4 أقلكم هذا عشان ولا واحد يخدعكم بكلام مزيف. 5 ومع أني مهليش عندكم بالجسد، بس انا موجود معاكم بالروح، وفرحان لما اشوفكم مرتبين حياتكم، وإيمانكم ثابت بالمسيح. 6 وما دام قبلتم المسيح يسوع رب، عيشوا حياتكم معه. 7 فثبتوا جذوركم فيبه، وخلوه القاعدة لحياتكم، وزيدوا الإيمان حقكم فيبه مثلما تعلمتم، وخليكم كُل وقت شاكرين الله.
8 انتبهوا أي واحد يزيد عليكم بكلام فارغ وتعاليم مش صحيحة من تقاليد الناس، ومن سلطة العالم وما يتفقش مع تعاليم المسيح. 9 لأنه بالمسيح الله موجود بكُل ألوهيته بجسد بشري. 10 وأنتم حصلتم الحياة كاملة بإتبعاكم المسيح. اللي هو فوق كُل قوة وسلطان. 11 ومادام أنتم تتبعوا المسيح فقدكم مختونين، وابتعدت منكم الطبيعة الجسدية، فهذا هو الختان اللي يعمله المسيح مش الناس. 12 فأنتم بالتعميد قُبرتم مع المسيح ورجعتم قمتم معه، لاِنكم مؤمنين بقدرة الله اللي أقامه من بين الأموات.
13 فأنتم كُنتم من أول ميتين بذنوبكم، وما كنتمش قدكم طاهرين بعد، بس أحياكم كُلكم مع المسيح. وغفر لنا كُل الذنوب، 14 وألغي كُل الفرائض اللي كانت مكتوبة علينا بكُل المطالب اللي كانت مش لصالحنا، فابعده نهائياً بأن سمره على الصليب. 15 وبالصليب المسيح غلب الحكام والقادة اللي هُم في عالم الأرواح، و ابعد عليهم السلاح وساقهم ذليليين بموكبه المنتصر عليهم. 16 ولا تخلوا أي واحد يتحكم فيبكم بأي حاجة متعلقة با اللي تأكلوه أو تشربوه، أو أي حاجة من عيد أو احتفال برأس الشهر أو يوم السبت. 17 هذه كُله كانت ظل للي شيجي، فالمسيح هو الأصل. 18 ما تسمحوش لأي واحد يحرمكم جائزتكم، برغبته بالتذلل وعبادة الملائكة. يتكلم عن رُوى شافها، وإنما هو ينتفخ بغباء بأفكاره الجسدية، 19 وما يتمسكش بالمسيح اللي هو الراس واللي فيبه يتماسك كُل الجسم مع المفاصل والأعصاب ويتغذي وينموا مثلما يشتي الله.
20 أنتم مُتم مع المسيح، فأصبحتم محررين من قوات هذا العالم. وليش تعيشوا مثلما لأنتم تتبعوا هذا العالم؟ ليش تخضعوا لفرائض مثل هذه: 21 "لا تمسكش بهذا، لا تذوقش هذك، لا تلمسش هذك" 22 هذه كُله اشياء شتنتهي بالاِستخدام، وكُلها قوانين وتعاليم صلحوها الناس. 23 وكأنه وصايا حكيمة بمن فيها من نظام عبادة وتواضع كاذب، وتعذيب للجسم، وكُلها ما تنفعش نهائياً بضبط شهوات الطبيعة الجسدية.