4 ظهر يوحنا المعمدان بالصحراء، يدعي الناس إنهم يتوبوا يتعمدوا بالماء، من شان الله يغفر لهم ذنوبهم. 5 وخرجوا لعِندُه أهل منطقة يهوذا وأهل القُدس كُلهم ، وكانوا يتعمدوا على إيـدُه بنهر الأردن ويعترفوا بذنوبهم . 6 وكان يوحنا يلبس ثوب من جلد الإبل، ويربط على حقوه حزام من الجلد ،و ياكل جراد وعسل من الصحراء. 7 وكان يُبشِّر ويقول :" شيجي بعدي واحد أقوى مني ،ما أستحِقش إنو أنزُل وأفُك خيط حِذائه. 8 أنا عمَّدتُكم بالماء؛ بس هـو شُعمّدكم بالروح القُدس. 9 بآذيك الأيام أجى يسوع المسيح من منطقة الناصرة اللي بناحية الجليل ،و أتعمَّد بنهر الأُردن على يد يوحنا . 10 وبساعة ما خرج من بين المـاء، شاف السماء تنشقّ والروح القُدس نزل علوه مثل حمامة. 11 وسمع صوت من السماء يقول :"أنت ابني الحبيب اللي بك فرحت كل فرح . 12 وبآذاك الوقت قاد الروح القُدس يسوع المسيح للصحراء ، 13 وجلس فيبها أربعين يوم بين الوحوش ،والشيطان يختبِروه ، وكانت الملائكة تخدُموه. 14 وبعد ما حبسوا يوحنا ،راح يسوع المسيح لمنطقة الجليل يُبشِّر بالإنجيل 15 ويقول :" خلاص قـرَّب الوقت اللي يقيم الله فيبُه مملكتُه ، توبوا وآمنوا بالإنجيل." 16 ولما كان يسوع المسيح يمشي بساحل بحيرة الجليل ، شاف إثنين صيادين هـم سِمعان وأخوه أنَدراوُس يرجموا بالشبكة للبُحيرة. 17 قلهم يسوع المسيح:"هـيـا إتبعونا ، شخليكُم صيادين للناس !" 18 بساعتُه فلتُو للشبك حقهم ومشوا بعدُه .
19 بعدين مشي من أوناك قليل ، و شاف يعقوب بن زبدي و يوحنا أخوه ،بالقارب يصلحوا الشبك ، 20 دعي لهم بآذاك الوقت يُتبِّعنوه، تركوا أبوهم زبدي بالقارب مع العمال وتبعنوه . 21 بعدين مشوا لكفرناحوم ،وبساعتُه دخل يسوع المسيح بيوم السبت لبيت العبادة وبـدأ يُعلِّمهم. 22 تعجّبوا الحاضرين من تعليمُه ، لإنو كان يُعلِّمهم مثل صاحب سُلطة ،موش مثل علماء التوراة . 23 وكان في ببيت العبادة اللي عندهم رجَّال فِيبُه شيطان نجس، بـدأ يصيح: 24 آه ..مـو دخلك بنا يا يسوع الناصري ؟ أجيت من شان تقتُلنا ؟ أنا عارف منو أنت. أنت قُدوس الله !"
25 "فصاح فوقه يسوع وقال لُه إسكُت !وإخرُج منُه !" 26 فصرع الشيطان الرجّال ،وصاح بصوت قوي وخرج مِنُه .
27 فتعجبوا كُلهم ،وتسألوا بينهم البين :"إيش هذا التعليم الجديد؟ يُقدِّمُه بقوة !حِتى الشياطين يأمرهم أمر ويطيعونُه.!" 28 وانتشر خبر يسوع المسيح بسرعة بكل ناحية منطقة الجليل. 29 وبعد ما خرجوا من بيت العبادة ،سرحوا لبيت سِمعان وأندراوُس ،وراح معهم يعقوب ويوحنا. 30 وكانت عمة سمعان راقد فوق الفراش مريض،فيبه حُمى، بساعتُه كلموا يسوع المسيح عليه. 31 قَرَب لعِنده،ومسك بيده وقيمِه، وراحت مِنه الحُمى بساعتُه وقامت تخدُمهم.
32 ولماغربت الشمس وأجى الليل ،جابوا لُه لعِنده كل الأمراض واللي فيبهم شياطين. 33 واتجمعو أهل المدينة كلهم عند باب البيت. 34 شفي يسوع المسيح كثير كانوا مصابين بأمراض مختلفة، وخرّج شياطين كثير، وما سمحش للشياطين يتكلموا لإنهم عرفوا مِنوهو. 35 وباليوم الثاني قام يسوع المسيح بدري قبل الفجرخرج لمكان بعيد وبدأ يُصلي هِناك. 36 فخرج سمعان واللي معو يدورُنوه ، ولما حصلونه قالوا لُه : 37 كُلهم يدوروا عليك.
38 قال لهم: "تعالوا نروح لمكان ثاني، للقرى اللي جنبنا، من شان أبشِّرأوناك (أو/هِناك)، لإنوعشان هذا أجيتو. 39 وراح يُبشِّر ببيوت العبادة بمنطقة الجليل كُلِه،ويُخرِج الشياطين. 40 واجى رجّال أبرص لعند يسوع المسيح وسجد على رُكبُه ويترجي لُه ويقول : "أنت قادر إنو تشفينا، إذا تشتي،"
41 فرحمه يسوع المسيح ومد يده ومسح علوه وقال: "أيوه أشتي ، إشفى" 42 وبساعته راح مِنو البرص وشُفي.
43 وحذَّرُه يسوع المسيح بِشدة قبل ما يمشوه، 44 وقال لُه: "إنتبه! لا تُكلم أحد بشيء، بس روح وري بنفسك للكاهن، وقدِّم اللي أمر فيبُه موسى، ويكون دليل لهم، ويعرفو الناس إنك تعافيِت ." 45 بس الرجّال راح وبدأ يصيح كثير وينشُر الخبَر بكل مكان، حِتى إنُه يسوع معا قدرش يدخل أي مدينة بالظاهر، فكان يجلس خارج بأماكن فاضي.وكانواالناس يجيئوا لُه من كل مكان.