1 ¹ أنا بولس عبد المسيح يسوع، الله دعينا عشان أكون رسول، وأختارنا عشان أبشر بالإنجيل. ² هذا الانجيل اللي وعد الله فيبُه من قبل بواسطة أنبيائه بالكتب المقدسة، ³ ويتكلم عن ابنه اللي جاء من ذُرية داود،من الناحية البشرية؛ ⁴ ومن جهة الروح القُدس ثبت بقوة إنوه ابن الله لما قام من الموت ،يسوع المسيح ربنا. ⁵ بواسطة يسوع المسيح ،وعشان إسموه حصلتو نعمة (أو بركة)، وأكون رسول وأدعي الناس من كل الشعوب للطاعة والإيمان، ⁶ ومن ضمنهم أنتم كمان، دعيكم الله عشان تكونوا ليسوع المسيح . ⁷ أكتب لكم أنتم كلكم اللي بروما، أحباب الله اللي اسمكم قديسين: عليكم النعمة والسلام من الله أبونا والرب يسوع المسيح. ⁸ أول شيء،أشكر إلهي بواسطة يسوع المسيح، من شانكم كلُكم، لإنوه إيمانكم ينتشر بالعالم كله . ⁹ يشهد الله اللي أعبدوه من كل قلبي، وابشربإنجيل ابنُه، كيف إننا أذكُركم دائماً، ¹⁰ أدعي دائماً بصلواتي ،إنوه يتسهل لي بيوم من الأيام و أزوركم بمشيئة الله . ¹¹ لإننا مُشتاق أشتي أشوفكم ، عشان أجيب لكم بركة روحية من شان تتقوا (تتشجعوا)، ¹² عشان نتشجع بيننا البين لما أكون عندكم،أنا اتشجع بإيمانكم، وانتم تتشجعوا بإيماني . ¹³ أشتيكم تعرفوا يا اخوتي، إننا نويتُ مرات كثير أزوركم ،عشان يكون لخدمتي ثمر عندكم كمان، مثلما أثمرت بين الشعوب الثانية، لكن مقدرتوش لحد الآن . ¹⁴ لإنوه عليَّا واجب جهة كل الشعوب المتمدنة والغير متمدنين، المثقفة والغير مثقفة سواء. ¹⁵ عشان كِذا أنا مشتاق لكم كثير، أشتي أبشركم بالإنجيل أنتم كمان اللي بروما . ¹⁶ أنا مستحيش بإنجيل المسيح (أنا افتخر برسالة الانجيل)،لإنوه هو القوة اللي يستخدمها الله لإنقاذ كل من يؤمن، سواءً يهود أو غير يهود . ¹⁷ لإنوه الله أعلن بالإنجيل كيف نكونصالحين ،اللي يعطوا الله على أساس الإيمان ، مثلما يقول الكتاب: "الصالح بواسطة الإيمان يحيا ." ¹⁸ فالله أعلن غضبُه من السماء على كل الناس الفُجاروما يعملونوه من شر وفساد ،اللي يحجُبوا الحق بفسادهم. ¹⁹ لإنوه كل اللي يشتوه البشر يعرفوه عن الله ،الله خلوه واضح وظاهر لهم، ²⁰ من لما خلق الله العالم، وصفات الله اللي ماتشوفيش العين، مثل قُدرتُه الأبدية والوهيتُه ، ظاهرة وواضحة للكل تشوفها العقول بمخلوقاتُه، إذن الناس مالهومش عُــذر . ²¹ رغم إنهم عرفوا الله ، لكن ما حمدونوش ولا شكرونوه،كإله، وراحوا بتفكيرهم للغباوة ومن غبائهم رجع قلبهم مُظلِّم . ²² يحسبوا إنهم أذكياء، وهُـم أغبياء. ²³ وبدلوا جلال الله اللي ما ينتهيش ،بتماثيل تشبه صورة الإنسان اللي يموت، والطيور والحيوانات والزواحف. ²⁴ عشان كِذا تركهم الله بشهوات قلوبهم للنجاسة،عشان يهينوا أجسامهم بينهم البين. ²⁵ لإنهم تبعوا الباطل بدل الحق ، وخافوا وعبدوا المخلوق بدل الخالق تبارك وتعالى للأبد..آمين.

²⁶ عشان كذا الله تركهم للشهوات المُخزية ، لإنوه نسوانهم أستبدلين العلاقة الجنسية الطبيعية بممارسات موش طبيعية . ²⁷ وكمان الرجال، تركوا العلاقة مع النسوان،وعملوا الفحشاء رجال مع رجال، وانشغلوا بشهواتهم بينهم البين ، عشان كذا استحقوا العقاب العادل لإنهم ضالين. ²⁸ ولإنهم رفضوا إنو يعرفوا الله، تركهم الله لعقولهم الفاسدة ، عشان يعملوا أمور موش صحيحية. ²⁹ وامتلأُوا بكل أنواع الشر والإثم والطمع والخُبث، وامتلأوا بالحسد والقتل والعداوة والمكر والسوء، ³⁰ نمامين مفترين،يكرهوا الله شتامين،متكبرين ،مُتفاخرين، مُخترعين للشر،عاصيين للوالدين ، ³¹ ما يفهموش ، ولا أمانة ،ولا حنان ، ولارحمة . ³² رغم انهم يعرفوا تمام إنو الله حكم بالموت على اللي يعمل آذي الأشياء ، هم يعملونيه وزيادة ويمدحوا اللي يعملونيه.