ማቴዎስ ሃፑክ 5 ኪሊማ እንካ ጋግ ¹ ዛርሲ ጁዋንዻ ፑኡሺሜኔ ሹ እን ጌዮጝ፣ ሌፕ ጋጊዬ ኡፓ፤ ውር ጊታይ ዻዬ ጆሌ እሺዻ ፓዬና ኦኔኒ። ² ሺጝ እያጜ ካርሲያ እንግን እርርሲዬን፤ ³ «ኬኡሲካ ባሪዮ ጊታይ ኣይ ኩፑጝ ጋይ ጫንቃሌ ጌጳሞካ ባሪዮ ሃጊዬይዬ፤ ⁴ ጊታይ ሞይካድ ጋይ ጫንቃሌ ጌይባ ቁዋቂቲ፤ ⁵ ሌሟን ጋይ ጫንቃሌ፤ ጁዋንትሽባ ዳሊ ኪያኒ፤ ⁶ ጊታይ ጫንቃል ኣዬን ካሽ ቃወዬ ኮርጉ ቃወዬ ጋይ ጫንቃሌ ናዓሽባ። ⁷ ጊታይ ሺዕሺሺ ጋይ ጫንቃሌ ጌይባ ሺዕሺኔን። ⁸ ጊታይ ሸን ጊዬይ ኣይ ጫንቃሉጝ ጋይ ጫንቃሌ ጌይባ ባሪዮ። ⁹ ጊታይ ጎብሺ ሹቃጝ ጋይ ጫንቃሌ ሺጝ ሃንታካ ባሪዮዬ ሺውባ። ¹⁰ ሺጝ ናንዳካ ጫንቃሌ ጊታይ ፓዩጝ ጋይ ጫንቃሌ፤ ጌጳሞካ ባሪዮ ሃጊዬይ። ¹¹ ውር ናንዳካ ኣን ይራ እየውያጝ፤ ዋኬ እየዌ ጋራ ፓይላ ድኬያ እየው ኬሾሮያጝ ጋይ ጫንቃል። ¹² ኣንቲቲ እን ከቦቴ ፎላ ዾዮኩጝ ናንዳካጝ ኣዬ ታቹጝ ካዋዝንሲ እየውባ፤ ሻምባ ሾሮ ኬሌሜን ጉዩ ውርካ ቶካ ባሪዮ ጊታባ ኣኖጝ የዋክቴያ እያይ። ¹³ እየው የኣያ ሶቃካ ዳሊ፤ ሶቆ ሶቆ ኣይን ኔኒ ጩዋንቲ ኔኒ ካይያያጝ ጩዋንቲ ኔኒ ዋሼ ጌዬን ቻሊሜንባይ? ካፓቅሼ ሹኑኬውርካ ባጞጝ ሳጊ ኣይኬን ካኣሽኪኔን። ¹⁴ እየው የኣያ ኦሜሌልካ ፔኑጝ፤ ከተማ እን ኣኔን ኦካ ጋጉጝ ቻሊሜንኬን ራሺኔን። ¹⁵ ውር ላሉጙሽ ፓኖሴ ኣጁጝኬን ከኦካ ካራም ዱቡ፤ ጊታይ ኣኔን ቶኦ ቱዎጝ ፓይላ ካ ላሉጞጝ ጋጁጝ ካራም ካራም ዾዮክ። ¹⁶ እያይ ውር ጌይ ዋድማ ሹቃ እን ጊዬይዬ ካጌጳሲዬ ሹኔ እን ጊዬይ ኣኔን ፎላ ዾዮክ ከሌሜንካ ውር ላሉጛ። ¹⁷ ክያጃዬ ውርካ ባሪዮዬ ኦይድ ከኦኮኑጝ ሃኩኔ ሃንቺሺዬን ዋሺቴን፤ ሃኩኒ ሹዋጵሼን ዬ ሃካና ኩንኬን ሃንቺሺዬን። ¹⁸ ሃዋይሼ እየውባ ኣኩሉክ፤ ፎላዬ ዳሊዬ ሌይ ሃምካ ሳጊዮጝ ክያጃ ፓይላ ሙኔንባዬ ከኦካ ክያጃ ፊደል ክየም ወይ ኦኬ ክየም ጎብሽኬን። ¹⁹ ዬ ውር ክየምጵንዻ ኬኦካ ክያጃ ጊታጝ ኣይን ጆጊ እን ሳስክያያጝ፤ እንቃዻ ካሳጊዮ እርርሲያያጝ፤ ከኦካ ጌጳሞካ ባሪዮ ሺጝ ዽኒዬ ሺውባ፤ ኣይባዬ ክያጃ ጊታጝ ሙኒሽባዬ እንቃዻ ካሙኒንቴባዬ እን እርርሲ ከኦካ ጌጳሞካ ባሪዮ ሺጝ ታቺዬ ሺውባ። ²⁰ ጫንቃል ኣዬን ጊዬይ ሃኬ ፈረሳውያኔ ውርካ እርርሲኔንካ ክያጃ ባካ ሌሜኔ ማቲ ጫንቃሌ ማር ጌዬንያጝ ሃምካ ፎላካ ጌጳሞ ሁሉኬን የቻሊያኬን። ²¹ ውር ጊታባካ ሌሜን ዋይሼ ኦይድ ኒሼን ካጝ ኒሹጝ ኮምሼባ የዋያያ፤ ²² ዬ ኣን ሃዋይሼባ እየው ከኦኬና ማር ኣኔን ውር እን ማኒሼ ጪኔጝ ኮምሼባ፤ ውርካጝ ዋይሼ ጪኔ ሞኙጝ ኦካ ሌሜንካ ካራም ጋንሽባ፤ ፕር ካጝ ሺጚ ዳዳቡጝ ኮምሼንካ ጉ ካሊ እሺባ። ²³ ዬ ሹካጝ መባ ኑኑ ኦካ ጋላ ቡልሼን የሺጜ ባሪዮ ቡልሼን ኦይን ጪን ማኒሺሼ እን ኣኔዬ ጌይ ጶቅያጝ፤ ²⁴ መባ ኑኑ ኦቼባ ኦይካ ሌሜን ጋላ ቡልሼን፤ ኬሌሜን ካሜ ናሺ ጋምባ እኔ ጪኔ፤ ጩዋ ዋኬ ቦሼባ መባ ኑኑ ባሪዮ። ²⁵ ባላጋራ እን ኑኑ ካሲሲ እን ካማር እን ኮምሺሼኔ፤ እን ቶዬን ጋራካ ውር ጃ ካማር ሳስክዬ እንካ ቁም ኣዬኔ፤ ካማር እን ቶኦካ ቁሜንዻ ፓቅሼን፤ ካኒ ኣኔንባ ጉዋር ክያኒዬ ይሪካ ካሜ ናሺ ጋንባ ኬባላጋራ ኑኑ። ²⁶ ሃሺጝባ ኣኩሉ፤ ኮምሺሼያ እንያጝ ሌይ ሃምኬ ካሺዬ ሺሊንጊ እንካ ቱንሱጝ የቱልኬን ከኦይን። ²⁷ ሺጜ ኦይድ ኩጳሺዬን የዋያያ። ²⁸ ዬ ኣን ሃዋይሼባ እየው፣ ውርካጝ ቶይ ሃኣጚ ኬካርቡካ ኣንግርማጝ ፓይላ ኩጳሲዬና ኬሸን ከእሺ። ²⁹ ካርቡ ኑኑ ቡዎን ኣኔ ክያጃካ ሴሶያጝ ቡሌ ፓቅባ ይሪካ፤ ካፓቅሼ ሩዋ ኑኑ ፓሲ ሃምካ ጉያጝ ካፓቅሼኬ ኦካ ሩዋ ኑኑ ቶና ሃባሺ። ³⁰ ቡዋ ኑኑ ቡዎን ኣኔ ክያጃካ ሴሶያጝ ቃጬ ፓቅባ ይሪካ፤ ሩዋ ኑኑ ፓሲ ካፓቅሼ ሃምካ ጉያጝ ካፓቅሼኬ ኦካ ሩዋ ኑኑ ቶና ሃባሺ። ³¹ እን ቡሊ ኝያ ኔኒ ፓይላ ካጋዬ ወርቀትካ ቡሊኔን ኣኔባ ከእያይ ሺጜ የዋያያ። ³² ዬ ኣን ሃዋይሼባ እየው፤ ማርሼ ዾዮክ ኦይን ኩጳሲምኔኔ ውር እን ቡሊ ኝያ ኔኑጝ ፓይላ ሻምባ እያይ ካኩጳሲምኖጝ፤ ኬክያጃ እጝ ኝያ እን ቡሎጝ ውር እን እያኒሹጝ ኮምሼ ኬኦይን ኣሽክዬ ኩጳሞጝ። ³³ ውር ጊታባካ ሌሜን ዋይሼ ኦይድ ኬሾሮ ዜርሚኔን፤ እን ዜርሜን ኦካ ማሪካ ቶይ እን ኤምኑ ሺጜ እያይ የዋያያ። ³⁴ ዬ ኣን ሃዋይሼባ እየው ኦይድ ካሎን ዜርሚንቴን፤ ኣይን ፎላጝ ኦይድ ዜርሚንቴን፤ ሃኦካ ኡፔንካ ባሪዮዬ፤ ³⁵ ኣይንኬ ዳሉጝ ኦይድዜርሚንቴን፤ ሃኦካ ኡሲ ቦወንካ ባሪዮዬ፤ ኦይድኬ ኢየሩሳሌም ዜርሚንቴን፤ ሃካታማካ ቢቲ ታቺ እጜ፤ ³⁶ ኣይን ኦካ እን ኤምኑጝ ኦይ ዜርሚኔን፤ ጭራሺ ክየምጵንዻ ፎልቼን ወይ ድሙጉ ሻሜን የቻሊኬኔ። ³⁷ ዬ የሃሳውናያጝ ክያጃ ጉዩ ሃኣኩሉክያጝ ሺጚ ኣኩሉክ፤ ማር ኣዬንያጝ ካኣይ እያይ፤ ከእን ኣይ ሹኑክ ፓይላ ካኩዋው ሃጋራዬ። ³⁸ ሺጜ ካርቡ ናንዳካ ካርቡ፤ ኒጊ ናንዳካ ኒጊ የዋያያ። ³⁹ ዬ ኣን ሃዋይሼባ እየው፤ ውር እን ኣሽክዬን ክያጃ ጋራጝ ኦይዲ ኖኪቴን፤ ኣይባዬ ውር እን ሙሪ ዻቢን ኑኑ ቡዎን ሁቡሼባ ኑዋዻ። ⁴⁰ ውር ክየም ካሲሲ እን ከኣንቲቲካ ቡዋ ኑኑ ቦወንያጝ ሌሜዬ ኣይባ። ⁴¹ ውር ክየም ሻማ እን ጊዲ ኬጉዋር ኬና ዹካትሽ ኪሎ ሚትር ክየምያጝ ሌሜ ጉዋር እንቃዬ ፓይባ ኬጋጝ። ⁴² ጊታይ ይወን ኦኑኑጝ ኣይባ፤ ከኦኑኑ እን ዎሺ ቢዲሩጝ ኦይ ማሪ ቲቲሼን። ⁴³ ሺጜ ናሺባ ናሺዺ ኑኑ፤ ሚኔባ ጋል ኑኑ የዋያያ። ⁴⁴ ዬ ኣን ሃዋይሼባ እየው፤ ናሺባ ጋል ጉዩ፤ ናንዳካ ጊታይ ዋኬ እየው ይወንባ። ⁴⁵ የሻማያ እያይንያጝ የማትያባ ሃንታካ ሹቡጊን እን ጉዩ ኣኔን ፎላ ዾዮክ፤ እሺ ቡልሼባ ሹሽ ናንዳካ ውር ጋራኔ ሌሟኔ፤ ጎትዻ ቢውሺሼባ ናንዳካ ውርካ ሴሶዬ ጫንቃላኔ። ⁴⁶ የናሺያያ እን ናሺ እየውጵንያጝ የጌያ ኦኬ ኬና ኣኒኒ እያን? ኤ ውር ጊታይ ፑኡሺኔ ጆል ጊቢሪካ ኬና ኣሽኪ ይጝ ኣኔኬኒ? ⁴⁷ ሃኦኬና የቲትሺቴ ጪኒጊንጵን ቡዋያጝ ኬውር እንቃ የኣያኬ ኦ ላሻ? ዛርሲ ኬና ኣሽኪ እን ኣኔኬኒ? ⁴⁸ ዬ ሹቡጊን እን ጉዩካ ፎላጝ ኣዬ ካሎን ጫንቃን እየውዻ ካሎን ኣይ ጫንቃል።