12 ¹ وقبل عيد الفصح بست ايام، أجاء يسوع لعند بيت عنيا، بلاد لعازر اللي أقامه من الموت. ² فعملوا له عشاء هناك ، ومرثا كانت تخدم ، وكان لعازر واحد من الجالسين معه عند المائدة. ³ فأخذت مريم قارروة عطر قيمته غالي وهو من الناردين الصافي ، ودهنت بُه أرجل يسوع ، مسحتهين بشعرها، فامتلأت البيت برائحة العطر . ⁴ فقال واحد من التلاميذ حقه، وهو يهوذا الإسخريوطي، اللي خانه بعدين : ⁵ " ليش؟ كان هذا العطر يُمكن يبتاع بمبلغ يساوي مُرتب سنة ويوزع للفقراء! " ⁶ قال هذا الكلام مش عشان إنو كان مهتم بالناس الفقراء ، هو قال هذا لإنو كان سارق ، وكان أمين الصندوق حق الفلوس معه فكان يسرق اللي يطرح داخله. ⁷ فقال يسوع : " سيبها ، هي جلست محتفظ بهذا العطر لليوم ، يوم تجهيزي للدفن . ⁸ الفقراء عندكم دائما، بس انا مشبقيش معاكم دائماً . " ⁹ وفي كثيرمن اليهود عرفوا إنو يسوع في بيت عنيا، فمشوا مش عشان يسوع بس ،هم راحوا عشان يشوفوا لعازر اللي قيمُه يسوع من الموت. ¹⁰ فقرروا رؤساء الكهنة انهم يقتلوا لعازر كمان، ¹¹ لإنو بسببه كان في ناس كثير يتركونهم ويؤمنوا بيسوع . ¹² وباليوم الثاني، سمعوا الجمهور الكبير اللي جاءوا عشان العيد ، إنو يسوع جاي بالطريق للقدس . ¹³ فشلوا أغصان النخل وخرجوا عشان يستقبلوه وهم يصيحوا : الجلال ! تبارك الآتي بأسم الرب ، تبارك ملك هذي الأمة ." ¹⁴ وحصل يسوع جحش ، وركب علوه مثلما كتُب بالكتاب : ¹⁵ " لا تخافوش يا اهل القدس ! هذا الملك حقكم شيجي راكب فوق الحمار ابن دآبه ."

¹⁶ في بداية الأمر ، مافهموش التلاميذ حقه كل هذا . بس بعد ما أتمجد يسوع ، فهموا انُه الكتاب ذكر هذي الأشياء عنُه ، وأنهم عملوها له .

¹⁷ والشعب اللي كان معه لما دعي لعازر من القبر وقامه من الموت، أتكلم بكل اللي حصل. ¹⁸ لهذا خرجوا ناس مليان عشان يستقبلوه ، لانهم سمعوا أنه عمل هذي المُعجزة. ¹⁹ الشيوخ قالوا بينهم البين : " احنا فشلنا تماماً . العالم كله يتبعه ! " ²⁰ وكان بين اللي اجاءوا للقدس عشان يعبدوا الله في العيد بعض اليونانيين . ²¹ فمشوا لعند فيلبس اللي هو من بيت صيدا اللي في منطقة الجليل ، وقالوا له : " يا سيد ، نشتي نشوف يسوع ." ²² فمشي فيلبس وكلم اندراوس ، وبعدين مشوا مع بعض وكلموا يسوع. ²³ فكلمهم يسوع : " اجت الساعة اللي فيها يتمجد اللي كان ابن الإنسان . ²⁴ الحق الحق اقول لكم ،اذا كانت حبة القمح ماتوقعش على الأرض وتموت ، هي شتبقي حبة واحدة ، بس اذا ماتت هي شتجيب حبوب كثير. ²⁵ اللي حياته عزيزه علوه شيضيعها ، واللي مايحبهاش في هذي الدنيا شيربحها وتكون له حياة الخلود . ²⁶ من يشتي يخدمنا لازم أنه يتبعني، لان خادمي يكون في المكان اللي انا فيبه . وكل من يخدمنا شيكرمه ابي .

²⁷ " القلب حقي الان مُضطرب ، فأيش أقول ؟ : " أنقذني ياباه من هذي الساعة ؟ لا ، انا أجيتو لهذي الساعة . ²⁸ ياباه ، مجد الأسم حقك ." فجاء صوت من السماء يقول : " أنا قد مجدته ، وأمجده كمان ." ²⁹ فالناس الكثير اللي كانوا هناك سمعوا الصوت وقالوا : " وقع رعد ." وناس ثانيين قالوا : " الملاك كلمه ." ³⁰ فقال يسوع : " هذا الصوت ماجاش عشاني انا، إنما أجاء عشانكم انتم . ³¹ الأن شيوقع العقاب على هذي الدنيا. الأن شيطرد سيد هذي الدنيا . ³² وانا لما أرتفع من الأرض ، أجذب لكل الناس ." ³³ بهذا الكلام أشار الى الطريقة اللي شيموت فيها . ³⁴ فجاوبوه الشعب : " سمعنا من الكتاب انُه المسيح شيبقى للأبد ، فكيف تقول أنت إنو ابن الإنسان لازم يُعلق ؟ فمن هو اللي صار ابن الإنسان ؟" ³⁵ قلهم يسوع : " النورشيبقي معكم لوقت قصير . إذن ٍ واصلوا السير مادام النور يُشرق عليكم ، عشان مايجيش عليكم الظلام . لأنه الذي يمشي في الظلام مايعرفش لوين يمشي . ³⁶ مادام النور معاكم ، آمنوا بالنور علشان توقعوا من اهل النور ." يسوع قال هذا وبعدين مشي وأختفي عنهم . ³⁷ ومع انه عمل معجزات كثير قُدامهم بس هم ما أمنوش به . ³⁸ وبذلك وقع الكلام اللي قاله إشعياء النبي : " يارب ، من اللي آمن برسالتنا ، ولمن ظهرت قوة ذراع الله ؟ " ³⁹ فما قدروش أنهم يؤمنوا . كما انه إشعياء قال كمان : ⁴⁰ " أعمى عيونهم ، وخلي قلوبهم قاسية ، عشان مايروش بعيونهم ، ويفهموا بقلوبهم ، فيرجعوا لعندي عشان اشفيهم ." ⁴¹ إشعياء قال هذا لأنه شاف جلال يسوع وتكلم عنه . ⁴² وبالرغم من هذا ألا انه كثير من الرؤساء آمنوا بيسوع ، بس ما اعلنوش إيمانهم لأنهم أفتجعوا من الشيوخ ليرجعوا يطردوهم من بيوت العبادة . ⁴³ لأنهم أحبوا أنهم يلاقوا مدح من الناس أكثر من المدح اللي يجي من الله .

⁴⁴ فقال يسوع بصوت عالي : " اللي يؤمن بي ، يؤمن باللي أرسلني مش بيا وحدي . ⁴⁵ ومن شافني ،شاف اللي أرسلني . ⁴⁶ انا النوراللي أجاء للعالم ، فاللي يؤمن بي مايبقيش بين الظلام. ⁴⁷ واللي يسمع الكلام حقي ومايعملش فيبوه ، انا ما أحكمش علوه . لاني اجيت مش عشان احكم على الناس ، إنما علشان انقذ الناس. ⁴⁸ واللي يرفضنا ومايقبلش الكلام حقي ، له من يحكم علوه : الكلمة حقي اللي انا اداعي بها شتحكم علوه باليوم الآخر. ⁴⁹ لإنو ماتكلمتش من عندي انا ، إنما الأب اللي ارسلنا ، هو اللي اوصانا بأيش أقول وأتكلم . ⁵⁰ وانا عارف انُه وصيته تهدي لحياة الخلود، فالكلام اللي انا اتكلم بُه هو اللي اتكلم بُه ابي .