1 ¹ من بولس، عبد الله ورسول يسوع المسيح في سبيل إيمان من اختارهم الله ، ومعرفتهم للحق الموافق للتقوى، ² في رجاء الحياة الأبدية، اللي وعد بها الله المُنزه عن الكذب، من قبل أزمنة الأزل، ³ ففي الوقت المُحدد، أعلن الله مُنقذنا كلمته ،وكلفنا بأمر منه أننا أبشر بها.

⁴ وانا أكتب الى تيطس ،ولدي الحقيقي بالإيمان اللي لنا كلنا نصيب فيبه،عليك النعمة والسلام من الله أبينا والمسيح يسوع مُنقذنا . ⁵ أنا سيبتك بجزيرة كريت علشان تكمل ترتيب الأمور اللي تحتاج الى ترتيب، وعلشان تُقيم شيوخ للجماعة بكل مدينة، مثلما وصيتك. ⁶ لازم إنو يكون الشيخ بلا لوم ، لهُ زوجة واحدة ، ويكونو أولاده مؤمنين ولا يتهمهم واحد بالخلاعة أو التمرد. ⁷ وبما أنو راعي الجماعة مسئول على عمل الله ، لازم أنه يكون بلا لوم ، مش عنيد ولا غضبان ولا سكران ولا عنيف وما يجريش بعد الربح الحرام . ⁸ بل لازم إنو يكون كريم ، محب للخير،يضبط نفسه ، صالح، تقي ، عاقل، ⁹ ويتمسك برسالة الحق مثلنا نعرفها .بكذا يكون قادر على انو يشجع الناس الثانين بالعقيدة السليمة ، وأنو يُرد على المعارضين. ¹⁰ بُه هناك كثير من معلمي الباطل المتمردين واللي يخدعوا عقول الناس، وخاصة اللي من اهل الختان . ¹¹ هاذم لازم إنو تسد لقوفهم. فهم يخربو ا بيوت بأكملها ، بتعليم حاجات ما تصلحش،وهذا من أجل الربح الحرام. ¹² قال واحد منهم ، هو نبي خاص بهم: " أهل كريت دائماً يكذبوا، وحوش شرسة، وكسالى شرهون." ¹³ وهذي شهادة صدق. لهذا لازم انُه توبخهم بقوة ، علشان يكون إيمانهم سليم. ¹⁴ وما ينتبهوش بعقولهم للخرافات اليهودية ووصايا الناس اللي راحوا عن الحق بعيد. ¹⁵ عند الطاهرين كل شيء طاهر. أما عند النجسين وغير المؤمنين، فما فيش حاجه طاهرة ، بل أنو عقولهم وضمايرهم كمان رجعت نجسة. ¹⁶ يقولوا انهم يعرفوا الله، بس بأعمالهم يكفروا به. فهم مكروهين ومش مُطيعين ، ومش نافعين بأي عمل صالح.