4 ¹ أيها السادة، عاملوا العبيد حقكم بعدل ومساواة واذكروا أنتم كما لكم سيد فوقكم بالسماء. ² داوموا على الصلاة، وخليكم صاحين وشاكرين. ³ وصلوا لنا كمان عشان الله يفتح لنا باب نوصل رسالته، عشان نبشر بسر المسيح اللي انا بسببه مسجون. ⁴ فصلوا عشان أقدر ابشر بالمسيح بالصوت مثلما ينبغي صح.

⁵ تعاملوا مع غير المؤمنين بذكاء، واستغلوا كُل فرصة متاحة لكم. ⁶ كونوا مهذبين بكلامكم كُل وقت عشان يكون له تأثير، وتقدروا تجاوبوا على كُل واحد. ⁷ كُل اخباري انا شيكلمكم عليها تيخيكس، فهو أخ محبوب وخادم أمين، وزميلي في خدمة المسيح. ⁸ وانا رسلته لعندكم عشان تعرفوا اخبارنا كُلنا ويشجعكم. ⁹ وشأرسل معه الأخ الأمين الحبيب أونسيموس اللي هو واحد منكم. وشيكلموكم بكل اللي يحصل عندنا.

¹⁰ ويسلم عليكم زميلي المحبوس معي أرسترخس وكمان مرقُس بن اخت برنابا اللي اخذتم عشانه نصائح، ولو جاء لعندكم رحبوا فيبه. ¹¹ ويسلم عليكم يشوع اللي يسمى يُسطس، فهو من اليهود اللي آمنوا بالمسيح، فهذوا هُم وحدهم يعملوا معي في توسعة ممكلة الله، وشجعونا كثير.

¹² ويسلم عليكم أبفراس اللي هو واحد منكم وخادم للمسيح، ويصلي كُل وقت لكم عشان تثبتوا كاملين وتوثقوا على الله بكل مشيئته. ¹³ وانا اشهد له انوه يتعب كثير عشانكم وعشان اللي هُم بمدينة لاودكية واللي هُم بمدينة هيرابوليس.

¹⁴ ويسلم عليكم الطبيب لوقا الحبيب، ويسلم عليكم ديماس. ¹⁵ وسلموا على الإخوة في مدينة لاودكية، وسلموا على الأخت نمفاس والمؤمنين اللي يجتمعوا ببيته. ¹⁶ ولما تقرأوا هذه الرسالة، رسلوها للمؤمنين اللي في لاودكية عشان يقرأوها عندهم كمان، وانتم اقرأوا الرسالة اللي شتصلكم من لاودكية.

¹⁷ وكلموا أرخبس: "ينتبه للخدمة اللي استأمنه الرب عليها."

¹⁸ وبالختام، اكتب لكم انا بولس هذه التحية بخط يدي، واذكروا أني محبوس. نعمة الله معاكم.