ሃፑክ 22 ሄክንሶካ ውር ጊታይ ሺወ ሃምካ ኣማካ ዴሞጾቃጝ ¹ ኢየሱስዻ፤ ፕር እንቃ ሜይሼያ እንግን ሄክንሶ ኬና ሺጝ እያጝ፤ ² ፎላ ዾዮክ ሙኔን ሙኔን ቢቲ ኬና ኣሽክሼ ዴሞጾቃካ ውዋ ኣማጝ፤ ³ ቢቲ እንዻ ካሺው ውር ጊታይ ቾችንሺዬ ይዕሲያ ውርካ ዋድማ፤ ዬ እንግን ሺጝ ሃፓይናኬን። ⁴ ፕር ይዕሲ ውርካ ዋድማ እንቃዬ ሺጝ፤ ዋይሺቴ ውር ጊታይካ ቾችንሺዬ፤ እየዎ፤ ሃኒቃ ቢህዌ ቢህ ሻጋሻጋኔ ሃኣሽክያያ ኣማ፤ ኦኬ ፓይላ ናንዳካጝ ጋሽክዬ ሹዋጶጝ ዋይሺቴ እንግን ፓዬን ሃምካ ዴሞጾቃጝ። ⁵ ዬ ውር ጊታይካ ቾችንሺዮጝ ሺወን እን ድርግቲሼዬ፤ ክየም ኩያ ሃምካ ሃሙጝ፣ ኑዋ ኩያ ሃምካ ኒጊዲ ኔኑጝ፤ ⁶ ጎም ውርካ ኤርጎ ጊታይ ሺዺዬ ዋኬ ጆሌዬ ኒሻ። ⁷ ቢቲ እንዻ ማኒሼ ይዕሲ ፓፃኖዬ ካሲያ ውር ጊታይ ኒሼን፤ ኡዱባ ከተማ ጊዬይዻ። ⁸ ጩዋ ዋይሼ ውርካ ዋድማ እያጝ፤ ኣማካ ዴሞጾቃ ሃሼኪሚ፤ ኣይባዬ ውር ጊታይካ ቾችንሺዮጝ ናንዳካጝ ማሬ ጌዬኑጝ፤ ⁹ ኳቲ ሃምካ ጉዋር እን ሳጊዬ ጆሌዬ ጊታካጝ የጌይቶጝ ፓይላ ሺውቴባ ዮጝካ ኣማካ ዴሞጾቃጝ። ¹⁰ ውርካ ዋድማዻ ኳት ሃምካ ጉዋሬ ካጝ ጌዮጝ ሹቃ እንዻ ጋራ እንዻ ፓይላ ፑኡሺዬ ኦልማ እንካ ዴሞጾቃጝ ቋቁሻ ከኳመና። ¹¹ ቢቲ እንዻ ሁሉክ ኳመና ጊታይ ቾችንሺዬ ቶዬንያጝ፤ ጌይ ውር ክየም ኬና ማር ኣፓላካ ዴሞጾቃ ኪሜን፤ ¹² ሺጝ እያጝ፤ ውሩጝካ ናሺማ ናኒዮ፤ የማር ኣፓላካ ዴሞጾቃ ኪሜኔ የቻኒ እያን ኦጝ ሁሉኬን? ዬ ውር እን ሃውር ኬና ማር ክያጃካ ውር ዋዬን። ¹³ ቢቲ እንዻ ዋይሼ ውር ጊታይካ ዋድማ ቁሚ ቡዋ ኔኒዬ ጃፍ ኔኒዬ ፓቅቴ ሃም ኣይ ድሙጉጝ፤ ከኦይን ማቲባ ኦቆራዬ ኒጊ ሺኪዬኔ ዋይሼ እንግን እያይ። ¹⁴ ጊታይ ሺዎጝ ሃጁዋኑ፤ ዬ ጊታይ ጊድዮጝ ሃጩዋማ። ¹⁵ ከኦይን ጩዋ ውርካ ፈረሳውያን ቱሌ ፓዬ ከኦካ ቶግ ኔኒ ክያጃ እን ቱሉጝ ካቶሊባዬ ክሊያ ጋጝ። ¹⁶ ውር ጊታይ ዻዬ ጆሌ እንግኔ ውርካ ሄሮድሴ ይዕሲሼ ሃሚን ኔኒዬ ሺጝ እያጝ፤ «ውሩጝካ እርርሲዬን ዮ፤ እን የእርርሲዬ ጉዋርካ ባሪዮ ከኣኩሉኬ፤ የማሬ ውር ክየምጵንዻ ጁኔኔ፤ የቶዬ ውር ፓይላ ከሊኩጝ ሃእባጃያ፤ ¹⁷ ሜይሼ ኡዋባ ሙኒሼን እን እያን? ኣይባዬ ናንዳካ ቄሳር ጊቢሪ ካሺሼን ሁሉኩሼባ ሞ ሁሉኩሼኬን? ¹⁸ ዬ ኢየሱስ እባጅ ጃካማ ጊዬይዬ ዋይሼ እንግን እያጝ፤ እየው ኣጁጉ ጊታጝ ካሙኒሺኔኑጝ የዎሻ እያን ክያጃ ናኒ ቶሊዬን? ¹⁹ ይንዳ ዹዋልሺቴያ ኣን ቢሬ እን የሺጝቴ ጊቢሪ ካሺዬኑጝ፤ እንግንዻ ቦሼያ እሺ ሺሊንጊ ክየም። ²⁰ እሺዻ ሺጝ፤ ዴንታ እን ጌዬን ኦካ ቢሮጝ ሃካ ኒን? ቶኬን ኔኒካ ሃካ ኒን? ²¹ እንግንዻ ሺጝ ሃካ ቄሳር፤ እሺ ዋሼ ሺጝ፤ ኣኪ እንካ ቄሳር ኣይ ቄሳር፣ እንካ ባሪዮጝ ኣይ ባሪዮ። ²² ዋዬ እን ጎሺያ፤ ጎይድ እሺዻዬ ፓያ። ²³ ውርካ ሰድቃውያን ጊታይ ሺጚ ናሹጜንካ ኣርሼን ኣርሼን ኣኔኬኔ ቃቢ ፓዬን ኦካ ኢየሱሴ ሺጝ እያጜ ጋንሼና፤ ²⁴ ውሩጝካ እርርሲዬን ዮ፤ ሙሴ እባ ውር ክየም እያንሽ ሃኣጚዬ ማር ሃንታ ቡሌኔ ኣርሽያጝ ጪኔ ካእያኒሼ ኝያካ እን ኣርሺዬ ካቡልሼ ሃንታጝ ክያጃ። ²⁵ ከኦካ ጫቃን ጉዋዩ ኣና ጪኒጌንካ ጋጝ ሶጳ፤ እንካ ሌሜን እያንሽ ሃኣጚዬ ቡልኬን ሃንታዬ ኣርሾጝ ጪኔ እያኒሻ ኣጚ፤ ²⁶ ፕር እንካ ላንሳዻ እያይ፣ እንካ ማክንሳዻ ሌይ ሃም ሶጳን ካጊያኒሾጝ ጋርሻ ከዴንታ እን። ²⁷ ከቱንሲ ኝያ እንዻ ኣርሻ። ²⁸ ዬ ፓይላ ናንዳካጝ እያኒሾጝ ከሹካ ናሹጜን ከኦካ ሶጳን ማቲ ኝያካ ና? ²⁹ ኢየሱስዻ ሺጝ እያጜ ዋሻ፤ ወርቀትካ ውርካ ቶካ ባሪዮዬ ቁዋቅትካ ባሪዮዬ ናንዳካጝ የማርቴ እባጄኑጝ የጊያምሻያ፤ ³⁰ ከኦካ ናሹጜን ጩዋ ውር ማቲባ ውርካ ኤርጎካ ፎላዬ እያኒሽኬን፣ እያኒሼንኬንዻ፤ ³¹ ዬ ናንዳካ ናሹጜንካ ኣርሼን ባሪዮ ሺጜ እያጜ ሃሳዎጝ የካኔ ኳማኬኒ? ³² ኣን ሃኣይ ኣምላክ ካኣብርሃም፣ ኣምላክ ካይስሐቅ፣ ኣምላክ ካያዕቆብ። ባሪዮ ሃእያይ ዬ ማር ኣምላክ ካኣርሼኔን። ³³ ዛርሲ ሹ እን ዋዬ እን ጎሺያ ከእርርሲዬን ኔኒ ³⁴ ዋይ እን ኢየሱስ ሻሜ ሰዱቃውያን ሹዬ፤ ውርካ ውርካ ፈረሳውያን ፑኡሺሜና ክየምጵንዻ፤ ³⁵ ከኦግዬይዻ ውር ክየም ኬና እባጅ ክያጃ ባካ ሌሜን ዎሽ ፓታንሲዬኔ ሺጝ እያጝ፤ ³⁶ ውሩጝካ እርርሲዬን ዮ፤ ከኦካ ክያጃ ፓይላ ሳጊያ ኤርጎ ና?» ³⁷ እሺዻ ሺጝ እያጝ፤ ኣምላክ ታቺ እን ካሎን ከሻን ኑኑ፣ ካሎን ከናፒሲ ኑኑ፣ ካሎን ከቃቦ ኑኑ ናሺባ፤ ³⁸ ይጝ ሃእን ኣይካ ሌሜኔ ሳጊኬ ኦካ ኤርጎ ፓይላጝ። ³⁹ እንካ ሙኔን ይጝ፤ ይንዻ ሃእን ሺጚ ውርካ ጉል ኑኑ ናሺኬ እን ኤምኑጝ፤ ⁴⁰ ክያጃዬ ውርካ ቶካ ባሪዮዬ ሃጊታይ ጋጁጜ ከኤርጎ ዻ ጊታጝ ፓይላጝ። ⁴¹ ውርካ ፈረሳውያን ጋኔንባ ፑኡሺሚኔ ቆቤኔ ኢየሱስ ሺጝ እያጜ ኣንሻ እንግን፤ ⁴² ናንዳካ ክርስቶስ ሙኒሼን እየው እያን? ሃውዋካ ኒንዻ? እንግንዻ ሺጝ፤ ሃውዋካ ዳዊት። ⁴³ እሺዻ ዋይሼ እንግን እያጝ፤ «ኣኪ ዳዊት ከቁዋቅትካ ኡሲካ ባሪዮ ሺጝ ናንዳካ ኦታቹጝ ናኑጝ? ሺጝ ናንዳካ ኦዻ እያጝ? ⁴⁴ ባሪዮ ታቺ እን ናኑጝ፤ ጋል ናኒ ሌይ ሃም ቶኬ ከጃፍ ናኒ ዱቡ ኩዋሚኑጝ፤ ኡፓ ቡዎን ናኒ። ⁴⁵ ዬ ዳዊት ሺጝ ታቹጝ ናኒዬ ሺውያጝ፤ ቻሊ እያን ውዋ ማቲዬን? ⁴⁶ ቻሊ ክያጃ ክየም ዎሼኔ ወይ ካርሲኬ ሹ እኔ ውር ክየምጵንዻ ኬና ካኣንሽ እሺ ኣኔኬን።