ሃፑክ 4 ፓታናካ ኢየሱስ ¹ ኢየሱስ ቆቅሼ ኡሲ ካባሪዮዬ ዋክባ ኬዮርዳኖስ ቦሼያ እሺ ሃምካ ቦናጝ፤ ² ኬታይ ሹ ኦይታም ፓታኒያ ኬዲያብሎስ፤ኬሹ ጊታይ ኦኬ ክዬምጵንዳ ኣምኬኔ ኡፔ ኬቱንሲ ካሽ ቃዋ እሺ። ³ ዲያብሎስዳ ሽጝ ይንዳ የኣይያ ውዋካ ባሪዮያጝ ባይ ጊታጝ ካማትዬ ምሹጝ ሻምባ። ⁴ ኢየሱስዳ ሺጝ«ሃንታካ ውር ኡፑኬን ኬምሽጵን ሽጝ እያይኔ ቶካኣ»ሽጝ እያይኔ ዋሼያ እሺ። ⁵ ጩዋ ዲያብሎስ ቡልሼ እሺ ኦኬና ኣይ ዴጌ ሺጝ ይንዳ ጌጳሞ ካፔኑጝ ፓይላ ዱዋሊሺንትዬ ይሪካ። ⁶ ሺጝ እያጝ ፤ታታቻን ግታጝ ጌጳሞዬ ታቺ ኣዬኔ ፓይላ ጋያ ኣን፤ናንዳካ ጊታይ ናሺ ኣን ናንዳካጝ ካኣዮጝ፤ሃኣይባ እን። ⁷ ዬ የይሁወንያ ኣንያጝ ጊታጝ ፓይላ ማቲባ ኑኑ። ⁸ ኢየሱስዳ ዋሼ ሺጝ ይሁንቴ ባሪዮ ኣምላክ ሃእሺጵን ኣይ ኣምላክ፤ሺጝ እያይኔ ቶካ። ⁹ ጩዋ ቦሼ ሃምካ ኢየሩሳሌሜ ሪብ እሺ ኦካ ሁሉኩሼንካ ቶኦካ ይሁኔኔ ሺጝ እያጝ«ይንዳ የኣይያ ውዋካ ባሪዮያጝ ኡንጉልዬ እን ኤምኑ ኬኦጝ ሌይ ዳራ ሃም። ¹⁰ ናንዳካኦ ሺጝ እያይኔ ቶካ«ካቶይ እምባዬ»ውርካ ኤርጎ ናንዳካ እን ጌርግትባ፤ ¹¹ ጃፍ ኑንዳ ካማር ኬባይ ሙኔኔ ኬቡዋ ጊዬይ ጎሜ ቲትባ። ¹² ኢየሱዳ ሽጝ«ኦይ ባሪዮ ታቺ እጝ ፓታንሲዬን ሺጛ እያይ»ሺጝ እያይኔ ዋሼያ እሺ። ¹³ ዲያብሎስዳ ጩዋ ሹዋጴ ፓታና ፓይላጝ ሌይ ሃም ሹ እንቃ ካጌዬ ጋጝ ኬኦኔኒ ኩያ። ¹⁴ ኢየሱስ ኬካንታካ ኡሲ ዋካ ገሊላ፤ጎሺ ኔንዳ ኬኦካ ጶሮክ ጊታይ ኣኔን ኦካ ፔን ጊታይ ፓይላ ቱላ። ¹⁵ እሺዳ ኣኔን እንጊን ኦካ ቶኦካ ይሁኔን እርርሲየን፤ውር ፓይላዳ ይወና እሺ። ¹⁶ ጩዋ ኩያ ሃምካ ከተማ ባጌጲሾጝ ናዝሬት፤ኬእያባ ዱሱሜን ሹ እንካ ሶጵሳ ኩዬ ሁሉክ ሃምካ ቶኦካ ይሁኔንካ ውርካ ኣይሁድ፤ናሹጜ ዶራ ካኮመን፤ ¹⁷ ጋያ እሺ ወርቀትካ ውርካ ባሪዮ ኢሳይያስ፤ሹ እጝ ክያጄ ሃሳዋካ ወርቀት እጝ ጌያ ኦይ ሺጜ እያጜ ቶኮጝ፤ ^{18 19} 18 ኡሲካ ታቺ እጝ ኣንኬ ኣን፤ካሜይሼ ውር ጊታይ ካቡርቂ ክያጃ ሹቃዬ እሺ ጲሻ ኣን ናንዳካ ጊታይ ቁሜን ቡሌን፤ናንዳካ ውር ጊታይ ሃሳውሺኔ ካቶዬኔ ካኬራፔኔ፤ናንዳካ ጊታይ ጋሊህ ኣርና ቡሌን። 19 ቦንካ ታቺ እጝ የናሺቶጝ ኡቹኬን ይዕሲያና። ²⁰ ጩዋ ወርቀት እጝ ዋሼ ኣይ ውሬ ኡፓ፤ጊታይ ኣን ቶኦካ ይሁኔን ክያኑጝ ፓይላ ሁቤኔ ጋን እሺ ቶዬን። ²¹ እሺዳ ሺጝ ይጝ ዬዋይቴ ኬናቡ ጉዩጝ ክያጃካ ወርቀቱጝ ሹጝ ሙኔና። ²² ፓይላ ናንዳካ እሺ ሃሻው ኬሹቃ፤ፕር ኬቶግ ጊዬይ ክያጃካ ኣይኔን ኣኔ ቱሌኑጝ ጋን ቡርቃድዬን «ይጝ ማር ውዋካ ዮሴፍኔኒ?ሺጝ እያይ። ²³ እሺዳ ኤምኑ ካዴሻዮ ባይሺሻ እን ኤምኑ፤ኦጊታይ የኣሽክዬ ቅፍርናሆሜ ሃዋይቶጝ ፕር ሻምባ ኦካ ከተማ ኑኑ፤ሄክንሶ እጝ ሺጜ እያይ ኬካይስቴ ቃጊማጝ ኣኔኬኒ»ዋይሼ እጊን እያይ። ²⁴ ፕር ዋይሼ እንጊን ሃዋይሼ እየው ኣኩሉክ፤ውርካ ባሪዮ ኬፔን እጝ ጌጳድዮጝ ሪጊሼንኬን። ²⁵ ዬ ኣይባ እያይዳዬ ሃዋይሼባ እየው ኣኩሉክ ፎላ ኬቦን ጂያን ሃጌ ኬትጌሽ ላ ካሽ ቁዋቃ እን ኣኔን ዳሉጝ ክያኒ ፓይላ ኬቦንካ ኤልያስ፤ሚሽ ጁዋኑ ኣንኬ እስራኤል፤ ²⁶ ኤልያስ ኬኦካ ጫቃን ካጊታይ ካኒ ይዕሲሼኬን ክየምጵንዳ፤ዬ ኣይባ እያይዳዬ ሚሽ ይዕሲሼ ፔንካ ሲዶራ ሃምካ ሳራፕታጝ፤ ²⁷ ኬቦንካ ውርካ ባሪዮ ኤልሳዕ ኬኦካ እስራኤል ኣና ውርካ ቡርቂ ጁዋኑ፤ዬ ኣይባ እያይኔ ኬውርካ ሶሪያ ካንዕማን እንቃ ኬኦካ ጫቃን ጊዬይ ውር ክዬምጵንዳ ካኒ ጌይኬን ጫንቃል። ²⁸ ውር ጊታይ ኣኔን ኦካ ቶኦካ ይሁኔን ፓይላ ሹ እጝ ዋዮጝ ኬማኒት ጎሬና፤ ²⁹ ናሹጝ ኬኦይን ቆቤዬ ኬከተማ እጝ ቡላ ቆሮርይ ክያኒ ፓቅሼን ኬኦካ ከተማ እጝ ቦሼ ኦካ ጉርባ ዴግ እጝ። ³⁰ ዬ እሺ ኬኦካ ጫቃን ጊዬይ ፓልሲዬ ኩያ። ³¹ ኢየሱስ ባይሺሻ ውርካ ጮዩ 31 ጩዋ ኬከተማ እጝ ጌዬን ኬሃምካ ጎብሼን ካገሊላ ጎብሼያ እያጝካ ቅፍርናሆም፤ጩዋ ኬሹ እጝካ ሶጵሳ ካርሲያ ዛርሲ እርርሲዬን። ³² እጝ ክያጆጝ ናንዳካጝ ኣዬ ኬጌጳሞጝ ኬእርርሲዬን ኔኒ ጎሺያ። ³³ ኬኦካ ቶኦካ ይሁኔን ኣና ውር ኬና ኡሲ ካቤሮ ጋራ ጎሜ እሺዳ ኡቹክ ኬናቅዲ ኬና ኣይዴጌ፤ ³⁴ ሃይ/ይጝካ ናዝሬት ኢየሱስ ዮ ኣና ክያጃ ኬና ኬሻሜ ኣን እያን?ዬኩና ካኣን ካይሲዬኒ?እን እያይ የኣዮጝ ሃእባጅያ እን፤እን የኣይ ውዋካ ባሪዮ/»ሺጝ እያይ። ³⁵ ኢየሱስዳ ሺጝ ኡፍ ሹይዬ ቱልባ ኬኦካ ውሩጝ ሺጝ እያይኔ ጎሪያ፤ቤሮ እንዳ ፋቅ ውር እጝ ኬኦካ ሌሜን ካውሬ ቦሼኬን እሺ ክያጃ ጋራዳዬ ኦቼዬ ኩያ። ³⁶ ውር ፓይላ ቡርቃድያ፤ኣይባ እያይኔ እርርሲኔኑጝ ሃኦ?ኬጌጳሞዬ ኬቁዋቅትዬ ኤርግትባ ኡሲካ ቤሮ እጝ ጮይሼ ጆሉጝ እንግንዳ ቱልባ፤ሺጝ እያይኔ ሃሳወና። ³⁷ ጎሺ ኔንዳ ቱላ ኦካ ጶሮክ ጊታይ ኣኔን ኦካ ክራ እጝ። ³⁸ ኬኦይ ጩዋ ቱልኬ ኦይካ ቶኦካ ይሁኔኔ ኩዬ ሁሉካ ሃምካ ቶኦካ ሲሞን፤ኣፕኔ ካሲሞን ኡፍኬ ቄጭቲካ ሩዋ ታቺ፤ናንዳካ እሺ ይወና ኢየሱስ። ³⁹ ሁሉክ ሃምን ኔኒዬ ጎሪያ ቄጪቲካ ሩዋ፤ቄጪቲካ ሩዋዳ ኦቼያ ይሪካ ናሹጜ ቾቺንሺያ እንግን። ⁴⁰ ሌይ ሃም ሹሽካዴቆጝ ውር ዋና ዋና ጊታኬና ቡርቂ ጎሜ ፓይላ ቦሼያ እሺ፤እሺዳ ኣይሼ ኦካ እንግን ክየም ክየም ቡዋዌ ባይሺሻ። ⁴¹ ቤሮዳ ፕር ሺጝ እን የኣይ ውዋካ ባሪዮይ ሺጝ እያይኔ ኡቹኬ ቱላ ኬኦካ ውር ጁዋኑ፤እሺዳ ጎሪያ እንግን፤ኣዬ ክርስቶሱጝ ናንዳካጝ ጊባጆጝ ውር ክየምጵንዳ ካክያጆጝ ካኒ ናሺኬን። ⁴² ሃሪሾጝ ኢየሱስ ኩያ ሃምካ ውር ክየም ሃምካ ውርካ ገሊላጝ ዛርሲዳ ኣን እሺ ዎሼን፤ፓዬና ኦይሺ ኣኖጝ ካቱላካሜ ኬኦጊዬይ ታማ ሃርጌን። ⁴³ የእሺ ሺጝ ሃኩይ ከተማ እንቃዬ ጌጳሞካ ባሪዮ ኪያጃ ሹቃ ክሊዬን ሁሉኩሼ ኣምባ ይዕሲዬ ኣን ሃናንዳካ ክያጃ ሺጜ እያይ። ⁴⁴ ካርሲያ ኦካ ቶኦካ ይሁኔን ኪሊኔን።