ሃፑክ 1 ሁሉኩሼን ¹ ኬጫቃን ጉዋዩ ክያጃ ጊታይ ሙኔን ጁዋናን ክያጃ ጊታይ ጊባጆጝ ቶኬ ጌዬምባ። ² ክያጃ እንዻ ናሹጝ ኬሌሜኔ ውር ጊታይ ኣይ ማኝ ካካሪቡዬ ውር ጊታይ ክያጆል ክያጃዬ ጊታይ ኣኖጝ ሓጊታይ ክያጆጝ። ³ ታቹጝ ቴዎፊሎስ ዮ፤ኣንዳ ኬታጝ ናኑጝ ኦኬ ፓይላ ኬኣሽክዬኔ ኬኣጅሼኔ ሃቃቢዮጝ ጩዋ ክያጃ ዳዬ ኣዬን ኔኒዬ ካቶክሼ እን ማቲ ሹቃዬ ሃጌያያ። ⁴ ይንዳ ሃኣሽክዮጝ ኦይን ዬእርርዮጝ ኣዬ ኣኩሉክ ኬእባጅዬ ጊያ። ⁵ ኬታቺካ ይሁዳ ኬቦንካ ሄሮድስ ኬኦካ ውርካ ኣብያ ኣና ውር ክዬም ኬና ሺጜ ዛካርያስ ኝያ ኔኒ ኤልሳብጥ ኣንኬ ውርካ ኣሮን። ⁶ እንግን ዳዋን ኬክያጃካ ባሪዮዬ ክሊማዬ ፓይላ ዳዬዬ ሃንታዳ ጋኔኬኔ ቆባ ኬሌሜንካ ባሪዮ ጋይጫንቃሌ። ⁷ ኣይባ እያይዳዬ ኤልሳቤጥ ኬጌቺንታ ኔኒ ሃንታዳ ኣኔኬን፤እንጊን ዳዋን ጋይ ውር ጊታኬና ኬቦን ጊዬይ ጌቺ። ⁸ ሹ ክዬም ዛካርያስ ሹካ ዋድማ ኔኒ ሄክሾጝ ኬኦካ ሌሜንካ ባሪዮ ሃታቺካ ፔን። ⁹ ኬሊኪ ኬታቻሞ ኔኒ ኩዬ ሁሉክ ሃምካ ቶኦካ ባሪዮዬ ናንዳካ እርርኔን ሻም ቁኛዬ ሄክሻ እሺ። ¹⁰ ሹ እጝ ሹካ እርሮ ኔኒ ሄክሾጝ ዛርስ ፓይላ ጎር ሹኑኬ ይዌና። ¹¹ ውርካ ኤርጎካ ባሪዮ ዶራ ኦካ ቁኛ ቡዋ ቡዎኔ ጌያ። ¹² ዛካርያስዳ ሹ እጝ ጌዮጝ ቴርጋድዬ ሪግሼና። ¹³ ውርካ ኤርጎ ዋይሼ እሺ ዛካርያስ ዮ፤ኦይ ሪግሺኔን ይሁኔን ኑኑ ዋያ ኝያ ኑኑ ኤልሳቤጥ ጅሽባ ሃንታካ ጁሙ ሮጝ ኔኒ ዬሺጚ ዮሓንስ። ¹⁴ ኬእሺ ባሊዬ ዋዛዬ ሄጌይባ፤ውር ጁዋንዳ ናንዳካጝ ጂሼ እሹጝ ዋዝንሲ እንግንባ። ¹⁵ ኦካ ሌሜንካ ባሪዮ ማቲባ ታቺ ኣይን ኣላላጝ ኣይን ኦዕንቃ ጊታይ ጮይሼ ጆሉጝ ፓይላ ማትኬን ካኒ ኣንባ ኦካ ክያጝካ ጁዋኔዬ ቆቅሼያ ኡሲካ ባሪዮ። ¹⁶ ኬኦካ ውርካ እስራኤል ጁዋናን ዋሼባ ሃምካ ታቺ እጝ ሃምካ ባሪዮጝ። ¹⁷ ሻንካ ሹቡጋን ሃምካ ሃንታን፤ጊታይ ማሪ ኤርጎ ቦዌን ካዋሼ ሃምካ ጫንቃሌ፤ካኣሽክሼ ውር ጊታኬና ካሻው ሃምካ ባሪዮዬ ኬኡሲካ ኤልያሴ ቁዋቅትዬ ኬሌሜንካ ታቺ እጝ ኩይባ። ¹⁸ ዛካርያስ ዋይሼ ውርካ ኤርጎካ ባሪዮ ይጝ ኣን ሃእባጅኬ ኦ ኣን ሃኣይ ጌቾ ኝያ ናንዳ ኬቦን ኔኒ ጌቺያ ሺጝ እያይ። ¹⁹ ውርካ ኤርጎካ ባሪዮ ዋሼ ዋይሼ እሺ ኣን ይጝ ዶሪ ኦካ ሌሜንካ ባሪዮ ሃዓይ ጌብሬኤል ይጝ ሹቃጝ ካሜይሼ እን ይዕስያ ኣን። ²⁰ እዮዎ ናንዳካጝ ዬማሬ ክያጃ ናኒ ዋዬኑጝ ካሊ ሹ ኔኒ ሌይ ሃምካ ሙኒኖጝ ዬማቲ ዱድዬ ዬካሊባ ዬቻሊኬን ውር ክዬምጵንድ ሜይሼን። ²¹ ዛርሳዳ ናንዳካጝ ዛካርያስ ኡሽሼ ቶኦክያኑጝ ካሪሲያ ጉንዱምኔን። ²² ጩዋ ቱሎጝ ካኒ ዎሽኬን እንግን ሜይሼን ኦጊታይ ውርካ ኤርጎካ ባሪዮ ክያጆጝ ናንዳካጝ ኮሜን ማሬ እባጄኑጝ ሺጝ ጌይ ውርካ ኤርጎካ ባሪዮዬ ጊያ። ²³ ዛካርያስዳ ሹካ ዋድማ ኔኒ ጃክኖጝ ዋኬ ኩያ ሃምካ ቶኦኔኑጝ። ²⁴ ኬኦይን ጩዋ ኝያ ኔኒ ኤልሳቤጥ ኡሩካ፤ኬክያጝካ ትጌሽ ቾን ዲካ እሺ ኤምኑ። ²⁵ እሺዳ ሺጝ ታቹጝ ናኑጝ ኬሹቃቲ፤ኬሴካሞ ናኒ ኬኦካ ጫቃን ካውር ካቡሌ ኣን ጌዬ ጋንኬ ሹጝ ኣሽክሼያ ኣን ይጝ። ²⁶ ኬትጌሽ እጝካ ላይሳ ባሪዮ ይዕሲያ ውርካ ኤርጎ ኔኒ ኦካ ፔን እጝ ጌዬን ኬጌልላ ሃምካ ካታማካ ናዝሬት። ²⁷ ይዕሲሼ ሃምካ ውርካ ዳዊት ኬና ሺጜ ዮሴፍ፤ናንዳካ ሃራኔኒ ዻጵ እጝ ዻጵ እጝ ሮጝ ኔኒ ሺጝ ማሪያም። ²⁸ ውር ካኤርጎ ሁሉክ ሃምኔኒዬ ፤ሺጝ ይጝ ካሎን ናሺዮጝ ሹቃ ካኣይሼ እን፤ባሪዮ ኣንኬ እን ፤እን ዬኣይኬና ጉዋኔ ዋይሼ እሺ። ²⁹ ማሪያምዳ ናንዳካ ሃሳዋ እጝ ቴርጋድዬ ሺጝ፤ይጝ እሻ ሃጌሶካ ኦ ሺጝ እያይኔ ካርሲያ ክያጃ ጊታይ ቃብዬን። ³⁰ ውርካ ኤርጎ ዋይሼ እሺ ማሪያም ዮ ኬኦካ ባሪዮ ዬጌያ ኦኬ ታቺ፤ኦይሪግሺኔን፤ ³¹ እዮዎ ዬኡሩኩባ ዬጅሺባ ሃንታካ ጁሙ ሮጝ ኔንዳ ዬሺጚ ኢየሱስ፤ ³² እሽዳ ማቲባ ታቺ ሺጝባ ውዋካ ባሪዮ ታቺ እጝ፤ባሪዮ ኣምላክዳ ኣይባ እሺ ጌጳሞ እጝካ ሹኔ ኔኒ ዳዊት። ³³ ኦካ ቶኦካ ያዕቆብ ጌጳድባ ኬጌጳሞ ኔኒ ቱኒሲ ኣኔኬን። ³⁴ ማሪያምዳ ዋይሼ ውርካ ኤርጎካ ባሪዮ ኣን ናንዳካጝ ሃማሬ ጁሙ ጌዬኑጝ ይጝ ኣይ እያን እያይ፤ ³⁵ ውርካ ኤርጎካ ባሪዮ ዋሼ ዋይሼ እሺ ኡሲካ ባሪዮ ኩንባ ኦኑኑ ቁዋቅቲካ ውዋካ ታቺ እጝ ይሁሼን እምባ፤ዬውዋ እጝ ዬሺጌ ጂሼን ሺጝ ውዋካ ባሪዮ። ³⁶ እዮዎ ኤዳ ኑኑ ኤልሳቤጥ ኬጌቺንታ ኔኒ ኡሩካ ሃንታካ ጁሙ ኬኡሩኬን ኔኒ ማቲያ ትጌሽ ላ። ³⁷ ኦኬ ኬና ካካው ባሪዮ ኣኔኬኔ፤ ³⁸ ኣን ሃኣይ ውርካ ባሪዮ ኬክያጃ ኑኑ ካማቲሼባ ኣን ሽጝ እያይ፤ጩዋ ውርካ ኤርጎካ ባሪዮ ቱሌ ኩያ። ³⁹ ማሪያምዳ ኬክያጝካ ሹ እጝ ናሹጝ ይሪካዬ ኩያ ሃምካ ፔን እጝ ኣይ ባሪጊን፤ፔን ክዬም ሃምካ ፔንካ ይሁዳጝ። ⁴⁰ ኩዬ ሁሉክ ሃምካ ቶኦካ ዛካሪያሴ ዋይሼ ኤልሳቤጥ ሃሹቃይ፤ ⁴¹ ኤልሳቤጥዳ ሹ እጝ ዋዬ ጌሶካ ማሪያም ውዋ ኣሼ ንኬ ኦካ ፒሲዬ ሁሉካ ኦካ ኤልሳቤጥ። ⁴² ሻም ናቂዲ ኔኒ ዴጌ ሺጝ እንኬ ኦካ ጫቃንካ ሃኣጚ ዬኣይኬና ጉዋኔ ጫላ እጝካ ፒሲ ኑኑጝ ሃኬና ጉዋኔ ። ⁴³ ኣይባ እያይዳዬ ጁዋኔካ ታቹጝ ናኑጝ ካኩዋዌ ኦናኒ ሃኣይ ኒኔ ። ⁴⁴ እዮዎ ናቂዲ ካጌሶ ኑኑ ሁሉኬ ናቡ ናኒ ክያኑጝ ጫላ እጝ ኣን ፒሲ ናኒ ክያኑጝ ኬዋዛ ኣሼና። ⁴⁵ ታቺ እጝ ሹዋጵሽባ ሽጝ እያይኔ ጊታይ ክያጆጝ ፤ጎሙጝ እሺ ሃዕን ጉዋኖጝ። ^{46 47} ይያሪካ ማሪያም V 46 ማሪያም ሺጝ ናፒሲ ናኒ ሻማ ባሪዮ ዴግ ዴግ፤ V 47 ኡሲ ናንዳ ኬዴሻ ናኒ ዋዝንድያ ኬባሪዮ፤ ⁴⁸ እሺዳ ጎቤንካ ውር ኔኒ ጌያ፤ካሪሲ ኬጋኔ ጅሼን ፓይላ ማቲሼባ ኣን ጫንቃል፤ ⁴⁹ እን ኣይ ሳጉጝ እሺኣሽክሼያ ኣን ኦኬ ታቺ፤ሮጝ ኔንዳ ሃኬና ይሁኔ። ⁵⁰ ጊታይ ሪጊሼን ሹቃ ኣዬን ኔኑጝ ቆባ ቦንኬቦን ። ⁵¹ ኬቡዋ ኔኒ ኣሺክያ ዋድማ ቁዋቃ፤ቃቦ ጊታይ ፑኡሺሜን ኦካ ሻን ጊዬዩጝ ላሊያ። ⁵² ታታቻን ኬ ኦካ ቆቤን ጊዬይ ጎብሽባ ዬጊታይ ኣይ ሌሞጝ ሻምባ ዴግዴግ፤ ⁵³ ጊታይ ካሽ ቃዎጝ ኬ ሹቃ ኣሚሽባ፤ዬጊታይ ኣይ ሆድሞጝ ይዕሲባ ማም እያይ። ⁵⁴ ሹቃቲ ኔኒ ጶቂሲዬን ኬሊሺያ ውር ኔኒ ካእስራኤል። ⁵⁵ ይጝ ኬ እንዳያይ ሜይሼ ሹቡጌን ጊዬዩጝ ናንዳካ ኣብራሜ ኤዳ ኔኒዬ እጝ ኣኖጝ ቦንኬቦን ሃዕንካ ዳዮጝ። ⁵⁶ ጩዋ ማሪያም ኡፔ ኦካ ኤልሳቤጥ ቲጌሽ ጂያን ዋኬ ኩያ ሃምካ ቶኦ ኔኑጝ። ዮሓንስ እንካ ዱቅኔን ጅሼን ኔኒ ⁵⁷ ኤልሳቤጥዳ ሹካ ጅሼን ኔኒ ዬክሾጝ ጅሻ ሃንታካ ጁሙ። ⁵⁸ ውርካ ጉል ኔኒዬ ኤዳ ኔኒዬ ሽጝ ባሪዮ ኣሽክሼያ እሺ ክያጃ ሹቃ፤ዬማቲያ ውር ጊታኬና ዋዝንድኬ ጋግ። ⁵⁹ ኬሹ እጝካ ሎንካይሳ ፓያ ውዋ ቆሪሼን ፤ዎሽ ውዋ ኬ ሮጝካ ሹኔ ዛካርያስ ሽዌን። ⁶⁰ ጁዋኔ ሺጝ ኣይኬን እያይ፤ሺጚ ዮሓንስ። ⁶¹ እንግዳ ኤዳን ኔኒ ሺጝ ውር ክዬምጵንዳ ኬና ካሽው ኬሮጝ እጝ ኣኔኬን፤ ⁶² ሹኔ ኔኒ ሺጝ ዬጋን እንግን ካሽው ኬ ሮጝካ ኦ ሺጝ እያይኔ ኣንሼና ይዕሲ ውሬ። ⁶³ እሺዳ ኣንሼን ኦካ ሮጝ ቶኬኔ ሺጝ ሮጝ ኔኒ ሃዮሓንሴ ቶካ። ⁶⁴ ይሪካ ቶግ ኔኒ ቡሌኔ ቆሩጝ ኔንዳ ቦዎኔ ጌጳሲ ባሪዮዬ ካርሲያ ሃሳውኔን፤ ⁶⁵ ውርካ ጉል ጊዬይ ፓይላ ቆቁሽ ሪግዬ ፤ክያጃ ጊታይ ፓይላ ዳዬዬ ሜይሼያ ውርካ ይሁዳ። ⁶⁶ ጊታይ ዋይ እጝ ፓይላ፤ ሽግ ይጝ ውዋጝ ካሙኒቴ ኦ ሺጝ እያይኔ ክያጃ እጝ ቃቢያ ኬሻን፤ቡዋካ ባሪዮ ኣኩሉክ ኣንኬ እሺ። ⁶⁷ ሹኔ ካውዋ ቆቁሼ ኡሲ ካባሪዮዬ ሺጝ እያጜ ሃሳዋ ሃሳዋ፤ ⁶⁸ ታቹጝ ካእስራኤ ኣምላክ ሮጝ ኑኑ ካጌጳዲባ፤ኩኔ ቶያ ዛርሲዬ፤ ⁶⁹ ቶኦካ ውር ኔኒ ዳዊት ኬሼይ ሹቃ ቲቴያ፤ ⁷⁰ ይጝ ኬኦባጝ ሃሳዌ ኬ ቶግካ ውርካ ባሪዮያን፤ ⁷¹ ባይሼን ኔኒ ሃኬ ቡዋካ ጋል ጉዋዩዬ፤ውርካ ጎሬን ጉዋይዬ፤ ⁷² ይጝ ኣሽክዮጝ ካዱዋሊሼ ሹቡጌን ጉዋዩ ክያጃ ሹቃዬ ካጶቂሲ ክያጃካ ይሁኔኔ። ⁷³ ናንዳካ ሹቡጌን ጉዋዩ ኣብራሃም ሹ ጮል ቃቢባ። ⁷⁴ ካቡል ኡዋው ኬኦካ ቡዋካ ጋሌ፤ሪጊዳ ኣኔኬኔ ካኣሽክሼባዬ። ⁷⁵ ኬቦን ፓይላ ኬይሁኔኔ ኬኦካ ሌሜንካ ጫንቃል ካሪብ ኡዋባዬ ጊያ። ⁷⁶ ይጝ ውዋጝ ጩዋ ዋይሼ ይጛ ውዋካ ባሪዮ፤ጉዋርካ ባሪዮ ኣሽክዬን ኬሌሜን ኩይባ። ⁷⁷ እጝ ናሹጝ ኬሺዕሺኔን ካሴሶ ጊዬዩጝ ካኣዬ ዛርሲ እባጄኔ፤ ⁷⁸ ኦኬ ሹቃ እጝ ናሹጝ ኬኦካ ባሪዮ ጉዋዩጝ፤ሹሽ ካሃሪሻካ ፎላ ቱልሼ ኡዋው። ⁷⁹ ይጝዳ ካላሉሼ ጊታይ ኣን ዲሙጉ ክያኒዬ፤ጊታይ ኣን ኦካ ሙዎልካ ኣርሼኔ፤ጃፍ ጊዬይ ካቦሼ ሃምካጉር ካዳቆዬ ጊያ። ⁸⁰ ውዋዳ ጌጲሼ ቁዋቅትሽ ኬኡስካ ባሪዮዬ፤ሌይ ሃምካ ማቲሼ ውርካ እስራኤል ኣኩሉክ ኡፓ ቦና ክያኒ።