¹ ጣይቭ ሁዳ ኧሳቭአተኘ ቁልፍ በከፈደንጋ አታአህረጋ ኧሳአት ግት አአህር፤ በሳቫይ እንእ አአር እንቁስ ባረ። ² ተህም ቀጥወ ብእግዜር ኢፍቲ ኢትሸኮዉታ ሳቭአት መላአይካ አሸሁ፤ሳቭአት መለከትቭ አዉዮም። ³ ኤኛቭ መላአይካ ኧወረቅ ኢጣን ግቭር ጠበጠ ማአታ ህትቭ ቢዪንኧኮዳ ሁዳምዬ ተሸከቨ፤ሁድቭ በዙፋን ሁዳ ኢፍቲ ባንዳ ተወርቅ አጣወሪ ህትቭ ቢዪንኧኮዳ ሁዳ ፎር ተቅዱሳን ጠሎት እንእ እማቲ ያቲኢንቭኩዳ ኖኦራ ኢጣን አዊ። ⁴ ኢጣንቭ ሁዳይ ተን ተቅዱሳንቭ ሁኖዋይ ጠሎት እማትሜ ተመላአይካ ሁዳይ ኧጅ እእግዜር ኤፐ ዋአ። ⁵ መላአይካቭ ሁዳ ኢጣን ግቭር ሁዳ ጠበጠታ ህትቭ ዪንኧኮዳ እሳድ ሁዳ ሜንአወታ አአፈሪ ኤፐ ኤረከን፤ኧወዠኸ ግምግም ይቭካ ቃር ቦዠቭ አአፈርቭ ኧቆርቁርት ኸረ። ⁶ ተህም ቀጥወ ሳቭአቸ መለከት ኧጠቦጩዋ ሳብአት መላአይካ ሁኖው መለከት ሁዳ ኢሮፎዋይ ቁጥቁጥ ቧርሙ። ⁷ አአወተራቸ መላአይካ መለከት ሁዳ ነፋ ፤ደቭቭ ኧትራኧረወ በረጀዪ እሳድቭ አአፈሪ ቃሸዊ ፤አአፈር ሶኦስተኘኋ ነተደ፤አአንታክርትቭ ኤኧቭ ሶኦስተኘኋ ነተደ፤ኧዝቨሰቨቭ ሳአር እንእ ነተደ ። ⁸ ኧዉርኤተኘቭ መላአይካ መለከት ሁዳ ነፋ፤ኑእ ቆቶ ኢቨስርካ አአር ብእሳድ ቲረድድ ኧቫሪ ኤፖሙ ቃሸዊ፤ ኧቫርቭ ሁዳ ሶኦስተኘኋ ደቭ ኸረ ተሽገረ። ⁹ በቫር ከስ ቲረቩርታቭ ነብስ ታነኖታ ፍጥረት ሶኦስተኘሁኖዋ ሞጁሙ፤ኧመርከብቭ ሁኖዋ ሶኦስተኘ ዎደሙም። ¹⁰ ኧሶኦስተኘቭ መላአይካ መለከት ሁዳ ነፋ ፤ኧዊኪረኸ ኢረድድካ ኑኡ ሆሆ በቩር እሃ ሶኦስተኘዪ እመኸቭ ብእሃ ሚንጭ ሶኦስተኘ ፎር ተሳቫይ ወንደ ወተኧዎም። ¹¹ ኧሆሆም ሁዳይ ሹቭ «ምራር» ዩዉሪ ባንደ ።እእሃቭ ሁዳ ሶኦስተኘኋ ኢቨርርካ አአር ኸረ ፤እሃቭ ሁዳ ተዉርርትኋ ኧትረሳ ኖኦራ ሰቭ ሞጁም። ¹² አርቭአተኘቭ መላአይካ መለከት ሁዳ ነፋ፤ዪዊዳ ብርሃን በሶኦስት ኧጅ ጠነቫ ኢኸረኸ፤ኡኡዋየ፥ ኧዳናአዪ ኧሆሆሙ ሶኦስተኘሁኖዋ ደነጒ፤ ኧዋአና ሶኦስተኘ ኧኧዳርቭ ሶኦስተኘ ብርሃን አያትረክቨኸ ሆንኧዪ። ¹³ ተህም ቀጥወ መኬኧ ባሁ፤በሳቫይ ግት አት እንጠረፎድ ኢቨርር ባንደ፤በሩእ ቃርቭ ፤«ኧተነፉዋ ሶኦስት መላአይካ መለከት ኢረፎዋይ ኧኸሬ ባአርዳ ፎር ኢረዉርታ ሁኖዋ ኦሁኖሁኖዋ! ኦሁኖሁኖዋ!ኦሆኖሁኖዋ!»ቲይካ ሰምአሁን።