18 ¹ بعد هذا، بولس سافر من مدينة أثينا وراح مدينة كورنثوس. ² وألتقي هناك مع واحد يهودي اسمه أكيلا وهومن بلاد بنطس. وكان عاده جاء قريب مع زوجته بريسكلا من إيطاليا ، لإنو القيصر كلوديس أمر بطرد اليهود من روما، فراح بولس لعندهم. ³ وبعدين جلس عندهم واشتغل معاهم، لإنو مهنته كانت مثل المهنة حقهم وهي صناعة الخيام.

⁴ وكان كل يوم سبت يتناقش مع الناس ببيت العبادة ويحاول إنو يقنع اليهود واليونانيين.

⁵ ولما سيلا وتيموثاوس وصلوا من مقدونية، بولس أتفرغ تماماً عشان يبشر بالمسيح. فكان يشهد لليهود بإنو يسوع هو المسيح. ⁶ بس هم عارضموه وجلسوا يسبونه، فنفض الثوب حقه وقلهم: "إذا هلكتم أنتم تتحملوا المسؤولية! أنا بريء منكم. من ذلحين انا شاروح لعند الناس اللي هم مش يهود." ⁷ فانتقل من هناك ونزل عند واحد اسمه تيطس يوستس، كان البيت حقه ملاصق لمجمع العبادة. ⁸ فآمن كريسبس رئيس المجمع بالمسيح هو وكل عائلته. وسمعوا كثير من أهل كورنثوس كلام بولس، فآمنوا واتعمدوا بالماء.

⁹ وليلة من الليالي، شاف بولس يسوع المسيح بالرؤيان فقله: "لا تخفش، أتكلم وما تسكتش، ¹⁰ أنا معك ومشقدرش ولا واحد يؤذيك، لإنو معي شعب كثير بهذي المدينة." ¹¹ فجلس بولس في مدينة كورنثوس سنة وستة أشهر يعلمهم كلمة الله.

¹² ولما كان غاليون حاكم على بلاد أخائية، اليهود اتجمعوا على بولس برآي واحد، وجابوه للمحكمة، ¹³ وأشتكوا علوه وقالوا: "هذا الرجال يشتي يقنع الناس إنوهم يعبدوا الله بطريقه ما تتناسبش مع الشريعه حقنا." ¹⁴ ولما كان بولس قاهو على وشك إنو يتكلم، قال غاليون لليهود: "ايها اليهود، لو كانت الشكوى حقكم هي على فعل مخالفه ولا جريمة كان من المعقول أننا أستمع لكم. ¹⁵ لكن مادام المُشكلة هي كلام على أسماء وعلى العقيدة حقكم، لازم تنهوا الموضوع بينتكم البين، أنا ما أشتيش إنو أكون قاضي بهذا الحاجات." ¹⁶ وطردهم من المحكمة. ¹⁷ فشلوا سوستانيس رئيس المجمع وضربوه قدام المحكمة، بس غاليون ما أهتمش ولا بحاجة. ¹⁸ وبقي بولس بكورنثوس لفترة طويلة، وبعدين ودع الإخوة وسافر بالبحر بإتجاه سوريه ومعه بريسكلا وأكيلا، بعدما حلق شعر رأسه بمدينة كنخريا، لإنو كان علوه نذر. ¹⁹ ولما وصلوا لعند أفسس فلتهم بولس هناك، وراح مجمع اليهود واتناقش مع اليهود. ²⁰ فطلبوا منوه إنوه يجلس عندهم فترة طويلة، فما قبلش. ²¹ بس قلهم وهو يودعهم: "شارجع لكم إن شاء الله." وبعدين سافر بالبحر من أفسس، ²² ونزل بميناء قيصرية فطلع وسلم على الكنيسة، وبعدين نزل لمدينة أنطاكية، ²³ فجلس فيبها بعض الوقت. وبعدين خرج ومشي في بلاد منطقة غلاطية ومنطقة فريجية، وكان يقوي عزيمة كل التلاميذ.

²⁴ وأجاء لأفسس يهودي اسمه أبلوس، ولد بالإسكندرية، وهو متكلم فصيح ويعرف كتاب الله. ²⁵ وكان قا تعلم طريق الله، ويتكلم بحماس قوي، ويُعلم الناس تعليم صحيح عن يسوع المسيح. ومع إنو ما كانش يعرف إلا المعمودية بالماء حق يوحنا. ²⁶ فجلس يتكلم بالمجمع بكل جراءة. فسمعوه أكيلا وبريسكلا، فشلوموه معهم ووضحوا له طريق الله بشكل دقيق. ²⁷ وقرر أبلوس إنو يسافر لبلاد أخائية فشجعموه الاخوة وكتبوا للتلاميذ هناك إنوهم يرحبوا فيبه. ولما وصل لهناك ساعد الكثيراللي آمنوا بفضل نعمة الله. ²⁸ لإنو كان بكلامه مع اليهود يهزمهم قدام الجمهور، ويبين لهم من الكتاب إنو يسوع هو المسيح.