ሃፑክ 4 ሄክንሶካ ጴንታ ¹ ከሹ እንቃ ጩዋ ካርሲያ ኦካ ላቅካ ኛፓስ እርርሲዬን። ኦይን እሺ ኣኖጝ ናንዳካጝ ዛርሲ ጁዋኑ ፑኡሺምኖጝ፤ ሁሉክ ኦካ ጋጊ እጝ ኣኔን ኛፓስ ክያኒዬ ኡፓ፤ ዛርሲ ፓይላ ጊታይ ኣኔን ኦካ ማራካ ኛፓስ እጝ ፑጭያ። ² እሺዻ እርርሲያ እንግን ኦኬ ጁዋኑ ኬሄክንሶ፤ ዋይሼ እንግን እያጝ፤ ³ ዋይባ፤ ውር ክየም ናሹጝ እያይ ጴንታ ኮሬን። ⁴ ሹ እጝ ኮሬ ጴንታጝ ክየም ፓቄን ጉዋር ማራ፤ ኩባር ፓዬኔ ቆዾሜ ቁጅ። ⁵ እንቃ ፓቄን ኦኬና ዳሊ ጁዋኑ ማሬ ኣኔን ኦካ ራቅካ ባይ፤ ናንዳካጝ ዳሊ ጁዋኑ ማሬ ኣኔን ፎት ይሪካ፤ ⁶ ዬ ሹ እጝ ሹሽ ቱሎጝ ሩጴ፤ ናንዳካጝ ጊሜይ ማሬ ኣኔኑጝ ቁዋቅሻ። ⁷ ጴንታ እንቃ ፓቄን ኦካ ጫቃንካ ክዽሬ፤ ክዽሬዻ ጌጵሼ ናንዳካጝ ሃጅሼ ሩቡ እጝ ዱቡጝ ካኒ ኡፑትኬን ካርቡ። ⁸ ጴንታ ዾክ ናንዳካጝ ፓቅኔ ዳሊ ሹቃ ክያኑጝ፤ ፎቴ ጌጵሻ፤ ኡፑታ ካርቡዻ፤ ክየም ማካንታም፣ ክየም ላታም፣ ክየም ዽብ። ⁹ ጩዋ ኢየሱስ ሺጝ ካጝ ኣኔ ናቡጝ ካዋይባ። ¹⁰ ሹ እጝ ኣዬ እሺጵን፤ ውር ታጵላማን ጊታይ ዻዬ ጆሌ እሺዬ ውር እንቃ ጊታይ ጋዬ ኬጋጜ ናንዳካ ሄክንሶ እጝ ጋንሼና። ¹¹ እሺዻ ዋይሼ እንግን ናንዳካ እየው ጋያ ክያጃካ ጌጳሞካ ባሪዮ እባጄን፤ ዬ ናንዳካ ጊታይ ኣኔን ሹኑክ ከሄክንሶ ሜይሼባ፤ ¹² እንዳ፤ ጌዬን ጌይባዬ ካማሬ ጶቅሲዬን፤ ዋዬንዻ ዋይባዬ ማሬ ኬሸን ጎሜን። ¹³ ጩዋ ኢየሱስ ዋይሼ እንግን እያጝ፤ ሄክንሶጝ የካኔ እባጃኬኒ? ኣኪ ሄክንሶ እንቃ ፓይላ የሻማ እያን ከእባጅቶጝ? ¹⁴ ኮሬን ኮር ክያጃ። ¹⁵ ውር ክየም ክየም ሙኔን ጴንታ ኮኑጝ ፓቄን ጉዋር ክያኑጝ፤ ሹ እጝ ዋዬ ክያጃጝ ይሪካ እጁጝ ኩኔ ቦባ ክያጃ እጝ ኮሬ ሻን ጊዬይ ቱዎጝ። ¹⁶ ፕር ዶክ ሙኔን ጴንታ ኮኑጝ ኮሬ ባይ ክያኑጝ፤ ሹ እጝ ዋዬ ክያጃጝ ይሪካ ቦባ ኬዋዛ፤ ¹⁷ ኣይባዬ ናንዳካጝ ማሬ ጊሜይ ኣኔኑጝ ካቆቤ ካሹ ጩዋማጵን፤ ናንዳካ ክያጃ እጝ ኦኬ ጋራ ወይ ጋሎ ሹካጝ ኩኖጝ ይሪካ ሻውባ ጋሎ ክያኒ። ¹⁸ እንቃ ፕር ሙኔን ጴንታ ኮኑጝ ኮሬ ክዽሬ ክያኑጝ፤ ክያጃ ዋዬን ዋይባ፤ ¹⁹ ኣይባዬ ክያጃካ ፔኑጝ ቱሌን ሻውን፤ ሆድማሞ ፑኡሺዬን ፕር ከኦኬ እንቃ ኣንግርዽዬን ክያጃ ቦውዬ ጎሜን ካማር ካርቡ ኡፑቴኔ ሻምባ። ²⁰ ዶክ ሙኔን ጴንታ ኮኑጝ ኮሬ ዳሊ ሹቃ ክያኑጝ፤ ጊታይ ሃጊታይ ካዋይ ክያጃዬ ካቦዌ ካኡፑት ካርቡጝ፤ ክየም ማካንታም፣ ክየም ላታም፣ ክየም ዽብ። ²¹ ዋይሼ እንግን እያጝ፤ የቦፓንቴ ፓኖሴ ከድኬን ወይ ኦካ ኣልጋ ዱቡ የኣጁጛባይ? ከኣጁጝቴ ማር ካራም ዾዮኬኒ? ²² ዬ እን ድኬ ማሬ ዹዋልሺኔን፤ እን ጅጜዬ ማሬ ኦሜሌል ቡልሼን ኣኔኬን፤ ²³ ዋይባ ካጝ ናቡ ኣኖጝ ካዋይባ። ²⁴ ኬዻይሼን ኦይን ኬዋይቶጝ ኣጅሽቴባ ኦካ ሳፋሪዬን ካጝ የሳፋሪቶ ሳፋሪሼ እየውባ፤ ፕር ኬኦይን ሳጊ ሌሜ እየውባ። ²⁵ እን ኣኖጝ ሌሜባ፤ ዬ እንቃ እን ማር ኣኔን ክያኒ፤ እያይ እን ኣኔዻ ቦባ። ²⁶ ጩዋ ኢየሱስ ዋይሼ እንግን እያጝ፤ ጌኣሞካ ባሪዮ ሙኔን ይጝ፤ ውር ክየም ኮር ጴንታ ዳሊ ክያኒ። ²⁷ ውር እጝ ከሚክር ኡጝጓ ከሹሽ ናሹጝጓ፤ ኣይባዬ እሺ ካኒ እባጅ ኬኔ ጴንታ እጝ ፎቴ ጌጵሻ፤ ²⁸ እሺ ዳሊዻ ኬሌንካ ሲሪካ ፎቴንካ ሩቡ፤ ጩዋ ቃል ይግኔ፤ ከኦይን ቃሎጝ ጌይሼባ ካርቡ ኬና ኡፑቲ፤ ²⁹ ካርቡ ኔኒዻ ኬእያይ እግሾጝ ቁዋቅሼን ኔኒ ሄክሾጝ ይሪካ ናሹጝ ፓቲዬኔ ካርሲባ ፓቲዬን። ³⁰ ፕር ሺጝ እያጝ፤ ጌጳሞካ ባሪዮ ሃሄክንሲያ ኬኦ? ሞ ሃክያጃኬ ሄክንሶካ ኦ? ³¹ ኬኦካ ጴንታ ጊታይ ኮሬ ኦካ ዳሉጝ ካሎን እን ኣይ ሃይሻይሹጝ ሙኔን ካርቡካ ሆልጆሆልጆ፤ ³² ዬ ኮሬ ፎታያጝ ጩዋ፤ ኬኦካ ኦጊታይ ኮሬዬ ኣኔን ኦይን ፓይላ ሳጊባ፤ ኩባርካ ፎላዻ ቆባ ኦካ ቃቅቴን ታታቺ ጊታይካ ሻሩጝ። ³³ ኢየሱስዻ ኬእያይ ዎሽ ውር ኬልሺዬን፤ ኬሄክንሶ ጁዋኑ ጊታኬና ኣኔን እያይ ሜይሼያ እንግን። ³⁴ ኦኬ ክየምጵንዻ ማርኬ ሄክንሶ ኣዬኔ ሜይሼኬን እንግን፤ ዬ ሹካጝ ኣዬ እሺዬ ውር ጊታይ ዻዬ ጆሌ እሺጲኑጝ ክያጅ ³⁵ ከሹ እጝ ቃይትሾጝ፤ ዋይሼ እንግን ካቁዋልሼን ታቴ። ³⁶ እንግንዻ ጎይድ ዛርሲዬ ቦ ጊታይ ኣኔን ጋጊ ክያኒዬ ፓያ፤ ጋጊ እንቃ ኣኔባ ኬእንግን። ³⁷ ከሹ እጝ ፑጉ ቁዋቃ ካሳይሌ ናሹጛ፤ ሄሌቆንዻ ሌይ ሃም ሙዋ ካቆቄ ጋጉጝ ኣኔን ጋጊ ይንጊሼን። ³⁸ ዬ ኢየሱስ ኣሽክሼ ኦካ ኡጜኔ ኡጜ ኣኔ ኦካ ጋጊ ታካ፤ እንግንዻ ጬይሻ፤ ሺጝ ውርካ እርርሲዬን ይጝ ጉዋዩ ዮ፤ ይጝ ሃጃክንቶጝ የጌይኬኒ? ³⁹ እሺዻ ናሹጜ ጎርያ፤ ዋይሼ ኛፓስ ጌይ ሹይ። ⁴⁰ ዋይሼ ውር ጊታይ ዻዬ ጆሌ እሺ፤ ሃናንዳካ ኦ የሪግሺንቴ እያጝ? ሌይ ኣይህ ሹጝ ይሁኔን ጉዩ ኣኔኬኒ? ዋይሼ እንግን እያይ። ⁴¹ እንግንዻ ሪግሼና፤ ዋይሼ ጋጝ ውሩጝ ሪቢሺ ሄሌቆን ሃኒኔ? ሃሳወና ኬጋጝ።