¹ Ndiwa gawa maku i gəshskshi da tarrnyi bayangu mi wakatu katanas i witaja, ² kakə mi nda rami ja da miya ndawa mi biwu wakati daakshi, wato muwanaucin sakwtu gu. ³ Iyu ke naika dlamingara bəlan, na tarrnyici bee tawanke kurak-kurak, gaɗa tin səkurr na ɗəgena dalasa bayangu cak-cak, alanguprro baci martapa Tiyopulus. ⁴ Sutku kasən gaɗa kaa zəgi jirrewa i ɗa tamke warra nda ramici. ⁵ I zaman Hirridus dəgəm Yahudiya, nda dlam pərris ɗagai , baci dləgun Zakarriya, warra vəre da kun auɗu Pẹrris Abija. Aci zəbe ama da kun auɗu Harruna gamaɗ, mi dləgun Alisabatu. ⁶ Akshi shirin cam ndak adalta i ri Kakasəku, gaɗa akshi a ɗəga dumaya mak na be tawanke mi Məgənyi ancu, na gəshi gayi. ⁷ Amman akshi na matkam bai, gaɗa Alisabatu gu duguru,, so akshi ke garunakshi tlapar i lakwtu. ⁸ Sartu ɗagai, Zakarriya a kəma Səku, a miya wana gəri kə pərris, gaɗa gafo ke, miya wanau vaikengara kə pallakshi. ⁹ Kakə mi nda kawa cikɗa pərris warra aye dlama wana, se nda cikɗe aci da kun palla pərrisaucin mi aca kunu gaɗa da təfi wənduwa Məgənyi da baki atərrshan. ¹⁰ Algi ndawa mak a magita a vəda i lakwtu mi aca baka atərrshan gu. ¹¹ Se maleika Səku da pakai da rrə'yi da baaka bagadi baka atẹrrshangu. ¹² Lakwtu mi Zakarriya i ka ci tənu, se da gəraɓi, kalau da jəb na aci. ¹³ Amman maleikau da ramici ma, "Zakarriya, ka kalwa bai, gaɗa Kakasẹku wuru na magita ci. Amaci Alisabatu aye ɗi ci mayim. Ka ɗaura dləgun gəri Yahai. ¹⁴ Ka ye dlama kuno na pərrɗai tlaparr, zam ndawa gawa aye kuno ɗi gəri. ¹⁵ Gaɗa aci aye dlaɓa marəm gənən i kəma Məgẹnyi. Aca dlaɓa baci sak səma bai, ko baci sa bee mi a ɗawa kuyo. Nda niya na aci na Nẹnwa Səku tin da kun madu miwu, ¹⁶ a katayi na ndak Isrraila gwa i ɗak dəvu Məgənyi Kakasəkwakshi. ¹⁷ Aci aye dlama rakan i kəma Məngənyi i kun nənwa na kərrmai Nabi Iliya. Aye dlama kasau gaɗa da məsci gəshi afafkin i gərre kutlatlkinshi, gaɗa nda gauɗak gaɗa da ɗigi dəvu adalta. Da sərmi ndawa mi nda sapərratu gaɗa Məgənyi." ¹⁸ Se Zakarriya da rami maleikau ma, "Na zəgi kasu nana? So na garənga, amaga ke garəngara." ¹⁹ Maleikau nda ngumici da ramma, "Iyu Jibrrilu, baci rrə'yi kəma Kakasəku. Nda wane iyu na ramici, nandici labarr herr təku. ²⁰ Aiki, ka kaci na ci dakuya, ka dəmu rama bai, se gafa warra bayangu wakatu. A dlaɓa kasau gaɗa ka bar jirrewa na rama warra na rami ci bai, mi aye wakata i kal-kal lakwtu gara. ²¹ Sarrtu ndawa a dərri Zakarriya tənu, se da jəb ajab gaɗa gawa sukwakuya gəri, i kun Wənduwa Səku gu. ²² Aci vəre tənu, a dəmu dlamekshi rama bai. Akshi da sanucidu ma, acu dlame na lawan i kun Wənduwa Səku. Se aci da jəb dlamekshi rama na aikwak, a dəmu rama na miya bai. ²³ Sarrtu warra miya yiwan wana gəri kə lakwtu damungara tənu, se da kacingeri wenduwa geri ²⁴ Da ku yiwan təku, se amagəri Alisabatu da mi na madau, da deɓshi na aɗagara harr tərra vaɗ, da ramma, ²⁵ "Sutku ne bee mi Məgənyi dlama nai, sarrtu mi launayu na kanjino, gaɗa da mi danai bik zhirau, da ri ndawa." ²⁶ Lakwtu Alisabatu a kun tərra ma-zədu na ma madau, se Kakasəku da wanyi maleika Jibrrilu i ɗa ɗagai i kun lardi Galili mi dləgun Nazarrat, ²⁷ i ri dabaku ɗagai, mi dləgun Maryamu, warra Isubu kə auɗu dəgəm Dauda a ɗəgau i patla. ²⁸ Maleikau da nai i ri gara, da ramma, "Nda ndəma kəm, kəm warra ka ba na herr tlaparr! Kakasəku a ɗagayi na kəm." ²⁹ Amman ankal gara tlangara tlaparr i ɗa təlam gəru, se atu da dlam ajap, da ramma, zada ndema tawan kasau. ³⁰ Maleikau da ramitu ma, 'Ka kalwa bai Marryamu, gaɗa ka ba na herr da ri Səku. ³¹ Aiki, ka ye bi madau, ka 'yawi mayim. Kaye ɗaura dləgun gəri 'Yeso.' ³² Aye dlaɓa marəm, ke, ndaye ɗaura gəri Wən Kakasəku Mulah/baci saksakta. Kakasəku Məgənyi a bardici gwajere garva auɗu Dauda.. ³³ Aye dlama garva wənduwa/audu Yakubu harr dəmarro, garva gəri ke a dama bai." ³⁴ Se Maryamu da rami maleikau ma, "Bitku a wakata nana, bee galte na zẹga gəmsək bai?" ³⁵ Se maleikau da ngumitu, da ramma, "Nẹnwa Sẹku aye fuwayi ɗa kəm, kərrmai Səku Mulah ke a cima na kəm. Gaɗa kasən, nən go aipu mi ndaye ɗi gu, nda ɗaurau Wen Kakaseku. ³⁶ Aiki, yagana kem Alisabatu cam na madau mayim i kun garugaragu. Sutku terra gara ke zedu, atu mi nda daura tu duguru. ³⁷ Gada go-bee warra a bedamu i Kakaseku." ³⁸ Se Marryamu da ramma, "To, so iyu gabayi gama ke Megenyi rro. Arr'yi da dlabanai kake mi ka ramu." Se maleikau daivi na atu. ³⁹ Se maryamu da tli kaɗe, i kun yiwangu, da yi ɗa ɗagai, mi a kun guguyayin Yahudiya, ⁴⁰ təfi kunu wənduwa Zakarriya, da ndəmi Alisabatu. ⁴¹ Lakwtu mi Alisabatu kəma ndəma Marryamu tənu, se matkam warra a kunu garagu da dlam katarr, ke nda niyi na Alisabatu na Nənwa Səku. ⁴² Se atuu da tlatli wura gara na awayau da ram maya, "Mi barka ne kəm i kun amatin, matkam mi a kuna kəm ke baci barka. ⁴³ Gaɗa gəmo wakatu na iyu kasau, harr mi məgənyi ga da nai i ri ga? ⁴⁴ Aiki, lakwtu mi ndəma kəm təfi agu ga tənu, se matkam mi a kunuga katərri gaɗa pərrɗai. ⁴⁵ Zam mi barka ne atu, mi barna jirrewa na bayangu, warra nda ramitu alkawarr gu da ri Məgənyi, ma nda niya du." ⁴⁶ Se Marryamu da ramma, "Arroga a saksakta Məgənyi, ⁴⁷ nənwa ga ke a pərrɗai na Kakasəku baci ra ga, ⁴⁸ Gaɗa aci tanu na gabayi gəri gama. Aiki, i kəmangu, zaman tawanke mak, aye ɗaura ganai mi barka. ⁴⁹ Gaɗa Kakasəku baci kərrmai dlamu danai bik ajap tlaparr, dləgun gəri ke go apu. ⁵⁰ Kanjənogəri dlaɓungara katanas harr dẹmarro, i ɗa zaman/kəlama tawanke mi a kalu gəri/a dlameci nakwana. ⁵¹ Aci tatku kərrmai ami gəri, da wayi na ndawa mi a rrakdlaɗa na kurrarram gəshakshi. ⁵² Aci wurrtu na nda garva, da gwajerarin garvakshi, se da saksakci na ndawa warra bee wammbai. ⁵³ Ndak maya ke aci da wayi na akshi na bəlalmin bayangu, amman nda bərrəɗ, aci rarka du ami gaɗau ⁵⁴ Da banaci gabayi gəri Isrraila, gaɗa aci da tanyi da tatki mugurəm, ⁵⁵ (kakə mi aci rami afafkin ja) i Ibrrahim na kadugumamin gəri harr dəmaro." ⁵⁶ Marryamu da mbasi ri yaganagara Alisabatu harr damtu tərra kwan, da kugu da kacingara i wənduwa gara. ⁵⁷ Yiwan mi Alisabatu aye ɗingara dengara tin se da'yawi mayim. ⁵⁸ Makapətatin na yaganaucingara kəma ma Məgənyi tatku na mugurum geri tlaparr i Alisabatu, se akshi da jəb dlama pərdai atu. ⁵⁹ Gafa yiwan danda-fudu na di mayingu dengara tenu, akshi da nai i wuda mayingu, Askhi maku da mpici dlegun ma "Zakariya;" cubena afekgeri. ⁶⁰ Amman miwu da ramma, "O,o. Ndaye daura geri Yahai." ⁶¹ Se akshi da ramitu ma, "Go nen warra a kun yaganaucin kun mi nda daurau na dlegun teku." ⁶² Se akshi da dlam rama i afku na amai, nda jaya ci dlegun warra aci anci nda dauri mayim gu na atu. ⁶³ Afku da jayi bi tarran, da tarrnyi ma, "Dlegun geri Yahai." Akshi mak da jeb ajap i da biyu. ⁶⁴ Na tasena bai se Seku da repci na miya geri da fetki na marrnyu. Aci da banji rama a saksakta Kakaseku. ⁶⁵ Ndawa mi da mbasu a damtukshi mak, da kalwi nakshi Kakaseku warra dlam bitku i Zakariya. Labarr bayangu mak da vaikingare lardi guguyayin Yahudiya. ⁶⁶ Ndawa mi kema mak, da mpi di geshakshi, da jeb ramau ma, "Zada marem genen tawan mayim teku aye dlaba?" Gada aikwak Megenyi a da geri. ⁶⁷ Nenwa Seku da niyi na afek geri Zakariya, da dlam anapci, maya, ⁶⁸ "Sarkerta i Megenyi, Kakasəku Isrraila, gaɗa aci deu da dlam bana, ke damu na wana kə dləgda ndagəri, ⁶⁹ Aci waneu diwa baci ra, warra na kərrmai tlaparr kə ra, da wənduwa gabayi gəri Dauda, wato da kun auɗu Dauda zədai gəri, ⁷⁰ kakə mi Kakasəku ramu, da miya nabaucingəri mi ga aipu tin zaman waci. ⁷¹ Acaye ni diwa ra, da ri makuraucinwa na nda gaba na wa. ⁷² Aca dlama kasau gaɗa da tatki kanjino i afafkinwa Ibrrahim, ke da tanyi ardiya gəri mi goaipu, ⁷³ yinɗa warra aci ramu i afəkwa Ibrahim, ⁷⁴ ta yinɗa bəza nawa, wa dlamici nakwana go-kalau, aku nda ra na wa da ami makuraucinwa, ⁷⁵ wa dlaɓi go aipu i kun adalta i kema geri, i kun mbasawa mak, ⁷⁶ Auwo, mayim təku ke, ndaye ɗauraci nabi kə Kakasəku Mulah, gaɗa ka ye nute jampel Məgənyi, ka sapərraci ndiwa gaɗa ni gəri, ⁷⁷ ka parrakci dəvu ra i ndiwa, da ri tupta aipapinshi. ⁷⁸ Sutku aye wakata ne gaɗa gawa kanjino Kakasəkwawa, gaɗa ɓidla da dəsku a ni, da bariwa bana da ri Səku, ⁷⁹ da bari ɓidla i ndawa mi da mbasu i kun aiwakwina, na nənwa mutu. Aca ye dlama sau da tatkiwa dəvu salam." ⁸⁰ Mayingu da rawi da dlamingeri na awayau i kun Nenwa Seku, da mbasu a pata harr lakwtu mi aci bandu wazek i ndak Isrraila.