm Yesu ɗaŋ nǝ Ɓorghǝnni tǝ naa tǝ shiɗ shiɗi. A giɓkǝ dǝllǝk yelghǝn gwanndǝ wos, a vǝrmi mbwaaghǝn muuri nǝ durghǝ raafeɗi nǝ kǝ dul. Duli gin yin a tǝpmngǝ shishighǝnɗi Yesu ɗaŋ nǝ ɓorghǝnni a giɓkǝ gya gyo ɗaŋ taa mǝǝshi. ⁴ Gin nǝ dul yo ɗaŋ wo laaɓzha hŋ, ngǝtn wo malar tǝ hŋ, wo mǝǝs hŋ. Yinǝ gaghǝn tsogn gaami nǝ kyaani. ⁵ Kinǝ lyaghǝn tǝ vartǝghǝ Cognvon a tǝpmngǝ Caaghǝn raa, duryo tu vumngǝn yo ɗaŋ tǝ ɓuumtsǝ ɗaŋ a naa mel tǝ bǝǝli a kili ghǝ ɓanngǝn. ⁶ Kitǝ polghǝn nyaŋ nyaŋ a dulgam gin, ko ɗaŋ tu yin ciɓ ɗaŋnin a wum wumngǝnraa a giɓ kǝ vuughǝn mari mari monnda. ⁷ Gin nǝkǝ diiɓkǝnngǝ caghǝn raa wan, gyo ɗaŋ a moɓ zinariya jimngǝn gyo ɗaŋ wo laaɓ zha, ko ɗaŋ tu ca diiɓ tǝ wuuɗ. Gin a fi duryo tu caaghǝn raa wan tǝ lǝǝki luughǝn, zǝkkǝn, tǝ zhimngǝn mǝnɗi a bǝlghǝnngǝ Yesu ɗaŋ nǝ Ɓorghǝnni. ⁸ Kaa yeltǝ hŋ, beɗ tǝ gi kyaa suu tǝ. Kaa yeltǝ ɗaŋnin hŋ, beɗ tǝ gi kaa caa raai ɓastǝ tǝ cik kitǝ polghǝn nyaŋ nyaŋ ɗaŋ nǝkǝ ɓokkǝn vi hŋ, polghǝn yo ɗaŋ nǝ yugngǝn tǝ zhimngǝn. ⁹ Ɗaŋnin kyaa kaɓnǝni nǝ durghǝ gammawan nǝ bamvi ghǝ caaghǝn raa wan, kǝ vuungǝn gya raai wan. ¹⁰ Mǝn shinngǝn Cokes tǝ paŋ tǝ ndǝr tǝ ceɗ tǝ ɗakkǝn a dulgamngǝ vuungǝn gin, a dulgam gyal yo ɗaŋ wo naa nǝ gwaan. ¹¹ Tǝǝ paŋ tǝǝ yisǝŋǝi tu nǝ vuumngǝni gyo ca manno. Tǝǝ paŋ tǝǝ yisǝŋǝi tu ko nǝ nu, tǝ ko kili gyo ǝŋ zhiptivar kǝ ɓorghǝn Cogn a giɓi wasǝŋ ɗaŋ a ta yigha wulghǝnvi tǝ yesji. Gin ata nguɓ a kiliyo ɗaŋ a tanyigha fughǝn wasǝŋ kyaɗ a dulgamngǝ gya buŋngǝn kǝgi ɗaŋ nǝ ɓorghǝnni tǝ gya luughǝn yo ɗaŋ wo laaɓ kaari. ¹² Tǝ ta bǝlshi mǝn tu ɓak caa mbuuni gamma wasǝŋ mǝn hŋ, beɗ tǝdi kyaani, a kiliyo ɗaŋ tǝ wulvi a gya ngǝtn yo ɗaŋ ɗaŋnin ɗaŋ taafuuki a gya gyo ɗaŋ caa fuuki vik wusni a zhipti ɗaŋ tǝ shinɗi a gya ngǝtn tsogn gaami a giɓkǝ guo ɗaŋ gya zhipti shinngǝn Cogn taa suu tǝǝ yelli. ¹³ Nǝ durghǝngin a ɗakɗa. A ngaɓǝn gammawani. A caaghǝn raa wan tak a dulgamngǝ gyal yo ɗaŋ taa lǝǝr kii mǝnɗi a kilighǝ bǝlghǝn Yesu ɗaŋ nǝ ɓorghǝnni. ¹⁴ Ɗaŋ mǝri ghǝ wumngǝn kǝǝm, ɓak a sughǝɗǝn gamawan a sughǝn yo ɗaŋ kǝ taya laaɓ a kiliyo ɗaŋ kǝta yisǝŋ hŋ. ¹⁵ Beɗ tǝ gi ɗaŋ gyo ɗaŋ a cimkiiɗi cin ndzǝkni, kyaani ɗaŋ, naan tǝ ndzǝkkǝn a ɓuruk tsǝtnngǝnwan. ¹⁶ Duryo tu yin dlyaaɗkǝn, ''Na nǝn tǝ ndzǝkkǝn, nǝ duryo tu minǝ ndzǝkkǝn.'' ¹⁷ Tǝ cik ǝŋ kya cim ''Daa'' gyo ɗaŋ ca ɗǝǝlvi tǝ suughǝn gam hŋ beɗ tǝ gi yin a dulgam laaghǝ ko zaari gyo, ɗuun kilighǝ riighǝn wan a giɓkǝ luughǝn zaar. ¹⁸ Kaa yisǝŋǝi tu ɓak a ta yin tǝ Azurfa ko Zinariya gyo ɗaŋ caa malari ǝnnda tǝ ta kaɓ kighai hŋ, a ɗǝghǝrghǝ tsǝtnngǝn yo ɗaŋ kǝǝ ta kuuɓ a gya Dawan. ¹⁹ A bamvi gin, kinǝ kaɓkǝn tǝ voraŋngǝ ndarani kǝ Yesu gi ɗaŋ nǝ Ɓorghǝnni gyo ɗaŋ a ta yin ɗaŋ ŋaatim yo ɗaŋ citǝ vuumngǝn ko daduɗ wus hŋ. ²⁰ Tǝ ta bwaa Ɓorghǝn kǝ Cogn ɓanndǝŋ kǝnnda daaɗighǝ ɗǝgn, beɗ tǝ gi a ta bǝlɗi ɓaski. ²¹ Kǝǝ caa raai a Cogn te ɓastǝ, gyo ɗaŋ tǝ shisher tǝɗi a mǝn mǝǝskǝn tǝ gyo ɗaŋ a vǝrtǝ luughǝn duryo tu caaghǝn raa wan tǝ raa namboŋǝi wo naai a Cognvon. ²² Kǝǝ ndar gya raa wan yelyel a tǝpm ɓutarghǝngam a jom jomnes. Gin a ta yin nǝ deghǝ jom jomnighǝ suughǝnngǝ yestǝ, tǝ cik suunǝn dlǝŋsǝ wan tǝ ɓuruk raa wan. ²³ Kaa nai nǝ gya gyo ɗaŋ taa sughǝɗ mbwaaghǝn washi, bak yin a tsǝri yo ɗaŋ ca laaɓ zha hŋ, beɗ tǝ gi yin a tsǝri kǝ mbuni, a taghǝ tsǝtnngǝn vik Cogn tǝ kǝ ŋaawos. ²⁴ Duryo tu, ''ɓuruk dli cin ɗaŋbyaar, tǝ ɓuruk luughǝn wos yin ɗaŋ byali gwas gyo ɗaŋ yaares caa kuŋǝi, tǝ ɓuruk byali gwas caa kaa tǝ ndaɗi, ²⁵ Bed tǝ gi gǝgnngǝ Daadǝn a naai nǝ kǝ ndok ndoki.'' Gin ngǝn nǝ vik muri ghǝ wusni ɗaŋ tǝbta kon ki mǝn.