ሃፑክ 23 ¹ ጊታይ ፑጪ ኦይን ፓይላ ናሹጜ ቦሼያ ኢየሱስ ሃምካ ጲላጦስ፤ ² ሺጝ እያጜ ካርሲያ ካሲሲዬን፤ ውሩጝ ጊያሚሺሻ ዛርሲ ጉዋዩ፤ ካቡልሼ ቄሳር ጊቢሪያጝ ሃርጊኔዬ፤ ፕር ሺጝ ኣን ሃኣይ ክርስቶስ ቢቲዬ ሃጌያያ። ³ ጲላጦስዻ ሺጝ የኣይ ቢቲካ ኣይሁዲ? ሺጝ እያይኔ ኣንሼና። ኢየሱስዻ ሺጝ ኬእያይ የሺጞጝ። ⁴ ጲላጦስዻ ዋይሽ ታታቻንካ ቢታኔ ዛርሲዬ «ኣን ኦካ ውሩጝ ሴሶ ክየምጵንዻ ኬና ሃጌዬ ኣኔኬን። ⁵ ዬ እንግን ሺጝ ውሩጝ ካርሲኬ ገሊላዬ ሌይ ኦጝካ ውርካ ይሁዳዻ ሺዽኬኔ ፑኡሺያ ሺጝ እያይኔ ቁዋቅቲሼ ሃሳዋ። ⁶ ጴላጦስ ዋዬ እጝ ኣዬ ውርካ ገሊላጝ ኣንሼና ካእባጄን፤ ⁷ ኢየሱስ ኩኔኬ ሃምካ ውርካ ሄሮድስ ሹ እጝ እባጆጝ፤ ሄሮድስ ኬክያጝካ ሹ እጝ ናንዳካጝ ኣኒኔ ኢየሩሳሌሙጝ ይዕሲሼያ ሃም ኔኑጝ። ⁸ ሄሮድስዻ ሹ ጁዋኑ ናንዳካጝ ዎሼ ኢየሱስ ጌዬኑጝ፤ ሹ እን ጌዮጝ ካሎን ዋዝንዽያ፤ ክያጃ ኔኒ ናንዳካጝ ዋዮጝ፤ ኣሽኪ ኦኬ ሹቃያጝ ጌዬን ኣኔን ቃቢዬን። ⁹ ኣንሻ እሺ ክያጃ ጁዋኑዻ፤ ዬ እሺ ክየምጵንዻ ካኒ ዋሽኬን። ¹⁰ ታታቻንካ ቢቲዬ ውር ጊታይ ቶክኔ ጆል ወርቀቴ ጎር ኦይኔ ጋኔን እሺ ሴሶ ክያኒ ዋሼን። ¹¹ ሄሮድስዻ ጋይኬ ፓፃኗኔ ቦውያ፤ ጎልቲያዻ፤ ኪሚሼ ኣፓላካ ጌጳሞዻዬ ዋሼ ይዕሲሼያ ሃምካ ጲላጦስ። ¹² ሄሮድሴ ጲላጦሴ ኬሹ እጝ ናሺያ ጋጝ፤ ዬ እባኬሌሜን ኦካ ጫቃን ጊዬይ ኣኔ ጎሬን። ¹³ ጲላጦስዻ ፑኡሺ ታታቻንካ ውርካ ቃሼ፤ ታታቺካ ፔኔ ዛርሲዬ ክየምጵኔ፤ ¹⁴ ዋይሼ እንግን እያጝ፤ ውሩጝ የሺጛ ቲቲሼያ ዛርሲ ሃምካ ሴሶዬ የቦፓይንቴያይ ዮጝ ናኑጝ፤ ኣንዻ ከኦካ ሌሜን ጉዩ ሃቃብዬ ከኦካ ካሲሲኔን እን የቦፓይንቴ ሴሶ ክየምጵንዻ ሃካና ጌይኬን። ¹⁵ ፕር ሄሮድስ ማሬ ኦኬ ክየምጵንዻ ጌዬን ዋሼያ ዮጝ ጉዋዩጝ፤ ከእያጝ የቶይቶጝ ውሩጝ ካሄክሼ ሃምካ ኣርሼን ኦኬ ክየምጵንዻ ካኒ ሙንኬን፤ ¹⁶ ዬ ሃጋልንሺያ ሃቡልባ። ¹⁷ እጝ ሺጜ እያይ ኬቶንቶሮ ውርካ ቁሜን ክየም ኬጊዲ ካቡልሼ እንግን ሃናንዳካጝ ዎሺሾጝ። ¹⁸ ዛርሲዻ ፓይላ ኬጋጝ ጎር ሹኑኬ ሺጜን ውሩጝ ቡሊቴ ዮጝ ቡልቴ ኦዋው ባርባን ሺጝ እያይኔ ጋኔን ኡቹኬን፤ ¹⁹ ባርባንዻ ኬከተማ ቱዎጝ ሃኬና ቲቲሼ ዛርሲ ሃምካ ሴሶዬ ሃውር ኬና ኒሺኒ ውሬ ቁሜ። ²⁰ ጲላጦስዻ ናንዳካጝ ዎሼ ኢየሱስ ቡሌኑጝ ፕር ሜይሼያ እንግን እንቃ፤ ²¹ ዬ እንግን ሺጜን ሮይባ ሮይባዬ ጋኔን ኡቹኬን። ²² ጲላጦስዻ ኬክያጝካ እንካ ማክንሳጝ ሺጝ ናንዳካ ኦ? ውሩጝ ሴሶ ኬና ኣሽክዬ ኣኔይ? እንካ ሄክሺሽ ሃምካ ኣርሼን ሴሶ ክየምጵንዻ ኣን ሃካና ጌይኬን፤ ዋይሼ እንግን ሃጋልንሺያ ቡልባ። ²³ እንግንዻ ሻም ናቂዲ ጊዬይ ዼጌ ካሮዮጝ ካሎን ይወና፤ ኡቹካ ጊዬይዻ ጁዋንቲሻ። ²⁴ ዬ እን ጋንሺኔ ካሙኖጝ ጲላጦስ ክያጃ ቱሚዬን ኔኒ። ²⁵ ጊታይ ቲቲሼ ዛርሲ ሴሶ ክያኒዬ ኒሺ ውሬ ቁሜ ኣኖጝ፤ ካቡልሼ እንግን ፓዬ ይሁኖጝ ቡልሼ እንግን ሃውር እንካም፤ ዬናንዳካጝ ዎሼ ኢየሱሱጝ እያይ ካሻሞጝ ሳስክዬ ኣያ እንግን። ²⁶ ጎሜ ኢየሱሴ ቦፓዮጝ ጌይ ውር ኬና ሺጜ ስምዖን ውርካ ቀሬና ኩንኬ ጶሮክ ጊታይ ኣኔን ኬኦካ ከተማ ዹኬ፤ ጌዬ ዼትሽ ሻሪ እንካ ሮይኔን ካዻዬ ኢየሱሴ ካካምባዬ ሻማ እሺ ጊዲጊዲ። ²⁷ ዛርሲ ጁዋኑዬ ሃኣጚ ጊታኬና ዻሼን ቋቁም ጊዬይዬ ኣኔን ኦቆርኔን ጋን ኬውር ጊዬይ ዻዬን። ²⁸ ዬ ኢየሱስ ሁቤን ሃምን ጊዬይዬ ዋይሼ እንግን እያጝ፤ እየው ሃኣጚ ጊታጝካ ኢየሩሳሌም ኦቆርቴ እየው ኤታጋኔ ሃንታ ጉዩዬ ዬ ኦይድ ናንዳካ ኣን ኦቆርቴን፤ ²⁹ እየዎ፤ ሴኳኔ ፒሲ ጊታይ ማሪ ጅሺኔኔ፤ ጊታይ ማሪ ሁቴ ጊዬይ ኡዋኔን ጋይ ጫንቃን ሹ እን ኬኣሁሺንቴ ኩንባዬ። ³⁰ ኬሹ እጝ ሺጝባ «ጋግ ቡድሼያ ኡዋው ጉርባዻ ራሼና ናንዳካ ኡዋው»። ³¹ ኣኪ ኬሻሪ ቁላ ሻማ እያጝያጝ፤ ኬቁዋቃካ ካሻም ኦ?» ³² ውርካ ሴሶ እንቃዻ ካኒሼ ኬጋጝ ጎሜ ቦፓይኔያ። ³³ ሹ እጝ ሄክሼ ፔን እን ሺጜ ቀራኒዮ ሮያ። ጊታይ ካሴሶዳ ክየም ሻሚሼ ቡዎን ኑዋ ሻሚሼ ዋርካታዬ ሮያ። ³⁴ ኢየሱስዻ ሺጝ ባባዮ፤ ጊታጝ ሻሚ እያጝ ጊባጅኬኔ ጊያ ሺዕሺሼ እንግንባ። እንግን ሃዽሽ ኣፓላዬ ካሺሜና። ³⁵ ዛርሲዻ ኣኔን ጎሬ ቶዬን። ውር ታታቻን ካፔንዻ ሺጝ« ባይሺሽባ ዶክ ይንዳ ሃክርስቶስ እጝ ጊድዬ ኬኦካ ባሪዮያጝ ካባይሺሽ እሺ ኤምኑ፤ ሺጝ እያይኔ ጋኔን ኦልቲዬን። ³⁶ ፓፃኗንዻ ፓዬኔ ጋኔን ኦልቲዬን፤ ጋይ ኣላላካ ካርቡካ ሻሪዬ፤ ³⁷ ሺጜን፣ ዬኣይ ቢቲካ ኣይሁድያጝ ባይሺሽባ እን ኤምኑ። ³⁸ ኬኦካ ሹቦ ኔኒ ዾዮክዻ ኣና ኦኬና ቶኬ ሺጜ ይጛ ቢቲካ ኣይሁድ። ³⁹ ኬኦካ ጊታይካ ሴሶ ሮዮጝ ክየም ሃሳው ሃሳዋካ ይሪኔኔ ሺጝ እን የማር ክርስቶሴን ሺጜን ይንዳ ባይሺሽየ እን ኤምኑዬ ኡዋዌ። ⁴⁰ ዬእንካ ሴሶ ኑዋ ሺጝ እያጜ ጎሪያ እሺ፤ የኣኔንባ ኦካ ኮምሼን ክየሜ፤ እን የሪግሼንኬን ባሪዮ? ⁴¹ ኡዋው ናንዳካ ኦይን ሃኣሽኪቶጝ ጋሎ ጌዬን ናንዳካጝ ኣኖጝ፤ ሃኣኒና ኦካ ኮሚሼንካ ኣኩሉክ፤ ዬ ውሩጝ ክያጃ ጋራ ክየምጵንዻ ካኒ ኣሽኪኬን። ⁴² ፕር ሺጝ ኢየሱስ ዮ፤ ሹካጝ የኩኔኬ ጌጳሞጝ ቃብያንባ። ⁴³ ኢየሱስዻ ሺጝ ሃዋይሼባ እን ኣኩሉክ ሹጝ ኬኣን የኡፊፓ ሃም ኣይ ሺሙጝ። ⁴⁴ ሹሽዻ ሃሳዓት ላ፤ ሌይ ሃምካ ሄክሼ ሳዓት ሳሉጝ ዳሉጝ ክያኒ ማቲያ ሚክር፤ ⁴⁵ ሜሌል ኣዬንካ ሹሽ ሃርጌያዬ ናዻራካ ኣፓላካ ቶኦካ ይሁኔን ሃዽሼኔ ካሺሜና ክያጝ ዻ። ⁴⁶ ኢየሱስዳ ኡቹክ ኬናቂዲ ታቺዬ ሺጝ ባባዮ ኡሱጝ ናኑጝ ሃኣይያ ቡዋ ኑኑ/ ሺጜ እያይ ኣርሻ። ⁴⁷ ታቺ እንካ ውር ዽባን ጌዬ ዳቢ እጝ ሙኔን፤ ሺጝ ውሩጝ ኬኣኩሉክ ሃጫንቃሌ ጌጳሲያ ባሪዮ። ⁴⁸ ውር ጊታይ ኣኔን ኦካ ክራ እጝ ፓይላ እን ሙኔን ቶዬን ፑኡሽሜኔ ሹ እጝ ጌዮጝ ዻሽ ቋቁም ጊዬይዬ ዋካ። ⁴⁹ ኣይባዬ ጊታይ እባጂ ኢየሱስ ኬድያው ፓይላ ፕር ካርሲ ከገሊላዬ ሃኣጚ ጊታይ ዻዮክ ቶዬን እጜ ጎራ ኬዱክ ⁵⁰ ከታታቻንካ ኣይሁድ ኣና ውር ክየም ኬና ኣይ ሹቃዬ ኣይ ጫንቃል ኬና ሺጜ ዮሴፍ። ⁵¹ ውር እንዻ ኬኪሊማ እንካ ካራሜ ኣሽክዬን ኔኒዬ ካኒ ዎሩሜንኬን። እሺዻ ኣዬ ውርካ ከተማካ ኣይሁድ እጝ ሺጜ ኣርማቲያስ ኩኔንካ ጌጳሞካ ባሪዮ ኣኔን ካሊዬን። ⁵² ውሩጝዻ ኩይ ሃምካ ጲላጦሴ ይወና ሩዋካ ኢየሱስ፤ ⁵³ ሹ እጝ ጋዬ እሹጝ፤ ሃቺሺ ሩዋ ኔኒዬ ሳርኬ ኣፓላዬ ኣጁጛ ኦካ ሌሲ እጝ ቆዴ ባይ ክያንዬ ካኒ ማሬ ውር ቱቱኬን። ⁵⁴ ሹ እንዻ ሃሹካ ሼክዬን፤ ሹእንካ ሶጵሳ ኣን ሄክሴን። ⁵⁵ ካርሲኬ ገሊላዬ ሃኣጚ ጊታይ ፓዬን ከኢየሱሱጝ ዻዬ ፓዬ ቶያ ቱቱኬን ኔኒ፤ ሻም እያን ጋጁጜ ሩዋ ኔኑጝ ቶያ። ⁵⁶ ጩዋ ዋኬ ጋሽክያ ጋሙሬዬ ቦዽዬ፤ ከክያጃ እጝ ክያጆጝ ከሹ እንካ ሶጵሳ ቦዋ ኡሲ።