17 ¹ بولس وسيلا وصلوا مدينة تسالونيكي بعدما جزعوا بأمفيبوليس وأبولونية. وكان في تسالونيكي المجمع حق اليهود. ² فمشي بولس مثلما يسوي كل مرة، وجلس يتناقش معاهم لثلاثة سبوت من كتاب الله، ³ ويشرح لهم ويثبت إنو كان لازم المسيح يتألم وبعدين يقوم من الموت، وقال: "يسوع هذا اللي أبشركم علوه هو المسيح." ⁴ فبعض اليهود اقتنعوا ورجعوا مع بولس وسيلا، وكمان عدد كبير من اليونانيين اللي يعبدوا الله، وكثير من النسوان أصحابات الشأن. ⁵ فأمتلأوا اليهود حسد، وجمعوا بعض الأشرار من أولاد الشارع وشكلوا عصابة وبدأوا يعملوا مشاكل بالمدينة. فهجموا على بيت ياسون وفتشوا على بولس وسيلا عشان يخرجوهم لعند الناس الشعب. ⁶ فما حصلوهمش هناك، جروا ياسون وبعض من الأخوة وأخذوهم لعند حكام المدينة وهم يصيحوا: "هاذم اللي عملوا الفتنة بكل مكان أجاءوا لهنا، ⁷ وياسون ضيفهم ببيته. وهم كلهم يخالفوا الأوامر حق قيصر ويقولوا إنو في ملك ثاني اسمه يسوع." ⁸ فالناس المتجمعين والحكام أتضايقوا لما سمعوا بيهذا. ⁹ وشلوا كفاله من ياسون والناس الثانيين، وبعدين فكوا لهم. ¹⁰ وبالليل مشوا الإخوة بولس وسيلا نفس اللحظة إلى مدينة بيرية. ولما وصلوا لهناك، راحوا لعند مجمع اليهود. ¹¹ وأهل يهود بيرية كانوا أشرف من يهود تسالونكي، فقبلوا كلام الله بحماس قوي وكانوا يدرسوا الكتاب كل يوم عشان يتأكدوا إنوه التعليم صحيح. ¹² وكثير من اليهود آمنوا وكمان نسوان كثير يونانيات أصحابات الشأن ورجال كثير يونانيين.

¹³ فعرفوا اليهود اللي هم بتسالونيكي إنو بولس يبشر بكلمة الله في بيرية، فراحوا هناك عشان يحرضوا علوه فيثيروا الشعب. ¹⁴ فالإخوة أسرعوا وأرسلوا بولس لساحل البحر. وبقي سيلا وتيموثاوس في بيرية، ¹⁵ والرجال اللي مشوا مع بولس، وصلوه لعند أثينا وبعدين رجعوا ومعاهم وصية من بولس عشان يلحقوه سيلا وتيموثاوس بأسرع وقت ممكن. ¹⁶ ولما كان بولس ينتظرهم بأثينا، أتضايق زيادة لما شاف المدينة مليانة بالأصنام. ¹⁷ فجلس يتناقش بالمجمع اليهودي مع اليهود وغيرهم من الناس اللي يتعبدوا بالمجمع، واللي يحصلهم كل يوم بسوق المدينة. ¹⁸ فحصل خلاف بينه وبين جماعة من الفلاسفة الأبيقوريين والرواقيين. فمنهم قالوا: "أيش يشتي يقول هذا كثير الهدرة؟" وقالوا بعضهم: "شكله يتكلم عن آلهة غريبة."هم قالوا هذا لإنو بولس كان يبشر بيسوع المسيح والقيامة من الموت. ¹⁹ فشلوه وراحوا به لعند مجلس أريوباغوس وقالوا له: "نشتي نعرف أيش هذا المذهب الجديد اللي تتكلم علوه. ²⁰ انت جالس تتكلم على مسامعنا بأفكار غريبة، فإحنا نشتي نعرف المعنى حقها." ²¹ وكان أهل أثينا، والأجانب اللي هم مُقيمين هناك، يجزعوا وقتهم بالتكلم على الافكار الجديدة والأستماع لها.

²² فوقف بولس بمجلس أريوباغوس وقال: "يا أهل أثينا، انا اشوف أنكم متدينين بكل حاجة. ²³ لاننا كنتو أتمشي بالمدينة حقكم وأشوف للمعابد حقكم حصلتو معبد مكتوب علوه: لعبادة الإله المجهول. فهذا الإله اللي تعبدونه وأنتم ما تعرفوش، أنا ذلحين أبشركم فيبه. ²⁴ هو الله خالق الكون وكل اللي فيه، هو رب السماء والأرض، وما يسكنش بمعابد يبنوها الناس. ²⁵ فهو ما يحتاجش لخدمة الناس لإنو ما يحتاجش لأي حاجه. هو نفسه يجيب لكل الناس الحياة والنفس وكل حاجه. ²⁶ وقاخلق كل شعوب البشر من رجال واحد، عشان يسكنوا كل الأرض، وحدد لهم الآوقات والأماكن اللي يعيشوا فيبها. ²⁷ عشان يبحثوا عن الله لعلى يتقربوا لعنده فيهتدوا له! فهو مش بعيد على اي واحد مننا، ²⁸ لإنو بُه نحيا ونتحرك ونوجُد. ومثلما قال واحد من الشعراء حقكم: إحنا كمان من ذريته! ²⁹ وطالما إحنا من ذريه الله، لازم إنو ما نشوف للألوهية مثل صنم يصلحه الإنسان بفنه ومهارته من ذهب او فضة او حجر. ³⁰ الله بالماضي أتجاهل هذا الجهل، أما ذلحين هو يأمركل الناس بكل مكان إنوهم يتوبوا. ³¹ لإنو حدد يوم يحاسب العالم بالعدل عن طريق الرجال اللي ختاره. وأثبت لجميع الناس على إنو اختاره بأنه أقامه من الموت".

³² فلما سمعوا عن القيامة من الموت، جلسوا بعضهم يتمسخروا، وبعضهم قالوا: "نشتي نسمعك مرة ثانية تتكلم على هذا الموضوع." ³³ وبعدين خرج بولس من المجلس.

³⁴ بس بعض الرجال رجعوا معه وآمنوا، ومنهم ديونيسيوس وهو عضو في مجلس أريوس باغوس، ومرة اسمها داماريس، وناس ثانيين غيرهم.