¹ ተህም ቀትወ አት አዊ ተቫር ቲዋአካ አሸሁ፤ሁድ አስር ቀንቪ ሳቭአት ጉንኧርቭ ባነውነደ ፤በቀንሞኋ ፎር አስር ዘውድ በጉንኧርሞኋ ኧቂናቨ ሹው ባኖነደ። ² አአሸሁን አዊ ዛጎራ ኢቨስር ባነደ፤ኧግርኋ ጭን ድብ ዩሪዳ አዊ፣አፉሞኋ ኧዠፕ አፍ ኢቨስር ባነደ፤፤ ደረቫ ሁዳ ኧገግኋይ ጦና፣ገግሞኋ ኢቸናወዳ ዙፋንቪ ኑኡቭ ደረግ አአዊ ሁዳ አቨን። ³ ተአዊ ሁዳይ ጉንኧር አት ሁዳ ፣ኧውንድ ያሰርአካ መዛ አኖዳአር ኢቨስር ባነደ።ቢኸር መዛኋ ፈዘን፤አአለም ሰቭ እንእ ወግ ኸረወታ እአአዊ ሁዳ ተሄተረን። ⁴ አአዊ ሁዳ ደረግ አቨኒ ኧኸሬ ኧደረቫ ሁዳ ሰቭ ኧንእ ሰገደነ። ህመኸቭ « አዊ ሁዳ ኢቨስርካአር ማን አነ ? ተሁትሁ ማን ኢትዋካይ ኢኸነ ? » ቧርምታ ኧሁዳ ሰጎጅነ። ⁵ አዊቭ ሁዳ ኧትቢት ቃር ኢዝሬኩወዳ ቃርቪ ያትቃንወዳቭ አነቨድ አዊ፤አርቭአ ውርኤት በኘቭ ዳኘ ኢኸሪ ተፈቀደነ። ⁶ ሁድ ጎይታቪ ኧጎይታቭ ሹው፣ሁድ ኢረቭርወዳቭ ኤኤድቪ በሳቫይ ኢረውርታቭ ፍጥረት ኧቅርውት ቀነሰ። ⁷ ተክርስቲያን ኢትዋካመዪ ኢኢምኮመኸ ደረግ አዊ። በዘር ፣በጥቭ፣ ሰቭ ቢዝሬኩዳ ቃርቪ በሰቭ ፎር እንእ ዳኝነድ አዊ። ⁸ ዋአለም ተትፈጠረ ቆነሺታ ባንጪ ጣዪ ኧሂዎት መጣፍ ከስ ሹውሁኗ አንጣፉዮዋ ባአለም እንእ ኢረውርታ ሰቭ አአዊ ሁዳ ኢሰጉጅዴ። ⁹ እንዝር አነነዳ ሰቭ እንእ ኧስቭአ፤ ¹⁰ ማንእየ ሰቭ ኢትቫነህ በኸረ ኧትቫረህ፤ማንየ ሰቭ በሴፍ ዮኦትሪ በኸረ ኡኡትሪ። ኧክርስቲያን ፋራሂነድሞሁኗዪ እምነትሞሁኗ ያዢዳ በዋዳን። ¹¹ ተህም ቀጥወ ኧኛ አዊ ታአፈር ከስ ቲዋአካ አሸሁ፤ሁድቭ ኧጣየኸ ውርርኤት ቀን ባነውነደ፤ ቲዝሬካቭ ኧደረቫኸ ኢዝሬክ ባነደ። ¹² ቢኢፍት አዊ ሹው በሩእ ዳኝነድ ሜናኋ ኢንአ ባነደ፤አፈርቪ በከስሞኋ አነውታ ፍጥረት እንእ ኧውንድ ቲያሰርአካ መዛ ኧተነፈ ኢኢፍት አዊ ኢሰጉጁዋኸ ኤፐ። ¹³ በሰቭ ሁኖዋ ኢፍቲ እሳድ ተሳቫት ቲያወት ስን ኖኦራ መርኸት አቴሸ። ¹⁴ ቢኢፍት አዊ ሹው መርኸት ያቲሺ ዳኝነድ አአዊዊ ኧኸሬ ባአፈር ኢረውርታ ሰቭ አሳሳተ፤በሰይፍ መዘኘ ኧኸረ ዘንጋ ጭን ባአያኋ አነዳ አዊ ምስል ያጣውሩዋኸ ኤዘዘኖም። ¹⁵ ህመኸ ኢኢፍት አዊ ምስል ኧዘንጉት ኢኸነኸ ኧምስል ሁዳ አፏት ኢቭመኸዪ እእም ምስል አይሰጉጂዋ ሰቭ እንእ ዮኦትሪዮኸ ኢንአይ ዳኝነድ አዊ። ¹⁶ ህመኸ ኑኡሞኋዪ እንስሞኋቭ፣ደንገኘዪ ዚጋቭ፣ባሬያዪ ኧቫሬቭ ዳቭ እንእ፥በቀነ ኧጅሞሁኗዪ በጉራ ኧጅሞሁኗ ዌ በጣባናሁኗ መርኸት ኢንኢዋኸ በግርድ ጠበጠኖም፤ ¹⁷ እመኸ ኤፐ ሁዳ አአዊ ሁዳይ መርኸት ፣ሹውኋ ዌ ኧሹውኋይ ቁጥር ኤነነ ማንእየ ሰቭ አይስየመኸዪ አያስየመኸ ኢንአኔ። ¹⁸ 18 ዋዳ ኣኋርት ያትሲእኩዳናአር፤ኧኋርት አነነዳ ሰቭ በረፐረ አአዊ ሁዳይ ሙዝር ኧቨዝርኩ፤ሙዝርሞኋ ኧሰቭ ሙዝርን፤ሙዝርሞኋ ስድስት በኧር ስድሳ ስድስትን።