8 وبدأ بولس يُداوم ويروح للمجمع لمدة ثلاثة شهور، وكان يتكلم بكل شجاعة على مملكة الله ويُناقش الناس ويُحاول يقنعهم بملكوت الله. 9 لكن بعضهم عاندوا ومارضوش يؤمنوا، وبدأوا يشتموا هذا الطريق قُدام الناس، فابتعد بولس منهم، وجلس مع التلاميذ وحدهم، وكان كل يوم يناقشهم بمدرسة واحد إسموه تيرانوس. 10 وجلس مُداوم سنتين، وبكذا وصلت كلمة الرب لكل اللي ساكنين بآسيا، يهود ويونانيين. 11 وعمل الله مُعجزات غير عادية على يد بولس. 12 كانوا الناس يأخذوا للأمراض مناديل ولا ملابس لِمست بجسم بولس، فكان يروح منهم المرض وتخرج منهم الشياطين.
13 وكان في هنِاك بعض اليهود اللي يتجولوا ويُخرجوا الجن،فحاولوا إنو يستغلوا إسم الرب يسوع المسيح وكانوا يقولوا: "إخرُج بإسم يسوع المسيح اللي يُبشِّر فيبُه بولس" 14 كان من بين هاذوم اللي يفعلوا كِذا، سبعة أولاد لواحد شيخ يهودي إسموه سكاوا، 15 جاوبهم الجني: "يسوع المسيح أنا اعرفوه، وبولس أعرفوه، لكن مين أنتم ؟" 16 وقفز الرجّال اللي فيبُه جني لفوقهم وضربهم كلهم، وهربوا وهم عرايا وفيبهم جُروح من البيت اللي كانوا داخله. 17 وانتشر هذا الخبر بين اليهود واليونايين اللي ساكنين بأفسس، وخافوا كُلهم، وأتعظم إسم الرب يسوع المسيح بين الناس. 18 وكثير من اللي أمنوا أجاءوا يعترفوا ويتكلموا باللي كانوا يعملونُه. 19 وبدأوا كثير من اللي كانوا يشتغلوا بالسحر يجمعوا كتبهم وحرقونيه قُدام الناس، وحسبوا قيمتها طلعت خمسين ألف من الفضة. 20 بآذي الطريقة كانت كلمة الرب تنتشربسرعة وتتقوي .
21 بعد ما حصلت آذي الأموركُلِّه، قرر بولس إنو يسافر للقدس، ومشي من طريق منطقة مقدونية وأخائية، وقال: "بعدما أوصل لهِناك لازم إنو أزور روما." 22 وأرسل لمقدونية إثنين من اللي كانوا يعاونونه: تيموثاوس وأرسطوس، أما هو جِلس فترة بآسيا. 23 وبآذاك الوقت وقعت مشاكل كبيرة بأفسُس، بسبب طريق يسوع المسيح، 24 كان في واحد إسموه ديمتريوس يشتغل صائغ، وكان يصنع تماثيل صغيرة من الفضة لمعبد الآلهة أرطاميس، فيجيب له هذا الشغل هو وعُمالُه رِبح كبير. 25 فجمع عُمالُوه وناس ثانين يشتغلوا بآذي المهنة، وقلهم: "يا رجال، أنتم عارفين إنو نكسب من هذا الشغل شيء كثير" 26 وانتم تشوفوا وتسمعوا كيف بولس هذا أضل ناس كثير هنا بأفسس، وبآسيا كله تقريباً، وأقنعهم إنو الآلهة اللي يصنعونيه الناس ماهيش آلهة. 27 وهذا خطر علينا، نخاف إنو مهنتنا تضيع سُمعتِه، وتضيع هيبة معبد أرطاميس والآلهة نفسِه تضيع عظمتِه، وهي اللي يعبدونيه الناس بآسيا والعالم كله.
28 لما سمعوا العمال هذا الكلام زِعلوا كثير، وبدأوا يصيحوا: "المجد لأرطاميس آلهة أهل أفسُس!" 29 وبساعتُه بدأت المشاكل بالمدينة كُلِه، وهجموا ناس كثيرعلى غايوس وأرستخرخُس المقدونيين ومسكوهم، وهم كانوا مرافقين لبولس بالسفر، وسحبونهم لساحة الملعب.
30 كان بولس يشتي يواجه الناس، لكن التلاميذ منعونوه. 31 حِتى أصحابه المسؤولين بآسيا رسلو لُه رسالة يترجونُه إنوه ما يُخاطرش بنفسُه ويروح الملعب، 32 لإنوه الناس كانوا بحالة فوضى، بعضهم كانوا يصيحوا بشيء وبعضهم بشيء ثاني، وأكثر الناس مايعرفوش ليش تجمعوا! 33 وكان في بينهم يهودي إسموه إسكندر، قدّمُنوه اليهود قُدامهم، عشان يتكلم. فأشر بيده إنو يشتي يتكلَّم مع الناس. 34 لما عرفوا الناس المتجمعين إنوه يهودي، صاحوا كلهم بصوت واحد: "المجد لأرطاميس آلهة أهل أفسُس!" وجلسوا يُرددوا هذا ساعتين تقريباً.
35 آخر شيء وقف حاكم المدينة وقدر إنو يُهدي الناس، وقلهم: "يا اهل أفسس ، العالم كُلُه يعرفوا إنو مدينة أفسس هي اللي تحرس معبد أرطاميس العظيم والتمثال اللي نزل من السماء! 36 هذا الشيء معروف وما فيش علوه أي خلاف، إهداؤا وبطلوا تتصرفوا تصرف طائش. 37 أنتم جِبتُم آذوم الإثنين الرجال لهِنا، وهم ما سرقوش المعبد ولا شتموا آلهتكم. 38 فإذا كان لديمتريوس واصحابه اللي يشتغلوا مِثلُه شكوى بأحد، عندنا محاكم وقُضاة، يروحوا يشتكوا لهم. 39 وان كان لكم شكوى ثاني، شيكون النقاش فيبِه بالإجتماع العام لأهل المدينة. 40 أما بآذي الطريقة، إحنا بخطر وشنتحاكم بتهمة إنو عملنا فتنة، بسبب اللي حصل اليوم، ومافيش معنا حُجة نقدمه على هذا التجمُع!" 41 بعد ما قال هذا الكلام الناس أتفرقوا.