“ናው ጥዕስትኖ፡ ‘ጃር ጻብኦቱዅ፡ እን ይና ደርብዲ ይና ወራዲርሰና እሲሮና የመማዅሰና፡ ኒሰና እሲዅና’ ይኑዅ።”
7 ዳርዮስ ሰየምሶ ኒ ሊጘር አመሪል፡ ሸባጥ ይስታዅ ሽካ ላዅ አርቢል፡ ለጘረጝንዲ ሰጃ ኳሪል፡ ንሰና ያዅ ቆል ጃሩዅ ነቢ ደካርያስ በራክያዅሪል እንቱዅ፣ 8 ቂር ራእይ ቋልዅን፣እነሓን፡ላ ግርዋ ኒል ይጃብል ጣላ ፈርዲል ጨዓንሳዅ፣ ኒ ይኸ፡ ለጥ ያዅ ኣካንሊ እን ካን ጸጾሩ ነበክል ደውዮ እርጕዅ፣ ኒጕርበትድኻ ኣፍሩስ ጣልዲ መኸትዲ ዋልውዲ እርግኑዅ። 9 ኣንኻ፡ “ዎ ይአደራ፣ ነን ውረኒ ግን?” ይዅንሉ።
እን ይዲ ጋቡ እርጋዅ መልኣክኻ፡ “ነን ውረኒ ኣከነት ቋልስየካ ግን” ይዅለ።
10 እን ካን ጸጾሩ ነበክል ደውዮ እርጋዅ ግርዋኻ፡ “ነን፡ ጃር ብረስ ጅልውድኖ ዮ እኝሸቐውሎም ግን” ዮ ወንተስዅ። 11 ናውኻ፡ እን ካን ጸጾሩ ነበክል ደውዮ እርጋዅ መልኣክ ጃሩዅሲ፡“ብራ ኒልክ ጅልውንዅን፣ እነሓን ብራ ኒውክ ፊኾ ሰላም ህምበኵ” ይኖ ወንተስንዅሉ። 12 ኒድ ደምቢ፡ እን መልኣክ ጃሩዅ፡ “ዎ ጃር ጻብኦትዅ፣ እና ለጘትረጝ አመሪል ቀጠብስረውለን፡ዕርዲራ ኢዮሩሳሌምትሪዲ ዕርዲራታት ያሁዱዲት አውን ኣኽራሲክ ግን እንቲ ብሕል የግራኽርለን?” ይዅሉ። 13 ጃር ኰዶ፡ እን ይዲ ጋቡ እርጋዅ መልኣክሲ ባህሰውዲ ፈርሕደውዲ ቆላትድ እሰ ወንተስዅሉ። M&B 14 ኒድ ደምቢ፡ እን ይዲ ጋቡ እርጋዅ መልኣክ ንሰና ይዅለ፣ “ጃር ጻብኦቱዅ ንሰና የኵ እⶖኵዅ ይሮ፡ እና ቆል ኒስ ድሪሲ፣ ‘ጽዮንዲ ኢዮሩሳሌምዲር ሰበትድ ገሪዅ ረቐቦ ህምበኵን፣ 15 እን ዳሕና ግን የው ቆምያትድኻ ገሪዅ ሓረቕሮ ህምበኵን፣ ኣን ከለላዅ ሓረቕሮ ዋኑ፡ ናው ደአም እን እርጋዅድ አወይሲ ጂበት ሃቢኒዅ።’
16 “በጋ፡ ጃር ንሰና የኵ እⶖኵዅ፣ ‘ኢዮሩሳሌምትል ራሕመትዲ ወንተርያ ግን፣ ይልጝን ኰዶ ኒል ሓዲስድ ገበርስሮ ግን፣ገመር ዓቀኒሰናኽር ኢዮሩሳሌምዲ አወይሲ ጠለቕስሮ ግን’ የኵ ጃር ጻብኦትዅ።
17 “ጃር ጻብኦትዅ ንሰና የኵ እⶖኵዅ ይሮኽር ድሪሲ፣ ‘ይዕርዲራታት ልሳዕ ርድቕድ እንሳኽስድኖ ግን፣ ጃር ኰዶ፡ ጽዮንቲ ሓዲስድ ደፍእድሮላ ግን፡ ኢዮርሳሌምትኽር ሓዲስድ ፍሪርዶላ ግን።’ ” S1 ሰጃ ጊኽዲ ሰጃ ብልሀቱዲ
18 ኒድ ደምቢ፡ ይገሽ አወት ቋልዅን፣ ይጃብልኻ ሰጃ ጊክክ ቋልዅን፣ 19 ኣን ይኸ፡ እን ይዲ ጋቡ እርጋዅ መልኣክሲ፡ “እና ነን ውረኒ ግን?” ዮ ወጝቀርዅንሉ።
ኒኽር፡ “እና ነን፡ ያሁዳ ብረዲ እስራኤልዲ ኢዮሩሳሌምዲት ፋሕሰው ጊክክ ግን” ይዅለ።
20 ኒደምቢ፡ ጃር ሰጃ ልውር ናኑ ሽውሲ ቋሊስዅለ። 21 ኣን ይኸ፡ “ነን ውራ እሲድኖ እንትንዅን?” ይኵን። ኒኻ፡ “እና ጊክክ፡ ላዅ ድኳ ኒኣኰርሲ ክብሰጊን፡ ያሁዳ ብሪል መንደርተውሲ ፋሕ ሰው ግን፣ ነን፡ ጒኢስድኖሎምኽር እን እክ ያሁዳ ብሪል መንደርተውሲ ፋሕሲድኖ ናጊክክ ክብሰው እን ቆምያታ ጊክክሲ ከሪነ ማልድኖኽር ግን ናው እንተው”