ሃፑክ 10 ቡሌንካ ኡማዬ ኣጚዬ ¹ ጩዋ ኢየሱስ ናሹጜ ኩያ ፔንካ ይሁዳዬ ራቅ ጊታይ ኣኔን ዮርዳኖስ ታቴዬ፤ ዛርሲ እንቃ ፑኡሽሜና ኦካ ማራማራ ኔኒ፤ ከኦይን እርርሲያ እንግን ኦግታይ ኣሽክዬ ኬሌሜን። ² ውር ክየም ክየምካ ፈረሳውያን ዎሽ እሺ ፓታንሲዬኔ ፓዬኔ ሺጝ፤ ውር ኝያ ኔኒ ቡሌን ኣኔባይ? ሺጝ እያይኔ ጋንሼና። ³ እሺዻ ዋሼ ዋይሼ እንግን ሙሴ ሜይሼ እየው ኦ? ⁴ እንግንዻ ሺጝ፤ ሙሴያጝ ቶክ ወርቀትካ ቡሌኔ ካቡሎጝ ናሺሼያ ኡዋው። ⁵ ኢየሱስዻ ዋሼ ዋይሼ እንግን እያጝ፤ ሙሴ ቶክሼ እየው ክያጃ እን ሃናንዳካጝ ሸን ጉዩ ኣዬ ኣርሹጉጝ። ⁶ ኣይባዬብከሌሜን ካሙኔን ባሪዮ ሻማ ጁሙዬ ሃኣጚዬ ሙና። ⁷ ዬ ውር ኦይድባ ሹኔዬ ጁዋኔዬ፤ ኡፓ ኬኣጚዻ፤ ⁸ እንግን ዻዋን ማቲባ ኣሩጝ ክየም፤ ከኦይን ጋይ ኣሩጝክየም ዬ ማር ዻዌን፤ ⁹ ዬ ውር እን ኣይኬ ባሪዮጝ ውር ክየምጵንዻ ካማር ዋና ማቲዬን። ¹⁰ ፕር ኬሹ እን ሁሉኬ ቶኦጝ፤ ውር ጊታይ ዻዬ ጆሌ እሹጝ ቲት ክያጃ እኔ ጋንሼና። ¹¹ እሺዻ ዋይሼ እንግን ውር ክየምጵንዻ ቡል ኝያ ኔኒዬ እያንሻ እንቃያጝ ኣሽክያ ከእሺ ኩጳሞ፤ ¹² እሺዻ ቱልኬ ኦካ ኡማዬ እያንሼና ከጁሙ እንቃያጝ ኩጳሲዬና» ዋይሼ እንግን እያይ። ¹³ ኢየሱስ ካዱም እንግንባዬ፤ ውር ቦፓይኔያ ሃንታ ጊዬይ ሃሚን ኔኑጝ፤ ዬ ውር ጊታይ ዻዬ ጆሌ እሹጝ ጎሪያ እንግን። ¹⁴ ኢየሱስዻ ቶይ እጜ ሚኒሼዬ ዋይሼ እንግን እያጝ፤ ሃንታ ካፓዬምባ ዮጝ ናኑጝ ኦይድ ሃርጊቴን፤ ጌጳሞካ ባሪዮ ሃካ ጊታይ ውይ ጊታጝ። ¹⁵ ሃዋይሼባ እየው ኣኩሉክ፤ ጌጳሞካ ባሪዮ ጊታይ ማርኬ ሃንታ ማቲዬን ፓይላ ክየምጵንዻ ሁሉኬን። ¹⁶ ናግ ሃንታዻዬ ኣይሼ ቡዋዌ ኡዋና እንግን። ¹⁷ ናሹጝ ኬኦይኔ ካርሲዬ ጉዋር፤ ውር ክየ ሪሼ ኩና ሃሚን ኔኑጝ፤ ኦካ ማሪ ኔኒዻ ቶኬ ኩዋሚኔ ሺጝ፤ ውርካ እርርሲኔን ሌሞጝ ዮ፤ ካሁሉኬ ሃምካ ቦንካ ካቦን ካኣሽኪ ኦኬና ኣኔን እያን» ሺጝ እያይ። ¹⁸ ኢየሱስዻ ሺጝ እያጜ ዋሼያ እሺ፤ ሃኦ የዋይሼ ኣን ሌሞጝ? ከኦካ ባሪዮ ክየም እጝ እንቃ ሌሞ ኣኔኬን፤ ¹⁹ የእባጅያይ ጊታይ ክያጆጝ፤ ኦይ ኒሼን፣ ኦይ ኩጳሲዬን፣ ኦይ ኦጉሬን፣ ኦይ ከሾሮ ክሊዬን፣ ኦይ ቱዋኔን፣ ሪግሺንቴባ ሹቡኔ ጁኔ። ²⁰ ውር እንዻ ሺጝ፤ ውርካ እርርሲዬን ይጝ ዮ፤ ጊታይ እባ ሃካርሲኬ ናሳሞ ናኒዬ ሃዻዬያ። ²¹ ኢየሱስዻ ቶይ እሺዬ ናሺያ፤ ዋይሼ እሺ ኣኪ ኦኬ ክየም ጆግሼያ እን ካሜ ጊታይ ኑኑ ኣኖጝ ፓይላ ኡዋሩጝሽባ፤ ዬ ኣይባ ኩፓን ኬፎላ ዾዮክ የጌይባ ሆድማሞ ኬና ፑኡሺዬ፤ ጩዋ ኩዋዌ ዻዬ ኣምባ። ²² ውር እንዻ ዋዬ እጝ ካሎን ሞይካዽያ፤ ናንዳካጝ ሆድማሞ ጁዋኑ ኣኖጝ ዻዹጝኔዬ ኩያ። ²³ ኢየሱስ ቶዬ ውር ጊታይ ኣኔን ማራማራጝ፤ ዋይሼ ውር ጊታይ ዻዬ ጆሌ እሹጝ ናንዳካ ውር ሆድሞ ሃምካ ጌጳሞካ ባሪዮ ሁሉኬን ካሎን ቁዋቅትሽ እያን/ ²⁴ ውር ጊታይ ዻዬ ጆሌ እሺዻ ዻዹጝኔያ ክያጃ እጝ ሃሳዎጝ፤ ኢየሱስ ፕር ዋይሼ እንግን እያጝ፤ ሃንታ ናኒዮ፤ ሃምካ ጌጳሞካ ባሪዮ ሁሉኬን ኣይ እያን ቁዋቃ። ²⁵ ናንዳካጝ ውር ሆድሞ ካሁሉኬ ሃምካ ጌጳሞካ ባሪዮያጝ ሳጊ ጋማላ ሁሉኬ ፑልታካ ማርፌያጝ ሃባዶ። ²⁶ ውር ጊታይ ዻዬ ጆሌ እሺዻ ሳጊ ኬዻዹጝኔን ሺጝ ኣኪ ሃኒን ካቻሊ ኡዋው ባይሺሼኑጝ ሺጝ እያይኔ ሃሳወና። ²⁷ ኢየሱስዻ ጌይ እንግንኔ፤ ሺጝ እን ማርኬ ታጝካ ውር ቻሊምኔን ኬታጝካ ባሪዮ ቻሊሜንባ» ዋይሼ እንግን እያይ። ²⁸ ጴጥሮስዻ ሺጝ እየዎ፤ ኡዋው ሃኦይዳ ፓይላዬ ሃዻይቴያ እን። ²⁹ ኢየሱስዻ ዋሼ ሺጝ፤ ሃዋይሼባ እየው ኣኩሉክ፤ ውር እን ሺጚ ናንዳካ ኣኔ ክያጃ ናኒዬ ኦይዲ ጶሮክ ኔኒ ወይ ጪኒጌን ኔኑጝ ወይ ጪኒጌን ኔኒካ እጛሽ ወይ ጁዋኖጝ ወይ ሹኖጝ ወይ ሃንታ ኔኑጝ ወይ ሃሙ ኔኑጝ ፓይላ፤ ³⁰ ጋን ኬቦኑጝ ኬጋራ ጶሮክ ኔኒ፣ ጪኒጌን ኔኒ፣ ጪኒጌን ኔኒካ እጛሽ፣ ሃንታ ኔኒዬ ሃሙዬ ሌሜ ዽቤ እን ማር ቦወን፤ ፔን እን ሺጚ ኩኔን ካማር ሃምካ ዻቆካ ቦንካ ቦን ሆርሚኔን ኣኔኬን። ³¹ ኣይባዬ ውር ጁዋኑ ጊታይ ኣኔን ሌሜን ማቲባ ሁር፤ ጊታይ ኣኔን ሁር ማቲባ ሌሜን። ³² እያንካ ኢየሩሳሌም ቱልሼን ጋንባ ጉዋር ክያኒዬ ኢየሱስ ኣኔን ኬሌሜን ግዬይ ኩዬን ፤ ውር ጊታይ ዻዬ ጆሌ እሹጝ ዻዹጝኔያ ውር እንቃ ጊታይ ዻዬ እንግንዻ ፕር ሪግሼና። ፕር ሻም ውር ታጵላማን ከኦካ ዛርሲ ዋናዬ ካሄክሼ ኦዌ ሜይሼያ እንግን። ³³ ዋይሼ እንግን እያጝ ካፓይሺቴ እያንካ ኢየሩሳሌም፤ ሃንታካ ውር ሳስክዬ ጋይባ ታታቻንካ ውርካ ቃሼ ውር ጊታይ ቶክኔ ጆል ወርቀቴ፤ እንግንዻ ኮምሼባ ኮምሼንካ ኣርሼን፤ ሳስክዬ ጋይባ ዛርሲዻ፤ ³⁴ ጎልቲባ፤ ፓልቅሼባዻ፤ ሙርባዻ፣ ጩዋ ንሽባ፤ ዬ እሺ ኬሹ እንካ ማክንሳ ጩዋ ናሹጓ። ³⁵ ጩዋ ሃንታካ ዜብዴዎስ ያዕቆቤ ዮሐንሴ ፓዬን ሃም ኔኒዬ ሺጝ ውርካ እርርሲዬኑጝ ዮ፤ ኦይን ሃይሁንቴ ፓይላ ካኣሽክሼ ኡዋው ሃዎሻያ። ³⁶ እሺዻ ዋይሼ እንግን የዎሻ እን ካኣሽክሼ እየው ኦጝ? ³⁷ እንግንዻ ሺጝ ከሹካ ጌጳሞ ኑኑ ካኣጁጜ ውር ጉዋዩ ክየም ከቡዎን ክየም ከዋርካታዬ ካቆብቶጝ ናሺሼ ኡዋባ። ³⁸ ኢየሱስዻ ሺጝ፤ የእባጃኬን ኣይን ኦይን ኬይሁንቶጝ፤ ኒያቡ እን ኣን ሃማቶጝ፣ ዱቅኔን እን ኣን ሃዱቅኖጝ ከዱቅይንቶጝ የቻሊያባይ? ³⁹ እንግንዻ ሺጝ እህ ሃቻሊያባ። ኢየሱስዻ ሺጝ ኒያቡ እን ኣን ሃማቶጝ የማታባ፣ ዱቅኔን እን ኣን ሃዱቅኖጝ የዱቅናባ፤ ⁴⁰ ኣይባዬ ቡዎን ናኒ ወይ ዋርካታ ናኒ ቆቤን ሃሓም ጋሽክሼ እየው ዬ ማር ኦኬና ኣን ካኣዬ እየው ወን» ዋይሼ እንግን እያይ። ⁴¹ ውር ታጳን ጊታይ ሺዺ ዋዬ እን ካርሲሼያ ያዕቆቤ ዮሐንሴ ማኒሼን። ⁴² ኢየሱስዻ ፑኡሺ እንግን ክየምጵኔ ዋይሼ እንግን እያጝ፤ ሺጝ ታታቺካ ዛርሲዬ ከእያይ የቃብቶጝ ከእያይ ቦወ ጌጳሞጝ፤ ከኦጊዬይ ጌጳሞ ከእያይ ዹዋልሼ እየው የእባጃያይ፤ ⁴³ ዬ ከታጝ ጉዩ ማር እያይኔን፤ ከኦካ ጫቃን ጉዩ እን ዎሺ ታቺ ማቲዬን ፓይላ ካማቲኬ ውርካ ዋድማ፤ ⁴⁴ ውር እን ዎሺ ሌሜን ማቲዬን፤ ካማቲ ካይሲካ ፓይላ፤ ⁴⁵ ሃንታካ ውር ካዋድሚዬዬ ዻቆ ኔኒ ናንዳካ ጁዋናን ካሻሜ ማም እያይኔ ካኣዬ ኩናዬ ካኒ ኩንኬን ዋድሚዬን። ⁴⁶ ከኦይን ጩዋ ፓዬና ኢያርኮ። ኢየሱሴ ውር ጊታይ ዻዬ ጆሌ እሺዬ ከዛርሲ ጁዋኑዬ ቱልኬ ኢያርኮያጝ ጌይ ውር ኬና ካርቡ ኣይ ሙሙዾ ውዋካ ጤሜዎስ በርጤሜዎስ ኡፍ ጉዋር ማራዬ ኣኔን ይሁኔን። ⁴⁷ እሺዻ ሹ እን ዋዬ እጝ ኣዬ ኢየሱስ እንካ ናዝሬት፤ «ሺጝ ውዋካ ዳዊት ፤ ኢየሱስ ዮ ዻሺያምባ፤ ሺጝ እያይኔ ካርሲያ ኡቹኬን። ⁴⁸ ካኡፍ ሹዬ ውር ጁዋኑ ጎሪያእሺ፤ ዬ እሺ ሺጝ ውዋካ ዳዊት ዮ፤ ዻሺያምባዬ ሌሜዬ ኡቹካ። ⁴⁹ ኢየሱስዻ ዾሬ ዋይሼ እንግን ሺውባ፤ እንግንዻ ዋይሼ ውር እጝ ካርቡ ኣይ ሙሙዾ «ይህ፤ ናሹጝጓ ሺው እንባ/ ⁵⁰ እሺዻ ኡፑት ኣፓላ ኔኒዬ ጌይ ካቼ ኩና ሃምካ ኢየሱሱጝ። ⁵¹ ኢየሱስዻ ሺጝ የዎሺ እን ካኣሽክሼ እን ኦጝ? ውር እን ካርቡ ኣይ ሙሙዾዻ ሺጝ ውርካ እርርሲዬኑጝ ዮ፤ ሃዎሺ ጌዬን። ⁵² ኢየሱስዻ ዋይሼ እሺ ካምባ ይሁኔን ኑኑ ባይሺሻ እን» ይሪካዻ ካርቡ ኔኒ ጌያ፤ ከጉዋርዻ ዻዬ ኢየሱሴ ኩያ።