¹ "Turik malekai tong ban donshui Afisus ta: woi eni ngoi woi an jenjaku babailo sarannis tinai 'e, yo a marshe tintil 'yak zena hitilaku dinar babiloi 'e angko ta;, ² Nen manotik ei ko iko shafsu. Ne manoti ko iko ruta shei ki kanno. Ne manoti ko an habri na ko ruko tong yam. Ne manoti ke jok biska ana rutanta disa bu, ke jok dodogla algi ka ona jiresu, kek manotik mayei a wunda kasu ta ana deino kusa Yeso, me ka a bu. ³ Ne manoti ko an sheiki habri, kek sa maito shei kika suno, me kek to'iko bu. ⁴ Me woi ei yon kolshe zeini buk koi, ko wuskok ndaltungko yo tono. ⁵ Kika ka a dibik be is ko ngatadgo. Ko tube ko e ei ko iko tingki onzi. Kaba fak tube, ne nditu gemkon shaftitik hitilatkok be 'i deinoto. ⁶ Mek an ei woi ye e yon ndalo: Ko ku'ukok ei Nikolatawaku 'yangko, yo ne ken nda bu. ⁷ Ngoina na kumo kol ei Kelui bu'uno anshek ban donshaku. Ngoina itkok nasara ne oni hadik tong roh yo zau, yo a tong firdasi Ndeyi."" ⁸ Turik malekai tong ban donshui Samaruna ta: 'Woi eni woi yo Si yo tono ke tata ka, yo matko jo sauwidgo aye. ⁹ "Ne manotik bonetko ki murengko mek an dara, ne manotik ana yabta sun ta nzuni Yahudaku, nzuni me ka a bu. Nzuniy ban donshu Singkau. ¹⁰ Kadak kol zubak bones ko gotko seshe dom bu. Jirek eniy singkau nda moktik ma'atongku tong rono, zof nguni be is an maito a kakabta nguni moi gedok ona jiretku. Ngu sena maoti so sommodi shim. Ta dom ki ona jire kanno, lei a dugshe ngunik kanno. 'Ya lei miya tong jire ngu wena zau so an wuye bu. ¹¹ Ngoina an kumo kol ei kelui bu'uno anshek ban donshaku. Ngoina itkok nasara a mata so ka bolo bu.""' "12 Turi dingdo wonses ki ban donshui a Burgamus: 'Woi eni ngoi an dirbai boni bolo saranniy 'e: ¹³ "Ne manoti be is ko deinoi be'i deinok Singkau. Shafki ka a ko ngafkok sunok gedo, ne manoti ko iko shana ka ona jiretko kanno bu, lei a sommodiy Antifas yo a sheidanta ne e, ngoi zina, yo dgyangko si hototku, a wondi be is Singkau deino. ¹⁴ Me, lei ki ka a, ne moishe ei ma'ato ma a zofshentik rege ka ona jiretko. Ko di'ishentik biyangkoi ma'ato shutante kit shida yo Balam shutanta onzi. Shutantak Balak had lui onangkok goro jo ta onangkok bille e aza hotok biya Ndeyi ¹⁵ A tong shida bille wom, ma'atongku ke ngahangkok bille Nikolatawakuk gedo, ta aza ei zina, so, ki jire, suba e te bu. ¹⁶ Wus ina ei woiye 'e, ko tube! Na ko ku'uko Ne nditu gemko mamarei, ken ina kesik nzuni ki dirbai tong bono. ¹⁷ Eri ngoi an kumo kol 'ei Kelui anshek ban donshaku. ngoi iko nasara Ne oni mannas bungkeno, jon oni goshos hetre ki sun yo hoyo tureno ka goshos 'e, sun yo an ngoi man bu, kaba ngoi yo biskai 'e.""' ¹⁸ Godi gya malekai ban donshui Tiyatira: 'Mamaye eni Lah Ndeyi, yo an ido kit hanok yesi; shekei kit tagullas leleno: ¹⁹ "Ne manotik ei ko iko, ndaltungko, ki ona jire ki nginhutko ki gedok ngara tilingko. Ne manotik ei ko iko kauso kauso wallak yok iko yo tono. ²⁰ Shasfki ka a, me woi ei a zofshe ne'e mure kola zeiko: Ko habrik mandu wonses 'e Yezebel so a wunda kato ta Nabiya. Ki be'i shutantunto, te zofko ngarakuno 'e aza ke to wo'otoi zangko zug goro sadka. ²¹ Ne onto sommodi tubek azatos me nda tuba bu. ²² Moyi! Ne gonno zofshento bi, biyai ke 'yangko azak tei a rina tong bone, kaba dei na tubangkok tong billento. ²³ Ne goha millantok mato, ke ban donshu shaf a mantiti ta a jagda dibna ki tiliy Ne'e. Ne ona bo hawok leilo hototku jajum ei ko iko. ²⁴ Me ki kinengkui tong Tiyatira, lei ngoi yiya na ngafko shutantu woi bui, ke jo man ei ma'ato wunda ta nakshik ruta singkau bui ne zesu dado kasu bu.' ²⁵ Shafki ka kabang erik gedo kabui ne nditu ²⁶ Ngoi iko nasara ki ngoi iko ei ne iko har tata kai, ne oni gedo ka algi. ²⁷ 'A ina mene kasuk zawa oyu, a hohobyinsu kit kayak yendi'. ²⁸ Kit shida yon biskak gem Bono, ne e ken oni jenjas ka shandal. ²⁹ Eri ngoi an kumo kol ei Kelui anshek ban donshaku.""'