1 ¹ ጳውሎስ፣ ውርካ ዋድማካ ኢየሱስ ክርስቶስ፣ ካኣይ ሐዋርያዬ እን ሺዎዬ ናንዳካ ክያጃ ሹቃካ ባሪዮ ኣይ ዋናጝ፤ ² ናንዳካ ክያጃ ሹቃጝ ከታካ ውርካ ቶካ ባሪዮ ከወርቀትካ ውርካ ይሁኔን ሌምሼ ጋዬና ቃቦ። ³ ክያጃ ሹቃዻ ናንዳካ ውዋ፣ ከኣሩጝ ናንዳካጝ ኣዬ ቢዛካ ዳዊቱጝ፣ ⁴ ፕር ከመንፈስካ ይሁኔን ከኦካ ኣርሼን ቲቴን ኣዬ ውዋካ ባሪዮጝ ናንዳካጝ ዹዋልሺኔ ከቁዋቅቱጝ ሃናንዳካ ኢየሱስ ክርስቶስ ታቺ እን ጉዋዩጝ። ⁵ ከዻር ኔኒ ናንዳካ ሮጝ ኔኒ ከኦካ ጫቃንካ ኣሕዛብ ፓይላ ውር ከታካ እምነት ሃም ጌዬኑጝ ከዋይሺኔን [ከቁዋቅትሼን] ሃቦዋ ኣይኔኔ ሐዋርያ ማቲዬኔ። ⁶ እየው ኤታጋን ከኣይቴካ ኢየሱስ ክርስቶሱጝ ሃኦካ ጫቃንካ ጊታይ ሺዎጝ። ⁷ ጊታይ ከባሪዮ ናሺዬዬ ካኣይ ውርካ ይሁኔኔ ጊታይ ሺዎጝ ጊታይ ኣኔን ሮም ፓይላ፤ ከሹቡጌን ጉዋዩ ከባሪዮ፣ ከታቺ እንዻ ከኢየሱስ ክርስቶስ ኣይኔኔ ሆፎዬ ካኣይሼ እየውባ። {ናንዳካ ሮም ቶዬን ፎሽካዽዬንካ ጳውሎስ} ⁸ ከኦካ ፓይላ ሃሌምሺዬ፣ እምነት ጉዩ ከእን ዋይኔ ኦካ ፔን ፓይላጝ፣ ናንዳካ እየው ፓይላ ከኢየሱስ ክርስቶስ ሃጎሺባ ኣምላክ ናኒ። ⁹ ሹ ጮል ሃቃቢዬ እየው እያን፣ ክያጃ ሹቃካ ውዋ ከሜይሺኔን ኬሸን ጋዛ ናኒ ካዋድምዮጝ ባሪዮ ሃማኝ ናኒ፤ ¹⁰ ሹ ጮል ከይሁኔን ናኒ ሃቃቢ እየውባ፤ ፕር ጋን ከቱንሲ ከክያጃካ ባሪዮ ካኩዋዌ ሃሚን ጉዩጝ ካቦውሼ ኣን ጉዋሩጝ ሃይወንባ። ¹¹ እንካ ቻልሺ እየው ቁቃቅትሺሼን ካካሺሼ እየው ኣይኔንካ መንፈሱጝ፣ ሃፎሺካዺያ እየው ቶዬን። ¹² ይንዻ ከእየወ ኣኔ ከኦካ እምነትካ ኡዋው ክየም ክየም ካቁዋቅትሺቴ ጋጜ ጊያ። ¹³ ጪኒጌን ናኒዮ፤ ካኣይሼ ኣን ኦካ ኣሕዛብ ዶኩጝ፣ ከኦጉዩዻ ካጌዬ [ካርቡጝ] ሹ ጁዋኑ ካኩዋወ ሃሚን ጉዩጝ ኣኔንባ ቃቢዬኔ፣ ዬ እን ኣይ ሌይ ጋኑጝ ከእባጅቴ እን ሃርጌ ኣኑጝ ሃዎሺያ። ¹⁴ ከጊታይ ኣይ ግሪኬ ጊታይ ማር ኣዬኔ፣ ናንዳካ ፓካላኔ ጊታይ ማር ኦኬ ጶቅሲዬኔ ሃኣኔ ባጃ፤ ¹⁵ ጊታይ ቆቤን ሮምዻ፣ ናንዳካ እየው ሃጊብዬ ክያጃ ሹቃ ሜይሺኔኑጝ ሃናንዳካ እዕጝ። ¹⁶ ሃሪግሼንኬን ከክያጃ ሹቃ፤ ናንዳካ ኦ ናንዳካ ጊታይ ኣምኒ ፓይላ ካኣዬ ናንዳካ ባይሼኑጝ ሃቁዋቅቲካ ባሪዮ፤ ይንዻ ከሌሜን ሃናንዳካ አይሁድ፣ ዻይሼያጝ ጩዋ ሃናንዳካ ኣሕይዛብ። ¹⁷ ከክያጃ ሹቃ ዹዋልሼና ጫቃንቃል ኣዬንካ ባሪዮዬ፤ ጫቃንቃል እንዻ ካርሲኬ ሌሜኔ ሌይ ቱንሲ ሃእን ኣይኬ እምነት፣ ጫንቃል ኡፓ ከእምነት» ከእያይ ሺጜ እያይኔ ቶኮጝ። {ማኒቲካ ባሪዮ ኦካ ውር} ¹⁸ ጋራቲ ጊዬይ እን ሹፌ ጎም እምነቱጝ፣ ከኦካ ሴሶ ጊዬይዬ ጋራቲ ጊዬይዬ ፓይላ ማኒቲካ ባሪዮ ዹዋልሼንባ ከፎላ ዾዮክ፤ ¹⁹ ናንዳካ ባሪዮ እንካ ቻሊዬ እባጄኑጝ ናንዳካ እንግን ሃጃሃ፤ ናንዳካ ኦ ባሪዮ ናንዳካ እንግን ሻማ ጃወ። ²⁰ ካርሲኬ ኦባ ሙኔ ፔኔ ዴንታካ ባሪዮ ጊታይ ማሬ እባጄን ይንዻ ቁዋቅቲ እንካ ቦን ጮሌ [መለኮቴ]፣ ከኦካ ኦግታይ ሙኖጝ ጌዬንባ ጃሃ፤ ዬ ውር ኣኔኬን ኦካ ቃይኔን። ²¹ ጊባጅኒን ባሪዮጝ፣ ካኒ ጎቢኬን እሺ ከእያይ ኣዬ ኣምላክ፤ ካኒ ቦሼኬን እሺ ጎሺዻ፤ ካኣይባዬ ቃቦ ጊዬይዬ ማቲያ ኦኬ ማም እያይ፤ ሻን እን ጊዬይዬ ማር ኦኬ ጶቅሲዬን ማቲያ ዲሙጉ። ²² ሻጛ ሃኣያ ፓካላዻያጝ፣ ማቲያ ሞኚ፤ ²³ ጎቢንታካ ባሪዮ እንካ ቦን ጮሉጝ ከውር እን ኣይ ኣርሹጉጝ፣ ሙንኬ ዴንታካ ኩባሬ፣ ከዳቢዬ ከኦኬ ጊታይ ሙኔዬ ጁጁሬንኬ ዳሊዬ ሁባ። ²⁴ ዬዻ ባሪዮ ኬሸን እን ጊዬይ ቋቋ ሴሶጝ ኣንግርማ ጊዬይ እንግን ከጋጝ ከሩዋ ጊዬይ ካሻሜ ዋናጝ ጊታይ ማር ይሁኔን [ሳስክዬ ጋዬና ኣሩጝ ሩካቤ። ²⁵ እምነትካ ባሪዮዻ ሁቡሼያ እያጝካ ሾሮጝ፤ ከኦካ ባልካ እን ሙኒ ፌኑጝ ይወና ኦግታይ ጋሽክዬ ከቡዋጝ፤ ዋድምሼያዻ እን ሙኒ ፌንዻ ሃኬና ጊሺዬ ቦን ጮል ²⁶ ከክያጃ እንዻ ባሪዮ ከኣንግርማ ኣንካ ቦኩንሲ ሳስክዬ ኣዬና፤ ኣይን ሃኣጚ ጊዬይዻ ጌይኔን እንካ ሁሉኩሼ ዴንታ ጊዬዩጝ ሳስክሼያ ሃምካ ዴንታ እን ማር ጊዬይ ኣዬኑጝ። ²⁷ ከእያይዻ ጁማን ጎይድ ሃኣጚ ጊታይካ ሁሉኩሼ ዴንታ ጊዬይዬ ጋይኬ ጋጜ [ላላቅሜና ከቡልኔን]፤ ጁሙዻ ኣሽክያ ከጁሙ ኦኬ ጋራ፤ ከኦኬ ኣሽክዬን ጋራጋራ ጊታይ ጊዬዩጝ [ቅጣት እንካ ሁሉኩሼ እንግኑጝ] ቦሼያ እንግን ኤታጋን። ²⁸ ከኦካ እንዻ ሳጊ ከቃቦ ጊዬይ ሺጜ ባሪዮ እባጄን ጠቅምኬኑጝ፣ እንካ ጋሽክዮጝ ካማር እንግን ሁሉኩሼኑጝ ካጋሽክዮጝ ባሪዮ ሳስክዬ ኣያ እንግን ሹቦ ኬና ማርካ ኣግዬን። ²⁹ ከኣይነት ፓይላ ሴሶ፣ ጋራቲ፣ ዛላሞዬ ዴንታ ጋራዬ ቆቋ፤ ቦውንታ፣ ናፒሲ ኒሼን፣ ጎረን፣ ከውር ቱዋኔኔ ሃጊታኬና ቆቅኬ ጃካማ፤ [ጊታይካ ሐሜቱጝ]፣ ³⁰ ጊታይ ካሲዬን ሮጝካ ውሩጝ፣ ጊታይ ሚኔ ኣምላክ፣ ጊታይካ ይሪኔን፣ ጊታይካ ጵራጵራጝ፤ ዎሽባ ጉዋር እንካ ጋሽክዬ ኦኬ ጋራጝ፤ ዋይሼንኬን ውር ጊዬይዻ። ³¹ ጊታይ ማር ጶቅሲዬን፣ [ጊታይ ላሊ ውሉጝ]፣ ሃጊታይ ማር ውር ዻዹጝኔኔ ኣይ [ጫካኝ]። ³² ጊታይ ኣሽክዬን እን ፓይላ ኣርሼን ሁሉኩሼ እንግንባ ጊባጃ ሕግ ልክ እንካ ባሪዮ እን ሺጝ እያይንያጝ፣ ማር ኦግታጝጵን ኣሽክዬኔ ቁዋቅትሺሽባ ጊታይ ኣሽክ እያይንዻ።