31
وبيوم من الأيام ، راح بُطرس ويوحنا للمعبد اليهودي يصلوا الساعة ثلاث العصر .
2
وقُدام باب المعبد اللي يسمى باب الجميل ، في كان رجّال جالس من يوم ما ولد وهو أعرج ، يتحملوه الناس كل يوم ويطرحوه عند الباب عشان يطلب صدقة من اللي يدخلوا الهيكل.
3
ولما شاف بُطرس ويوحنا يدخلوا المعبد ، طلب منهم صدقة .
4
فا شافوا لعنده نظرة طويلة ، وقله بطرس: "شوف لعندنا"
5
فشاف لعندهم ، وهو متوقع يتصدقوا علوه .
6
وقله بطرس: "ما فيش معي فضة ولا ذهب ، بس شاجيب لك اللي عندي : باسم يسوع المسيح الناصري قُم وامشي!"
7
ومسكه بيده اليمين وأقامه ، وبنفس الوقت تقوت أرجله وكعبه ،
8
وقفز ووقف وبدأ يمشي ، ودخل معاهم للهيكل ، وهو يمشي ويتقفز فرحان ويسبح الله.
9
وشافوه كُل الناس الموجودين وهو يمشي ويسبح الله .
10
وعرفوه إنو الشحات الأعرج اللي كان يجلس قُدام باب الجميل ، واستغربوا كثير وانذهلوا من اللي حصل .
11
ولما كان الرجّال يلازم بُطرس ويوحنا بالهيكل بقاعة سليمان ، جري لعندهم ناس كثير واتجمعوا عندهم مستغربين .
12
ولما شاف بطرس هذا قلهم: "يا بني إسرائيل ، ليش تستغربوا من اللي حصل ، وليش تشوفوا لعندنا كأنه إحنا بقدرتنا أو إيماننا خلينا هذا الرجال يمشي؟
13
إنما رب إبراهيم وإسحاق ويعقوب ، رب آبائنا ، مجد ابنه يسوع ، اللي سلمتوه للقتل وانكرتموه قُدام بيلاطس ، اللي كان أراد يخرجه .
14
أنكرتم القدوس البار ، وطلبتم مسامحة رجال قاتل ،
15
وقتلتم واهب الحياة . بس الله قامه من الموت ، وإحنا شهود على ذلك .
16
وهذا الرجّال اللي تشوفونه وتعرفونه ، اتقوي بالإيمان بِاسم يسوع . فالإيمان بيسوع هو اللي شفي الرجّال تماماً مثلما تشوفوه كُلكم .
17
وانا داري يا إخواني ، أنكم أنتم ورؤساءكم عملتم هذا بجهل ،
18
والله بهذا تمم اللي قد كان أوحى فيبه لجميع الأنبياء إنو المسيح شيتألم .
19
فتوبوا وارجعوا عشان الله يسامح ذنوبكم،
20
وتجيكم أيام الفرج من عند الله ، بيرسل لكم يسوع المسيح مرة ثانية ، اللي سبق أختاره لكم ،
21
والمسيح لازم يبقي بالسماء لما يجي الوقت اللي يتم فيبه إصلاح كُل شيء مثلما أوحى الله لإنبيائه الصالحين من زمان .
22
وقد قال موسى: شيبعث الله لكم من بين إخوانكم نبي مثلي ، فا سمعوا للي شيقلكم .
23
واللي ما يسمعش له يُهلك من بين الناس .
24
وكمان تنبأ على هذي الأيام كل الأنبياء من صموئيل وكُل اللي أجاء برسالة بعده .
25
وانتم أولاد الأنبياء وأولاد العهد اللي عمله الله مع لآبائنا لما قال لإبراهيم: بذريتك شتحصل البركة كُل شعوب الأرض .
26
وعشانكم أولاً أقام الله ابنه يسوع ورسله علشان يبارككم بإنو يرجع كل واحد منكم من عمله الشرير."