9 ¹ ولما كان يسوع المسيح ماشي،شاف رجَّال أعمي من لما خُلِق، ² فسألونُه تلاميذُه :" يا مُعلِّم ،منو اللي عمل ذنب: لما خُلِق الرجَّال هذا أعمي، هو ولا ابوه وامه؟" ³ جاوب يسوع المسيح:" ما ولِدش أعمي بسبب ذنُبه ولا ذنب أبوه وامه، خُلِق أعمي عشان تظهُر قوة الله بشفائُه. ⁴ مادام الوقت نهار، لازم إنو أعمل أعمال اللي ارسلنا ،شيجي الليل ، وما احد يقدر إنو يعمل فيبُه. ⁵ مادُمتُ بالعالم ،فأنا نورالعالم."

⁶ قال هذا و تفـل على التُراب ،وعِمل مِن التُفال طين ،وبعدين طلي بالطين عيون الأعمي. ⁷ وقال لُه :" روح إتغسل ببركة سِلوام" اللي معناتِه مُرسل، فراح واتغسل ورجع يشوف.

⁸ فالجيران واللي كانوا يعرفونُه من قبل إنو شحَّات قالوا:" موش هذا هو الرجل اللي كان يجلس ويشحت؟ ⁹ قال بعضهم :" إلا هو نفسُه" وآخرين قالوا :" لا ، موش هو ، لكن يُشبهُهُ!" أمـا هـو قال: "أناهـو الرجل اللي كان أعمي." ¹⁰ فقالوا لُه :" كيف أتفتحين عيونك؟" ¹¹ جاوب :" الرجل اللي اسمُه يسوع عجن طين ودهن بُه عيوني،وقال لي: روح لبركة سلوام وإتغسل. فَرحتو واتغسلتو ورجعتو أشوف." ¹² سألونُه :" وين هو الأن؟" قال :" ما ادري." s1 علماء اليهود يحققوا مع الأعمى اللي شفوه يسوع المسيح

¹³ فأخذوا الرجَّال اللي كان أعمي لعند علماء اليهود. ¹⁴ وكان اليوم اللي عجن فيبُه يسوع المسيح الطين وفتح عيون الأعمي، يوم سبت. ¹⁵ فسألنوه علماء اليهود كيف رجع يشوف ، قال لهم : "طرح يسوع المسيح طين على عيوني واتغسلتو، والآن أنا أشوف " ¹⁶ فقالوا بعض علماء اليهود:" موش ممكن إنو يكون هذا الرجَّال من الله،لإنوه يُخالف سُنة السبت ".بس بعضهم قالوا : " كيف يقدر شخص مُذنب إنو يعمل مثل هذه المُعجزات؟" فحصل بينهم خلاف . ¹⁷ رجعو مرة ثاني يسألوا الرجَّال اللي كان أعمي:" مادام إنوه فتح لك عيونك ،إيش رأيك فيبُه؟ جاوبهم :" هـو نبي!"

¹⁸ لكن علماء اليهود ماصدقوش إنو كان أعمي ورجع لُه بصرُه، إلا لما استدعوا والديه. ¹⁹ وسألونهم :" هذا ابنكم اللي تقولوا إنوه خُلِق أعمي ؟ كيف رجع يشوف الآن؟" ²⁰ جاوبُنهم الوالدين :" إحنا نعرف إنو هذا هو ابننا ،وخُلِق أعمي . ²¹ أما كيف يقدر يشوف الأن ،ولا من اللي خلوه يشوف ،ما نعرفش! إسألونُه هـو رجَّال بالغ، ويقدِر إنو يجاوب من نفسُه ."

²² أبوه وأُمه قالوا كِذا لإنهم كانوا خائفين من اليهود، لإنو اليهود إتفقوا إنو أي واحد يعترف بيسوع إنوهو المسيح ممنوع يدخل المعبد اليهودي. ²³ عشان كِذا قالوا:"إنوه بالِغ إسألونُه."

²⁴ مرة ثاني علماء اليهود دعــوا للرجَّال اللي كان أعمي، وقالوا لُه:" نُحلِّفَك بالله إنو تقول الصدق ، نِحنا نعرف إنو هذا الرجَّال مُـذنِب." ²⁵ جاوبهم:" مُذنب ولا موش مُذنب،أنا معرفِش ، أنا أعرف شيء واحد: إننا كنتُ أعمي والآن أشوف ." ²⁶ قالوا لُه:" إيش عِمل لك ؟ كيف فتح لك عيونك ؟" ²⁷ جاوبهم :" قلتُو لكم وما رضيتم تسمعونا،ليش تشتوا تسمعوا الآن ؟ يمكن إنكم تشتوا تكونوا تلاميذ لُه ؟" ²⁸ فشتمونُه وقالوا لُه:" أنت تلميذه، أما نِحنا تلاميذ موسى . ²⁹ نِحنا نعرف إنو الله كلَّم موسى؛ بس هذا الشخص ما نعرفش من وين هو." ³⁰ جاوبهم الرجَّال :" شيء غريب هذا ! إنكم ما تعرفوش من أين هو، رغم إنو فتح لي عيوني. ³¹ نِحنا نعرف إنو الله ما يستجيبش للمذنبين ، لكنُه يسستجيب للي يتقوه ويعمل بإرادتُه، ³² وما سمعناش بالتاريخ كُله إنو واحد فتح عيون شخص خُلق أعمي. ³³ لو ما كانش هذا الرجَّال من الله ، ماكان يقدريعمل شيء." ³⁴ قالوا لُه :" أنت كُلك خُلِقت بالذنوب ، وتشتي تُعلِمنحنا !" وطردونُه خارج . ³⁵ وعرف يسوع المسيح انهم طردونُه خارج ،راح لعندُه وسأله:"تُؤمن بإبن الله ؟" ³⁶ جاوبه الرجَّال :" من هو ياسيد عشان أأمن فيبُه ؟" ³⁷ قال لُه يسوع المسيح:" أنت شِفتو،واللي يتكلم معك الآن هو نفسُه !" ³⁸ قال الرجَّال :" آمنتُ ياسيد!" وسجد لُه .

³⁹ فقال يسوع المسيح:" أجيتو لهذا العالم عشان أحكُم بأنو: العُميان يشوفوا ، ويعموا اللي يشوفوا!"

⁴⁰ فسمع هذا بعض علماء اليهود اللي كانوا معُه ، وقالوا لُه :" هل نحنا برضو عُميان ؟" ⁴¹ فقال لهم يسوع المسيح :" لو كنتم صدق عُميان ماكان عليكم ذنب، لكن الآن تقولوا : نِحنا نشوف ، عشان كِذا ذنبكم باقي عليكم"