1
1
ኦይንካ ኣይ ይሪካጝ ካዹዋልሼ ውርካ ዋድማኔ፣ ባሪዮ እን ኣዬ እሹጝ ሹካካ ኢየሱስ ክርስቶስ ሃይዕጝ፤ ኢየሱስዻ ይዕሲ ውርካ ኤርጎዬ ዹዋልሼያ ውርካ ዋድማ ዮሐንስ፤ v 2 እሺዻ ናንዳካ ክያጃካ ባሪዮዬ ናንዳካ ማኚ ኣዬንካ ኢየሱስ ክርስቶሴ ኦግታይ ጌዮጝ ፓይላ ሜይሼና። v 3 ቦን ዲያውትሻ፤ ኣኪ ውር እን ኮሚ ክያጃካ ሃሳዋጝ ሃጫንቃል፤ ጊታይ ዋይዬ ጊታይ ዻዬ ኦግታይ ቶኬዬ ጋይ ጫንቃል። {ጌሶዬ ሶቦርሲኔኔ} v 4 ከኦካ ዮሐንስ፤ ናንዳካ ቶኦካ ይሁኔን ሶጳ ጊታይ ኣኔን ሃምካ ጎቢሼንካ እስያጝ፤ ከእን እን ኣኔዬ፣ ከባካ ሌሜኔ ከእን ሹጝ ኩኔኔ፣ ከኦካ ጊታይ ኣኔን ኦካ ሌሜንካ ፎላዻጝ ከመንፈሳን ሶጳን፣ v 5 ዬፕርዻ እን ኣይ ማኝ ሹቃጝ፣ ከኦካ ኣርሼን እን ኣይ ቶይድዬ እን ኣይ ታቺካ ቢታንካ ፔኑጜ ከኢየሱስ ክርስቶስዻ ኣይኔኔ ሆፎዬ ካኣይሼባ እየው። ከእን ናሺ ኡዋዌ ከኦካ ሴሶ ጉዋዩዻ እን ሻሚ ኡዋው ኣርናጝ፣ v 6 ካዋድምሺንቴ እን ኣይ ኣምላኬ ሹኔዻዬ ከእን ሻም ኡዋው መንግስት ኔኒዬ ውርካ ቃሼ፣ ጎቢንታዬ ቁዋቅትዬ ከቦን ጮል ካኣይሼባ እሺ/ ኣሜን። v 7 እየዎ፤ ኩንባ ከሉፍ፤ ኣይኒን ጊታይ ቶኪ እሺዻ ሺዽኬኔ፣ ካርቡ ፓይላ ጌይባ እሺ፤ ዛርሲካ ፔኑጝ ፓይላ ከናንዳካ ኩኔን ኔኒ ሺጝባ ሁኡ ሁኡ። ይንጌ/ ይን ፓይላ ማቲባ፤ ኣሜን። v 8 ከእኔዬ ከባካ ሌሜኔ፣ እንካ ኩዋዻ፣ እን ሹቃካ ፓይላጝ ኣምላክ ታቺ እን፣ ሺጝ ኣን ሃኣይ እንካ ሳጊዬ እንካ ጎሬዬ። {እን ሙኔን ሃንታካ ውር} v 9 ኣን ጪኔ ጉዩ ዮሐንስ፣ ሃኣይኬ እየወ ከኢየሱስ ክርስቶስ ጋሎ ጌዬኔ ኦካ መንግስት ኔኒዬ፣ ሃኣዬ ኬናካ ዶንሺ ኦኬ ከእየውጝ፣ ናንዳካ ክያጃካ ባሪዮዬ ናንዳካ ማኚ ኣዬንካ ኢየሱሴ ሃኣኔን ኦካ ጎልዹ እን ኣኔን ፔን እጝ ሺጜ ፍጥሞጝ። v 10 ከሹካ ታቺ እን ሃኣይኬ መንፈስ፤ ኦኬ ሙኔን ናቅድካ ውርካ ኤርጎ ሃዋይያ ናቅድ ታቺ ታካ ሁር፤ v 11 ናቅዲ እንዻ፣ «ጌይኖጝ ከወርቀት ኬና ኣይ ቱፑኒኔን ቶኬ ከኦካ ኤፌሶን፣ ከኦካ ሰምርኔስ፣ ከኦካ ጴርጋሞን፣ ከኦካ ትያጥሮን፣ ከኦካ ሰርዴስ፣ ከኦካ ፊላድልፍያዬ ከኦካ ሎዶቅያዬ ዋይሼ ኣን ይዕሲሼ ሃምካ ቶኦካ ይሁኔን ሶጳ ጊታይ ኣኔን እስያጝ። v 12 ኣንዻ ሃሁቤንያ ናቅዲ እን ሃሳውኔ ኣን ቶዬን፤ ከሹ እግ ሃሁቡኖጝ ሃጌይያ መቅረዝካ ወርቄ ሶጳ፤ v 13 ከኦካ ጫቃንካ ወርቄዻ ሃጌይያ ኦኬና ሙኔም ሃንታካ ውር፤ እሺዻ ሃኬና ኪሚ ኣፓላ ኬና ጅጚ ሌይ ሃምካ ጃ፣ ሃኬና ቁም ቋቁም ኔኒዻ ከወርቄ። v 14 ሹቦ ኔኒዬ ጭራሺዬ ሃኬካ ጭራሺካ ማድር ፎልቼን፣ ሃፎልቼን ከጭራቲዻ፤ ካርቧን ኔኒዻ ሙኔን ሌሉጝካ ጉሁ። v 15 ጃፋን ኔኒዻ ሙኔን ወርቄ ኮኑጝ ፓቅሼ ኦካ ጉሁ ኬና ላሉጚዬ ጫጪ፤ ናቅዲ ኔኒ ሙኔን ሙዋካ ሮሙ ኮኑጝ ሁቡዬ ኮሺ። v 16 ከቡዋ ቡዎን ኔኒ ጎም ቢሊ ሶጳ፤ ከኦካ ቶግ ኔኒዻ ቱላ ኤቤል ኬና ቶ ጮል ኣይ ጫሪ፤ ማሪ ኔኒዻ ሃኬና ጳልትሜን ከኡሼንካ ሹሽ። v 17 ከሹ እን ሃጌዬዻጝ ሃዊ ከውር ኮኑጝ ኣርሺዬ ሃቡድያ ኦካ ጃፍ ኔኒ። እሺ ኣይሼ ኣን ቡዋ ኔኒ ቡዎኔ ዋይሼ ኣን እያጝ ኦይ ሪግሺኔን፤ እንካ ካርሲዬ እንካ ቱንሲዬ ሃኣን፤ v 18 ኣን ሃኣይ እያይ፤ እባጝ ሃኣርሺያዻ፤ እየዎ ቦኬ ጋኔ ሌይ ሃምካ ኣዬ ቦን ጮሉጝ ሃኣይ እያይ፤ ቁሉፍካ ኣርሼኔ ካኞሩሴ ኣንኬ ቡዋ ናኒ። v 19 ዬ እጝ የጌዮጝ፣ ቶክባ እን ጋን ኣኔዬ እንካ ሙኒንቴ ማወኸ። v 20 ኦካ ድኬንካ ቢላን ሶጳን ጊታይ የጌዬ ቡዋ ናኒ ቡዎን ክያኒዬ መቅረዝካ ወርቃን ሶጳኔ ሃይዕጝ፤ ቢላን ሶጳን ሃሜርሜርካ ቶኦካ ይሁኔን ሶጳን፤ ፕር መቅረዛን ሶጳን ሃቶኦካ ይሁኔን ሶጳን።