1 ¹ وبعدين شفتو باليد اليمنى للجالس على العرش، كتاب متكوب فيبه من الخارج ومن الداخل ومختوم بسبعة اختام. ² وشفتو ملاك قوي يصيح بصوت عالي: " منو اللي يستحق يفك ختوم الكتاب ويفتحة؟" ³ فما قدرش ولا واحد لا في السماء ولا على الأرض ولا تحت الأرض أنو يفتح الكتاب ويشوف ايش فيبه. ⁴ فجلست أبكي بكاء شديد، لانه مافيش منو اللي يستحق أنو يفتح الكتاب ويشوف اللي فيبه. ⁵ فكلمني واحد من الشيوخ : " لاتبكيش. لأنو الأسد اللي من قبيلة يهوذا ، اللي هو أصل داود، وهو المستحق أنو يفتح الكتاب ويفك ختومه السبعة . "

⁶ وبعدين شفتو حمل الفداء واقف بوسط العرش وحوله كائنات حية أربعة والشيوخ، وشكله كأنه ذبح ، وله سبعة قرون ، وله كمان سبعة عيون وهي أرواح الله السبعة اللي أرسلها الى الدنيا كلها . ⁷ فمشي وشل الكتاب من اليد اليمنى للجالس على العرش. ⁸ فلما شله ، ركعت الكائنات الأربعة ، وركعوا الشيوخ الأربعة والعشرين أمام حمل الفداء. وكان مع كل واحد قيتارة وكؤوس من ذهب مليانة بالبخور ، اللي هو صلوات القديسين. ⁹ وغنوا أغنية جديدة: " أنت مُستحق أنو تأخذ الكتاب وتفتح ختومه ، لانك ذبحت ، وبدمك اللي سفك، إشتريت لله ناس من كل قبيلة ولغة وشعب وأمة. ¹⁰ وخليتهم مملكة لإلهنا وكهنه له، وشيملكوا على الأرض." ¹¹ وبعدين شفتو ، فسمعتو ترتيل الملايين من الملائكة وهي تحيط بالعرش وبالكائنات الحية والشيوخ. ¹² وتقول بصوت عال. " حمل الفداء اللي ذبح يستحق أنه يلاقي القوة والثروة والحكمة والقدرة والكرامة والجلال والحمد." ¹³ وبعدين سمعتو كل المخلوقات بالسماء وعلى الأرض وتحت الأرض وبالبحر،كل المخلوقات بالكون كله تهتف: " الحمد والكرامة والجلال والقدرة للجالس على العرش، ولحمل الفداء، الى أبد الآبدين." ¹⁴ وهنا جاوبت الكائنات الحية الأربعة : " آمين ." وركعوا الشيوخ ساجدين.