7 وتابعنا السفر بالبحر من صور إلى بتولمايس ، وسلمنا على الإخوة اللي هناك وجلسنا معهم يوم واحد . 8 ويوم الثاني رحنا لمدينة قيصرية ونزلنا ضيوف ببيت المبشر فيلبُس ، وهو واحد من السبعة ، 9 ومعه أربع بنات عذارى عندهن موهبة النبؤة.
10 وجلسنا عنده أيام . ولما كنا عنده جاء لعندنا من منطقة يهوذا نبي اسمه أغابوس . 11 فأخذ حزام بولس ، وقيد به يداته وأرجله وقال: "الروح القدس يقول إنو صاحب هذا الحزام شيقيدوه اليهود هكذا بالقدس ، ويسلموه لعند الأمم." 12 ولما سمعنا هذا الكلام ، كُلنا والناس الموجودين قمنا نترجي بولس ما يروحش القدس ، 13 وقلهم بولس: "ليش تبكوا وتكسروا قلبي؟ أنا مستعد أموت عشان اسم الرب يسوع." 14 ولما ما قدرناش نقنعه رجعنا سكتنا ، وقلنا له: "مشيئة ربنا معاك."
15 وبعد فترة اتجهزنا للسفر ورحنا القدس . 16 وكان معنا تلاميذ من قيصرية ، واخذونا لبيت مناسون القبرصي ، وهو تلميذ قديم ، وجلسنا عنده ضيوف . 17 ولما وصلنا القدس ، رحبوا بنا الإخوة بفرح . 18 واليوم الثاني مشينا مع بولس وجلسنا عند يعقوب ، وكُل الشيوخ كانوا جالسين عنده . 19 وسلم بولس عليهم ، وجلس يكلمهم باللي عمله الله بين الشعوب الثانية عن طريق خدمته .
20 ولما سمعوا كلامه سبحوا الله ، وقالوا له: "أنت تشوف يا أخ اللي آمنوا بالرب من اليهود بالآلآف ، وهم متعصبين للشريعة . 21 وقد سمعوا اِنك تدعو اليهود اللي يعيشوا عند الشعوب الثانية أنهم يخالفوا موسى ، وتقلهم ما يختنوش أولادهم وما يتبعوش عاداتنا المتوارثة ، 22 أكيد أنهم شيسمعوا أنك جئت الى هنا، إيش نعمل ؟ 23 اعمل باللي نقول لك فيه : عندنا أربعة رجال عليهم نذر ، 24 امشي معاهم للهيكل وتطهر معاهم ، وادفع قيمة حلق رؤوسهم ، والجميع بيعرف اللي سمعوه عليك مش صحيح ، لإنك تعمل نفسهم بالشريعة . 25 وأما المؤمنين اللي هم مش يهود، قد رسلنا لهم رسالة نوصيهم فيها بإنو ما يأكلوش من الذبائح المقدمة للأصنام والدم ، وما يأكلوش لحم الحيوانات المخنوقة ، وما يزنوش." 26 واليوم الثاني راح بولس مع الرجال وتطهر معاهم وبعدين دخل الهيكل عشان يسجل التاريخ اللي ينتهي فيه أسبوع التطهير ، ووقت تقديم القربان على كُلهم . 27 ولما قد السبع الأيام بيخلصين ، شافوا اليهود من بلاد آسيا بولس في الهيكل ، فحرضوا الناس كلهم، ومسكوه . 28 وهم يصيحوا: " ساعدونا يا بني إسرائيل! هوذا الرجّال اللي يعلم الجميع بكل مكان ضد الشعب والشريعة وبهذا المكان ، ودخل اليونانيين للهيكل ونجس هذا المكان المقدس." 29 لإنهم كانوا شافوا تروفيمس الأفسسي مع بولس بالمدينة ، وظنوا أنه دخله معه للهيكل .
30 فهاجت المدينة كلها ، وهجم الناس على بولس ، وسحبوه لخارج الهيكل ، وغلقوا الأبواب نفس الوقت . 31 ولما كانوا يحاولوا أنهم يقتلوه سمع قائد الكتيبة الرومانية بإنو الفوضى ملأت القدس كلها. 32 وبنفس الوقت اخذ معه عسكر وضباط وجاء مسرع لعنده . ولما شافوا اليهود قائد الكتيبة وقفوا من ضرب بولس . 33 فاقترب القائد ومسكه ، وأمر عساكره بإنهم يقيدوه بسلسلتين ، وبدأ يسأل : " منو هذا ، وإيش عِمل؟" 34 فصاحوا بعضهم بشيء ،وغيرهم بشيء ثاني. فما قدرش القائد إنو يعرف الصدق بسبب هيجان الناس ، فأمر بإنو ياخذوا بولس للمعسكر . 35 ولما وصلوه العسكر للسُلم اضطروا أنهم يتحملوه عشان يتخلصوا من عنف الناس . 36 لإنو الناس كانوا يتبعونه ويصيحوا: "اِعدموه."
37 ولما العساكركانوا يدخلوا بولس للمعسكر ، قال للقائد باللغة اليونانية: "هل أقدر أكلمك بشيء؟" فقله القائد: "هل تتكلم اليونانية؟ 38 مش أنت المصري اللي عِمل الفوضى في المدينة، وقاد أربعة ألف من القتلة خرج بهم للصحراء من فترة ؟" 39 فقله بولس: "أنا يهودي من طرسوس ، المدينة المشهورة في كيليكية . لوسمحت خلينا أكلم الناس." 40 فسمح له القائد ، ووقف بولس على السُلم ، وأشر بيده للناس . ولما سكتوا ، كلمهم باللغة العبرية ، وقلهم: