3 ¹ كان في رجّال من عُلماء الشريعة اسمُه نيقوديموس، وكان من قادة اليهود. ² أجى لعند يسوع بالليل وقله:" يامُعلم، إحنا نعرف إنك مُعلّم أجيت من عند الله، لإنو محد يقدر يعمل هذه المعجزات اللي تعملها أنت، إلا إذا كان الله معُه " ³ جاوبه يسوع : أقولك الصدق:" إذا ما ولِد الإنسان ولادة جديدة من فوق، ما يقدرش إنُه يشوف مملكة الله." ⁴ فسأله نيقوديمُوس :" كيف يولد الإنسان ولادة ثانية وهو شيبه؟ هل يقدر إنو يدخل بِطن أُمه مرة ثاني ويُولد؟ ⁵ جاوبه يسوع:" إذا ماولدِش الإنسان من الماء والروح ،مايقدرش يدخُل مملكة الله. ⁶ فالمولود من الجسد هو جسد، والمولود من الروح هو روح. ⁷ لا تستغربش إنو قُلت لك لازم إنو تولدوا من جديد. ⁸ الريح تهُب مكان ماتشتي، وتسمع صوتها ، بس ماتعرفش من فين تجي ولا فين تروح ،ونفس الشيء بالنسبة للي يولد من الروح."

⁹ فقال لُه نيقوديموس :" كيف يمكن إنو يحصُل هذا؟

¹⁰ جاوبه يسوع :"أنت معلم إسرائيل وماتعرفش هذا! ¹¹ أقولك الصدق: نِحنا نتكلَّم باللي نعرِفُه ونشهد باللي رأينُه، لكن ماقِبلتُم شِهادتنا. ¹² إذا كُنتُ كلمتُكم بأمورالدنيا وما أمنتم، كيف شتؤمنوا إذا كلمتكم بأمور السماء؟ ¹³ ولا أحد طِلِع للسماء إلا اللي نزل من السماء،وهو اللي رجع بشر. ¹⁴ ومثلما عَلَّق موسى الحية بالصحراء،كِذا لابُد إنويُعلّق اللي رجع بشر، ¹⁵ علشان تكون الحياة الأبدية لكل من يؤمن فيبُه."

¹⁶ لانه كذا أحب الله كل الناس لدرجة إنو ضحي بإبنُه الوحيد، علشان مايهلِك كل من يُؤمن بُه وتكون لُه حياة الخلود" ¹⁷ لأن الله مارسلش ابنُه علشان يُعاقب الناس،أرسله عشان يُنجيهم . ¹⁸ اللي يُؤمن بُه ما يُعاقبش، واللي ما يُؤمنش فيه يُعاقب،لإنو ما آمنش بإسم ابن الله الوحيد. ¹⁹ وهذا هو أساس العقاب :إنو النورأجى للعالم، لكن الناس حبوا الظلام بدل النور،لإنو أعمالهم شريرة. ²⁰ كل اللي يعمل الشرَّ يكره النور،ومايخرجش للنور خايف لتفتضح أعماله. ²¹ أما اللي يمشي بالحق،فيخرُج للنور علشان يظهر بوضوح أنُه يعمل باللي يعمله بقوة الله ." ²² بعد كِذا راح يسوع وتلاميذه لبلاد يهوذا ،وجلس هِناك معهم ،وكان يُعمِّد الناس. ²³ وكان يوحنا برضو يُعمِّد الناس بمنطقة عين نون قريب قرية ساليم ،لإنو الماء كان هِناك كثير،وكانوا الناس يجيئوا ويتعمَّدوا هِناك. ²⁴ هذا قبل ما يدخُل يوحنا السجن. ²⁵ وحصلت جدال بين تلاميذ يوحنا وواحد من اليهود بموضوع الوضوء. ²⁶ فراحوا لعند يوحنا وقالوا لُه :" يا مُعلِّم، شُوف ! الرجل اللي كان معك بنهر الأُردُن، واللي شِهدت لُه ،هو الأن يُعمِّد،وكل الناس يروحوا لعِندُه."

²⁷ فقلهم يوحنا:" الإنسان ما يلاقيش حاجة إلا إذا الله جاب له ." ²⁸ وانتم أنفسكم تشهدوا لي إننا قلتو: مش أنا المسيح ،أنا مُرسل قبلُه أجهز لُه الطريق. ²⁹ العروسة للعريِس، أما صاحب العرِيس، فيوقف ويسمعُه،ويفرح كثير لما يسمع صوت العرِيس هذا هو إذن فرحي، وهو الآن كامل . ³⁰ لازم إنو هو يزيد وانا أنقُص."

³¹ اللي يجي من فوق هو فوق الكُل،واللي من الأرض هو أرضي،ويتكلَّم مثل أهل الأرض. اللي يجي من السماء هو فوق الكُل." ³² وهو يشهد باللي سِمعُه وشافه ،وماحد منكم يقبل رسالتُه. ³³ اللي يقبل رسالتُه ،يشهد إنو الله صادق. ³⁴ لإنو اللي أرسلُه الله ،يتكلم بكلام الله، فالله يعطي الروح للإبن بلا كيل . ³⁵ الأب يُحب الإبن وخلي كُلّ شيء تحت سلطته. ³⁶ اللي يُؤمن بالإبن لُه حياة الخلود، واللي مايُؤمنش بالإبن ما يشوفش حياة الخلود،وغضب الله يكون عليه."