ሃፑክ 1 ዮሐንስ እንካ ዱቅኔን ክልማ ኔኒ ¹ ውዋካ ባሪዮ፤ ክያጃ ሹቃ እንካ ሌሜን ካኢየሱስ ክርስቶስ። ² ከውርካ ባርዮ ኢሳይያስ፤ ሺጝ እያጜ ቶኳ፤ እየዎ፤ እንካ ኣሽኪ ጉዋር ኑኑ ውርካ ኤርጎ ኬሌሜን ኑኑ ሃይዕሲባ። ³ እንካ ይግ ጉዋርካ ታቺ እጝ ኣሽክቴባ እንካ ይጌን ሺጝ እያይኔ ናቅድካ ውር እጝ ኡቹኪ ቦና ክያኑጝ። ⁴ ዬ እንካ ዱቅኔን ዮሐንስ ዱቅዬን ቦና ክያኒዬ፤ ክልዬን ዱቅኔን እንካ ሺዕሺኔንካ ሴሶዬ ኩና። ⁵ ውርካ ፔንካ ይሁዳ ኦይ ቆብሼዬ፤ ውርካ ኢየሩሳሌም ፓይላዬ ፓይ ሃም ኔኒዬ ሺዕሺዬን ሴሶዬ ዱቅዬና ከቡዋካ ዮሐንስ ኦካ ዳራካ ዮርዳኖስ። ⁶ ዮሐንስዻ ክም ጪራሺካ ጋማላ፤ ኬእልኮ ቁም ቃልሺ፤ ቃወን ካፍታዬ ይቲሬካ ቦናዬ። ⁷ ክልማ ኔኒዻ ሺጝ፤ ኣን ሃጌይ ኩፔ ካቡል ቁሜንካ ቻውያጝ ማራን ሁሉኩሼን፣ እጝ ሳጊኬ ኦናኒ ኬኣን ማ ኩንባ፤ ⁸ ኣን ሃዱቅ እየውባ ከሙዋ እሺ ዱቅ እየውባ ኬኡሲካ ባሪዮ» ሃኬና ሺጝ እያይ። ⁹ ኬሹ እጝ ኢየሱስ ኩንኬ ኦካ ከተማ እጝ ኣይኬ ገሊላ ናዝሬቴ ዱቅዬና ኬቡዋካ ዮሐንስ ኦካ ዳራካ ዮርዳኖስ። ¹⁰ ኬሹ እጝ ቱሌ ኬሙዋ ክያኑጝ፤ ፎላ ቦወኔ፤ ኡሲካ ባሪዮ ማቲ ሆሌዬ ጎብሼ እሺዬ ጌያ። ¹¹ ናቅድ ኬና ሺጝ ውዋ እጝ ናኒ ሃናሺያ ሃእን ከእን ኦኬ ዋዝንሲያና ዋዬና ኬፎላ። ¹² ይሪካ ኡሲካ ባሩዮ ቦሼያ እሺ ሃምካ ቦናጝ። ¹³ ፓታኒዬን ኬእጁጜ ኡፓ ሹ ኦይታም፤ ኡፕኬ ዳብዻ፤ ውርካ ባሪዮዻ ኣኔንኬ እሺ። ¹⁴ ቁሜ ዮሐንስ ጩዋ፤ ኢየሱስ ክልዬን ክያጃ ሹቃካ ባሪዮ ኩይ ገሊላዬ፤ ¹⁵ ሺጝ ሹሽ ሄክሻ፤ ጌጳሞካ ባሪዮ ድያውቲሻ፤ ሻው ይሁኔን፤ ኬክያጃ ሹቃጝዻ ጉሚባ፤ ሺጝ እያይኔ ክልዬና። ¹⁶ ኢየሱስ ሳጊኬ ኦካ ቆጩርካ ኛፓስካ ገሊላያጝ፤ ስምዖኔ ጪኔ ኔኒ እንድያሴ ናንዳካጝ ጋዬ ውርካ ቆውኔንካ ኣርቶጝ፤ ሚጪሼ ኞፑቴይ ጊዬይ ኛፓስ ክያኒዬ ጌያ። ¹⁷ ኢየሱስ ዋይሼ እንግን ዻይቴ ኣንባ፤ ሃሻምባ እየው ኬና ካቆው ውር። ¹⁸ እንግንዻ ይሪካ ጎይድ ኞፑቴይ ጊዬይዬ ዻዬያ። ¹⁹ ሳጊዬ ዽታኬ ማም ጌይ ሃንታካ ዘብዴዎስ ያዕቆቤ ጪኔ ኔኒ ዮሐንሴ ቆብ ጋጊ ክያኒዬ ጋሽክዬን ኞፑቴይ ጊዬይዬ። ²⁰ ይሪካ ሺዋ እንግን፤ እንግንዻ ጎቼ ሹቡጌኔ ውርካ ዋድማ ጊታይ ኣሽክኔ ጆል ካርሚ ጋጊ ክያኒዬ ዻዬያ። ²¹ ኬኦይ ፓያ እያጝካ ቅፍርናሆም፤ ኢየሱስ ኬሹ እጝ ይሪካ ሁሉክ ሃምካ ቶኦካ ይሁኔኔ ካርሲያ እርርሲኔን። ²² ማርኬ እያኑጝ ቶኬዬኔ እርርሲዬን ኬውር ኮኑጝ ጌጳሲዮጝ፤ ዛርሲዻ ዻዹጝኔ እርርሲኔን ኔኒ። ²³ ኬሹ እጝ ኦካ ቶኦካ ይሁኔን ጊዬይ ውር ኬና ኣኔ ኡሲካ ጮዩ ሺጝ እያጜ ኡቹካ፤ ²⁴ ኢይሱስ እንካ ናዝሬት ኬኦጉዋዩ የዎሾ? የኩኒ ኡዋው ካይሲዬኒ እን የኣዬ ኒን ሃእባጃያ፤ እን የኣይ ውዋካ ባሪዮ/» ²⁵ ኢየሱስዻ ሺጝ ኡፕ ሌዬ ቱልባ ኬኦኔኒዬ ጎሪያ። ²⁶ ኡሲካ ጮዩዻ ዳርጊሲዬ ውር እጝ ኬቁዋቅቱጝ ጩዋ ኡቹኬ ቱላ። ²⁷ ዛርሲ ፓይላ ዻዹጝ ኔዬ፤ ሺጝ እሻ ሃኦ? ሃእርርሲኔን ሃሊ እጝ ኣኔ ጌጳሞኪ/ ኣይን ኡሲካ ጮዩዻ ኤርጊትባ፤ እንግንዳ ቱልባ/» ሺጝ እያይኔ ጋንሻ ጋጝ። ²⁸ ይሪካ ጎሺ ኔኒ ሄክሻ ኦካ ራቅ ጊታይ ኣኔን ኦካ ገሊላ ፓይላ። ²⁹ ይሪካ ቱልባ ኬቶኦካ ይሁኔን፤ እሺዬ ያዕቆቤ ዮሐንሴ ፓዬ ኩሉካ ሃምካ ቶኦካ ስምዖኔ እንድርያስ። ³⁰ ኣፕኔካ ስምዖን ሩዋ ቄጪሼ ዴሜኔ ኣኔን ኡጜን፤ ናንዳካ እን ዴምኖጝ ሜይሼያ እሺ፤ ³¹ ዬ እሺዻ ኩይ ሃሚን ኡጜዬ ጎም ቡዋ ኔኒዬ ቲታ፤ቄጪቲካ ሩዋዻ ኦይዳ እሺ፤ ናሹጜ ካርሲያ እንግን ቾችንሺዬን። ³² ጫቼንካ ሹሽዻ ጩዋ ዴቆጝ፤ ኬቃይ ጩዋ ውርካ ክራ እጝ ፓይላ ቦው ውር ጊታይ ካቡርቅዬ ጊታይ ቤሮ ጎሜዬ ቦሼያ ሃሚን ኔኑጝ። ³³ ዛርሲካ ከተማ እጝ ፓይላ ፑጭዬ ኣኔ ኦካ ሃፑካ ቶኦ። ³⁴ እሺዻ ባይሺሻ ውር ጁዋኑ ጊታይ ዴሜን ኬቡርቅ ዋናዋናጝ፤ ቡላ ቤሮ ጁዋኑዻ፤ ኣይባዬ ቤሮ ናንዳካጝ እባጄ ኣይንካ ኢየሱሱጝ ካሃሳውኖጝ ካኒ ኣይኬን እንግን። ³⁵ ካሪንታዻ ካኒ ክራ ሃርሽኬኔ፤ ኢየሱስ ናሹጜ ቱላ ኬቶኦ፤ ኩይ ኦካ ራቅ ክየሜ ካርሲያ ይሁኔን። ³⁶ ስምዖኔ ባይዳን ኔኒዬ ዻዬ እሺዬ ካርስያ ዎሼን፤ ³⁷ ሹ እጝ ጌዮጝ ዋይሼ እሺ ውር ፓይላ ዎሽ እምባ። ³⁸ እሺዻ ዋይሼ እንግን ካናሹጜ ካፓይባ ኦካ ጶሮክ ጊታጝ ኣኔን ድያው፤ ካክሊይንቴባ ኦይን፤ ሃኩኖጝ ሃናንዳካ እጝ። ³⁹ ዬ ሁሉክ ኦጉዋይካ ቶኦካ ይሁኔኔ ኬክ ⁴⁰ ውር ክየም ኬና ጎማ ቡርቅካ ጊዬ ቶኬ ኩዋሚን ኦካ ማሪ ኔኒዬ ሺጝ የናሺሼያ ኣንያጝ የቻሊባይ ኣን ጫንቃል ሻሜን» ሺጝ እያይኔ ይወና። ⁴¹ ኢየሱስዻ ዻዹጝኔ ውር እጜ ቲት ቡዋ ኔኒዬ ዱሜ፤ ሺጝ ሃናሺባ ጌይባ ጫንቃል። ⁴² እሺዻ ይሪካ ኬኦካ ቡርቅካ ጊዬ ጌያ ጫንቃል፣ ባይሻዻ። ⁴³ ኢየሱስዻ ካሎን ኣጅሺሽ ውር እጜ ሺጝ እያጜ ይዕሲያ፤ ⁴⁴ ክያጃ ክየምጵንዻ ከማር ውር ሜይሼኔ ኣጅሼባ፤ ኣይባዬ ካኣይሼ እንግን ማኝዬ ካሜ ዹዋልሼ እን ኤምኑ ውርካ ቃሽ፤ ናንዳካ ጫንቃል ጌዬን ኑኑ ኣሽክባ ጋላባ ሙሴ ክያጆጝ» ሺጝ እያይ። ⁴⁵ ዬ ውር እጝ ኦካጝ ኩዮጝ ክያጃ እጝ ፓይላ ሃሳውሼያ ራቅ ጊታይ፤ ሃሳዋዻ ሻማ ፒሽካ። ናንዳካ እጝ ኢየሱስ ኦካ ከተማ ኒንዻ ኬጃ ሁሉኬን ካኒ ቻልኬን፤ እጝ ናሹጝ ኬኦጝ ካርሲያ ኦካ ራቅ ጊታይ ኣኔን ኬኦካ ከተማ ዋስ ኡፔን፤ ዬ ውር ካኒ ጱዽኬን ኬኦይን ቆቦጝ ሃም ኔኒ ፓይሼን።