1 ¹ ኦብድያ ቋላዅ ራኢ፦ አደራ ጃር ኤዶምሲ ቋላዅድ ኦድየት እኝሻቝዅ፣ ዋስናዅ ንሽቓ ጃሩዅ፦ "ኣን ጃር ኤዶምትል ማዓት ገምድድኖ ኣደድነድ እከል ንሽቓ እኝሸቆ ህምበኵን!" ያዅ ግን። ² ጃር ኤዶምቲ ንሰና ያኵ፦ "እናሓን ቆምያት ነበክል ሓያም እሰካ ህምበኵን፣ ገሪዅ ቃበብስራኽር እክቶ ግን። ³ መክሕስትና ኵለበኪዅ ምሊዅካ፣ ሸሻ በጢራዅሊ መንደርትራኵ፣ እንቲ ኒል ክራዅ ልጝን ጊራ ሺራዅሊ ከደምሳዅ ግን፣ 'እን ኣን ኒል ህምባ ኣካንልድ ኣዊ ገምድሮለ ገረሳዅን፧' ይነድ ዋርዲትራኵ። ⁴ ደአም ንስሪሪሰና ኣወት ዋውረጝር፡ ኵመስከብሲ ሽጝርው ነበክል እስረጝር፡ ኒልድ ገምድየካ ግን። ኒስ ኣን ጃር ጋበ ህምበኵን። ⁵ ሱኳን ወሪ ወረሬው ቂር እንተረነን፣ ኣቕተውሲሎም ካያ አድኖ ፈረናኵ፣ ደቢብ እክበው ቀምበልሰው ባረናኵ፣ ኵኣፋይቲ ደአም ትክሲነ ድሂስድኖካ ግን። ⁶ እንትን ኤሳውር ፈደን እንታ ልጝን በተንሱዅ፣ እናሓን እንታ ርዝቕ ኒውክ ወረርሱዅ። ⁷ እን ቆል ማእኰቱዅ ትወውካ ኵጨር ናውክ ምሊኒዅካ፣ ኵብሪልድር ፍድኖካ ሳደድንዅካ፣ ኵፈተት ኲል ኣፋይቲ ኣኽኖ ጕኑዅካ፣ እን ኵሳንሰዓስ ቋው ሰቀር ወሸቕድኑዅካ፣ ነኒስክ እሱኑካ እንትኻ ላሪ አርእላ። ⁸ "እንን ወክት እንዲሲ ኤዶምትልድ ልውሩ፣ ኤሳውር ጊሪልድኻ ኣምራንሲ ድሂስያ ግን። ⁹ ኤዶምትል መንደርተው ከው ናውክ ኵውስትድኖ ግን፣ ቴማንዱ ፋርሰን ጕኢሲ ፈጥፈጠናኵ። ¹⁰ "ኵዳን ያቆኡእቍርድ ፈደንሲ ዕምጭድ ኵርነዲን፡ ተዋረድቶ ግን፡ ዲመሲኽር ድቶ ግን። ¹¹ ናኣፋይቲ ናእስሲ ከሪነ፣ ናርድቕ ናትክ ወረሬና ግርገት፡ እንቲ ሸሊ ደውይሮ መርሊስሩ እርግሩዅ፣ እንቲ እኳ የሩሳሌምቲ ቅሻድ በንስጘው ከወልድ ላሪሲ ኪደላ። ¹² ይሁደር ብሪል መንደርተው ኵሻንሊ ገእያዅሎም ጅርበትድ፡ ባህ ይጊድካ ሻዅ ግን፣ ናድዲ ኳሪል ረይሕስትቶ፡ ናጨነቕስና ኳሪልር ናል ከበርስቶ ኣስተሀልጊድካ ሻዅ ግን። ¹³ ናድዲ ወክትሊ ይእካ ባብድ ቱቶ አስተሀልጊድካ ሻዅ ግን፣ ናጅርብት ወክትሊኻ እክ ይሁደርውድ ድደድ ፈርሕሮ ሕበርሲቶ አስተሀልጊድካ ሻዅ ግን። ናው ድድና ኳሪል ናርዝቕሲ ወረርቶ እርግለካኒ። ¹⁴ እን እግረውሲ ኵቶ ደርብ መግለደኒዅሊ ኣጎብቶሎም እርግለካ፣ እን ከብተውስኻ ናጅርበት ግርገድ ኣባይድ ደኵስሮ ኡቶሎም እርግለካ። ¹⁵ "ኣን ጃር ቆምያት ናትከል ፈረዳ ግርጋ ገእዩዅ፣ ዎ ኤዶም! ኵክድመትሰና ኵአረኸስ አርቶ ግን፣ እን እንቲ እስራዅ ክድመት ሙቕላ ኵል ወንተርዶ ግን። ¹⁶ ይእክ ሻትክ ጊሪል ጽዋእ ጅርበቱዅ ጅእኑዅ፣ እን ናላው ሸጝገብል ህምበው ቆምያት ናውክ ኒልድ ጂባዅ ጽዋእ ጅርበቱዅ ጅእድኖ ግን፡ እን ጀአው ናውክኻ እርግግነሰና ኣኽድኖ። ¹⁷ "ጊራ ጽዮንዱዅልድ ድዲልድ ደአነው አርስድኖ ግን፣ ጊራ ጽዮንድዅር ሸትክ ኣኽሮ ግን፣ ያቆብር እክኽር እን አስቶሎም እርገው ናማልሲ ወንተስኖ አድኖ ግን። ¹⁸ ያዕቆብቝር ለኺሰና፣ ዮሴፍቝር ሃልሃልቲሰና፣ ኤሳውቝርኻ ገለፍሰና ኣኽድኖ ግን፣ ለኻ ገለፍሲ ሓውሳዅሰና ያቆብእቊርዲ ዮሰፍእቊርዲ፡ ኤሳዉእቊርሲ ድሂስድኖ ግን፣ ነስ ጋበኽር ኣን ጃር ግን። ¹⁹ "ከው ኔጌቡ ኤሳውር ጊረስ ሻኽድኖ ግን፡ ጊራ ግርጌሩዅሊ ሀምበው ከው ፍልስጢሙ ብረስ ለውድኖ ግን፣ ኤፍረምዱዅዲ ሰማርዪዅዲ ከረመነስኽር ሸኽድኖ ግን፡ ብናያብኻ ጊልዓድቲ ለውሮ ግን። ²⁰ ከናንትል ህምበው እስራኤልዱ ስደተኛታት፡ ሰራጵታትል ኣኽታሲ ህምባ ብረስ ለውድኖ ግን፣ ሰፋራድምትል ህምበው የሩሳሌምሩ ስድተኛታት፡ ኔጌብሩ ዕርዲራታትሲ ለውድኖ ግን። ²¹ እን ደአኑ እክ የሩሳሌምሩ ጊራ ጽዮንዱዅሊ ኣኽኖ ኤዶምቲ ሓከምድኖ ግን፣ ኒሕክምር ጃሩዅ ኣኽሮ ግን።"