ሃፑክ 18 ከፓይላ ሳጊ ፎላ ዾዮክ ሃኒን ¹ ከሹ እን ውር ጊታይካ ዻይኔን ፓዬን ኦካ ኢየሱሴ ሺጝ፤ ከፓይላ ሳጊ ፎላ ዾዮክ ሃኒኔኔ ጋንሼና። ² ኢየሱስዻ ዼት ሃንታ ዽታኬ ክየሜ ሪብ ጫቃን ጊዬይዬ ዋይሼ እንግን እያጝ፤ ³ ሃዋይሼባ እየው ኣኩሉክ፤ የማራ ዋኬ ሃንታ ዽታኬ ማቲዬንያጝ ክየምጵንዻ የሻዋኬን ፎላ ዾዮክ። ⁴ ዬ ከፎላ ዾዮክ ካሳጊኬ ፓይላ ሃእን ሻሚ እሺ ኤምኑ ከሃንታ ዺኒ ይርኩጝ፤ ⁵ ውር እን ቦው ሃንታ ኬና ውይ ይጝ ከሮጝ ናኑጝ ቦባ ኣንዻ። ⁶ ኣይባዬ ከጊታይ ይወን ከኣን ከኦካ ሃይሻይሺ ጊታጝ፤ ውርካጝ ካቲንሲ ክየም፤ ካቁምሼ ማዶካ ባይ ዴጩጉ ቦሉ ኔኒ ክያኒዬ ካፓቅሼ ኛፓሴ ካዱቅምኖጝ ሃባሺ። ⁷ ፔኑጝ ናንዳካጝ ማቲዬ ኦካ ካቲሚኔኑጝ ሃይ/ ኩኔንካ ካቲሚኔን ሺዽኬኔ፤ ኣይባዬ ናንዳካ ውር እን ኣይ ኦካ ካቲሚኔን ሃይ። ⁸ ቡዋ ኑኑ ወይ ጃፍ ኑኑ ናንዳካጝ ማቲሼ እን ኦካ ካቲሚኔኑጝ ቃጬ ፓቅባ፤ ከኣኔ ቡዋ ዻዌ ወይ ጃፍ ዻዌ ካፓቅሼ እን ሃምካ ጉ እንካ ሹ ጮልያጝ፤ ከኣዬ ኤላዬ ወይ ዱጙሚዬ ከሁሉኬ ሃምካ ዻቆጝ ሃባሺ። ⁹ ፕር ካርቡ ማቲሼያ እን ኦካ ካቲሚኔንያጝ ቡሌ ፓቅባ፤ ከኣኔ ካርቡ ዻዌ ካፓቅሼ እን ጉ ክያኑጝ፤ ከኣኔ ካርቡ ክየሜ ከሁሉኬ ሃምካ ዻቆጝ ሃባሺ። ¹⁰ ከኦካ ጫቃንካ ሃይሻይሺ ጊታጝ ኦይዲ ክየምጵንዻ ቦውቴኔ ኣጅቴባ፤ ሃዋይሼባ እየው፤ ከውርካ ኤርጎ ጊታይ ኣኔን ፎላ ዾዮኬ ¹¹ ሃንታካ ውር ኩና ጊታይ ካይህ ዻዓሺዬን። ¹² ይንዳ ሜይቴየ ኣን፤ ውር ክየም ካኣኔ ማድር ዽብ ክየሜ ከኦካ ጊታይ ክየም ካይያጝ ኦቼ ሳልታም ሳላን ጋግ ክያኒዬ ዎሼ ኩይኬን እን ካይህ? ¹³ ሃዋይሼባ እየው ኣኩሉክ፤ ጌያ ማድር እን ካይህያጝ፤ ከኦካ ሳልታም ሳላን ጊታይ ኣኖጝ ካሎን ዋዝንዽባ ከእን ጌዮጝ። ¹⁴ እያይ ከኦካ ጫቃንካ ሃይሻይሺ ጊታጝ ክየምጵንዻ ካካይህዮጝ ማር ክያጃካ ሹኔ እን ጊዬይ ካፎላ ዾዮኬን። ¹⁵ ጪኔ ኑኑ ጊያሚሺሻ እንያጝ ካሜ ኣይ እኔ እሺዬ ዻዺኔ ሜይሼባ እሺ ሴሶ ኔኒ፤ ዋይሼና እንያጝ ሻምሼባ ጪን ሃሚን ኑኑጝ። ¹⁶ ኣይባዬ ማር እን ዋይሺኔንያጝ ክያጃ ፓይላ ማቲባ ከክያጃ ኬና ካቁዋቅትትሽ ከማኝ ዻዌ ጅያኔ፤ ጎም ውር ክየም ወይ ዻዌ ካሃሳውኔባ። ¹⁷ እንግን ዋይሺኔንያጝ ሜይሼ ቶኦካ ይሁኔን፤ ማራ ቶኦካ ይሁኔን ዋይሺኔንያጝ ኮምሼ እሺ ከዛርሲዬ ውርካ ጊቢሪ ፑኡሺዬኔ። ¹⁸ ሃዋይሼባ ኣኩሉክ፤ እን የኣሽክቴ ዳሉጝ ክያኒ ፓይላ ማቲባ ኬና ካቁሜ ፎላ ዾዮክ፤ እን የቡልቴ ዳሉጝ ክያኒ ማቲባ ኬና ቡሌ ፎላ ዾዮክ። ¹⁹ ፕር ሃዋሼባ እየው ኣኩሉክ፤ ዳሉጝ ክያኒ የኣያ ዻዌ ኦኬ ካጝ የይሁንቴ ከጋጝ ዋይሺኔኑጝ ባባ እን ኣኔን ፎላ ዾዮኩጝ ኣሽክሼባ እየው። ²⁰ ጊታይ ኣይ ዻዌ ወይ ጅያኔ ፑኡሺሜን ከሮጝ ናኑጝ ኣን ሃጌዬንባ ኦይን። ²¹ ከሹ እን ጴጥሮስ ኩይ ኦካ ኢየሱሴ ሺጝ፤ ታቹጝ ዮ፤ ጪኔ ናኒ ጊያሚሺሻ ኣንያጝ ካሺዕሺሼ እሺ ክያጝ አኸ? ሃሌይ ክያጝ ሶጳይ? ²² ኢየሱስዻ ሺጝ «ሌይ ክያጝ ሶጳታም፤ ሶጳዬ ሌይ ክያጝ ሶጳጵን ሃሺጝኬን። ²³ ዬ ፎላ ዾዮክ፤ ሙኔን ኮመን ኮኑጝ ኣኔን ኦካ ቡዋካ ውርካ ዋድማዬ ታቺ እን ዎሼ ፑኡሺዬን። ²⁴ ሹ እን ካርሲዬ ቢራንዻ ኮመን ቦፓይኔያ ውርካ ዋድማ ኬና ኣኔ ባጃ ሺ ታጲ። ²⁵ ውርካ ዋድማ እን ናንዳካጝ ካዎሼ ባጃ እን ኣኔን ኦኔኒ ካሺዬኑጝ፤ ካኡዋሩጝሼ ኝያ ኔኒዬ፣ ሃንታ ኔኒዬ፣ ኣንቲቲ ኔኒዬ ካካሺዮጝ ታቺ እን ኤርግታ። ²⁶ ከሹ እጝ ዋርካ ዋድማ እን ቡድ ጃፍ ኔኒ ክያኒዬ ሺጝ ዶንሺሼ ኣንባ፤ ባጃ እን ኣኔን ኦናኒ ፓይላ ሃካሺባ፤ ሺጝ እያይኔ ይወና። ²⁷ ታቺ እንዻ ዻዹጝኔዬ ሺዕሺሼያ እሺ፤ ባጃዻ ፓይላ ኦቼ እሺዬ ይዕሲያ። ²⁸ ውርካ ዋድማ እንዻ ቱልባ ከኦካ ሌሜንካ ታቺ እን ጌይ ባይዳ ኬና ኔኒ ኣኔ ባጃ ሺልንጊ ዽብ ክየሜ ጎሜ ዋይሼ እሺ ባጃ እን ናኒ ኣኔን ኦኑኑ ካሺሼ ኣምባ። ²⁹ ባይዳ ኔኒዻ ቡድ ኦካ ማሪ ኔኒዬ ሺጝ ዶንሺሼ ኣንባ ሃካሺሼ እንባዬ ይወና። ³⁰ ኣይባዬ ካዶንሺሼ እሹጝ ካኒ ናሺኬን፤ ሌይ ሃም ካካሺዬ ባጃ እን ኣኖጝ ዾቅሺሼያ ቶኦካ ቁሜን። ³¹ ውርካ ዋድማ እንቃ ጊታይ ጌይ ኦይን ሙኔን ካሎን ዻዹጝኔያ፤ ፓዬ ኦይን ሙኔን ፓይላ ሜይሼያ ኤሪ ታቺ እን። ³² ከሹ እጝ ታቺ እን ሺውሽ ውርካ ዋድማ እጜ፤ ዋይሼ እሺ እያጝ፤ እን ውርካ ዋድማ ጋራጝ፤ ናንዳካጝ የይሁኔ ኣኑጝ ባጃ እን ፓይላ ሃኦቼያ እን፤ ³³ ኣን ከእያይ ሃሺዕሺሼ እኑጝ እንዻ ባይዳ ኑኑ ሺዕሺሼን ሁሉኩሼኬኒ? ³⁴ ከማንትዻ ሌይ ሃም ካካሺያ ሹዋጶጝ ሳስክዬ ኣዬና ሃምካ ቶኦካ ቁሜኑጝ። ³⁵ ዬ እየው ክየም ክየም የማርቴያ ጪንጊን ከሻን ካሺዽባ ሺጜንያጝ፤ ሹኔ እን ጉዩ ካፎላዻ ሻምባ እያይ።