20 1 وبعدما انتهت المشاكل، دعي بُولس للتلاميذ وشجعهم، وودعهم وسافرلمقدونية. 2 وبدأ يتنقل بآذيك المنطقة كُلِه، وكان يوعظ التلاميذ وشجعهم بكلام كثير، وبعدين وصل لليونان. 3 وجلس فيبه ثلاثه شهور، ولما كان بولس يُجهيز نفسُه شُسافر عن طريق البحر لسوريا، عرف إنو اليهود يتأمروا شقتلونوه، قرر إنو يرجع من طريق مقدونيا. 4 ورافقُنوا بالسفر سُوباترُس بن بِرُّس من مدينة بيرية؛ وأرِستَرخُسُ وسكُونُدُسُ من اهل تسالونيكي؛ وغايوس وتيموثاوس من مدينة دربة، وتيخِيكُسُ وتُرُوفِيمُسُ من ولاية آسيا. 5 آذوم سبقونا وانتظرونا بمدينة ترواس. 6 أما نحنا سافرنا بحر من فيلبي، بعد عيد الفطير اليهودي، ووصلنا لمدينة ترواس بعد خمس ايام وتبعناهم، وجلسنا هِناك سبع ايام. 7 وبداية الأسبوع يوم الأحد أجتمعنا كُلنا عشان نأكل الخبز، وبدأ بولس يخطُب بالناس، وجلس يتكلم ويوعظهم لُنص الليل، لإنوه كان ناوي يسافر اليوم الثاني. 8 وكنَّا مجتمعين بغرفة بالدور الاعلي، وسرجات كثير والع. 9 وكان في شاب إسموه أفتِيخُوسُ جالس بالشُباك، كان يُنعيس وغلبوه النوم، وبولس يتكلم كلام كثير، ففلت من الدور الثالث للأرض ومات. 10 نزل بُولُس، ورجم بنفسُه لفوقه وحِضِنوه وقلهم: "لا تخافوش! عاده حيّ!" 11 بعدين طلع بولس وقسم الخبزوأكل، وواصل كلامه معهم لما طلع الفجر، بعد كِذا سافر. 12 وأخذوا الشاب لبيتُه حيّ، وفرحوا كثير. 13 أما نحنا ركبنا بالسفينة وسِبقنا بولُس ومشينا بحر لمدينة أسوس، وجلسنا ننتظر لُه هِناك، لإنو هو رتب كل شيء ومشي رجل لأسوس. 14 ولما وصل لمدينة أسوس، أخذنوه معنا بالسفينة ومشينا لميناء مِيتِيليِنِي. 15 واليوم الثاني مشينا بالسفينة من هِناك، ووصلنا لمقابل جزيرة خيوس. وباليوم الثالث مشينا قريب من جزيرة سَامُوس، واليوم الرابع وصلنا لمِيلِيتُسَ، 16 وكان بُولُس مُقرِّر إنو ما يتوقفش بأفسُس، عشان ما يتأخرش بأسيا، وكان يشتي يوصل بسرعة لمدينة القُدس إذا قدر قبل يوم الخمسين.

17 ومن مِيلِيتُس رسل بُولُس لشيوخ الكنيسة بأفسس يجيئوا لعندوه. 18 لما وصلوا لعندوه قلهم:

"أنتم تعرفوا كيف كنتُو أتعامل معكم طول الفترة اللي جلستِه بينكم، من أول يوم أجيتوا فيبِه لآسيا،

19 وخدمتو الرب بكل تواضع، ودموع كثير، رغم المشاكل اللي حصلت لي بسبب مُؤامرات اليهود. 20 وما قصرتو معكم بشيء ينفعكم، وكنتو أوعظكم واعلمكم ظاهر ومن بيت لبيت. 21 وكنتو أدعي اليهود واليونانيين إنو يتوبوا لله ويؤمنوا بربنا يسوع المسيح. 22 وذلحين أنا رايح للقُدس، بأمر من الروح القُدس، ومعرفش ايش اللي بيحصل لي هِناك. 23 لكن الروح القدس كان يقول لي بكل مدينة أروح لِه إنوه السجن والمصائب تتنظر ليَّ. 24 لكن حياتي ما تهِمناش، المهم إنوه أوصل لهدفي وأكمل العمل اللي كلفنا فيبُه الرب يسوع المسيح، إنو أتكلم ببشارة نعمة الله. 25 أنا عارف إنكم معا شتشُفوش وجهي مرة ثاني، أنتم كُلكم اللي جلست بينكم وبشرتكم بمملكة الله. 26 عشان كِذا أقولكم اليوم إننا بريء من دم أي واحد منكم. 27 لإنو أنا ما تردتوش وبلغتُكم بكل مشيئة الله.

28 إنتبهوا لانفسكُم وللرعية اللي خليكم الروح القدس مشرفين عليهم، عشان تنتبهوا لكنيسة الله اللي اشتري بدمه. 29 أنا عارف إنوه بعد ما اسافر، شِدخُلوا بينكم ذئاب شرسين ماعندهم رحمة بالرعية. 30 وشظهُروا ناس حتى من بينكم انتم، ويتكلموا بأشياء غيرصحيحة عشان التلاميذ يتبعُونهم. 31 عشان كِذا إنتبهوا! وإتذكروا إننا لمدة ثلاث سنوات ما توقفتوش ليل ونهار، وانا أنصح كل واحد منكم وانا أبكي. 32 لكن ذلحين شستودعكم برعاية الله وكلمة نعمتُه، هي اللي تقدر إنوه تبنيكم وتعطيكُم نصيب مع كل المُقدسين لله. 33 ما تمنيتُوش يوم فضة أحد منكم ولا ذهبُه ولا ثيابُه. 34 وانتم تعرفوا إننا أشتغلتوا بيداتي آذين عشان أسدد كل حاجاتي وحاجات اللي معي. 35 وعلمتُولكم بكل شيء، كيف إنو لازم نتعب ونعمل ونساعد المحتاجين، ونتذكر كلام الرب يسوع إنو قال: البركة لما تعطي أكثر من لما تأخذ. 36 بعدما قال بولس هذا الكلام ركع معهم كُلهم وصلي. 37 وبكوا كُلهم وحضنوا بولس وباسونُّوه. 38 وزعلوا علوه كثير، خاصةً لما قلهم إنهم معا شِشوفوش وجهه مرة ثاني، ومشوا معوه للسفينة وودعونُه.