2 ¹ يا إخواني ، بما أنكم تؤمنوا بربنا يسوع المسيح ، رب المجد، إذن لا تميزوش بعض الناس على غيرهم . ² مثلاً إذا دخل الى إجتماعكم رجّال بخواتم ذهب وملابس غالية ، ودخل كمان رجّال فقيربملابس وسخانه، ³ فإذا رحبتم بالرجّال الغني قائلين: " أتفضل، إجلس على هذا الكرسي ." وبعدين قلتم للرجّال الفقير :" وأنت، وقف هناك ، أجلس على الأرض عند ارجلنا." ⁴ كذا يؤكد أنكم تميزوا بين الناس حسب طبقاتهم، جاعلين من أنفسكم قضاة أصحاب افكار سيئة .

⁵ إسمعوا يا إخواني الأحباء: " الله أختار اللي هم فقراء بهذي الدنيا، علشان يكونوا اغنياء بالإيمان ويجيب لهم نصيب بالمملكة اللي وعد بها للي يحبونه . ⁶ أما أنتم فتحتقروا الفقير! ما تعرفوش أنو الأغنياء هم اللي يتسلطوا عليكم ويجرجروكم للمحاكم ، ⁷ وهم اللي يكفروا بالإسم الكريم اللي تنتموا له .

⁸ ما أحلى عملكم لما تطبقوا القانون الملكي المذكور بالكتاب واللي يقول :" حب الأخرين مثلما تحب نفسك . " ⁹ إما إذا كنتم تميزوا بعض الناس على غيرهم ، فأنتم ترتكبوا الذنب ، وتحكم عليكم الشريعة بأنكم مخالفين لها . ¹⁰ لأن اللي يعمل بالشريعة كلها ، بس هو يخالف وصية واحدة منها ، يكون مُذنب بحق الشريعة كلها. ¹¹ لأن اللي قال : " ما تزنيش " قال كمان : " لا تقتلش." يمكن أنت ما تزنيش ، بس اذا قتلت، قد خالفت الشريعة كلها.

¹² إذن أتذكروا أنو الله شيحاسبكم على كل اللي تقولونه وتعملوا به ،وذلك حسب الشريعة اللي تحررالناس. ¹³ ففي يوم الحساب ، الله مشرحمش من كان مش رحيم . أما اللي هو مش رحيم فما بيخافش يوم الحساب. ¹⁴ ايش الفائدة يا إخواني إذا كان واحد يقول : " انا مؤمن." بس اعماله ما تدلش أبداً على أنه مؤمن؟ هل يقدر هذا النوع من الإيمان أنو ينقذه ؟ طبعاً لا! ¹⁵ لنفرض انو أخ أو أخت كانوا بحاجة شديدة الى الثياب والأكل اليوم، ¹⁶ وقال لهم واحد منكم :" أتمنى لكم كل خير. البسوا ثياب دافئة ، وأكلوا أكل تمام." بدون ما يجيب لهم اللي يحتاجونه من ثياب وأكل، فأيش الفائدة من هذا ؟ ¹⁷ بكذا نشوف أنو الإيمان وحدة ميت إذا ما يجيبش بعده أعمال. ¹⁸ ربما واحد يقول :" البعض عندهم إيمان ، والبعض عندهم أعمال." بس أنا أرد على هذا وأقول : " أنا ما أشوفش إيمانك إذا مافيش لك أعمال ، بس أنا اوريك إيماني بأعمالي!

¹⁹ أنت تؤمن أنو الله واحد؟ تمام! حتى الشياطين تؤمن بهذا ، وترتعش من الخوف."

²⁰ وهذا يؤكد ، يا غبي ، انو الإيمان اللي فيش فيه أعمال هو إيمان ميت!

²¹ أبونا إبراهيم مثلاً، أعتبره الله صالح لأعماله ، لأنه جاب ابنه إسحاق على المذبح . ²² إذن، أنت ترى أنو إيمانه كان مربوط بأعماله، فصار إيمانه كامل بالإعمال . ²³ وهذا هو اللي يقصده الكتاب بقوله : " آمن إبراهيم بالله ، فاعتبر الله إيمانه صلاح . " وهذا هو السبب إنو دُعي " خليل الله ." ²⁴ تشوفوا إذن انو الله يعتبر الإنسان صالح على أساس أعماله مش بالإيمان وحده.

²⁵ ومثال ثاني هو راحاب اللي كانت زانية ، الله اعتبرها صالحة لأعمالها ، فهي رحبت بالأثنين الجواسيس، وساعدتهم على الهروب من طريق ثاني. ²⁶ مثلما الجسم بدون روح هو ميت ، كمان الإيمان بدون أعمال هو ميت .