¹ Bulus mi wara nda ɗauru dari Masipu Yeso gaɗa da dlaɓi baci wanyi ikun Nənəwa Səku, na yaganaja Sastanisu, ² i nye nda ɗəga Səku kə Korinti, i nye ndawa wara nda ciriɓtə na akshi i kunu Masipu Yeso, ndawa wara nda ɗaure akshi gaɗa da dlaɓi nakshi duniyabu wara na aipu bai. Ja tarnau ke i ndawa mak wara a ɗaura dləgun Məgənyi Yesu Masipu i rawanke, wato Məgənyakshi na Məgənyaja ke. ³ Herr na mbasu kəlappiya da nai i rikun dari Səku Afawa na Məgənyi Yeso Masipu. ⁴ Fatawanke na sambarka i Səku gaɗa kun, gaɗa herr Səku wara Masipu Yeso dlami kun. ⁵ Aci bardi un ləman i duvu tawanke, i kun rama na zəgaya tawanke. ⁶ Aci bəɗu na kun, kakə wara saida i ɗa Masipu kasaktən gara na jirewa i gadava kun. ⁷ Gaɗa kaseən kwa bukə bari kə ruhaniya bai lakwtu wara kun na dlakwi pakayai Məgənyawa Masipu Yeso. ⁸ A ɗauzata na kun harr i dadəgəri, gaɗa kwa dlaɓi go aipu i gafak Məgənyi Yeso Masipu. ⁹ Səku baci jirewa ke wara ɗauri kun i kunu njimeɗ Wun gəri Yeso Masipu Məgənya wa. ¹⁰ Na ɗauzata kun, yaganaucin, i kunu dləgun Məgənyawa Masipu Yeso, a kasaktina na aɗakun tagadlawa da dlaɓa i gadava kun bai. Na ɗauzata kun wam a dlamina tanke na gəshi gayi miya kun ke da dlaɓə gayi. ¹¹ Atəro kutli Kulaucin dedani rama kun ma tagadlawa təfun gara i gadava kun. ¹² Nda dlamə nana: tike kun a ramo ma, "Iyu na aku Bulus," ko "Iyu na aku Apollos," ko "Iyu na aku Masipu. ¹³ "Nda ɓurarəna Masipu gu bi? Nda dləgə Bulus gaɗa kun bi? Ko nda dlami kun Baptisma i kun dləgun Bulus? ¹⁴ Na dlam sambarta i Səku gaɗa na dlam Bastisma i nən wam bai, se i Kərispus na Gayus rukshi. ¹⁵ Na dlamə kasən gaɗa karr ɗagai da ramə ma nda dlami kun Bastisma i kunu dləgun ganai. ¹⁶ Na dlamə Bastisma i yal wunduwa Stipanas ke, kasən binən na tumantu na dlam Bastisma i ɗagai wam bai. ¹⁷ Atəro Masipu wane iyu gaɗa na dlam Bastisma bai, amman gaɗa na dlam wazək rama gəri. Aci wane iyu gaɗa na dlam wazək təlam ramak zəgayak nəngaiwa bai, gaɗa karr dləga wara nda dlami Masipu da bukəna kərmai gara. ¹⁸ Atəro wazək dləga kakaɓukwina i rik ndawa wara a rabu. Amman i rik ndawa wara Səku rakshi, kərmai gəri. ¹⁹ Atəro da tarna maya, "Na waya na zəgayak nda zəgaya. Na dləməɗ na yakintak nda asən." ²⁰ Nda baci g ərayu? Nda baci zəgaya?Nda baci gamɗaya kə duniya təku? Səku məstə gərayək duniya i kakaɓukwina bi? ²¹ Tənda duniya na zəgaya gara mak zəga Səku bai, Səku ika kalkal dari ndak bari jirewa mak dari kakaɓukwinak wazək. ²² Atəro Yahudaucin anci daiki be wara kə ajab, Helinaucin ke kuru a maka zəgaya. ²³ Amman ja dlamak wazək Masipu wara nda dləga ci, guguyak kə dagamuk Yahudaucin irik Helinaucin ke kakaɓukwina ²⁴ Amman irik ndawa wara Səku ɗaurakshi, Yahudaucin na Helinaucin mak, ja wazək Masipu i mbasək kərmai na zəgayak Səku. ²⁵ Atəro kakaɓukwinak Səku rəma na gərayuk ndawa, taskin gəri rəma na ndawa i awayau. ²⁶ Aikina ɗaura wara nda dlami kun, yaganaucin, mak kun bai nda zəgaya i rin ndawa wara a kaktla kun. Tike bai baci kərmai. mak kun bai wara nda 'yawu na garva. ²⁷ Amman Səku cikɗaɗu be wara bata be wambai i duniya gaɗa da zhirwi ndak zəgaya. Səku cikɗu be wara na awayu bai gaɗa da zhirwi be wara na awayau. ²⁸ Səku cikɗu be wara go paida ga muwak i duniya ke. Aci cikɗaɗu be wara ndawa a lawangu i miya be wambai, gaɗa aci da mbasci na mak be wara nda lawangu na paida. ²⁹ Aci dlamə kasau gaɗa karr nən ɗagai da dlaɓə na aro marəm i kəma gəri. ³⁰ Gaɗa be wara Səku dlamu kwa dlaɓu nakun i kunu Masipu Yeso, wara dlamən gara bi asən i wa darik Səku. Dlamən gara bi adalta i wa, vəyi na wa, da rə nawa ke. ³¹ Gaɗa kasən, kakə wara nda tarnu i kunn rama Səku maya, "Baci kkəma adla, da kkəma adla gəri i kunu Məgənyi"